म. टा. विशेष प्रतिनिधी, औरंगाबाद

शहरातील रस्त्यांची दुरवस्था आणि दुरुस्तीसंदर्भात दाखल जनहित याचिकेत मुंबई उच्च न्यायालयाच्या औरंगाबाद खंडपीठाचे न्यायमूर्ती प्रसन्न वराळे आणि न्यायमूर्ती आर. जी. अवचट यांच्यासमोर सुनावणी झाली असता प्रतिवादी राष्ट्रीय महामार्ग प्राधिकरण आणि रेल्वे विभागाने उत्तर दाखल करण्यासाठी वेळ मागून घेतला. या प्रकरणात २६ ऑगष्ट रोजी सुनावणी होईल.

औरंगाबाद खंडपीठातील वकील रूपेश जैस्वाल यांनी २०१२मध्ये शहरातील रस्त्यांची दुरवस्था आणि दुरुस्तीसंदर्भात जनहित याचिका केली आहे. या प्रकरणात मागील सुनावणीदरम्यान शिवाजीनगर येथील भुयारी मार्गही निर्धारीत वेळत पूर्ण झाला नसल्याचे खंडपीठाच्या निदर्शनास आणून देण्यात आले होते. एक फेब्रुवारी रोजी सरकारी वकिलांनी कामाच्या प्रगतीपत्रकाचे टप्पे सादर केले होते. मात्र, भुयारी मार्गाचे काम पुढे सरकलेच नसल्याची माहिती देण्यात आली. गोलवाडी रेल्वे उड्डाणपुलाच्या १९ कोटी ६८ लाखांचे कार्यादेश (वर्क ऑर्डर) देण्यात आले असून एका वर्षात उड्डाणपुल पूर्ण करण्यात येईल, अशी माहिती रेल्वेच्या वकिलांनी दिली होती. या प्रकरणात बुधवारी सुनावणीदरम्यान प्रतिवादींतर्फे उत्तर दाखल करण्यासाठी वेळ मागून घेण्यात आला.

म. टा. प्रतिनिधी, औरंगाबाद

भारतीय सैन्यदलातील सैनिकास मिळालेल्या जमिनीची परस्पर विल्हेवाट लावण्यात आल्यामुळे माजी सैनिकाच्या पाल्याला भूमी अभिलेख आणि महसूल विभागाच्या खेट्या माराव्या लागत आहेत. ही जमीन मिळविण्यासाठी माजी सैनिकाने प्रयत्न केले. मात्र, त्यांच्या अकाली मृत्यू झाला, न्याय मिळवण्यासाठी आता पाल्य सतीश आदमाने यांनी १० ऑगस्टपासून विभागीय आयुक्त कार्यालयावर उपोषण करण्याचा इशारा दिला असल्याचे पत्रकार परिषदेत सांगितले.

यावेळी सतीश आदमाने म्हणाले की, काशिनाथ सीताराम आदमाने यांनी भारतीय सैन्यदलात २२ वर्षे सेवा केली होती, सेवेत असताना त्यांनी भारत-पाकिस्थात युद्धामध्ये योगदान दिले होते. त्यांना शासनाने सिल्लोड तालुक्यातील मौजे अंभई शिवरातील सर्व्हे क्रमांक १६० मधील पाच एकर गायरान जमीन दिली होती. कालांतराने भूमी अभिलेख विभागाने एकत्रिकरण योजना लागू केली. त्यानुसार सर्व्हे क्रमांक १६० चे रुपांतर गट क्रमांक १०७ असे करण्यात आले. मात्र, सदर जमिनीचा गट नंबर १०७ फेरफार करताना अदमाने यांच्या नावाची नोंद मालकी हक्कात घेण्यात आली नाही. हा प्रकार लक्षात आल्यानंतर आम्ही महसूल व भूमीअभिलेख कार्यालयाकडे वारंवार धाव घेतली. मात्र, त्याचा काही उपयोग झाला नाही. जमीन मिळेल याचे स्वप्न पाहत असतानाच काशिनाथ आदमाने यांचा मृत्यू झाला असल्याचे सतीश आदमाने यांनी सांगितले. अनेक वर्षांपासून आम्ही अंभईचे तलाठी, मंडळ अधिकारी, भूमी अभिलेखचे अधिकारी, सिल्लोड तहसीलदार, उपसंचालक भूमी अभिलेख कार्यालय तसेच लोकशाही दिन, विभागीय लोकशाही दिनातही धाव घेतली. विशेष म्हणजे तहसील कार्यालयाने सातबाऱ्यावर नाव असल्याची चूक भूमी अभिलेख कार्यालयाने पत्राद्वारे कळविली आहे. प्रशासनाच्या या कारभारामुळे अखेर १० ऑगस्टपासून उपोषणाला बसण्याचा पर्याय निवडला असल्याचे सतीश आदमाने यांनी पत्रकार परिषदेत सांगितले.

म. टा. प्रतिनिधी, औरंगाबाद

गावकऱ्यांची मदत आणि शिक्षकांच्या इच्छाशक्तीच्या जोरावर केसापुरी जिल्हा परिषद शाळेला नवसंजीवनी मिळाली. ही शाळा वर्षभरापूर्वी शाळा बंद पडण्याच्या मार्गावर होती.

या शाळेत २०१८-१९ मध्ये विद्यार्थी संख्या २२ होती. त्यामुळे जिल्हा परिषद प्रशासनाने ही शाळा बंद का करण्यात येऊ नये, अशी विचारणा केली. शाळा बंद पडू नये, यासाठी शिक्षकांनी हालचाली सुरू केल्या. मुख्याध्यापक विजयकुमार गेडाम, सहशिक्षक रवी जाधव यांनी प्रयत्न सुरू केले. केवळ पटसंख्येचा प्रश्न राहिला नव्हता. शाळेच्या परिसरात जनावरांचा मुक्त संचार, वाहनांची ये-जा सुरू असल्याने शाळेची शांतता भंग पावली होती. शाळेचे पटांगण म्हणजे रहदारीचा रस्ता झाला होता. शाळेला संरक्षक भिंत नाही, गेट नाही, परिसरात एकही झाड नाही, स्वच्छतागृहावर करवंदाची जाळी, शाळेचा रंग उडालेला, पिण्यासाठी पाणी नव्हते, शाळा व अंगणवाडी यामधून जाणारी बरोबर दोन फुटाची सांडपाण्याची नाली. ही सर्व अवस्था बघून शाळा आहे काय? असा प्रश्न पडला.

