सार्वजनिक बांधकाम उपविभागाकडील मालमत्ता व पाणीपट्टीची चार लाख ८२ हजार ९०२ रुपये थकबाकी वसुलीसाठी नगरपालिकेने येथील ऐतिहासिक विश्रामगृहाला जप्तीची नोटीस बजावली आहे. ही थकबारी ३० मार्चपर्यंत न भरल्यास विश्रामगृह सील करण्यात येणार आहे.
खुलताबाद येथील विश्रामगृहाला एका शतकाची परंपरा आहे. निजामकालीन वैभव व वास्तुरचनेचे उदाहरण आहे. सार्वजनिक बांधकाम विभागाच्या दुर्लक्षामुळे या इमारतीचा मालमत्ता कर व पाणीपट्टी थकली आहे. विश्रामगृहात पाण्याचा ठणठणाट असल्याने येथे भेट देणाऱ्या अभ्यागतांना सुविधा मिळत नाहीत. सार्वजनिक बांधकाम उपविभागाच्या खुलताबाद कार्यालयाच्या तिजोरीत खडखडाट असून पाणीपट्टीची थकबाकी भरण्यासाठी निधी नसल्याने कार्यकारी अभियंता (पश्चिम) यांच्याकडे निधीची मागणी करण्यात आली आहे. हा निधी वेळेत मिळाला नाही, तर ऐतिहासिक विश्रामगृहावर जप्तीची वेळ येणार आहे.
इमारतीवर अवकळा
खुलताबाद येथे टेकडीवरील विस्तीर्ण जागेवर ८१ हजार ७६४ रुपये खर्च करून १९११मध्ये ही भव्य वास्तू बांधण्यात आली. या वास्तुचे दोन भाग आहे. पहिल्या मजल्यावर एक भोजन कक्ष व सहा शयनकक्ष आहेत. तळमजल्यातील संग्रहालयात निजामकालीन वस्तू ठेवण्यात आल्या आहेत. शंभरी गाठलेल्या या इमारतीला अवकळा आली आहे.
मोबाइल अॅप डाउनलोड करा आणि राहा अपडेट
