म. टा. प्रतिनिधी, औरंगाबाद

शिक्षक भरतीत समांतर आरक्षणाला फाटा देणाऱ्या शिक्षण विभागाने तब्बल ३२५८ जागा रिक्त ठेवल्या आहेत. पात्र उमेदवार असतानाही जागा रिक्त का, असा प्रश्न उपस्थित केला जात आहे. माजी सैनिकांच्या जागांबाबत नियमावलीचे पालन न करता त्या जागा रिक्त ठेवल्या आहेत.

'पवित्र' पोर्टलद्वारे शिक्षक भरतीची प्रक्रिया राबविण्यात येत आहे. नऊ वर्षानंतर भरतीचा प्रश्न मार्गी लागला असून पहिल्या टप्प्यात ९०८० पदे ही मुलाखतीशिवाय भरतीसाठी उपलब्ध होती. त्यापैकी मोठ्या प्रमाणात जागा रिक्त ठेवत मुलाखतीशिवाय ५८२२ उमेदवारांची निवड यादी जाहीर करण्यात आली. त्यामध्ये शिक्षण विभागाने अनेक गोंधळ घालून ठेवल्याचा आरोप होत आहे. समांतर आरक्षणाला फाटा देत प्रकल्पग्रस्त विद्यार्थ्यांच्या जागा इतरत्र वळविण्यात आल्या आहेत. औरंगाबादमध्ये ओबीसी प्रकल्पग्रस्तांच्या सहा जागा असून त्यातील तीन जागा या नियमाप्रमाणे भरण्यात आल्या, तीन ठिकाणी उमेदवार उपलब्ध नाहीत असे गृहित धरून त्या जागा सर्वसाधारणमधून भरण्यात आल्या. या ठिकाणी समांतर आरक्षण प्रकल्पग्रस्ताला डावलण्यात आले. तर माजी सैनिकांचा नियमही भरती प्रक्रियेत पाळला गेला नसल्याचे समोर आले आहे. माजी सैनिकांच्या जागांवर त्या प्रवर्गातील उमेदवार नसतील, तर त्या जागा त्या-त्या प्रवर्गासाठी खुल्या केल्या जातील, असे सांगण्यात आले. तशी नियमावली पोर्टलवर उपलब्ध आहे. मात्र, निवड यादी जाहीर करताना ही नियमावली पाळली गेली नसल्याचे प्रकार समोर आले. शिक्षण विभागाने माजी सैनिकांसाठी ११०० जागा रिक्त ठेवल्या आहेत. त्यासह गणित-विज्ञान विषयासाठी देखील पर्यायी उमेदवार उपलब्ध नसल्याचे सांगत जागा रिक्त ठेवल्या आहेत.

\Bसंस्थाचालकांचे भले?\B

मुलाखतीशिवाय उमेदवारांची निवड यादी जाहीर करताना उमेदवार मिळत नसल्याची कारणे देण्यात आली. या यादीत उमेदवार मिळाले नाहीत, तर १६ ऑगस्टला मुलाखतीची यादी जाहीर होणार, त्यासाठी विद्यार्थी कोठे असतील असा प्रश्न उपस्थित केला जात आहे. संस्थाचालकांसाठी शिक्षण विभागाने या जागा रिक्त ठेवल्याचा आरोप होत आहे. संस्थास्तरावर मुलाखतीसाठी एका जागेसाठी दहा उमेदवारांना बोलावण्यात येणार आहेत. त्यावेळी अधिक उमेदवार हायला हवेत, यासाठी हा खटाटोप केला जात असल्याचा आरोप होत आहे.

माजी सैनिकांच्या रिक्त जागा त्या-त्या प्रवर्गात खुल्या करण्याची घोषणा पवित्र पोर्टलच्या नियमावलीत केली होती. त्या नियमाची अंमलबजावणी झाली असती, तर मला १३५ गुण व दोन्ही 'टीईटी' पात्र असूनही घरी बसण्याची वेळ आली नसती.

-मंगेश बिडवे, योग्यताधारक बेरोजगार

म. टा. प्रतिनिधी, औरंगाबाद

शासनाच्या प्रचलित धोरणानुसार प्राथमिक, माध्यमिक, उच्च माध्यमिक शाळांना अनुदान द्यावे, या मागणीसाठी शिक्षकांनी शिक्षण उपसंचालक कार्यालयासमोर मंगळवारी चक्क शीर्षासन आंदोलन केले.

राज्यात विनाअनुदानित शाळांचा प्रश्न गंभीर बनला असून या शाळांतील शिक्षकांचे अनुदानासाठी राज्यभर आंदोलन सुरू आहे. त्यासह विविध मागण्यांसाठी महाराष्ट्र राज्य शिक्षक सेनेतर्फे उपसंचालक कार्यालयासमोर शीर्षासन आंदोलन करण्यात आले. प्रचलित धोरणानुसार अनुदान, मूल्यांकन न झालेल्या शाळांचे मूल्यांकन करावे, पेन्शन योजनेचा लाभ द्यावा, टीईटी परीक्षेचा अभ्यासक्रम निश्चित करून परीक्षा घ्यावी, पूर्वीच्या नियुक्तीधारकांना त्यातून सूट देण्यात यावी, २० टक्के अनुदानपात्र कायम सेवेत झालेल्या कर्मचाऱ्यांची नावे त्वरित शालार्थ प्रणालीत समाविष्ट करावीत, आदी मागण्या करण्यात आल्या. काहीवेळ शिक्षक शीर्षासन करत आंदोलनात सहभागी झाले. त्यानंतर उपसंचालक कार्यालयातील अधिकाऱ्यांना मागण्यांचे निवेदन देण्यात आले. निवेदनावर मराठवाडा कार्याध्यक्ष नामदेव सोनवणे, मराठवाडा अध्यक्ष दत्ता पवार, जिल्हाध्यक्ष विलास पाटील यांच्यासह विलास पाटील, रावसाहेब आधाणे, ज्ञानेश्वर सोनवणे, लक्ष्मण मुळे, शिवाजी देवरे, विजय काथार, सुगमचंद परदेशी, प्रवीण खरे, संजय गोंगे, किशन पेरकर, अनिरूद्ध काळकुंबे, कन्हैया विसपुते, अंकुश पाल, राजु देवरे यांच्या सह्या आहेत.

म. टा. प्रतिनिधी, औरंगाबाद

केंद्रीय गृहमंत्रालयाच्या वतीने देशातील अतीउत्कृष्ट तपास करणाऱ्या अधिकाऱ्यांना गृहमंत्री पदक देऊन गौरवण्यात येते. देशातील ९६ तसेच राज्यातील ११ पोलिस अधिकाऱ्यांना नुकतेच हे पदक जाहीर झाले आहे. यामध्ये औरंगाबाद विभागातील एटीएसमध्ये कार्यरत असलेले पोलिस निरीक्षक अविनाश आघाव आणि जवाहरनगर पोलिस स्टेशनमधील सहायक पोलिस निरीक्षक श्रद्धा वायदंडे यांचा समावेश आहे.

