बीड जिल्ह्यातील परळी येथील वैद्यनाथ सहकारी साखर कारखान्याच्या निवडणुकीचा ज्वर वाढायला सुरुवात झाली आहे. शुक्रवारी विधान परिषदेचे विरोधी पक्ष नेते धनंजय मुंडे, पंडितअण्णा मुंडे यांच्यासह राष्ट्रवादी काँग्रेसच्या उमेदवारांनी अर्ज निवडणुकीसाठी दाखल केले. गुरुवारी बीडच्या पालकमंत्री पंकजा मुंडे यांच्यासह भाजपाच्या ४५ जणांनी उमेदवारी दाखल केली असल्याने आगामी काळात होत असलेल्या या निवडणुकीत पंकजा मुंडे विरूद्ध धनंजय मुंडे असा संघर्ष रंगणार आहे.
वैद्यनाथ साखर कारखान्याच्या निवडणुकीसाठी २३ मार्चपासून उमेदवारी अर्ज दाखलकरण्यास सुरुवात झाली. गुरुवारी भाजपकडून पालकमंत्री पंकजा मुंडे यांच्यासह ४५ जणांनी अर्ज दाखल झाले. त्यांच्यासोबत आमदार आर. टी. देशमुख, यशश्री मुंडे, विद्यमान उपाध्यक्ष नामदेवराव आघाव यांनी भाजपाकडून अर्ज दाखल केले. शुक्रवारी आणखी एका मुंडेंनी कारखाना निवडणुकीत पॅनेल रिंगणात उतरवले आहे. शुक्रवारी विधान परिषदेचे विरोधी पक्ष नेते धनंजय मुंडे व त्यांचे वडील पंडितअण्णा मुंडे यांच्यासह परळी तहसील कार्यालयात जाऊन उमेदवारी दाखल केली. धनंजय मुंडे यांनी भटक्या जाती जमाती गटातून तर पंडितअण्णा मुंडे यांनी संस्था मतदार संघातून अर्ज दाखल केला. बीड जिल्ह्याचे लक्ष लागलेल्या या कारखान्याच्या निवडणुकीत मुंडे विरूद्ध मुंडे अशी लढत आता होणार असल्याचे स्पष्ट झाले आहे. या दोन मुंडेमध्ये कोण बाजी मारणार याकडे जिल्ह्याचे लक्ष लागले आहे.
मोबाइल अॅप डाउनलोड करा आणि राहा अपडेट
