महापालिकेने ज्या रस्त्यांचे नुकतेच मजबुतीकरण केले आहे ते रस्ते २४ कोटींच्या पॅकेजमधून वगळण्याचे संकेत महापालिकेचे आयुक्त प्रकाश महाजन यांनी दिले. 'या संदर्भात आमदार अतुल सावे यांच्याशी चर्चा करून निर्णय घेऊ,' असे ते म्हणाले.
'चकचकीत रस्त्यांना मुलामा' या मथळ्याखाली 'मटा' ने १२ मार्चच्या अंकात वृत्त प्रसिध्द केले होते. शहरातील दहा रस्त्यांच्या मजबुतीकरणासाठी शासनाने २४ कोटी ३३ लाख रुपये दिले आहेत. या दहा रस्त्यांची यादीही शासनाने जोडली आहे. जे रस्ते शासनाने सुचवले आहेत, त्यापैकी सहा रस्त्यांचे काम महापालिकेने आपल्या फंडातून सहा महिने ते वर्षभराच्या काळात केले आहे. याच रस्त्यांवर पुन्हा शासनाच्या निधीतून खर्च केला जाणार आहे. त्यामुळे पालिकेने केलेला खर्च वाया जाईल असे 'मटा' ने आपल्या वृत्तात म्हटले होते.
दरम्यान, त्या दहा रस्त्यांच्या कामांचे अंदाजपत्रक महापालिकेने तयार केले असून ते पन्नास कोटी रुपयांचे झाले आहे. २६ कोटींनी जास्तीचे अंदाजपत्रक झाले आहे. जास्तीचा निधी पालिकेने उभारावा असे शासनाने म्हटले आहे, पण रस्त्यांच्या सुरू असलेल्या कामांचेच पेमेंट देण्यासाठी पालिकेला तारेवरची कसरत करावी लागते आहे. त्यामुळे 'जास्तीचा निधी शासनानेच द्यावा, अशी विनंती शासनाला करू,' असे महाजन म्हणाले.
तेच ते रस्ते त्या यादीत असतील तर काही रस्ते बदलता येतील का, याचा विचार केला जाईल. यादीतील रस्ते बदलण्यासाठी आमदार अतुल सावे यांच्याशी चर्चा करावी लागेल. पालिकेने काही महिन्यांपूर्वी ज्या रस्त्यांवर खर्च केला त्याच रस्त्यांवर शासनाच्या निधीतून खर्च करायचा असेल तर त्यातून काही साध्य होणार नाही.
- प्रकाश महाजन, पालिका आयुक्त
मोबाइल अॅप डाउनलोड करा आणि राहा अपडेट