पोलिस अधिकाऱ्याच्या कारकिर्दीत गुन्ह्याचा तपास हे त्याचे अविभाज्य अंग आहे. तपास अधिकारी किती गांर्भियाने गुन्ह्याचा तपास करतो यावर गुन्ह्याचा निकाल अवलंबून असतो. अशा अतीउत्कृष्ट तपासाची दखल केंद्रीय गृहमंत्रालयाच्या वतीने देखील घेण्यात येते. गृहमंत्री पदक प्राप्त झालेले निरीक्षक अविनाश आघाव यांनी जवाहरनगर पोलिस ठाण्यात कार्यरत असताना २०१६ साली वर्धन घोडे या बालकाच्या अपहरणाचा आणि खून प्रकरणाचा तपास केला होता. तांत्रिक बाजूसह तपास करताना त्यांनी कोणतेही लुपहोल्स राहणार नाहीत याची काळजी घेतली होती. या प्रकरणी दोन्ही आरोपींना कोर्टाने या तपासाचा आधार घेत आजन्म कारावासाची शिक्षा सुनावली आहे. तसेच जवाहरनगर पोलिस स्टेशनमध्ये सध्या कार्यरत असलेल्या एपीआय श्रद्धा वायदंडे या २०१६ मध्ये ठाणे शहर पोलिस दलात कार्यरत होत्या. त्यावेळी शीळ डायघर पोलिस ठाण्यात ११ वर्षांच्या मतीमंद मुलीवर तिघांनी सामूहिक बलात्कार केला होता. वायदंडे या ठाणेनगर पोलिस ठाण्यात कार्यरत असताना त्यांची या सामूहिक बलात्काराच्या तपासासाठी विशेष तपास अधिकारी म्हणून नियुक्ती करण्यात आली होती. एपीआय वायदंडे यांनी उत्कृष्ट तपास करीत आरोपींना अटक केली. कोर्टाने या गुन्ह्यातील आरोपींना २० वर्षाची शिक्षा सुनावली आहे. नुकत्याच झालेल्या गर्भलिंग निदान चाचणी प्रकरणातही त्यांची विशेष तपास अधिकारी म्हणून नियुक्ती करण्यात आली होती.

…

आघाव यांचा राष्ट्रपती पदकानेही गौरव

अविनाश आघाव यांची पोलिस दलात २४ वर्षांची सेवा झाली आहे. नुकतेच त्यांना राष्ट्रपती पदकाने गौरवण्यात आले आहे. पोलिस महासंचालकाचे सन्मान चिन्ह देखील त्यांना प्राप्त झाले आहे. आतापर्यंत त्यांना ११७४ बक्षीसे, ९६ प्रशंसापत्र तसेच चार विशेष कामगिरींच्या नोंदीने गौरवण्यात आले आहे. उस्मानाबाद येथे कार्यरत असताना पारधी समाजाच्या समस्या, गुन्हेगारी आणि उपाययोजना यावर विशेष अभ्यास आणि या अभ्यासाचा अहवाल शासनाने विशेष योजना राबविण्यासाठी केला आहे. शहरात असताना त्यांनी अनेक गंभीर गुन्ह्याची उकल केलेली आहे.

…

वायदंडे यांची क्रीडा क्षेत्रात देशासाठी कामगिरी

श्रद्धा वायदंडे ह्या २०१० साली एमपीएससी परीक्षेच्या माध्यमातून पीएसआय म्हणून पोलिस दलात दाखल झाल्या आहेत. वायदंडे ह्या उत्कृष्ट क्रीडापटू देखील आहेत. तलवारबाजीमध्ये त्यांना राज्य शासनाचा महत्त्वाचा शिवछत्रपती पुरस्काराने गौरवण्यात आले आहे. एशीयन गेममध्ये देखील त्यांनी हँडबॉल, सॉफ्ट बॉल, तलवारबाजी या खेळात सहभाग घेत प्राविण्य मिळवले आहे. शहर पोलिस दलात कर्तव्यदक्ष पोलिस अधिकारी म्हणून त्या ओळखल्या जातात. जवाहरनगर पोलिस ठाण्याला पोलिस निरीक्षक नसताना त्यांनी काही महिने प्रभारी अधिकारी म्हणून उत्कृष्ट काम केलेले आहे.

…

वर्धन घोडे खून प्रकरणात तत्कालीन पोलिस आयुक्त अमितेशकुमार तसेच इतर अधिकाऱ्यांचे मार्गदर्शन लाभले. तपास पथकातील सर्वांनी यामध्ये परिश्रम घेतले. आरोपींना आजन्म कारावासाची शिक्षा सुनावली गेली. या गुन्ह्यातील तपास हा अशा प्रकारच्या गुन्ह्यामध्ये मार्गदर्शक ठरणार आहे. वर्धनच्या पालकांना न्याय मिळाला याचे समाधान वाटते.

अविनाश आघाव - पोलिस निरीक्षक

…

मतीमंद मुलीवर झालेला अमानुष बलात्कारामुळे मन हेलावून गेले होते. तिची अवस्था देखील बघवत नव्हती. तिला काही सांगता देखील येत नव्हते. आव्हानात्मक हा गुन्हा होता. यातील आरोपींना अटक करून सखोल तपास करण्यात आला. या तपासाआधारे कोर्टाने आरोपींना २० वर्षांची शिक्षा सुनावली आहे. निकाल लागल्यानंतर केलेल्या मेहनतीचे चीज झाल्याचे समाधान वाटले.

श्रद्धा वायदंडे - सहायक पोलिस निरीक्षक

म. टा. प्रतिनिधी, औरंगाबाद

सोलार प्लांटसाठी सात कोटीच्या कर्जाचे आमिष दाखवून महिलेची चार लाख १२ हजारांची फसवणूक करण्यात आली. मे २०१९ ते ऑगस्ट २०१९ या कालावधीत मुकुंदवाडीत हा प्रकार घडला. या प्रकरणी चार जणांविरुद्ध मुकुंदवाडी पोलिस ठाण्यात फसवणूकीचा गुन्हा दाखल करण्यात आला आहे.

याप्रकरणी पद्मा देविदास रगडे (वय ५५, रा. संजयनगर, मुकुंदवाडी) यांनी तक्रार दाखल केली. रगडे ह्या मुलगा, सुनेसह वास्तव्यास असून त्यांचा मुलगा रिक्षाचालक आहे. १५ मे रोजी त्यांनी एका वर्तमानपत्रात कर्जा संबधी जाहिरात पाहिली होती. त्यांनी जाहिरातीत दिलेल्या मोबाइल क्रमांकावर संपर्क साधला. यावेळी ऋतूजा देशपांडे नावाच्या महिलेने संवाद साधला. सोलार प्लांटसाठी नाबार्ड फायनान्स कंपनीकडून कर्ज मिळेल तुम्ही शेतीची कागदपत्रे पाठवा, असे देशपांडेने सांगितले. रगडे यांनी कागदपत्रे मेल केली असता त्यांना कर्ज मंजूर होण्यासाठी काही रक्कम भरावी लागेल, असे सांगण्यात आले. रगडे यांनी देशपांडेच्या सांगण्यावरून त्यांनी सांगितलेल्या खात्यात एक लाख बारा हजार रुपये भरले. तसेच धनंजय लेले नावाच्या व्यक्तीकडे तीन लाख रुपये रोख दिले. नाबार्ड फायनान्समधून बोलत असल्याचे सांगत गुप्ता आणि भारगावकर हे रगडे यांना तुमचा सात कोटीचा चेक तयार असून तुम्ही रक्कम लवकर भरा, असे सांगत रक्कम भरण्यासाठी भाग पाडत होते. अनेक महिने उलटले तरी रगडे यांना कोणताही चेक देण्याात आला नाही. तसेच ऋतुजा देशपांडेने पैसे परत करण्याबाबत उडवाउडवीची उत्तरे रगडे यांना दिली. या प्रकरणी रगडे यांच्या तक्रारीवरून संशयित आरोपी ऋतुजा देशपांडे, धनंजय लेले, गुप्ता, भारगावकर यांच्यावर फसवणुकीचा गुन्हा दाखल करण्यात आला आहे.

…

घर विक्री करून दिले पैसे

रगडे यांनी सात कोटीच्या कर्जासाठी त्यांचे संजयनगर येथील घर तीन लाखाला विक्री केले. तसेच दुसरे घर गहाण ठेऊन उसणे घेत दिले आहे. त्यांना कर्ज तर भेटले नाही मात्र घर गमवावे लागले असल्याचे दिसून आले.

