म. टा. प्रतिनिधी, पैठण
अतिक्रमण न काढण्यासाठी ४५ हजार रुपयांची लाच घेतना पकडले गेलेले नगर पालिकेतील वरिष्ठ लिपिक व्यंकटी पापूलवारने जामिनानंतर रुजू होताच सूडबुद्धीने कारवाई सुरू केली आहे. अँटी करप्शन विभागाकडे तक्रार करणाऱ्याचा व्यापाऱ्याचे दुकान पाडण्यासाठी नाथ मंदिर परिसरातील दुकाने नोटीस न देता गुरुवारी (२६ फेब्रुवारी) पाडली.
अतिक्रमण न काढणे व भोगवट्याची मुदत वाढवण्यासाठी तिरूप परदेशी यांच्याकडून ४५ हजार रुपयांची लाच घेताना व्यंकटी पापूलवार याला मंगळवारी (२४ फेब्रुवारी) रात्री अँटी करप्शन विभागाने सापळा लावून पकडले. पापूलवारला बुधवारी जामीन मिळाला व गुरुवारी नगर पालिकेत कामावर रुजू झाले. नगर पालिकेनेही त्यांना अतिक्रमण विरोधी पथकप्रमुखपदी रुजू करून घेतले. रुजू होताच पापूलवारने तक्रारदार परदेशी यांचे दुकान जमीनदोस्त केले. परदेशी यांचा दुकान पाडता यावे यासाठी त्या परिसरातील १५ दुकाने नोटीस न देता पाडली. त्याबद्दल विचारणा केली असता, नगर पालिकेने नाथ मंदिर परिसरात भोगवटा तत्वावर दिलेल्या सर्व जागा रद्द करण्याचा निर्णय घेतला आहे, असे पापूलवारने सांगितले. एक वर्षापासून प्रभारी मुख्याधिकारी असलेले सुधीर शेट्टी यांना माहिती विचारली असता, त्यांनी मला याविषयी काहीच माहिती नाही. विचारून सांगतो, असे सांगून कानावर हात ठेवले.
दरम्यान, मागच्या एक वर्षापासून मुख्याधिकारी नसल्याने नगर पालिकेच्या कर्मचार्‍यांनी सुरू केलेल्या मनमानी कारभाराची जिल्हाधिकारी यांनी दखल घेतली असून त्यांनी पैठणचे तहसिलदार संजय पवार यांच्याकडे पैठण नगर पालिकेच्या मुख्याधिकारी पदाची सूत्रे देण्याचा निर्णय घेतला आहे.
नाथमंदिर परिसरातील अतिक्रमणे गेल्या आठवड्यात काढली. आता पूर्वसूचना न देता गुरुवारपासून जागा मोकळी करा, असे सांगितले आहे. - नारायण कणसे, व्यापारी
नाथमंदिर परिसरातील व्यापारी वर्षभर नाथषष्टी यात्रेची वाट बघत पाहतात. नगर पालिकेने यात्रेपर्यंत वेळ द्यावा. - भानुदास जाधव, व्यापारी
तहसीलदारांकडे सूत्रे
नगर पालिकेतील अनागोंदीची जिल्हाधिकाऱ्यांनी दखल घेतली असून तहसीलदार संजय पवार गुरुवारी मुख्याधिकारी पदाची सूत्रे सोपवण्यात आली.
फटाके फोडून स्वागत
व्यंकटी पापूलवार जामिनावर सुटका झाल्यानंतर बुधवारी रात्री आठ वाजता पैठणमध्ये दाखल झाले तेव्हा समर्थकांनी महाराणा प्रतापसिंह चौकात फटाके फोडून स्वागत केले. यावेळी तक्रारदाराच्या दुकानासमोरही फटाके फोडण्यात आले.
तक्रारदाराचे दुकान पाडले, पैठणध्ये अनागोंदी