सरपंच शांताराम वाहुळ, उपसरपंच प्रधान जाधव, माजी सरपंच रामनाथ सुरोशे, ज्ञानेश्वर पवार, धोंडिराम निकम तसेच गावातील प्रतिष्ठित व्यक्ती, पालक, गावकरी यांच्याशी रवी जाधव यांनी संपर्क साधला. गावकऱ्यांनी शाळेसाठी हवी ती मदत करण्याचे आश्वासन दिले. त्यामध्ये माजी सरपंच रामनाथ कडुबा पाटील सुरासे यांनी सढळ हाताने सर्वप्रथम शाळेला सहा हजारांची मदत केली. त्यातून गेट, शाळेच्या मागील बाजूस ५० फूट रुंदीचे तारेचे कुंपण केले. पहिल्या वार्षिक स्नेहसमेलनास पाच हजारांचा निधी, शाळेस पाच फुटी नारळाची १५ झाडे, एक विद्यार्थी दोन झाड याप्रमाणे ७० औषधी झाडे गेल्यावर्षी दिली. त्यांच्या सहकार्यामुळे खरोखर शाळेला एकाप्रकारे संजीवनी प्राप्त झाली.

शाळेच्या खात्यावर असलेल्या दुरुस्ती निधीमधून प्रथम सांडपाण्याची भूमिगत व्यवस्था व पाण्याची व्यवस्था आदी मुख्याध्यापक, शालेय समिती अध्यक्ष, सर्व सदस्य यांनी केली. ग्रामपंचायतीकडून विनामूल्य नळजोडणी करून देण्यात आली. शाळेने पहिले वार्षिक स्नेहसंमेलनाचे आयोजन केले. तेव्हा रामनाथ पाटील सुरासे यांनी दिलेल्या पाच हजारांच्या मदतीमुळे वार्षिक स्नेहसंमेलन जोमात पार पडले आणि तब्बल बारा हजार रुपये बक्षिसांचा वर्षाव झाला. उपलब्ध झालेल्या रक्कमेचा उपयोग संपूर्ण शाळेची रंगरंगोटी करण्यात आला. या सर्व प्रयत्नामुळे शाळेचा कायापालट झाला आहे.

\Bअधिकाऱ्यांकडून शाबासकीची थाप\B

यात भर टाकत दोन्ही शिक्षकांनी ज्ञानरचनावाद प्रमाणे शिक्षण, सहशालेय उपक्रम, डिजिटल क्लासरूम, शाळेमध्ये आयोजित विविध क्रीडा स्पर्धा, आनंदनगरी, परिसर सहल, वन भोजन, जयंती व पुण्यतिथीचे आयोजन, आनंददायी शिक्षण, विद्यार्थ्यांचे वाढदिवस, हसत खेळत शिक्षण यामुळे विद्यार्थी रमून शाळेचा पट २२वरून ३५ झाला. पालकांचा विद्यार्थ्यांकडे आणि शाळेकडे पाहण्याचा दृष्टिकोन बदलला. अध्ययनस्तर निश्चितीमध्ये केसापुरी शाळा अव्वल आली. गटशिक्षणाधिकारी, केंद्रप्रमुख, केंद्रीय मुख्याध्यापक यांना शाळेस व शिक्षकांना शाबासकीची थाप द्यावी लागली आहे.

म. टा. प्रतिनिधी, औरंगाबाद

अण्णासाहेब पाटील आर्थिक मागास विकास महामंडळामार्फत राबविल्या जाणाऱ्या छत्रपती राजाराम महाराज उद्योजकता व कौशल्य विकास अभियान योजनेंतर्गत गेल्या १६ महिन्यांत ७२६ जणांना ४५ कोटी ३७ लाख रुपयांचे कर्ज संबंधित बँकांनी मंजूर केले आहेत. कर्ज वाटप व व्याज परताव्यात येथील कार्यालय राज्यात अव्वल ठरले असून, आतापर्यंत ४७० लाभार्थींना एक कोटी ३० लाख रुपयांचा व्याज परतावा देण्यात आला आहे, अशी माहिती महामंडळाचे जिल्हा समन्वयक प्रवीण आगवन पाटील यांनी 'मटा'शी बोलताना दिली.

आर्थिक दुर्बल घटकातील बेरोजगार युवकाना स्वयरोजगारासाठी आर्थिक सहाय्य करण्यासाठी छत्रपती राजाराम महाराज उद्योजकता व कौशल्य विकास अभियानाच्या माध्यमातून महामंडळाने शेतकरी उत्पादक गटासाठी दहा लाखापर्यंत बिनव्याजी गट प्रकल्प कर्ज योजना आणली आहे. वैयक्तिक कर्ज व्याज परतावा योजना; तसेच गट प्रकल्प कर्ज व्याज परतावा आदी योजना राबविल्या जातात.

एक मार्च २०१८पासून जिल्ह्यातील सुमारे सहा हजार बेरोजगारांनी विभागाच्या वेबसाइटवर अर्ज केले, परंतु बहुसंख्या अर्जा सोबत कर्ज प्रकरणासाठी आवश्यक कागदपत्रे, प्रकल्प अहवाल नसणे ही बाब समोर आल्याने समन्वयक आगवन पाटील, समाधान सूर्यवंशी, शीतल चव्हाण आदी कर्मचाऱ्यांनी अर्जदारांशी संपर्क साधून अर्ज, बँकेत प्रस्ताव सादर करण्याबाबत मार्गदर्शन केले. दरम्यान, बँकेकडे आता दोन हजार २७० अर्ज सादर करण्यात आले होते. त्यापैकी ७२६ अर्ज प्रकरणे मंजूर करून त्यांना एकूण ४५ कोटी ३७ लाख रुपयांचे कर्ज वाटप केले आहे. बँकेने ३४४ अर्ज अपात्र ठरविले असून, एक हजार २०० कर्जप्रकरणांवर कार्यवाही सुरू आहे.

बँकेचा नियमित हप्ता भरणाऱ्यांना महामंडळाकडून व्याज परतावा दिला जातो. अशा ४७० लाभार्थींना व्याज परताव्यापोटी एक कोटी ३० लाख रुपये प्रदान करण्यात आले आहे तर, उर्वरित अर्जदारांना व्याज परतावा देण्याबाबत कार्यवाही सुरू आहे. कर्जवाटप व व्याज परताव्यात औरंगाबाद राज्यात अव्वल ठरला असून दुसऱ्या क्रमांकावर नाशिक कार्यालय आहे. नाशिकमध्ये ६५० अर्जदारांना या योजनेचा लाभ मिळाल्याचे महामंडळाकडून सांगण्यात आले.

एम.कॉमपर्यंत शिक्षण झाले असून, स्वयंरोजगार उभारण्यासाठी एक वर्षापूर्वी महामंडळाकडे अर्ज केला व कर्जप्रस्ताव बँकेकडे सादर केला होता. तीन महिन्यांत कर्ज प्रकरण मंजूर झाले असून, देवगाव रंगारी येथे रेडिमेड गारमेंटचा व्यवसाय सुरू केला आहे. महामंडळाच्या योजनेनूसार आतापर्यंत ७० हजार रुपयाचा व्याज परतावा ही मिळाला आहे.

- गणेश सोनवणे, लाभार्थी

जिल्ह्यातून आतापर्यंत ७२६ जणांना स्वयंरोजगार उभारणीसाठी ४५ कोटीहून अधिक कर्ज वाटप झाले आहे. कर्जवाटप व व्याज परताव्यात औरंगाबाद राज्यात अव्वल ठरला आहे.