म. टा. प्रतिनिधी, औरंगाबाद

गुरुवारी शहरात स्वातंत्र्यदिन साजरा करण्यात येणार आहे. या पार्श्वभूमीवर शहरात कडेकोट बंदोबस्त तैनात करण्यात आला आहे. पोलिस प्रशासनाने आठ विशेष पथके निर्माण केली आहे. शहरातील लॉज, हॉटेल तसेच रेल्वे स्टेशन, बसस्टँड भागात संशयितांची तपासणी करण्यात येणार आहे.

गुन्हे शाखा, सायबर सेल, विशेष शाखा तसेच मुख्यालयातील कर्मचारी मिळवून ४८ जणांची सात पथकात विभागणी करण्यात आली आहे. साध्या वेशात असलेले हे पथक रेल्वे स्टेशन, मध्यवर्ती बसस्थानक, सिडको बसस्थानक येथे प्रवाशांची तपासणी करणार आहे. तसेच शहरातील लॉज, हॉटेल आदी ठिकाणी तपासणी करणार आहे. गर्दीचे ठिकाण असलेले मॉल, मल्टीप्लेक्स आदी ठिकाणी देखील हे पथक तपासणी करणार आहे. कलम ३७० हलविल्यानंतर गुप्तचर विभागाने सर्वच शहरांना हायअलर्टचा इशारा दिला आहे. त्या अनुषंगाने ही सतर्कता बाळगण्यात येत असल्याची माहिती विशेष सूत्रांनी दिली. पोलिसांनी तैनात केलेल्या बंदोबस्तामध्ये अडीच हजार पोलिस कर्मचारी, अधिकारी तसेच सीआरपीएफच्या दोन कंपन्याचा समावेश असून ५०० होमगार्ड देखील असणार आहे.

…

चित्रीकरण आवश्यक

पोलिसांच्या या पथकामध्ये गुन्हे शाखेचे पाच, विशेष शाखेचे चार तर सायबर सेलचा एक कर्मचारी असणार आहे. पथकाने प्रवाशांची तपासणी करताना सौजन्याने वागण्याचे आदेश देण्यात आले आहे. तसेच या पथकांना कॅमेरे वाटप करण्यात आले असून तपासणी करताना चित्रीकरण करण्याचेही आदेश देण्यात आले आहेत.

म. टा. प्रतिनिधी, औरंगाबाद

पॅचवर्कच्या कामाचा महापालिकेचा मंगळवारचा मुहूर्त हुकला आहे. आता पॅचवर्कच्या कामासाठी उद्याचा (बुधवार) वायदा करण्यात आला आहे. पालिकेच्याच प्रशासनाने शहरातील अतिजोखमीच्या ७५ रस्त्यांची यादी तयार केली आहे. या रस्त्यांवर चारचार हजरांपेक्षा जास्त खड्डे असण्याची शक्यता आहे.

रस्त्यांवरच्या खड्ड्यांमुळे शहरातील नागरिक त्रस्त झाले आहेत. गेल्या आठवड्यात झालेल्या पावसामुळे खड्ड्यांची समस्या अधिकच गंभीर झाली आहे. महापालिकेकडून खड्डे बुजवण्यासाठी ठोस कार्यवाही सुरू करण्यात आली नाही, त्यामुळे महापौर नंदकुमार घोडेले यांनी सोमवारी संबंधित अधिकाऱ्यांची बैठक घेतली आणि पॅचवर्कची कामे तात्काळ सुरु करण्याचे आदेश दिले. त्यानुसार मंगळवारपासूनच पॅचवर्कची कामे केली जातील, असे अधिकाऱ्यांनी स्पष्ट केले होते. शासनाच्या शंभर कोटींच्या निधीतून जे कंत्राटदार रस्त्यांची कामे करीत आहेत, त्यांच्याकडूनच पॅचवर्कची कामे करून घेतली जातील, असे स्पष्ट करण्यात आले होते, परंतु मंगळवारी पॅचवर्कच्या कामांना सुरुवात झाली नाही. बुधवारपासून पॅचवर्कची कामे सुरू केली जातील, असे अधिकाऱ्यांनी सांगितल्याची माहिती महापौरांनी दिली. बुधवारी जळगाव रोड आणि बेगमपुरा येथील रस्त्यावर पॅचवर्कची कामे केली जाणार आहेत.

औरंगाबाद : महापालिकेचे वैद्यकीय पथक कोल्हापूर, सांगली परिसरातील पुरग्रस्त भागात मदत करण्यासाठी मंगळवारी रवाना झाले. या पथकाला महापौर नंदकुमार घोडेले, उपमहापौर विजय औताडे, सभागृहनेता विकास जैन, अतिरिक्त आयुक्त डॉ. डी. पी. कुलकर्णी, आरोग्य वैद्यकीय अधिकारी डॉ. नीता पाडळकर यांनी निरोप दिला.

वैद्यकीय अधिकारी डॉ. बाबासाहेब उनवणे यांच्या नेतृत्वाखाली हे पथक कोल्हापूरला रवाना झाले. पथकामध्ये औषध निर्माण अधिकारी संजय आडके, शेख अल्ताफ, गोविंद गिरी यांचा समावेश आहे. या पथकाच्यासोबत अग्निशमन दलाची गाडी देखील पाठविण्यात आली आहे. अत्यावश्यक औषधी पथकाच्या सोबत देण्यात आली आहेत.

म. टा. प्रतिनिधी, औरंगाबाद

'राज्यरस्ता आणि सुरक्षित रस्ता प्रत्येकाला हवा असतो मात्र, सामान्यांना अव्यावहारिक वाटणारे निर्णय अनंतराव यांनी जोखीम पत्करत स्वीकारले. या अर्थाने ते निबिड अरण्याचे वाटसरू होते,' असे प्रतिपादन पद्मश्री डॉ. अभय बंग यांनी केले. ते पुस्तक प्रकाशन कार्यक्रमात बोलत होते.

ज्येष्ठ पत्रकार अनंत भालेराव यांच्या जन्मशताब्दी वर्षानिमित्त माजी न्यायमूर्ती नरेंद्र चपळगावकर लिखित 'अनंत भालेराव - काळ आणि कर्तृत्व' या पुस्तकाचे प्रकाशन करण्यात आले. यशवंतराव चव्हाण नाट्यगृहात मंगळवारी सायंकाळी कार्यक्रम झाला. यावेळी मंचावर ज्येष्ठ सामाजिक कार्यकर्ते पद्मश्री डॉ. अभय बंग, नरेंद्र चपळगावकर, नंदिनी चपळगावकर, डॉ. सविता पानट, निशिकांत भालेराव, श्याम देशपांडे, संजीव कुलकर्णी आणि निमा कुलकर्णी यांची प्रमुख उपस्थिती होती. पुस्तकाचे प्रकाशन केल्यानंतर डॉ. बंग यांनी अनंतरावांच्या व्यक्तिमत्त्वावर प्रकाश टाकला. 'सर्वांना राजसत्ता आणि सुरक्षित रस्ता हवा असतो, अशा आशयाची रॉबर्ट क्रॉसची कविता आहे. अनंत भालेराव यांनी नेहमीच हा रस्ता टाळून आडमार्ग निवडला. वंदे मातरम् सत्याग्रह, सेलू येथे शिक्षकी पेशा सोडून पूर्णवेळ सामाजिक व राजकीय कार्यात घेतलेली उडी आणि 'मराठवाडा' वर्तमानपत्राच्या संपादकपदाची स्वीकारलेली जबाबदारी या तीन महत्त्वाच्या घटना आहेत. खऱ्या अर्थाने या घटनांनी अनंतरावांच्या आयुष्याला वेगळे वळण मिळाले. अनंतराव सुरक्षित रस्ता सोडलेले निबिड अरण्याचे वाटसरू होते. इतरांना अव्यावहारिक वाटणारे निर्णय त्यांनी नैतिकता जपत घेतले. 'पदोपदी पसरुन निखारे आपल्याच हाती' या उक्तीप्रमाणे त्यांचे आयुष्य होते. नरेंद्र चपळगावकर यांनी पुस्तकात अनंतरावांचे व्यक्तिमत्त्व ताकदीने उभे केले आहे. अनंतरावांशी माझी प्रत्यक्ष भेट कधीच झाली नाही. मात्र, पुस्तक प्रकाशनानिमित्त या थोर माणसाशी जोडला गेलो', असे बंग म्हणाले.

