म. टा. प्रतिनिधी, फुलंब्री
कायगाव (ता. सिल्लोड) परिसररात अवैधरित्या वाळू वाहतूक करणारे तीन ट्रॅक्टर वाळूसह पकडले. वडोदबाजार पोलिसांनी शुक्रवारी रात्री गस्त घालत असताना ही कारवाई केली. कारवाईची माहिती मिळताच इतर वाळू वाहतूक करणारे ट्रॅक्टर पसार झाले.
फुलंब्री तालुक्यातील गावांना लागून गिरजा नदी तर सिल्लोड तालुक्याच्या गावांना लागून पूर्णा नदी वाहते. वडोदबाजार पोलीस ठाणे हद्दीत बोरगाव कासारी, चिंचखेडा भवन, तांडाबाजार, परिसरात पूर्णा नदीतून तर पाल, पाथ्री, वडोदबाजार, भालगाव, कविटखेडा, बोरगाव अर्ज, शेवता, पेंडगाव, पाडळी, निमखेडा, टाकळी या गावालगत गिरजा नदी वाहते. परंतु, यंदा दुष्काळ सदृश्य परिस्थिती असल्यामुळे नदीचे पात्र कोरडे पडले आहे. त्यामुळे या भागात अनेक दिवसांपासून वाळूची मोठ्या प्रमाणात तस्करी होऊ लागली आहे.
शनिवारी पहाटे २ ते ३ वाजेच्या दरम्यान पूर्णा नदीच्या पात्रातून अवैध वाळू वाहतूक करणारे तीन ट्रॅक्टर वाळूसह वडोदबाजार पोलिसांनी पकडले. सहायक पोलीस निरीक्षक दिलीप सागर, यांच्यासह पोलिस कर्मचारी खंडागळे, एन. आर. नागझरे, मुरकुटे, वाघुळे, यांच्या पथकाने गस्त घालत असताना कायगाव शिवारात आरोपी एकनाथ देवमाण रोठे (वय २१ रा. जैनपूर कोठारा ता. भोकरदन), रामदास शेषराव आठावने (रा. तांदुळवाडी ता. भोकरदन) कारभारी त्रिंबक रोठे (रा. जैनपूर कोठारा ता. भोकरदन) यांना वाळू वाहतूक करताना रंगेहाथ पकडले.
.........
जालना जिल्ह्यात अवैधरित्या वाळू वाहतूक करणाऱ्यांविरुद्ध कारवाईचा बडगा उभारण्यात आला. या दोन्ही वाळू वाहतूकदारांवर पोलिसात गुन्हे नोंदविण्यात आले आहे. पहिल्या घटनेत सदर बाजार पोलिसांनी रामनगर परिसरात अवैधरित्या वाळू वाहतूक करणाऱ्यांवर कारवाई केली. एमएच २१-६०४७ क्रमांकाच्या ट्रॅक्टरमधून वाळूची अवैधरित्या वाहतूक करीत असल्याची माहिती सदर बाजार पोलिसांना खबऱ्यामार्फत मिळाली. पोलिसांनी सापळा रचून हे ट्रॅक्टर पकडले. याप्रकरणी पोलिस शिपाई संदीप आंबटकर यांच्या तक्रारीवरून सदर बाजार पोलिसांनी अनिल जोशी आणि भाऊसाहेब मगरे या दोघांविरोधात गुन्हा दाखल केला आहे. आरोपींच्या ताब्यातून वाळू आणि ट्रॅक्टर असा एकूण ४ लाख ३० हजार रुपयांचा ऐवज जप्त करण्यात आला. पुढील तपास पोलिस जमादार डी. डी. दिवटे हे करीत आहे. दुसरया घटनेत आष्टी पोलिसांनी देखील वाळू वाहतूक करणाऱ्या ट्रॅक्टरवर कारवाई केली आहे. एमएच २०- क्रमांकाच्या या ट्रॅक्टरमधून बेकायदा वाळू तस्करी सुरू होती. पोलिस जमादार एकनाथ पडूळ यांच्या तक्रारीवरुन या ट्रॅक्टरच्या अज्ञात चालकांवर गुन्हा नोंदविण्यात आला आहे.
मोबाइल अॅप डाउनलोड करा आणि राहा अपडेट