- प्रवीण आगवन पाटील, समन्वयक

म. टा. प्रतिनिधी, औरंगाबाद

जिल्हा परिषद अध्यक्ष, उपाध्यक्ष व विषय समिती सभापती तसेच पंचायत समिती सभापती, उपसभापतींच्या निवडीचा तूर्तास लांबणीवर टाकण्याचा निर्णय राज्य मंत्रिमंडळाने बुधवारी घेतला. यामुळे औरंगाबाद जिल्हा परिषदेत शिवसेना व काँग्रेसला फायदा होणार असून भाजपला फटका बसणार आहे.

जिल्हा परिषदेच्या विद्यमान अध्यक्ष अॅड. देवयानी डोणगावकर व पदाधिकाऱ्यांची मुदत २० सप्टेंबर रोजी संपणार होती. पुढील अडीच वर्षांसाठी अध्यक्षपदाची सोडत लवकरच होणे अपेक्षित होते. मात्र, आज मंत्रिमंडळाने विद्यमान झेडपी व पंचायत समिती पदाधिकाऱ्यांना मुदतवाढ दिली. त्यामुळे या कारभाऱ्यांची लॉटरी लागली आहे. डिसेंबरअखेरपर्यंत मुदतवाढ मिळणार असल्याने अध्यक्षपदाची स्वप्ने पाहणाऱ्यांची मात्र निराशा झाली आहे. पुढच्या अध्यक्षपदासाठी सेना - भाजप युती होणार असून त्यात भाजपचा अध्यक्ष होण्याची शक्यता आहे. मात्र, मुदतवाढ मिळाल्याचा फटका भाजपला बसणार आहे.

म. टा. प्रतिनिधी, औरंगाबाद

जायकवाडी धरणात नाशिक येथून होत असलेल्या पाणी पुरवठ्यामुळे गंगापूर आणि वैजापूर तालुक्यातील नदीजवळील गावांचा वीज पुरवठा रविवारपासून खंडीत करण्यात आला होता. पुराचे पाणी ओसरल्याने खंडित केलेल्या गावांचा वीजपुरवठा तिसऱ्या दिवशी बुधवारी सुरळीत करण्यात अल्याची माहिती महावितरणचे मुख्य अभियंता सुरेश गणेशकर यांनी दिली. पुरामुळे गंगापूर आणि वैजापूर भागातील नदीकाठी असलेल्या ५२ गावांचा वीज पुरवठा खंडित करण्यात आला होता. त्याच दिवशी १३ गावांचा वीज पुरवठा सुरळीत करण्यात आला होता. सोमवारी ३९ गावांचा वीज पुरवठा खंडीत होता. मात्र पावसाचा जोर कमी झाल्याने २९ गावांचा वीज पुरवठा सुरळीत करण्यात आले. तसेच बुधवारी राहिलेल्या १० गावांचा पुरवठा सुरळीत करण्यात आले. मुख्य अभियंता गणेशकर यांनी बुधवारी वैजापूर तालुक्यातील गोदावरी नदीकाठच्या नागमठाण गावास भेट देऊन परिस्थितीचा आढावा घेतला. या महापुरात महावितरणचे जवळपास वीस लाखांचे नुकसान झाल्याचे समजते.

औरंगाबाद : डॉ. बाबासाहेब आंबेडकर मराठवाडा विद्यापीठाच्यावतीने माधव गुणवंतराव सावरगावे यांनी वृत्तपत्रविद्या व जनसंवाद विषयात पीएच.डी.प्राप्त केली. माजी कुलगुरू डॉ. सुधीर गव्हाणे यांच्या मार्गदर्शनाखाली 'शाश्वत विकास संवाद : स्वरूप व व्याप्ती' या विषयावर त्यांनी शोधप्रबंध सादर केला. माधव सावरगांवे हे वडमुरंबी (ता. देवणी, जि. लातूर) येथील मूळ रहिवाशी असून, १५ वर्षांपासून पत्रकारितेत कार्यरत आहेत. त्यांनी एम.ए. (एमसीजे) अभ्यासक्रमात आ. कृ. वाघमारे सुवर्णपदक प्राप्त केले आहे; तसेच विद्यापीठाची सुवर्णमहोत्सवी शिष्यवृत्ती त्यांनी प्राप्त केली आहे. डॉ माधव सावरगावे यांचे त्रिपुरा केंद्रीय विद्यापीठाचे कुलगुरू डॉ. वि. ल. धारूरकर, प्रा. सुरेश पुरी, डॉ. दिनकर माने, डॉ दीपक शिंदे, डॉ. रेखा शेळके, व्ही. एस. कुलकर्णी यांनी अभिनंदन केले आहे.

म. टा. प्रतिनिधी, औरंगाबाद

रिक्षातील प्रवाशाचे रोख २० हजार रुपये व दोन मोबाईल असा सुमारे ३० हजारांचा ऐवज पळविणारा आरोपी मोहम्मद अश्पाक उर्फ बब्बा मोहमंद हनिफ याला बुधवारी (७ ऑगस्ट) अटक करुन न्यायालयात हजर करण्यात आले असता, आरोपीला शुक्रवारपर्यंत (८ ऑगस्ट) पोलिस कोठडीत ठेवण्याचे आदेश मुख्य न्यायदंडाधिकारी एम. ए. मोटे यांनी दिले.

या प्रकरणी काकासाहेब शिवाजी जाधव (३२, रा. पवन नगर, हडको) यांनी फिर्याद दिली होती. वेदांतनगर पोलिस ठाण्यात गुन्हा दाखल होऊन आरोपी मोहम्मद अश्पाक याला अटक करण्यात आली. त्याच्याकडून चोरीच्या ऐवजापैकी दोन हजार ३० रुपये जप्त करण्यात आले. तपासादरम्यान आरोपीने भाऊ मोहम्मद अनिस उर्फ बोक्या याच्या साथीने चोरी केल्याची कबुली दिली. आरोपीला न्यायालयात हजर केले असता, आरोपीचा साथीदार तथा भाऊ बोक्या याला अटक करणे तसेच चोरीचा ऐवज जप्त करणे बाकी असून आरोपींनी शहरात आणखी कोठे गुन्हे केले आहेत, याचा तपास करावयाचा असल्याने आरोपीला पोलिस कोठडी देण्याची विनंती सहाय्यक सरकारी वकील योगेश सरोदे यांनी न्यायालयात केली. ही विनंती मान्य करून न्यायालयाने आरोपीला शुक्रवारपर्यंत पोलिस कोठडी सुनावली.

म. टा. प्रतिनिधी, औरंगाबाद

शासनाच्या अनुदानातून केली जाणारी रस्त्यांची कामे अत्यंत संथ सुरू आहेत. त्यामुळे रस्त्यांच्या कंत्राटदारांना प्रति दिवस सत्तर हजार रुपये दंड होऊ शकतो. दंड आकारण्याची कार्यवाही देखील सुरू करण्यात आली असल्याची माहिती मिळाली आहे.