पुस्तक लेखनावर चपळगावकर यांनी भाष्य केले. 'अनंतरावांचे कुटुंब सतत विकसित होणारी कल्पना होती. त्या कुटुंबाला मर्यादा नव्हत्या. 'हे विश्वचि माझे घर' मानणाऱ्या वारकरी संप्रदायाचे संस्कार त्यांच्यावर होते. म्हणूनच व्यावहारीक भिंती ओलांडणारे प्रेम त्यांना मिळाले. वारकरी संप्रदाय आणि गांधीवाद हाच त्यांच्या मनाचा नैतिक पाया होता. ही नैतिकता त्यांना एवढे मोठे करून गेली की, इतर गोष्टी गौण ठरल्या. लेखनात नम्रता ठेवून त्यांनी वाईट गोष्टींवर कोरडे ओढले. लोकातील व्यक्तिमत्त्व असल्याने ते आदर्श ठरले,' असे चपळगावकर म्हणाले. प्रकाशक संजीव कुलकर्णी यांनी प्रास्ताविक केले. यावेळी विविध क्षेत्रातील नागरिक मोठ्या संख्येने उपस्थित होते.

\Bवर्तमानपत्राचे नेतृत्व\B

मराठवाडा प्रदेशाचे नेतृत्व गोविंदभाई श्रॉफ, अनंत भालेराव आणि 'मराठवाडा' वर्तमानपत्राने केले. एखाद्या भूभागाचे नेतृत्व वर्तमानपत्राने करावे, ही अचंबित करणारी गोष्ट होती, असे बंग म्हणाले. हैदराबाद मुक्तिसंग्रामात सक्रिय असताना अनंतराव आणि सहकाऱ्यांना उमरी बँक लूट प्रकरणात तुरुंगवास घडला होता. जानेवारी १९४८मधील ही घटना. या तुरुंगात गांधी हत्येतील आरोपी सावरकर, करकरे होते. अगदी लगतच्या बराकीत दोघे होते. जवळ असले तरी दोघांत विचारांची भिंत होती, असे डॉ. अभय बंग म्हणाले.

म. टा. प्रतिनिधी, औरंगाबाद

खरेदीची परिभाषा बदलणाऱ्या प्रोझोन मॉलच्या लॉन्सवर स्वातंत्र्य दिनानिमित्त गुरुवारी (१५ ऑगस्ट) रोजी सकाळी साडेसहा वाजता ध्वजवंदन व प्रोझोन रिटेलर्स सन्मान सोहळा रंगणार आहे. यंदा या सन्मान सोहळ्याचे चौथे वर्ष असून, या प्रेरणादायी उपक्रमात 'टाइम्स ग्रुप'चा देखील सहभाग असणार आहे.

गुरुवारी (१५ ऑगस्ट) सकाळी साडेसात वाजता प्रोझोनच्या लॉन्सवर मान्यवरांच्या उपस्थितीत झेंडा वंदन करण्यात येईल. विविध शाळांचे विद्यार्थी देशभक्तीपर कार्यक्रम सादर करतील. याशिवाय विविध स्थानिक कलावंत विद्यार्थ्यांसह राष्ट्रभक्तीपर गाणी सादर करून उपस्थितांचे मनोरंजन करतील. यावेळी प्रोझोनमधील रिटेलर्सना मान्यवरांच्या हस्ते सन्मानित करण्यात येणार असल्याची माहिती प्रोझोनचे सेंटर हेड मोहम्मद अर्शद यांनी दिली.

ब्रँडेड वस्तू खरेदीसाठी तरुणाईचे अतिशय लोकप्रिय ठिकाण म्हणून प्रोझोन मॉल ओळखला जात आहे. प्रोझोनमध्ये फिल्म फेस्टिवल, रास दांडिया, स्वातंत्र्य दिन, प्रजासत्ताक दिन, महाराष्ट्र दिन, गुढीपाडवा, दसरा-दिवाळी, रमजान ईद, ख्रिसमस, रक्तदान शिबीर, विविध एक्झिबिशनसारखे उपक्रम मोठ्या उत्साहात साजरे करण्यात येतात.

स्वातंत्र्य दिनानिमित्त प्रोझोनमध्ये सायंकाळी चार वाजता भारतीय सैनिकांच्या कुटुंबीयांसमवेत 'सॅल्यूट' हा मनोरंजनाचा कार्यक्रम आयोजित केला आहे. यामध्ये बँड परफॉर्मन्स, डान्स परफॉर्मन्स सादर केला जाईल. यावेळी देशभक्तीपर गीतांचे सादरीकरणही होणार आहे. ब्रिगेडियर दिग्विजय पात्रा यांच्या प्रमुख उपस्थितीत सुमारे ३० आजी-माजी सैनिकांच्या कुटुंबीयांसोबत हा सोहळा रंगणार आहे. स्वातंत्र्य दिनाच्या सोहळ्याला औरंगाबादकरांनी मोठ्या संख्येने उपस्थित राहण्याचे आवाहन प्रोझोनचे सेंटर हेड मोहम्मद अर्शद यांनी केले आहे.

म.टा.प्रतिनिधी, औरंगाबाद

गेल्या काही दिवसात नगर तसेच नाशिक जिल्ह्यात झालेल्या दमदार पावसामुळे जायकवाडीच्या उर्ध्व भागातील बहुतांश प्रकल्प तुडूंब भरली आहेत. सध्या २२ पैकी तब्बल १२ धरणांमध्ये ९० टक्क्यांपेक्षा अधिक पाणीसाठा झाला असून वाघाड, भावली व अधाला प्रकल्प शंभर टक्के भरले आहेत.

राज्याच्या एका भागामध्ये मोठ्या पावसामुळे पूरस्थिती असताना दुसरीकडे मराठवाड्याची तहान मात्र टँकरद्वारे भागवण्यात येत आहे. नाशिक जिल्ह्यात झालेल्या मोठ्या पावसामुळे मराठवाड्यातील सर्वात मोठा प्रकल्प असलेल्या जायकवाडी धरणात ९० टक्के पाण्याची आवक झाली आहे. जायकवाडी भरले असले तरी विभागातील इतर प्रकल्प मात्र पावसाअभावी कोरडेठाक पडले आहेत.

९० टक्यांपेक्षा अधिक पाणी असलेल्या प्रकल्पांमध्ये करंजवण, ओझरखेड, गंगापूर, गौतमी, कश्यपी, कडवा, दरणा, मुकणे, भंडारदरा, मुळा, तीसगाव, वालदेवी, अधाला या प्रकल्पांचा समावेश आहे.

उर्ध्व भागातील २२ प्रकल्पांमध्ये सध्या २ हजार २१२ दशलक्ष घनमीटर जिवंत साठा आहे. मात्र दुसरीकडे जायकवाडी वगळता मराठवाड्यातील सात मोठ्या प्रकल्पांमधील पाणीसाठा मृतसाठ्यात आहे. यामध्ये येलदरी, सिद्धेश्वर, माजलगाव, मांजरा व निम्न तेरणा, सिना कोळेगाव धरणांचा समावेश आहे. जिवंत पाणीसाठा असलेल्या प्रकल्पांमध्ये इसापूर, निम्न मनार विष्णूपुरी प्रकल्पांचा समावेश आहे.

