म. टा. प्रतिनिधी, औरंगाबाद
कोल्हापूर, सांगलीतील आलेल्या महापुरामुळे तेथील बांधवांवर मोठे संकट आले. एका दिवसात होत्याचे नव्हते झाले. अशा परिस्थितीत या बांधवांसाठी सर्वत्र मदतीचा ओघ सुरू झाला. औरंगाबादमधीलही अनेक संस्था, संघटनांनी मदतीचा हात पुढे केला आहे. विविध सामाजिक संस्थांकडून रविवारी मदतनिधी, साहित्य जमा करण्याचे आवाहन करण्यात आले त्याला शहरवासीयांनी भरभरून प्रतिसाद दिला. रविवारी रात्रीसह सोमवारी मदत पूरग्रस्तांसाठी पाठविली जाणार आहे. शहरातील व्यापारी महासंघ, कॅनॉट गार्डन व्यापारी संघ, सिडको-हडकोतील व्यापरी सोमवारी मदत एकत्रित करणार आहेत.
पूरग्रस्तांसाठी विद्यार्थ्यांनी नाश्ता सोडला
कोल्हापूर, सांगलीतील पूरग्रस्तांसाठी वसतिगृहातील विद्यार्थ्यांनी आपला दोन दिवसांचा नाश्ता सोडला. दोन दिवसांच्या नाश्ताचे पैसे जमवून या विद्यार्थ्यांनी सर्वासोंबत आपलाही मदतीचा हातभार लावला आहे.
किलेअर्क परिसरातील शासकीय एक हजार मुलांच्या वसतिगृहातील विद्यार्थ्यांनी आपल्याला मिळणारा नाश्ता न करता त्याचा निधी पूरग्रस्तांना मदत म्हणून दिला. विद्यार्थ्यांनी दोन दिवसीय नाश्ता बंद करून त्यासाठी मिळालेला पैसा मदत म्हणून पाठवून दिला. यामध्ये त्यांनी साहित्य घेत पाठवून दिला. महाराष्ट्र राज्य विद्यार्थी कृती समितीतर्फे बिस्कीटचे पुढे, मदत निधी जमा केला. या विद्यार्थ्यांनी पैठणगेट, औरंगपुरा भागात मदत जमा केली. समितीचे राज आवाड, अंकुश चौरे, विवेक हजारे, दिगंबर वैद्य, अमोल चौरे, दिगंबर वैद्य यांचा समावेश आहे. होली हेल्पिंग हँडतर्फे दूध डेअरी, सिडको बसस्थानक परिसरात मदत निधी, साहित्य जमा करण्यात आले.
रविवारी मदत निधीसह, कपडे, पांघरणे, बेडसीट, चादर यासह किराणामध्ये गव्हाचे पीठ, टूथपेस्ट अशा साहित्याचा समावेश आहे. चौका गावकरी, परिसस्पर्श फाउंडेशन, शिवराजे ग्रुपतर्फे मदतीची हाक दिली असता चौका गावकऱ्यांनी भरभरून प्रतिसाद दिला. यावेळी पूरग्रस्त लोकांना पाणी बॉटल, गहू, तांदूळ, बिस्किट, औषधी साहित्य जमा केले.