शहरातील रस्त्यांच्या कामांसाठी शासनाने महापालिकेला शंभर कोटी रुपयांचे अनुदान दिले आहे. या अनुदानातून तीस रस्त्यांची कामे करण्याचा निर्णय घेण्यात आला आहे. तीसपैकी सध्या १९ रस्त्यांची कामे हाती घेण्यात आली आहेत, पण बहुतेक कामे ठप्प आहेत किंवा संथ गतीने सुरू आहेत. वारंवार नोटीस बजावून देखील कंत्राटदार रस्त्यांच्या कामांना गती देत नसल्यामुळे पालिका आयुक्तांनी कंत्राटदारांना निर्वाणीचा इशारा देणारी नोटीस बजावली होती. कंत्राटदारांनी नोटीसचा खुलासा केला, पण हे खुलासे समाधानकारक नसल्याचे स्पष्ट झाले आहे. त्यामुळे कंत्राटदारांवर दंडात्मक कारवाई करण्याचा निर्णय घेतला जात आहे. प्रति दिवस सत्तर हजार रुपये दंड आकारला जाऊ शकतो असे सूत्रांनी सांगितले. एक ऑगस्टपासून कंत्राटदारांना सत्तर हजार रुपये या प्रमाणे दंड लागू शकतो. कंत्राटदारांच्या बिलांमधून दंडाची रक्कम वजा केली जाणार आहे. कंत्रादारांना रस्त्यांच्या कामांबद्दल टप्पे ठरवून देण्यात आले आहेत, ठरवून दिलेल्या टप्प्यांनुसार कंत्राटदाराने काम केले पाहिजे.

म. टा. प्रतिनिधी, औरंगाबाद

रस्त्याच्या कामासाठी नागरिकांसह नगरसेवक राजेंद्र जंजाळ बुधवारी रात्री रस्त्यावर उतरले. दोन महिन्यांपासून खोदून ठेवलेल्या रस्त्यात पाणी साचले, चिखल झाला. त्यामुळे नागरिकांना येणे जाणे अवघड होऊन बसले. नागरिकांना सोसावा लागणाऱ्या त्रासाची प्रचिती अधिकाऱ्यांना देखील यावी म्हणून जंजाळ यांनी अधिकाऱ्याला चिखलात उतरवले. त्यानंतर रात्रीतून अॅप्रोच रस्ता तयार करण्याचे अधिकारी व कंत्राटदाराने मान्य केले.

गारखेडा भागातील नाथप्रांगण, आर. बी. हिल्स येथील रस्त्याचे काम शासनाच्या शंभर कोटी रुपयांच्या अनुदानातून करण्यात येणार आहे. विजय चौकापासून राज हाइट्सपर्यंत रस्त्याचे काम व्हाइट टॉपिंगच्या माध्यमातून करण्यासाठी कालिकामाता मंदिराच्या समोरील रस्ता कंत्राटदाराने दोन महिन्यांपूर्वी खोदून ठेवला. खोदलेल्या रस्त्यावर काहीच काम केले जात नसल्यामुळे नागरिक कमालीचे त्रस्त झाले होते. त्यातच दोन-तीन दिवसांपासून सुरू असलेल्या पावसामुळे खोदकाम केलेल्या रस्त्यावर मोठ्या प्रमाणावर पाणी साचले. त्यातच ड्रेनेज लाइन फुटल्यामुळे दूषित पाण्याचा त्रास नागरिकांन होऊ लागला. त्यामुळे नागरिकांचे आरोग्य धोक्यात येऊ लागले. याची दखल घेत नगरसेवक राजेंद्र जंजाळ सायंकाळी साडेसातच्या सुमारास कालिकामाता मंदिराच्या रस्त्यावर आले. ते आल्यामुळे नागरिक देखील मोठ्या संख्येने जमा झाले. त्यात रामकृष्ण बारहाते, नारायण पाटील, अनंत कौशिके, राजेंद्र पाटील, रेखा बारहाते, सुषमा डोंगरजकर, सीमा कौशिके, पुष्पा कान्हे, सीमा बासवडेकर, शीतल राऊत, वेदिका देशपांडे, अर्चना पाटील, गौरी अकोलकर आदींचा समावेश होता. जंजाळ यांनी पालिकेच्या अधिकाऱ्यांना फोन लावले, पण सुरुवातीला त्यांना प्रतिसाद मिळाला नाही, पण त्यानंतर उपअभियंता फड, कनिष्ठ अभियंता निकम यांच्यासह कंत्राटदार आणि पीएमसीचे प्रतिनिधी दाखल झाले. जंजाळ यांनी महापौर नंदकुमार घोडेले यांना देखील फोन केला. घोडेले देखील आले.

खोदून ठेवलेल्या रस्त्यात जमा झालेले पाणी आणि चिखल याची माहिती जंजाळ यांनी महापौरांना दिली. यावेळी एका अधिकाऱ्याला चिखलामध्ये उतरवण्यात आले. त्यानंतर रात्रीतून अॅप्रोच रस्ता तयार करण्याचे आदेश महापौरांनी अधिकाऱ्यांना दिले. अॅप्रोच रस्ता तयार केल्याशिवाय घरी जाऊ नका, असे अधिकारी व कंत्राटदाराला सांगण्यात आले. लगेचच रस्त्याचे काम सुरू करण्याची ग्वाही कंत्राटदाराने यावेळी दिली.

या रस्त्याचे काम महापालिकेच्या फंडातून केले जात नाही. शासनाच्या निधीतून हे काम केले जात आहे. त्यामुळे केलेल्या कामाचे पैसे कंत्राटदारांना मिळणार आहेत. असे असताना अधिकारी कंत्राटदाराकडून काम का करून घेत नाहीत, अधिकारी गप्प का आहेत? चिरीमिरी घेऊन अधिकारी गप्प बसत आहेत. कंत्राटदारांना पायघड्या घातल्या जात आहेत. त्यात नगरसेवक बदनाम होतो. रस्त्याचे काम कंत्राटदाराने केले नाही आणि अधिकाऱ्यांनी काम करुन घेतले नाही तर, त्याचा जाब विचारला जाईल.

- राजेंद्र जंजाळ, नगरसेवक

-

म. टा. प्रतिनिधी, औरंगाबाद

औरंगाबादच्या शासकीय औद्योगिक प्रशिक्षण संस्थेतील (आयटीआय) विद्यार्थ्यांना थेट अमेरिकेतील नामांकीत कंपनीमध्ये नोकरीची संधी मिळणार आहे. दळणवळण, पायाभूत सुविधा क्षेत्रातील 'एडवर्डस्' उद्योगाने अत्याधुनिक प्रशिक्षण टूलसह, प्रात्यक्षिकासाठी 'फोर स्ट्रोक अॅडव्हॉन्स डिझेल कट सेक्शन इंजिन' विद्यार्थ्यांना अभ्यासता येणार आहे. कंपनीचे अध्यक्ष मार्क एडवर्डस् आणि कंपनीतील शिष्टमंडळाने मंगळवारी संस्थेला भेट देऊन पाहणी केली.

