मार्च महिना अर्धा संपत आला तरी 'स्वाइन फ्लू'चे प्रमाण कमी होण्याची कुठलीही शक्यता दिसत नाही. सध्या सुरू झालेल्या पावसामुळे आजारावर नियंत्रणासाठी एप्रिल महिना उजाडण्याची शक्यता आहे. घाटी हॉस्पिटलमध्ये रोजच तीन ते चार संशयित रुग्ण येत असून, एखादा तरी पॉझिटिव्ह रिपोर्ट येत आहे. सध्या स्वाइन फ्लू वॉर्डातील १४ पैकी ७ रुग्ण पॉझिटिव्ह असून ६ गंभीर रुग्ण व्हेंटिलेटरवर आहेत. व्हेंटिलेटरवरील ४ रुग्ण पॉझिटिव्ह आहेत.
पावसाळ्यातील दमट हवामानात दिसून येणारा 'स्वाइन फ्लू' यंदा जानेवारीमध्ये दिसून आला. फेब्रुवारीत रुग्णांची संख्या वाढत जाऊन सहा ते सात पॉझिटिव्ह रुग्णांचा मृत्यू झाला. उष्ण हवामानामुळे मार्चच्या पहिल्या आठवड्यापर्यंत आजार नियंत्रणात येण्याची शक्यता तज्ज्ञांकडून व्यक्त होत असताना गेल्या आठवड्यातील अवकाळी पाऊस व वातावरण बदलामुळे रुग्ण संख्या अपेक्षेप्रमाणे कमी झाली नाही. त्यातच मार्चच्या पहिल्या आठवड्यात पुन्हा चार रुग्णांचा मृत्यू झाल्याने आजार वाढत असल्याचे स्पष्ट झाले. काही जिल्ह्यांत दोन दिवसांपासून होत असलेल्या पावसामुळे वैद्यकीय क्षेत्राची चिंता वाढली आहे.
११ महिन्यांचे बालक व्हेंटिलेटरवर
काही दिवसांपासून स्वाइन फ्लू वॉर्डात एक ११ महिन्यांचे बाळ व्हेंटिलेटरवर असून, स्वाइन फ्लू पॉझिटिव्ह असल्याचे समजते. याशिवाय व्हेंटिलेटवरील पाच रुग्णही कमी अधिक प्रमाणात गंभीर असल्याचे समजते. विशेष म्हणजे मागच्या आठवड्यापासून उपचार घेणाऱ्या पॉझिटिव्ह रुग्णाला मंगळवारी प्रकृती सुधारल्यामुळे सुटी देण्यात आली.
जिल्हाधिकाऱ्यांकडून दखल
स्वाइन फ्लू वॉर्डासाठी आवश्यक असलेल्या वैद्यकीय साहित्याबाबत जिल्हाधिकारी विक्रमकुमार यांनी माहिती मागवली. घाटी प्रशासनाकडून त्यांना लोशन, मास्क, व्हेंटिलेटर ट्यूब आदी साहित्याची गरज असल्याचे कळविण्यात आले आहे.
पाऊस किंवा पावसाळी दमट हवामान 'स्वाइन फ्लू'साठी पोषक आहे. पाऊस पडून गेल्यानंतरही आठ ते दहा दिवस त्याचा परिणाम राहू शकतो. त्यामुळे मार्चअखेरपर्यंत तरी 'स्वाइन फ्लू'चे प्रमाण कमी होण्याची शक्यता वाटत नाही.
- डॉ. मंगला बोरकर, मेडिसिन विभागप्रमुख, घाटी
आतापर्यंत वॉर्डात दाखल झालेले रुग्ण ९२
पॉझिटिव्ह रुग्णांची संख्या ४०
'स्वाइन फ्लू'ने मृत्यूमुखी पडलेले रुग्ण १०
घाटीत रोज येणारे संशयित रुग्ण ३ ते ४
मोबाइल अॅप डाउनलोड करा आणि राहा अपडेट