म. टा. प्रतिनिधी, औरंगाबाद

नाशिक जिल्ह्यातील धुवाँदार पावसामुळे नांदूर मधमेश्वर बंधाऱ्यातून गेल्या आठवड्यात गोदावरी पात्रामध्ये मोठा विसर्ग सोडण्यात आल्यामुळे औरंगाबाद जिल्ह्यातील वैजापूर आणि गंगापूर तालुक्यातील सुमारे २७ गावांमध्ये आलेला पूर आता ओसरला आहे. पूर येण्यापूर्वीच प्रशासनाकडून या गावातील सुमारे १३३१ नागरिकांना सुरक्षित स्थळी हलविण्यात आले होते आता हे सर्व गावकरी आपापल्या घरी पोचले आहेत.

पुराचा सर्वाधिक फटका बसलेल्या वैजापूर तालुक्यातील २७ गावांमधील ९४२ नागरिकांना सुरक्षितस्थळी हलविण्यात आले होते, यामध्ये नागमठाण ५६, अव्वलगाव ३७, बाजाठाण ८३, देवगाव शनी २६, चेंडूफळ ११२, भालगाव १५०, वांजरगाव (शिंदे वस्ती) २००, डोणगाव ४० लाखगंगा १८, पुरणगाव २०, बाबतरा ५०, बाभुळगाव गंगा ८०, ढोक नांदूर तसेच गंगापूर तालुक्यातील आगर कानडगाव ८७, नेवरगाव १९४, हैबतपूर ४०, अंमळणेर ४४ तर कायगाव मधून १४ नागरीकांना सुरक्षितस्थळी हलवण्यात आले होते. यासयह काही गावांमध्ये शेतीचे नुकसान झाले आहे. प्रशासनाकडून शासकीय शाळांमध्ये या नागरिकांची राहण्याची व भोजनाची सोय करण्यात आली होती.

उर्ध्व भागामधून करण्यात आलेल्या विसर्गामुळे या गावांमध्ये प्रशासनाने हायअलर्ट जारी करण्यात आला होता. दोन्ही तालुक्यांतील नदीकाठावर असलेल्या गाव, वाड्या, वस्त्यांमध्ये पुराच्या पाण्याचा शिरकाव होऊ शकतो. नाल्यालगत असलेल्या गावांना पाण्याचा वेढा पडण्याची शक्यता आहे. त्यामुळे परि‌स्थिती हाताळण्यासाठी प्रशासनानेही 'टीम' तयार केल्या होत्या. तसेच संभाव्य पूरस्थितीमुळे जिल्हा प्रशासनाने वेळीच बचावकार्याची तयारी केली होती. यासह 'एसडीआरएफ' व एनडीआरएफच्या जवानांच्या तुकडीलाही पाचारण करण्यात आले होते. यंदा आतापर्यंत नांदूर मधमेश्वरमधून २ लाख ९१ हजार क्युसेकने पाणी सोडण्यात आले असल्यामुळे या गावांना पुराने वेढा दिला होता. उपविभागीय अधिकारी संदीपान सानप यांच्या मार्गदर्शनाखाली महसूलचे पथक तसेच पोलिस प्रशासनानेही नागरिकांना सुरक्षितस्थळी पोचवण्यासाठी प्रयत्न केले होते.

२८०० हेक्टरचे नुकसान

गोदावरीला आलेल्या पुरामुळे वैजापूर तालुक्यातील पुराचा फटका बसलेल्या सर्व १७ गावांमधील तब्बल दोन हजार ८०० हेक्टर शेतजमीनीचे मोठे नुकसान झाले. नागरिकांना आपापल्या घरी सुरक्षित पोचवल्यानंतर प्रशासनाकडून नुकसानीच्या पंचनामे करण्यास सुरुवात झाली आहे. तालुक्यातील वांजरगाव (शिंदेवस्ती) येथील सर्वाधिक ३५० हेक्टर शेतजमीनीचे पुरामुळे नुकसान झाले आहे.

म. टा. प्रतिनिधी, औरंगाबाद

जिल्हा परिषद शिक्षकांच्या भरतीसाठी टीईटी उत्तीर्ण झालेल्या उमेदवारांची यादी नऊ तारखेला जाहीर झाली. या शिक्षकांच्या कागदपत्र तपासणी मोहिमेला मंगळवारपासून सुरुवात करण्यात आली. औरंगाबाद जिल्हा परिषदेत २०३ शिक्षक रुजू होणार आहेत. यापैकी मंगळवारी आलेल्या शिक्षकांना दुपारी दोन वाजेपर्यंत प्रक्रिया सुरू न झाल्याने ताटकळावे लागले.

शिक्षण विभागाने राज्यातील जिल्हा परिषद शिक्षण विभागात भरतीसाठी टीईटी पात्र बीएड व डी. एड शिक्षकांना पवित्र पोर्टलवरून प्रक्रिया राबविली आहे. १३ ते २५ ऑगस्ट दरम्यान पात्र उमेदवारांची कागदपत्रे तपासली जाणार आहेत. राज्यातील ३५ जिल्हा परिषदांमधून केवळ औरंगाबाद झेडपीतच आजपासून ही प्रक्रिया सुरू झाली. कागदपत्र तपासणीसाठी राज्यभरातून उमेदवार आले होते. सकाळच्या सत्रात जिल्हा परिषद मुलींच्या शाळेत कागदपत्र तपासणी प्रक्रिया सुरू होणे अपेक्षित होते. पण दुपारी दोनपर्यंत काहीच हालचाल झाली नाही. त्यामुळे बाहेरगावाहून आलेल्या उमेदवारांना प्रतीक्षा करावी लागली. दोननंतर तीन स्वतंत्र टेबलवर प्रक्रिया राबविली गेली. सूत्रांनी दिलेल्या माहितीनुसार माहिती भरून घ्यावयाचे फॉर्म प्रिंट झाले नसल्याने प्रक्रियेस उशीर झाला.

\Bनिवड झालेले उमेदवार \B

मराठी माध्यम डीएड १३१

मराठी माध्यम बीएड ५०

डीएड उर्दू २१

बीएड उर्दू १

औरंगाबाद : कोल्हापूर, सांगली येथील पुरग्रस्तांना मदत करण्यासाठी महावितरणमधील सबॉर्डिनेट इंजिनीअर्स असोसिएशनने एक दिवसाचे वेतन देण्याचा निर्णय घेतला आहे. त्याचे संमतीपत्र संघटनेने महावितरणाचे मुंबई कार्यालयातील 'ह्युमन रिसोर्स' विभागाचे संचालक चंद्रशेखर एरमे यांना दिले.

सबॉर्डिनेट इंजिनीअर्स असोसिएशनची कार्यकारिणीची बैठक घेण्यात आली. यावेळी राज्यातील सर्व अभियंत्यांनी एक दिवसाचे वेदन पुरग्रस्त शहरांसाठी मुख्यमंत्री मदत निधीला देण्याचा निर्णय घेतला. औरंगाबाद परिमंडळात १२०० अभियंते आहेत. याशिवाय महावितरणमध्ये राज्यात दहा हजारांवर अभियंते कार्यरत आहेत. या सर्व अभियंत्यांचे एक दिवसाचे वेतन हा मुख्यमंत्री मदत निधीला देण्याचा निर्णय घेण्यात आला आहे.