'आयटीआय'मधून शिक्षण घेतलेल्या विद्यार्थ्यांना रोजगाराच्या संधी मोठ्या प्रमाणात उपलब्ध आहेत. त्यामुळे 'आयटीआय'कडे विद्यार्थ्यांचा सर्वाधिक कल आहे. अभ्यासक्रमाची रचना, प्रात्यक्षिकाचे महत्त्व, शिकविण्याची पद्धत याबळावर मुलांच्या 'आयटीआय'मधील विद्यार्थ्यांना परदेशातील नोकरीची संधी 'एडवर्डस्' कंपनीमुळे मिळणार आहे. दळणवळण, पायाभूत सुविधा क्षेत्रात ही कंपनी १९६१पासून कार्यरत आहे. कंपनीच्या अध्यक्षांसोबत आठ पदाधिकाऱ्यांनी मुलांच्या 'आयटीआय'ला भेट देऊन मुलांशी संवाद साधत, अभ्यासक्रम, विविध ट्रेड, प्रात्यक्षिक कसे चालते याबाबत जाणून घेतले. संस्थेत २७ विविध अभ्यासक्रमांचे प्रशिक्षण दिले जाते. त्यातील मशिनिस्ट, टर्नर, ग्राइंडर, वेल्डर, फिटरच्या विद्यार्थ्यांना कंपनीतर्फे आपल्या नोकरीची संधी देण्याचे मान्य केले. त्यासाठी जानेवारी २०२०मध्ये पुन्हा संस्थेत येऊ, असे त्यांनी आश्वासन दिले आहे. त्यांनी अभ्यासक्रमातील प्रात्यक्षिक, प्रत्यक्ष कंपनीत काम करताना त्यांच्याकडे कशा प्रकारे काळजी घेतल्या जाते याबाबत माहिती देत त्यांचे 'प्रशिक्षण कीट' संस्थेला दिले. यामध्ये फ्लॅश ड्राइव्ह, कंपनी वर्कशॉपमधील कामासाठी वापरण्यात येणारे टूल, प्रोजेक्ट सीडी, कंपनीत काम करताना काळजीसाठीचे सांकेतिक चिन्हांचे पुस्तकाचा समावेश आहे. 'प्रशिक्षण कीट'सह त्यांनी अभ्यासक्रमाबाबत सूचना केल्या. सहा महिन्यांनंतर आल्यानंतर त्याचा आढावा घेऊन विद्यार्थ्यांना प्रशिक्षणासह नोकरीची संधी व शिक्षकांच्या प्रशिक्षणासाठी प्रयत्न करण्याचे आश्वासन दिले. प्रात्यक्षिक करण्यासाठी विद्यार्थ्यांनी काळजी घ्यावी यासाठी शंभर गॉगल्स भेट दिले. यावेळी 'आयटीआय'चे प्राचार्य अभिजीत अलटे, एस. व्ही. भोसले, व्ही. एस. परदेशी, आर. के. भाटणकर, आर. एल. कुलकर्णी, डी. बी. खंडागळे, ए. पी. गायदर, डी. जी. मारवाडकर, पी. डी. जुंगे यांची उपस्थिती होती.

\Bप्रशिक्षणासाठी इंजिन\B

संस्थेतील ऑटोमोबाइल अभ्यासक्रमाच्या विद्यार्थ्यांना अभ्यास करताना प्रात्यक्षिक सोपे जावे. त्यांना आंतरराष्ट्रीय पातळीवरील ऑटो इंजिनचा अभ्यास करता यावा यासाठी 'फोर स्ट्रोक अॅडव्हॉन्स डिझेल कट सेक्शन इंजिन' पाठविले आहे. हे इंजिन येत्या काही दिवसांत संस्थेला मिळणार आहे. त्यानंतर विद्यार्थी त्यावर प्रात्यक्षिकाचे धडे घेऊ शकणार आहे.

'एडवर्डस्'चे मालक मार्क जानेवारीत औरंगाबादला आले होते. त्यावेळी त्यांना आम्ही संस्थेत भेटीचे आमंत्रण दिले. संस्थेची पाहणी करत पुढच्यावेळी भारतात आल्यानंतर पुन्हा भेट देतो, असे सांगितले. त्यांनी आज भेट देत प्रशिक्षण साहित्य, विद्यार्थ्यांशी संवाद आणि इंजिन पाठविल्याची माहिती दिली. दोन तास संस्थेत होते. त्यांच्यासोबत पत्नीसह कंपनीतील अधिकारी उपस्थित होते. त्यांनी दिलेल्या प्रशिक्षण 'कीट'नुसार शिक्षकांना प्रशिक्षण देऊ. विद्यार्थ्यांनाही आधुनिक तंत्रज्ञानाची माहिती, प्रशिक्षण देऊ. त्यामुळे करून पुढच्यावेळी ते आले तर, प्रत्यक्ष त्याचा आढावा घेऊन आपल्या विद्यार्थ्यांना संधी उपलब्ध करून देतील.

- अभिजीत अलटे, प्राचार्य, शासकीय आयटीआय.

म. टा. प्रतिनिधी, औरंगाबाद

औरंगाबाद येथील 'महाराष्ट्र राष्ट्रीय विधी विद्यापीठ' कुलगुरूपदी डॉ. कोल्लूरू व्यकंटा सोमनाथा सर्मा (के.व्ही.एस.) यांची बुधवारी निवड करण्यात आली आहे. कार्यकारी परिषदेत त्यांची निवड जाहीर करण्यात आली. डॉ. केव्हीएस हे विद्यापीठाचे दुसरे कुलगुरू असतील.

विद्यापीठाचे तत्कालीन कुलगुरू डॉ. एस. सूर्यप्रकाश यांनी डिसेंबर २०१८मध्ये राजीनामा दिला. त्यानंतर प्रभारी कुलगुरू म्हणून डॉ. जे. कोंडय्या यांच्याकडे पदभार आहे. नवीन कुलगुरूपदासाठीची प्रक्रिया मार्चपासून सुरू आहे. अर्ज छाननी प्रक्रियेनंतर एक जुलै रोजी 'सर्च कमिटी'समोर १४ उमेदवारांनी मुलाखती दिल्या होत्या. त्यापैकी चार जणांची नावे कुलपती सर्वोच्च न्यायालयाच्या न्या. आर. बानुमती यांच्याकडे पाठविण्यात आले. त्यांनी केलेली निवड बुधवारी मुंबईत झालेल्या कार्यकारी परिषदेत जाहीर करण्यात आली. डॉ. केव्हीएस हे तेलंगाणामधील राष्ट्रीय विधी विद्यापीठ, नलसार येथे १३ वर्षांपासून वरिष्ठ प्राध्यापक म्हणून कार्यरत आहेत. कन्झुमर आणि कॉम्पिटिशन लॉ विभागाचे ते प्रमुख आहेत. त्याशिवाय कॉर्पोरेट आणि कमर्शियल लॉ विभागाचा अतिरिक्त कार्यभार आहे. निझाम इन्स्टिट्यूट ऑफ मेडिकल सायन्स या हैदराबाद येथील प्रसिद्ध रुग्णालयात ते विधीतज्ज्ञ म्हणून काम पाहतात. चेन्नई, हैदराबाद, गांधीनगर येथील विधी विद्यापीठांच्या अभ्यास मंडळाचे सदस्य असलेल्या डॉ. सर्मा यांना तेलंगण राज्य सरकारकडून सर्वोत्कृष्ट शिक्षकाचा पुरस्काराने सन्मानित करण्यात आले आहे. 'एनटीपीसी' आणि सिंगारनी कॉलियरीज ली. यांच्यातील लवादाचे अध्यक्षपदही त्यांनी भूषविले. डॉ. सर्मा २५ ऑगस्टनंतर पदभार स्वीकारणार असल्याचे त्यांनी 'मटा'ला सांगितले.

