जिल्ह्यातील ४१ स्वतंत्र आणि २ संयुक्त वाळूपट्ट्यांच्या ई-ऑक्शन (लिलाव) प्रक्रियेकडे ठेकेदारांनी पाठ फिरविली. ४३ पैकी केवळ ८ वाळूपट्ट्यांचाच लिलाव झाला असून उर्वरित वाळूपट्ट्यांसाठी पुन्हा निविदा प्रक्रिया प्रशासनाला काढाव्या लागणार आहेत.
गेल्यावर्षीही ई ऑक्शन प्रक्रीयेकडे ठेकेदारांनी पाठ फिरवली होती, तीच परंपरा यावर्षीही पहावयास मिळाली. जिल्हा प्रशासनाने नदीपात्रातील वाळूउपसा करण्यासाठी वाळूपट्ट्यांचा लिलाव करण्याचा निर्णय घेतला. जानेवारी महिन्यात ४१ स्वतंत्र आणि २ संयुक्त वाळूपट्ट्यांसाठी ई-ऑक्शन प्रक्रिया राबवण्यात आली. यात ९ वाळूपट्ट्यांचे लिलाव झाले, मात्र लिलावाचे प्रकरण न्यायालयात गेल्यामुळे न्यायालयाच्या आदेशानुसार प्रशासनाने पुन्हा लिलाव प्रक्रीया राबविली. या प्रक्रियेत पूर्वी लिलाव झालेल्या वाळूपट्ट्यांमधील वैजापूर तालुक्यातील भालगाव येथील वाळूपट्टा वगळता इतर ८ वाळूपट्ट्यांचे लिलाव झाले. या सर्व वाळूपट्ट्यांची सरकारी किंमत १ कोटी २७ लाख रुपये होती. लिलावात २ कोटी २३ लाख रक्कम प्राप्त झाली. उर्वरित ३५ स्वतंत्र आणि २ संयुक्त वाळूपट्ट्यांसाठी पुन्हा ई ऑक्शन प्रक्रीया राबविण्यात येणार आहे.
वाळूपट्ट्यातून १४ कोटी अपेक्षित
१४ कोटी ३८ लाख अपेक्षित किंमतजिल्ह्यातील ४१ स्वतंत्र वाळूपट्ट्यांसाठी ८ कोटी ८० लाख आणि २ संयुक्त वाळूपट्ट्यांसाठी ५ कोटी ५७ लाख रूपये अपेक्षित सरकारी किंमत ठरविण्यात आली आहे. पहिल्या टप्प्यात केवळ ८ वाळूपट्ट्यांचे लिलाव झाले आहेत. लिलावात गेलेल्या वाळूपट्ट्यांमधून वाळू उपसा करण्याची मुदत ३० सप्टेंबर २०१५ पर्यंत आहे. त्यामुळे अवघ्या ६ महिन्यांसाठी ठेकेदार हे वाळूपट्टे घेतील का? असा प्रश्न निर्माण होत आहे.
वाळूपट्टा लिलावात मिळालेली रक्कम
वाघाडी (ता. पैठण) ७७,९०,३२०
पूरणगाव (ता. वैजापूर) ३५,४२,७९६
कोटनांद्रा (ता. सिल्लोड) २,१५,७८२०
मोढा खु (ता. सिल्लोड) ३१,४५,४२०
सावखेडा (ता. सिल्लोड) १०,४६,३००
चिंचखेडा (ता. सिल्लोड) ३०,१५,४२०
पिंपळगाव (ता. फुलंब्री) ६,२६,५०४
भालगाव (ता. फुलंब्री) १०,०३,५८०
एकूण २२३२८१६०
मोबाइल अॅप डाउनलोड करा आणि राहा अपडेट