यासंदर्भात औरंगाबाद महावितरण कार्यालयात आलेले मुंबई कार्यालयाचे संचालक चंद्रशेखर येरमे यांच्याकडे असोसिएशनच्या पदाधिकाऱ्यांनी पत्र दिले. यावेळी सबॉर्डिनेट इंजिनीअर असोसिएशनचे सहसचिव अभियंता अविनाश चव्हाण, सचिन लालसरे, विपुल पिंगळे, रमेश वाघचौरे, प्रकाश वाहुळे, दादासाहेब काळे, इरफान खान, राजेश येडे, यांची उपस्थित होती.

……

म. टा. प्रतिनिधी, औरंगाबाद

सोळा वर्षांच्या भाचीच्या अपहरण प्रकरणात मावस आत्याला पैठण पोलिसांनी अटक करुन तिला न्यायालयात हजर केले असता, आरोपीला शुक्रवारपर्यंत (१६ ऑगस्ट) पोलिस कोठडीत ठेवण्याचे आदेश विशेष न्यायाधीश ए. एस. खडसे यांनी दिले. विशेष म्हणजे मुलीने धाडसाने आरोपींच्या तावडीतून सुटून पळ काढला आणि अंधारात शेतवस्ती गाठून मदतीचे याचना केली आणि शेतवस्तीवरील नागरिकांनीही तिला वेळेवर मदत करीत आई-वडिलांकडे मुलीला सुपूर्द केली.

बीड जिल्ह्यातील १६ वर्षीय अल्पवयीन मुलगी आपल्या मावस आजीसोबत गेवराई तालुक्यात नागपंचमीच्या सणाला गेली होती. तिथून तिला मावस आत्याच्या गावी नेण्यात आले. त्यावेळी भाचीला काही दिवस येथे राहू, असे म्हटल्यामुळे नातीला मावस आजी तिच्या मुलीकडे म्हणजेच पीडितेच्या आत्याकडे सोडून निघून गेली. दरम्यान, सायंकाळी दुकानातून क्रिम आणण्यासाठी मुलगी व तिची आत्या दुकानावर आल्या होत्या. क्रिम घेऊन घराकडे निघाल्या असता रस्त्यात थांबलेल्या कारमधील मुलांसोबत आत्या बोलत थांबली. आजुबाजूला पाहत कारमधून योगश नावाचा मुलगा उतराला आणि मुलीस कारमध्ये ढकलेले. त्यावेळी मुलीने प्रतिकार करत आत्याच्या नावाने आरडाओरड केला. मात्र आत्याने कुठलाही विरोध न करता प्रकार शांतपणे पाहत थांबली आणि कार भरधाव वेगाने पुढे निघून गेली. कारमधील चौघे दारू प्याले व मुलीशी लगट करण्याचा प्रयत्न केला. थोड्या अंतरावर एकजण खाली उतरला आणि लगोलग अन्य दोघे खाली उतरले. कारमध्ये कोणी नसल्याचे पाहून मुलीने कारमधून पळ काढला. हे लक्षात येताच कारमधील मुलांनी मुलीचा पाठलाग केला. मात्र मुलगी गवतात लपून राहिली. कार निघून गेल्यानंतर ती बाजूच्या रस्त्याने चालत गेली. त्यानंतर मुलीने अंबड तालुक्यातील शेतवस्तीवरचा दरवाजा वाजवून मदतीची याचना केली. त्यावेळी त्या वस्तीवर व्यक्तीने त्याच्या मोबाईलवरुन मुलीच्या वडिलांना फोन लावला. काही वेळेनंतर मुलीचे आई-वडील व चुलते चारचाकी वाहनातून मुलीला घेण्यासाठी आले. भेटीनंतर मुलीने घडला प्रकार सांगितला.

\Bआरोपींची नावे निष्पन्न करणे बाकी

\Bसंबंधित मुलीच्या आईच्या तक्रारीवरुन मावस आत्याविरुद्ध गुन्हा दाखल होऊन पैठण पोलिसांनी तिला अटक केली. तिला विशेष न्यायालयात हजर केले असता, आरोपींची नावे निष्पन्न करणे, गुन्ह्यातील कार जप्त करणे बाकी असून गुन्ह्याच्या तपासासाठी आरोपीला पोलिस कोठडी देण्याची विनंती सहाय्यक सरकारी वकील आर. सी. कुलकर्णी यांनी न्यायालयात केली. ही विनंती मान्य करुन न्यायालयाने आरोपीला शुक्रवारपर्यंत पोलिस कोठडी सुनावली.

म. टा. प्रतिनिधी, औरंगाबाद

औरंगाबादकरांना विविध १३ प्रजातींच्या गुलाबाची पाच हजारांवर रोपट्यांनी महापालिकेचे रोझ गार्डन बहरमार आहे. मजनुहिल परिसरातील हे उद्यान स्वातंत्र्य दिनापासून सर्वसामान्यांसाठी खुले केले जाणार आहे. नागरिकांना सुरुवातीचे काही दिवस उद्यानात विनाशुल्क प्रवेश करता येणार आहे.

महापालिकेचे तत्कालीन आयुक्त असीम गुप्ता यांनी रोझ गार्डनची कल्पना मांडली होती. त्यादृष्टीने काम देखील सुरू केले होते, पण त्यांच्या बदलीनंतर या कामाकडे महापालिकेचे दुर्लक्ष झाले. रोझ गार्डनसाठी राज्य शासनाच्या पर्यटन विभागाने चार कोटींचा निधी दिला. त्याशिवाय जिल्हा नियोजन समितीने अडीच कोटी रुपये दिले. निधी उपलब्ध असताना देखील उद्यानाचे काम होत नव्हते. डॉ. हर्षदीप कांबळे महापालिकेचे आयुक्त म्हणून आले आणि त्यांनी रोझ गार्डनच्या संकल्पनेला गती देण्याचे काम केले. देशाच्या विविध भागातून गुलाबाची रोपटी आणण्यासाठी त्यांनी नियोजन सुरू केले. दरम्यानच्या काळात त्यांची बदली झाली. त्यानंतर आता विद्यमान आयुक्त डॉ. निपुण विनायक यांनी या प्रकल्पात लक्ष घातले आणि तो पूर्णत्वास नेला.

रोझ गार्डनचा वैशिष्ट्यपूर्ण आराखडा तयार करण्यात आले आहे. गुलाबाच्या १४ पाकळ्यांच्या माध्यमातून रोझ गार्डनने गुलाबाचा आकार घेतला आहे. उद्यानात गुलाबांच्या १३ प्रजातींची पाच हजार २२० रोपटी लावण्यात आली आहेत. वेगवेगळ्या रंगाची आकर्षक गुलाब फुले स्थानिक नागरिकांना आणि पर्यटकांना आकर्षित करणारी ठरणार आहेत. जून महिन्यात गुलाबांच्या रोपट्यांच्या लागवडीला सुरुवात करण्यात आली. शास्त्रोक्त पद्धतीने लागवड करण्यात आली. रोझ गार्डनसाठी उद्यान अधीक्षक विजय पाटील आणि शाखा अभियंता गोपीकिशन चांडक यांनी विशेष परिश्रम घेतले.

स्वातंत्र्य दिनाच्या मुहूर्तावर रोझ गार्डन सर्वसामान्यांसाठी खुले करण्यात येणार असल्याची माहिती महापौर नंदकुमार घोडेले यांनी दिली. सकाळी दहा ते सायंकाळी सहापर्यंत हे गार्डन खुले असेल. सध्या विधान परिषद निवडणुकीची आचारसंहिता असल्यामुळे उद्घाटन करता येणार नाही. आचारसंहिता संपल्यावर ज्येष्ठ नेत्यांच्या उपस्थितीत गार्डनचे उद्घाटन करू, असे ते म्हणाले.