निवड झाल्याचा आनंद झाला. विद्यापीठाचा विस्तार अधिक चांगल्या पद्धतीने कसा करता येईल यावर भर असेल पदभार स्वीकारल्यानंतरच अधिकबाबी स्पष्ट करेल.

- डॉ. केव्हीएस सर्मा

म. टा. प्रतिनिधी, पैठण

जायकवाडी प्रकल्पात मंगळवारी दोन लाख क्युसेकपेक्षा जास्त पाण्याची आवक सुरू झाली. रात्री नऊ वाजता प्रकल्पातील उपयुक्त साठा ४५.९७ टक्क्यांपर्यंत पोचला. धरणाच्या पाणीपातळीत १२ तासांत पाच फुटांनी वाढ झाली. येणाऱ्या २४ तासांत धरणात येणाऱ्या पाण्याची आवक तीन लाख क्युसेकपर्यंत पोचणार असल्याची माहिती जलसंपदा विभागाच्या अधिकाऱ्यांनी दिली.

नाशिक जिल्ह्यात मागच्या दोन आठवड्यांपासून सुरू असलेल्या पावसामुळे २८ जुलैपासून जायकवाडी धरणात पाण्याची आवक सुरू आहे. गेल्या चार दिवसांपासून नाशिक जिल्ह्यात अतिवृष्टी झाल्याने तेथील सर्व धरणांतून पाण्याचा विसर्ग करण्यात येत आहे. परिणामी, सुरुवातीला दहा हजार क्युसेकप्रमाणे येणाऱ्या पाण्यात मंगळवारी मोठी वाढ झाली. मंगळवारी दिवसभर दोन ते अडीच लाख क्युसेक आवक सुरू होती. परिणामी, १२ तासांत धरणाच्या पाणीपातळीत पाच फुटांनी वाढ झाली.

रात्री नऊ वाजता जायकवाडी धरणाची पाणीपातळी १५१०.४७ फूट एवढी नोंद करण्यात आली. सध्या, धरणात १७३६.२१६ दशलक्ष घनमीटर पाणीसाठा असून, यापैकी ९९८.११० दशलक्ष घनमीटर (४५.९७ टक्के) उपयुक्त साठा आहे.

दहा दिवसांत ४० टीएमसी

२८ जुलैपासून जायकवाडी धरणात पाण्याची आवक सुरू झाली असून, आतापर्यंत ११३७ दशलक्ष घनमीटर म्हणजेच जवळपास ४० अब्ज घनफूट (टीएमसी) पाणीसाठा जमा झाला आहे. धरणाच्या पाणीपातळीत २० फुटांनी वाढ झाली आहे. जायकवाडी धरण काठोकाठ भरायला अजूनही ११ फूट पाणीपातळी वाढण्याची गरज असल्याची माहिती जलसंपदा विभागाच्या अधिकाऱ्यांनी दिली आहे.

म. टा. प्रतिनिधी, गंगापूर

'मुख्यमंत्री ठरवण्यासाठी महाराष्ट्र तुमची जहागिरी नाही. महाराष्ट्राचा मुख्यमंत्री कोण होणार, हे ठरवण्याचा अधिकार येथील जनतेला आहे,' अशा शब्दांत खासदार डॉ. अमोल कोल्हे यांनी देवेंद्र फडणवीस यांच्या मुख्यमंत्रिपदाबाबतच्या वक्तव्याचा समाचार घेतला. ते गंगापूर येथे शिवस्वराज्य यात्रेत बोलत होते.

सभेला माजी उपमुख्यमंत्री अजित पवार, राष्ट्रवादी काँग्रेसचे जिल्हाध्यक्ष माजी आमदार कैलास पाटील, आमदार विक्रम काळे, विलास चव्हाण, महिला जिल्हाध्यक्ष छायाताई जंगले, सुनीता चव्हाण, डॉ. ज्ञानेश्वर नीळ उपस्थित होते. डॉ. कोल्हे म्हणाले, 'रयतेचे राज्य पुन्हा आणण्यासाठी, तरुणांना रोजगार मिळवून देण्यासाठी, जातीजातीमध्ये तेढ कमी करण्यासाठी ही यात्रा काढली आहे. पारदर्शक कारभाराचे आश्वासन देऊन तुम्ही सत्तेवर आलात. मात्र, पाच वर्षांत काहीच करू शकला नाहीत. त्यामुळे तुम्हाला महाजनादेश यात्रा काढावी लागली. महाराष्ट्राचा मुख्यमंत्री कोण होणार, हे ठरवण्याचा अधिकार जनतेला आहे. महाराष्ट्र तुमची जहागिरी नाही,' अशी टीका त्यांनी केली.

माजी उपमुख्यमंत्री अजित पवार म्हणाले, 'गंगापूर खुलताबाद मतदारसंघात अनेकजण इच्छुक आहेत. पवार साहेब कोणा एकाला उमेदवारी देतील. ज्यांना उमेदवारी मिळेल त्यांना निवडून आणा. सध्या उड्या मारण्याचे काम चालू आहे. निष्ठेला महत्त्व राहिले नाही. कोणाचे हात अडकले आहेत. तर कुणाच्या मागे चौकशीचा ससेमिरा लावण्याची भीती वाटते. तर कोणाला संस्था वाचवायची पडली आहे. मतदार राजाने दल बदलू करणाऱ्यांना खड्ड्यासारखे बाजूला सारावे,' असे म्हणत त्यांनी युती सरकारवर टीका केली. मराठा आरक्षणासाठी जलसमाधी घेतलेल्या काकासाहेब शिंदे यांच्या पुतळ्याला यावेळी अभिवादन करण्यात आले.

औरंगाबाद : डॉ. बाबासाहेब आंबेडकर मराठवाडा विद्यापीठाच्या वर्धापन दिनानिमित्त जीवन साधना पुरस्कार देण्यात येणार आहे. यासाठी १६ ऑगस्टपर्यंत नामांकने मागविण्यात आली आहेत.