मराठा क्रांती मोर्चाचा पुढाकार
मराठा क्रांती मोर्चाच्या माध्यमातून औरंगाबादेतून सोमवारी धान्य, कपडे, आरोग्य साहित्यासह उपयोगी साहित्याचे तीन ट्रक रवाना झाले. शहरात टीव्ही सेंटर, पुंडलिकनगर आणि सिडको एन-एक अशा तीन भागात सेंटरवर ही मदत जमा करण्यात आली. यामध्ये पूरग्रस्तातील कुटुंबाला लागणारे खाद्य वस्तू बरोबर टॉवेल, ब्लँकेटस्, तेल, मीठ, साखर, पत्ती, चादर, खोबरेल तेल ते आरोग्य विषयक साहित्यसह सर्व वस्तू एका असणार आहे. साहित्य पोहचविण्यासाठी मराठा क्रांती मोर्चाचे २० समन्वयक ट्रक सोबत आहेत. टीव्ही सेंटर येथील बुलंद छावा कार्यालयात सुरेश वाकडे, सतीश वेताळ, मनोज गायके, गिरीश झाल्टे, अकंत चव्हाण, योगेश औताडे, प्रदीप हारदे, तर पुंडलिकनगराती संभाजी बिग्रेडच्या कार्यालयात शिवानंद भानुसे, बाबासाहेब दाभाडे, संजय सोमवंशी, नीलेश शेलार, वैशाली खोपडे, विठ्ठल खांदेभराड, पंढरीनाथ काकडे, प्रशांत देशमुख, रेणुका सोमवंशी आणि रेखा वाहटुळे रमेश गायकवाड यांचा समावेश आहे. जयभवानीनगर येथे 'स्वराज्य ग्रुप'तर्फे मदत निधी, साहित्य जमा करण्यात आले. यावेळी अजय गंडे, प्रदीप सोळुंके, विश्वनाथ तिकांडे, किशोर घोडके, उमेश सोमवंशी, भागवत पवार, अनिल गावंडे, सुनील पठाडे, कैलास दाडेंकर, तुकाराम मोरे, किरण मोरे, किशोर आंबट, आशिष देशमुख यांनी सहभाग घेतला.
अडीच लाख रुपयांचे औषधी
'एमआयएम'चे प्रदेशाध्यक्ष खासदार इम्तियाज जलील यांच्या वतीने खासदार निधीतून अडीच लाख रुपयांचे वैदयकीय साहित्य पाठविण्याचा निर्णय घेतला आहे. हे वैद्यकीय साहित्य औरंगाबाद जिल्हाधिकारी यांच्या मार्फत कोल्हापूर आणि सांगली जिल्हाधिकारी यांच्याकडे पाठविण्यात येणार आहे, अशी माहिती खासदार जलील यांनी दिली.
'आयसा'तर्फे पूरग्रस्तांना ५१ हजारांची मदत
औरंगाबाद इंडस्ट्रीयल सप्लायर असोसिएशनने (आयसा) राज्यातील पूरग्रस्तांसाठी मदतीचा हात पुढे केला आहे. मुख्यमंत्री सहायता निधीसाठी आयसातर्फे ५१ हजार रुपयांचा निधी देण्यात आला आहे. उद्योग राज्यमंत्री अतुल सावे यांच्याकडे हा धनादेश देण्यात आला. यावेळी साईचे संचालक विरेंद्र भांडरकर, असोसीएशनचे अध्यक्ष पंकज लोहिया, कोषाध्यक्ष जयराज पाटील, उपाध्यक्ष मुकुंद सांगवीकर, सचिव सुहास लंके, प्रकल्प प्रमुख प्रसन्न शिसोदे, माजी अध्यक्ष समीर कानडखेडकर, नितीन सोमाणी, मनीष भंडारी, दत्तात्रय बेदडे, शैलेश देशपांडे, सतीष लोणीकर, अमित कोरडे, मनोज कासलीवाल, राजेश परदेशी, संतोष कुलकर्णी, सुनील निकम, विजय जैस्वाल, मिलिंद उमदिकर, श्रीपाद कुलकर्णी यांची प्रमुख उपस्थिती होती.
'व्यापारी महासंघ' आज फेरी काढणार
व्यापारी महासंघ, सिडको हडको व्यापारी असोसिएशन, कॅनोट परिसर व्यापारी संघ यांच्यातर्फे सोमवारी मदतनिधी, साहित्य जमा करण्यासाठी फेरी काढली जाणार आहे. सकाळी ठिक १०.३० वाजता `अग्रेसन चौक, रामगिरी हॉटेल येथून सुरूवात केली जाणार आहे. फेरी कॅनोट परीसर, एमजीएम रोड, चिश्तिया पोलिस चौकी मार्गे अविष्कार कॉलनी रोड, बजरंग चौक व बळीराम पाटील स्कूल परीसरात मदत जमा करणार आहेत. यासाठी रविवारी नियोजन बैठक झाली. यावेळी व्यापारी महासंघाचे प्रतिनिधी सरदार हरिसिंग, ज्ञानेश्वरअप्पा खर्डे, बद्रिनाथ ठोंबरे, सुभाष पुजारी, सचिन अग्रवाल, सुधाकर शिंदे, सचिन खंडेलवाल, संजय गवंडर, प्रविण भोसले, शिवा लुगांरे यांची उपस्थिती होती.