\Bदोन लाख लिटरचा जलकुंभ\B

रोझ गार्डनसाठी पाण्याची स्वतंत्र व्यवस्था करण्यात आली आहे. डॉ. सलीम अली सरोवराच्या लगत असलेल्या उद्यानात विहीर आहे. या विहिरीला उन्हाळ्यात देखील खूप पाणी असते. त्यामुळे या विहिरीपासून रोझ गार्डनपर्यंत पाइप लाइन करण्यात आली आहे. रोझ गार्डनच्या परिसरात उंचावर दोन लाख लिटर क्षमतेचा जलकुंभ तयार करण्यात आला आहे. विहिरीतले पाणी थेट जलकुंभात सोडले आहे. जलकुंभातून गार्डनमधील गुलाबाच्या प्रत्येक पाकळीमध्ये पाण्याचे कनेक्शन देण्यात आले आहे. त्या माध्यमातून प्रत्येक पाकळीतील गुलाबाच्या रोपांना पाणी दिले जाते. त्यामुळे उन्हाळ्यातही रोझ गार्डन टवटवीत राहील, असा विश्वास व्यक्त केला जात आहे.

म. टा. प्रतिनिधी, औरंगाबाद

वडगाव कोल्हाटी येथील गायरान जमिनींची कायदेशीर नोंद असूनही सिडको प्रशासनाने हस्तांतर केले आहे. सातबारामध्ये नोंद करुन मालकी हक्क प्रदान करावा या मागणीसाठी भीमशक्ती संघटनेने केली आहे. या मागणीसाठी विभागीय आयुक्तालयासमोर उपोषण सुरू आहे.

वडगाव कोल्हाटी येथे गट क्रमांक चार व १४ येथील जमीन १९७८ पासून मागासवर्गीय, इतर मागासवर्गीय आणि आदिवासी समाज कसत आहे. याची नोंद १९८५ मधील पंचनामे अतिक्रमण नोंदवहीत आहे. तरीसुद्धा ही जागा खोटे पंचनामे करून सिडको प्रशासनाने हस्तांतरित केल्याचा आरोप भीमशक्ती संघटनेने केला आहे. ही जमीन परत मिळवण्यासाठी आंदोलकांनी विभागीय आयुक्तालयासमोर उपोषण सुरू केले आहे. जमिनीवरील पिकांची व घरातील सामानाची नासधूस सिडकोचे वसाहत अधिकारी गजानन सातोटे व इतर कर्मचाऱ्यांनी केल्याचा आरोप आंदोलकांनी केला आहे. याबाबत विभागीय आयुक्तालयांना निवेदन देण्यात आले. महाराष्ट्र संघटक बाबूराव वाकेकर यांच्या नेतृत्वाखाली आंदोलन करण्यात आले. या आंदोलनात मोहन चव्हाण, बन्सी चव्हाण, प्रेम चव्हाण, भारती चव्हाण, भानुदास साळवे, विजय चव्हाण, लता चव्हाण, अजय वाघमारे आदी सहभागी झाले आहेत.

म. टा. प्रतिनिधी, औरंगाबाद

कोल्हापूर, सांगली जिल्ह्यांतील संकटात सापडलेल्या नागरिकांना जिल्हा व्यापारी महासंघानेही पुढाकार घेतला आहे. वेणुताई चव्हाण शाळेच्या विद्यार्थ्यांनीही मदतफेरी काढून निधी संकलित केला. शहरातील एका औषध विक्रेत्याने पाच लाख रुपयांची औषधे पुरग्रस्त भागातील गरजू रुग्णांसाठी मंगळवारी पाठविली.

जिल्हा व्यापारी महासंघाने सोमवारी शहर, सिडको परिसरात निधी संकलनासाठी फेरी काढली होती. त्यात सुमारे पाच लाख रुपयांचा निधी जमा झाला. मुख्यमंत्री मदत निधीसाठी पाच लाख रुपयांचा धनादेश जिल्हाधिकारी उदय चौधरी यांच्याकडे सुपूर्द करण्यात आला आहे. उद्योजक मानसिंह पवार, महासंघाचे अध्यक्ष जगन्नाथ काळे, मराठवाडा चेंबर्स ऑफ ट्रेंड अँड कॉमर्सचे प्रफुल्ल मालाणी लक्ष्मीकांत राठी, सरदार हरिसिंग सरदार, कचरू वेळंजकार, विजय जैस्वाल, जयंत देवळांकर, ज्ञानेश्वर अप्पा खर्डे, अनंत बोरकर, बद्रीनाथ ठोंबरे, सचिन खंडेलवाल, सचिन अग्रवाल, संजय गवंडर आदी पदाधिकारी उपस्थित होते.

\Bपुरग्रस्तांसाठी औषधी\B

पूरग्रस्त भागात रोगराईची होण्याची भीती व्यक्त केली जात आहे. त्यामुळे औषध विक्री व्यवसायिक असलेल्या औरंगपुरा येथील मित्तल परिवाराने संसर्जजन्य आजारांसाठी आणि विविध प्रतीजैविके अशी पाच लाख रुपयांची औषधी दिली आहेत. पुणे येथील डॉ. प्रवीण पवार व त्यांच्या पथकाकडे ही औषधे सुपुर्द करण्यात येणार असून मंगळवारी हि औषधे पाठविण्यात आल्याचे औषध विक्रेते हरिषचंद मित्तल यांनी सांगितले. निखील मित्तल, निलेश मित्तल, शंकर वाणी आदी यावेळी उपस्थित होते. दरम्यान, सिडको परिसरातील वेणूताई चव्हाण शाळेतील विद्यार्थ्यांनी पुरग्रस्त भागातील नागरिकांच्या मदतीसाठी निधी संकलन फेरी काढली. सिडको एन आठ येथील विविध कॉलनी परिसरातून ही फेरी काढण्यात आली. फेरीदरम्यान जमा झालेली रक्कम जिल्हाधिकाऱ्यांमार्फत मुख्यमंत्री मदत निधीत जमा केली जाणार आहे.

\B५१ हजारांची मदत\B

भाजपचे नगरसेवक राजू शिंदे यांनी ५१ हजार रुपयांची मदत केली. विधानसभेचे अध्यक्ष हरिभाऊ बागडे यांचा १७ ऑगस्ट रोजी वाढदिवस आहे. वाढदिवसानिमित्त कोणतेही कार्यक्रम न घेता पूरग्रस्तांसाठी मदत करा, असे आवाहन बागडे यांनी केले आहे. त्या आवाहनाला प्रतिसाद देत राजू शिंदे यांनी ५१ हजार रुपयांचा धनादेश बागडे यांच्या स्वाधीन केला. यावेळी गोकुळ मलके, दामूअण्णा शिंदे, रवी कावडे, आकाश पवार, महेश वाजे, स्वप्नील दाभाडे उपस्थित होते.

म. टा. प्रतिनिधी, औरंगाबाद

राज्य कर्करोग संस्था अर्थात कॅन्सर हॉस्पिटलच्या विस्तारांतर्गत रेडिओथेरपी विभागाच्या दुसऱ्या युनिटच्या बांधकामासाठी ३८ कोटी ७५ लाखांच्या निधीला नुकतीच प्रशासकीय मंजुरी मिळाली असल्याने विभागाच्या तीन नवीन मजल्यांच्या बांधकामाचा मार्ग मोकळा झाला आहे. या विस्तारीत विभागात लिनॅक, ब्रेकेथेरपी यासारख्या आणखी अद्ययावत उपकरणांसह मायनर ओटी, डे-केअर तसेच विविध वॉर्ड असणार आहेत. निविदा प्रक्रिया पूर्ण झाल्यानंतर बांधकाम सुरू होऊन वर्षभरात काम होण्याचे संकेत आहेत. त्याचवेळी वेगवेगळ्या उपकरणांची खरेदी प्रक्रिया सुरू असून, पाच ते सहा उपकरणेदेखील हॉस्पिटलमध्ये दाखल झाली आहेत.