यासंदर्भात कुलगुरू डॉ. प्रमोद येवले यांच्या अध्यक्षतेखाली होणाऱ्या विद्यापीठाच्या ६१व्या वर्धापनदिन (२३ ऑगस्ट) समारंभात पुरस्कार वितरण करण्यात येईल. वर्धापनदिनानिमित्त विज्ञान, शिक्षण, सांस्कृतिक, सामाजिक क्षेत्रात व इतर क्षेत्रांमध्ये उल्लेखनीय कार्य करणाऱ्या मान्यवरांचा जीवनसाधना पुरस्काराने सन्मान करण्यात येतो. पुरस्काराच्या निवडीसाठी प्रस्ताव १६ ऑगस्ट २०१९पर्यंत डॉ. मुस्तजीब खान (संचालक, विद्यार्थी विकास) यांच्याकडे देण्यात यावेत. प्रस्ताव व्यक्तिगतरित्याही सादर करता येणार आहेत किंवा संचालक विद्यार्थी विकास यांच्याकडे पाठविण्यात यावेत, असे आवाहन कुलसचिव डॉ. साधना पांडे यांनी केले आहे.

म. टा. प्रतिनिधी, औरंगाबाद

'एनएमसी'चा कडाडून निषेध करीत वेगवेगळ्या मागण्यांसाठी घाटीतील निवासी डॉक्टरांच्या बेमुदत संपाला बुधवारी (७ ऑगस्ट) सुरुवात झाली. परिणामी, सर्व वैद्यकीय शिक्षकांनी रुग्णसेवेचे शिवधनुष्य पेलले असले तरी बुधवारी नेहमीच्या तुलनेत निम्म्याच शस्त्रक्रिया झाल्या. दरम्यान, संप सुरुच राहिला तर मात्र रुग्णसेवेचा गंभीर फटका बसू शकतो, अशी शक्यता व्यक्त केली जात आहे.

राज्यभरातील निवासींनी संपात उडी घेतली असून, शहरातील शासकीय वैद्यकीय महाविद्यालय व रुग्णालयातील (घाटी) ३३५ निवासी डॉक्‍टर संपात सहभागी झाले आहेत. संपानिमित्त निवासी डॉक्टरांनी बुधवारी घाटी परिसरात जोरदार घोषणाबाजी केली. तसेच ठिकठिकाणी निदर्शने केली. संपाच्या पार्श्वभूमीवर मार्डच्या पदाधिकाऱ्यांनी अधिष्ठाता डॉ. कानन येळीकर यांची भेट घेतली असता, स्थानिक पातळीवरील समस्या सोडवण्याचे आश्‍वासन डॉ. येळीकर यांनी पदाधिकाऱ्यांना दिले. संपामुळे दररोज होणाऱ्या सुमारे ४५ मोठ्या शस्त्रक्रिया घटून दिवसभरात ३० शस्त्रक्रिया झाल्या, तर दररोज होणाऱ्या सुमारे ३० छोट्या शस्त्रक्रियांपैकी एकही शस्त्रक्रिया बुधवारी दिवसभरात होऊ शकली नाही, असे समजते. संपामुळेच जवळजवळ सर्वच विभागात १६७ वैद्यकीय शिक्षक रुग्णसेवेसाठी भिडले होते. संपातून आपत्कालिन सेवा वगळण्यात आली नसल्याने रुग्णसेवा प्रभावीत होणार आहे. त्यामुळेच संप चिघळला तर रुग्णसेवा गंभीररित्या प्रभावित होऊ शकते, अशी भीती व्यक्त केली जात आहे. संप सुरू राहणार का मागे घेण्यात येणार, याविषयी मध्यवर्ती मार्ड संघटना निर्णय घेणार असल्याचे निवासींच्या संघटनेचे शहर उपाध्यक्ष डॉ. क्रांतीराज पवार म्हणाले. दरम्यान, घाटीतील नवीन ग्रंथालय उद्घाटनाशिवाय विद्यार्थ्यांसाठी खुले करण्यात यावे, अशा मागण्यांच्या घोषणा देत घाटीतील वैद्यकीय विद्यार्थ्यांनी ग्रंथालयासमोर निदर्शने केली.

म. टा. प्रतिनिधी, औरंगाबाद

शहरातील कोचिंग क्लास चालकांनी पंधरा दिवसात फायर एनओसी न घेतल्यास कोचिंग क्लासला सील ठोकण्यात येईल, असा इशारा महापाकेतर्फे देण्यात आला आहे. सुमारे दोनशे कोचिंग क्लासवर कारवाई केली जाण्याची शक्यता आहे.

गुजरातमध्ये सुरत शहरात एका कोचिंग क्लासला आग लागल्यामुळे मोठी दुर्घटना घडली होती. त्यामुळे सर्वच शहरातील कोचिंग क्लासेसमधील अग्निशनम उपकरणांबद्दल आणि अग्निशमन व्यवस्थेबद्दल प्रश्नचिन्ह निर्माण झाले आहे. औरंगाबाद महापालिकेने या बद्दल वस्तुस्थिती जाणून घेण्यासाठी कोचिंग क्लासच्या संचालकांच्या नावे नोटीस बजावल्या आणि कोचिंग क्लाससाठी अग्निशमन उपकरणे लावली आहेत का याची माहिती द्या, असे सांगितले. सुमारे दोनशे क्लासेसला नोटीस बजावण्यात आली होती, परंतु आठ ते दहा क्लासच्या संचालकांनी नोटीसचा खुलासा केला. उर्वरित क्लासच्या संचालकांनी खुलासा करण्याकडे दुर्लक्ष केले. त्यामुळे आता या सर्व क्लासच्या संचालकांना अंतिम नोटीस दिली जाणार आहे. नोटीस मिळाल्यावर पंधरा दिवसात त्यांनी पालिकेच्या अग्निशमन विभागाकडून फायर एनओसी न घेतल्यास कोचिंग क्लास सील केले जाणार आहेत. कोचिंग क्लास ज्या इमारतीत भरवले जातात त्या इमारतीच्या मालकावर आणि क्लासच्या संचालकांवर गुन्हे दाखल केले जाणार आहेत. कोचिंग क्लासच्या इमारतींचे स्ट्रक्चरल ऑडिट देखील करुन घेतले जाणार आहे.

म. टा. प्रतिनिधी, वैजापूर

गेल्या काही दिवसांपासून सुरू असलेल्या संततधार पावसामुळे शहरातून जाणारा मुख्य रस्ता फुटला आहे. त्यामुळे येवला नाक्यापासून करुणानिकेतन शाळेपर्यंत रस्त्यावर ठिकठिकाणी मोठे खड्डे पडले असून वाहनधारकांसह पादचाऱ्यांना चालणे कठीण झाले आहे. या राष्ट्रीय महामार्गावरील मोठे खड्डे व चिखल यामुळे अपघाताची शक्यता वाढली आहे.

मागील काही दिवसांपासून शहर व ग्रामीण भागात पावसाची रिपरिप सुरू आहे. संततधार पावसामुळे वैजापूर शहरातून जाणाऱ्या 'नाशिक निर्मल' या राज्य रस्त्याची व आता राष्ट्रीय महामार्गात रूपांतरित झालेल्या मार्गाची अक्षरश: चाळणी झाली आहे. येवला नाका, नवीन भाजी मंडई, झगडा फाटा (सरला बेट कमान), आंबेडकर चौक, टपाल कार्यालय, पंचायत समिती कार्यालय, नगरपालिका या परिसरात व त्यापुढे करुणानिकेतन शाळेपर्यंत खोल खड्डे पडले आहेत. याशिवाय शहराला जोडणाऱ्या लाडगाव रस्ता, तिडी रस्ता हे रस्तेही खड्डेमय झाले आहेत. सध्या राष्ट्रीय महामार्गांतर्गत येणाऱ्या येवला हद्दीपासून शिऊर पर्यंतच्या रस्त्याचे काम सुरू आहे. त्यामुळे हा रस्ता सार्वजनिक बांधकाम विभागाकडून राष्ट्रीय रस्ते प्राधिकरणाकडे हस्तांतरित करण्यात आला आहे. कंत्राटदाराने काही महिन्यांपासून रस्त्याचे काम सुरू केले असून विनायकराव पाटील महाविद्यालयापर्यंत मातीकाम होत आहे. मात्र, कासवगतीमुळे काम थंडावले असून, शहरातील रस्त्याकडे प्रशासनाचे दुर्लक्ष होत आहे. राष्ट्रीय महामार्गाची तातडीने डागडुजी करण्यात यावी, अशी मागणी नागरिकांमधून होत आहे. मात्र, सार्वजनिक बांधकाम विभागाने हा रस्त्या आमच्या अखत्यारित येत नसल्याचे सांगून हात झटकल्याने नागरिकांनी रस्त्याच्या कामासाठी कुणाकडे दाद मागावी, असा प्रश्न आहे.

---

\Bमटा भूमिका

\B---

\Bजबाबदारी कुणाची?

\B---

सध्या सगळीकडे हीच स्थिती आहे. रस्ताचे काम झाले की काही महिन्यांमध्ये तो खराब होतो. अनेक ठिकाणी त्याची चाळणी होते. त्यानंतर डागडुजीच्या नावाखाली माती, मुरूम टाकून थातूरमातूर काम केले जाते. दुरुस्तीचे काम करण्यासाठी कंत्राटदार, रस्त्या ज्यांच्या ताब्यात आहे, तो सरकारी विभाग सारेच टाळाटाळ करतात. मग ही जबाबदारी नेमकी कुणाची, ते ठरवावे लागेल. एखाद्या रस्त्याचे काम झाले की, त्याचे आयुष्य किती. तो रस्ता किती वर्षांपर्यंत कंत्राटदाराने दुरुस्त करावा, याची स्पष्टता यावी. त्याची नागरिकांनाही माहिती व्हावी. त्यांना या लोकांविरोधात दाद मागता येईल. प्रशासनाने हात न झटकता आपले काम करावे. नागरिकांना दिलासा द्यावा.

म. टा. प्रतिनिधी, औरंगाबाद

इयत्ता दहावीसाठीची राज्यस्तरीय राष्ट्रीय प्रज्ञाशोख परीक्षेसाठी ऑनलाइन अर्ज भरण्याच्या प्रक्रियेला मंगळवारपासून सुरुवात झाली. राज्य परीक्षा परिषदेने ऑनलाइन अर्ज भरण्याच्या प्रक्रियेचे वेळापत्रक जाहीर केले असून, ११ सप्टेंबरपर्यंत अर्ज भरण्याची मुदत आहे. प्रथमस्तरावरील राज्यस्तरीय परीक्षा १७ नोव्हेंबर रोजी घेतली जाणार आहे.

परिषदेने ऑनलाइन अर्ज भरण्याच्या प्रक्रियेच्या वेळापत्रकासह शाळांना सूचनापत्रही पाठविले आहे. विद्यार्थ्यांना www.mscepune.in व http://nts.mscescholarshipexam.in वेबसाइटवर ऑनलाइन अर्ज भरण्याची प्रक्रिया सुरू आहे. विद्यार्थ्यांना ऑनलाइन अर्ज शाळेमार्फत भरावयाचे आहेत. विद्यार्थ्यांची ऑनलाइन अर्ज भरण्यासाठी आवश्यक असणारी माहिती, नॉनक्रिमिलेयर शाळांनी एकत्रित करायची आहे. राष्ट्रीय शैक्षणिक संशोधन व प्रशिक्षण परिषद यांच्यातर्फे २०१२-१३पासून राष्ट्रीय प्रज्ञाशोध परीक्षा इयत्ता दहावीसाठी दोन स्तरावर घेण्यात येते. दहावी परीक्षा देत असलेल्या विद्यार्थ्यांना परीक्षेस बसता येते. एक जुलै २०१९ रोजी वय १८ वर्षांपेक्षा कमी असलेल्या विद्यार्थ्यांना अर्ज भरता येतो. वेळापत्रकानुसार विद्यार्थ्यांना सहा ते ११ सप्टेंबरदरम्यान अर्ज ऑनलाइन नियमित शुल्कासह भरावा लागणार आहे. विलंब शुल्कासह अर्ज भरण्याची प्रक्रिया १२ ते १८ सप्टेंबर, अतिविलंब अर्ज भरण्याची प्रक्रिया १९ ते २७ सप्टेंबर यादरम्यान होईन. राज्यस्तरावरील परीक्षा १७ नोव्हेंबर रोजी घेतली जाणार आहे. राष्ट्रीयस्तरावरील परीक्षा १० मे २०२० रोजी देशभरात घेतली जाणार आहे.

\Bपरीक्षेचे स्वरूप असे असेल\B

राज्यस्तरीय परीक्षेत दोन विषयांची परीक्षा होते. त्यामध्ये बौद्धिक क्षमता चाचणी व शालेय क्षमता चाचणीचा समावेश आहे. पहिला पेपर हा मानसशास्त्रीय चाचणी असते. त्यामध्ये कार्याकारणभाव, विश्लेषण, संकलन आदी संकल्पनांवर आधारित प्रश्न असतात. पेपर-दोन हा इयत्ता नववी, दहावीच्या अभ्यासक्रमांवर आधारित असतो. त्यामध्ये सामान्य विज्ञान, समाजशास्त्र, गणित असे विषय असतात. दोन्ही पेपर प्रत्येकी शंभर गुणांचे असतात. मराठीसह इंग्रजी, हिंदी, गुजराथी, उर्दू, कन्नड व तेलुगू या सात माध्यमातून विद्यार्थी पेपर देवू शकतात. राज्यस्तरावरून यशस्वी झालेले विद्यार्थी राष्ट्रीयस्तरावर परीक्षेला पात्र ठरतात. जी परीक्षा राष्ट्रीय शैक्षणिक व प्रशिक्षण परिषदेतर्फे घेतली जाते. त्यात मूल्यांकनाची निगेटिव्ह मार्किंग (वजा गुण) पद्धत असते.