विस्तारीकरणाची प्रक्रिया पूर्ण झाल्यानंतर कॅन्सर हॉस्पिटल हे सुमारे ३०० खाटांचे होणार आहे. याच विस्तारित बांधकामासाठी यापूर्वी ३१ कोटी सात लाखांच्या प्रस्तावाला शासनाने मान्यता दिलेली होती, मात्र सुधारित प्रस्ताव २०१५-१६मध्ये तयार झाला होता व सध्याच्या दरानुसार एप्रिलमध्ये सादर झालेला 'डीपीआर' ७७ कोटींवर गेला होता. त्यामुळे काही प्रमाणात बदल करून अधिष्ठाता डॉ. कानन येळीकर यांच्या मार्गदर्शनाखाली सुधारित ३८ कोटी ७५ लाखांचा 'डीपीआर' शासनाला मंजुरीसाठी पाठविण्यात आला होता. त्यानंतर विभागाच्या तळमजल्यासह दुसऱ्या व तिसऱ्या मजल्याच्या बांधकामासाठी ३८ कोटी ७५ लाखांच्या प्रस्तावाला नुकतीच प्रशासकीय मंजुरी मिळाली आहे. यापुढे लवकरच निविदा प्रक्रिया राबविण्यात येईल. निविदा प्रक्रियेनंतर वर्ष ते दीड वर्षभरात बांधकाम पूर्ण होऊ शकेल, असे हॉस्पिटलचे विशेष कार्य अधिकारी डॉ. अरविंद गायकवाड यांनी सांगितले. नवीन ठिकाणी तळमजल्यावर लिनॅक उपकरणासाठी बंकर तयार करण्यात येणार असून, या बंकरवर दोन मजले होतील. यामध्ये तळमजल्यावर बंकरसह बाह्यरुग्ण विभाग, कर्मचाऱ्यांसाठी कक्ष, मायनर ओटी असेल. त्यावरील पहिल्या मजल्यावर ४२ खाटांचा वॉर्ड असेल, तर दुसऱ्या मजल्यावर दोन वॉर्ड होतील. सध्याच्या इमारतीवर एक मजल्याचे बांधकाम होणार असून, या मजल्यावर आठ आयसोलेशन कक्ष, १६ खाटांचे एमआयसीयू, १५ खाटांचे पेइंग रूम व इतर कक्ष तसेच वार्ड होतील, असेही सांगण्यात आले.

\Bउपकरणे असतील सर्वांत अद्ययावत

\Bकॅन्सर हॉस्पिटल हे २०१२ मध्ये सुरू होण्यापूर्वीच कित्येक महिने अगोदर लिनॅक, ब्रेकेथेरपी व इतर कोट्यवधींची अद्ययावत उपकरणे हॉस्पिटलमध्ये दाखल झाली होती. त्यावेळीही ती सर्व उपकरणे अद्ययावत होती आणि आता विस्तारीकरणामध्ये दाखल होत असलेली व नजिकच्या भविष्यात दाखल होणारी सर्व उपकरणेदेखील आजच्या स्थितीनुसार अद्ययावत असणार आहे. नवीन उपकरणांमध्येही लिनॅक, ब्रेकेथेरपी व इतर उपकरणे दाखल होणार आहेत, असेही हॉस्पिटलच्या सूत्रांनी सांगितले.

म. टा. प्रतिनिधी, औरंगाबाद

इन्स्टिट्यूट ऑफ चॉर्टर्ड अकाउंटन्सी ऑफ इंडियातर्फे (आयसीएआय) घेण्यात आलेल्या चार्टर्ड अकाउंटंट (सीए) अंतिम परीक्षेचा निकाल मंगळवारी सायंकाळी जाहीर करण्यात आला. परीक्षेत औरंगाबादच्या विद्यार्थ्यांनी चांगल्या प्रकारे यश मिळविले.

यंदा लोकसभा निवडणुकांमुळे सीएची परीक्षा पुढे ढकलण्याची वेळ आली होती. सुधारित वेळापत्रकानुसार २७ मे ते १२ जून दरम्यान विविध १३९ परीक्षा केंद्रावरून ही परीक्षा घेण्यात आली. त्या परीक्षेचा निकाल मंगळवारी जाहीर करण्यात आला. निकालाचे प्रमाण अत्यल्प असले तरी औरंगाबादमधील विद्यार्थ्यांनी परीक्षेत यश मिळविले आहे. औरंगाबादमध्ये ६५० विद्यार्थ्यांनी अंतिम परीक्षा दिली. त्यापैकी उत्तीर्ण विद्यार्थ्यांचा टक्का चांगला आहे. उत्तीर्ण विद्यार्थ्यांमध्ये रोहन खंडेलवाल, सौरभ साबु, श्रद्धा दक्षिणे, अभिनव शर्मा, रोहन मुगदिया, यश जैन, निधी कापडिया, कुणाल गादिया अशा विद्यार्थ्यांचा समावेश आहे. शासकीय सुटी असल्याने एकमेकांना फोन करून निकालाबाबत विचारपूस करत होते. अंतिम निकालानंतर एकमेकांची भेट घेत विद्यार्थ्यांनी एकमेकांचे अभिनंदन केले. निकालानंतर बहुतांशी विद्यार्थी नोकरीकडे वळतात किंवा काहीजन पॅक्टीस करतात. सुरुवातीला नोकरी करण्याकडे कल असेल, चांगल संधी मिळाली तर प्रॅक्टिसही करण्याकडे लक्ष असल्याचे 'मटा'ला रोहन खंडेलवाल याने सांगितले.

…म. टा. प्रतिनिधी, औरंगाबाद

राज्यातील विविध भागांत पूर परिस्थिती निर्माण झाली होती. त्यामुळे औरंगाबाद विभागातील बसच्या एक हजार ५८५ फेऱ्या रद्द करण्यात आल्या आहेत. यामुळे गेल्या १२ दिवसांत एसटी विभागाला ५४ लाख ७६ हजार रुपयांचा फटका बसलेला आहे.

राज्यात मुंबईसह अन्य भागात झालेल्या अतिवृष्टीमुळे पूरसदृश्य परिस्थिती निर्माण झाली होती. मुंबईसह नाशिक येथूनही १४ दिवसांपूर्वी जायकवाडी धरणाकडे पाणी सोडण्यात आले होते. अतिवृष्टीमुळे मुंबई, नाशिक, सूरत, अहमदाबाद, बोरीवली, सिल्लोड, रायपूर, वैजापूर, कोपरगाव, श्रीरामपूर आणि कन्नड-नागापूर या मार्गावरील बस सेवा रद्द करण्यात आली होती. एक ऑगस्ट ते १२ ऑगस्टदरम्यान एकूण एक हजार ५८५ फेऱ्या रद्द करण्यात आले आहे. यामुळे एक लाख ९१ हजार ७१० किलोमीटर रद्द करण्यात आले आहे. यामुळे एकूण ५४ लाख ७६ हजार ८४७ रुपयांचा फटका एसटी विभागाला बसलेला आहे.

औरंगाबाद विभागातून रद्द करण्यात आलेल्या औरंगाबाद-मुंबई, बोरीवली ही सेवा पुन्हा सुरू करण्यात आली. शिवाय औरंगाबाद-नाशिक ही बससेवाही पुन्हा सुरू करण्यात आली आहे मात्र, अजूनही औरंगाबाद-कोल्हापूरकडे जाणाऱ्या एसटी बस रद्द करण्यात आलेल्या आहेत. कोल्हापूर रस्त्यावर पूर ओसरू लागला असला तरी, वाहनांच्या लागलेल्या रांगांमुळे या मार्गावर बस सोडू नका, असा निरोप आल्याने या फेऱ्या रद्द केल्या असल्याची माहिती मध्यवर्ती बस स्थानकाकडून देण्यात आली आहे.