म. टा. प्रतिनिधी, औरंगाबाद
केंद्र आणि राज्यात भारतीय जनता पक्षाचे सरकार आहे. त्यामुळे औरंगाबादेच नाव संभाजीनगर होणारच, असे सांगत भाजप नेत्यांनी भावनिक मुद्याचा आधार घेतला आहे. वॉर्डातून उमेदवारी कोणा एकालाच मिळणार आहे, इतर निष्ठावंताना महामंडळासह अन्य संधी मिळेल, असे गाजर दाखवत बंडखोरी टाळण्यासाठी शर्थीचे प्रयत्न सुरू केले आहेत. दरम्यान, महिला कार्यकर्त्यांना न्याय द्या, पदाधिकाऱ्यांच्या नातेवाईकांना नको, असे म्हणत कोअर कमिटीच्या सदस्यांना काही महिला कार्यकर्त्यांनी घेराव घातल्याची घटना मेळाव्याआधी घडली.
महापालिका निवडणुकीच्या तयारीसाठी भाजप कार्यकर्त्यांचा मेळावा शहानूरमियाँ दर्गा रोडवरील श्री हरी पॅव्हेलियन येथे गुरुवारी (२ एप्रिल) आयोजित करण्यात आला होता. पाणी पुरवठा व स्वच्छता मंत्री बबनराव लोणीकर, खासदार अमर साबळे, आमदार अतुल सावे, नारायण कुचे, किशनचंद तनवाणी, प्रवीण घुगे, डॉ. भागवत कराड, शहराध्यक्ष भगवान घडामोडे, शिरीष बोराळकर, संजय जोशी आदी यावेळी उपस्थित होते.
युतीबाबत येत्या दोन ते तीन दिवसात निर्णय होईल, असे याप्रसंगी बोलताना पाणी पुरवठा मंत्री लोणीकर यांनी सांगत यंदा महापौर भाजपाचाच होणार, असा विश्वासही व्यक्त केला. मानगुटीवर बसलेले समांतरचे भूत उतरविणारच, असे सांगत त्यांनी नागरिकांना पुरेसे पाणी माफक दरात देऊ, असे आश्वासन दिले. राज्यात सत्तेत येताच केवळ रस्त्यांसाठी भाजप सरकारने ३१ कोटी रुपये या शहराला दिले. यापुढे विकासकामासाठी मोठ्या प्रमाणात निधी आणला जाईल, प्रसंगी जागतिक बँकेतून कर्ज काढू, असेही लोणीकर नमूद केले. तिकीट एकालाच देता येईल, मात्र इतरांनी नाराज होऊ नये, निष्ठावंताना पक्षाकडून योग्य संधी दिली जाते. महामंडळावरील नियुक्तीपासून योग्य त्या संधी मिळतील, असे त्यांनी सांगत एकदिलाने काम करण्याचे आवाहन केले. याप्रसंगी खासदार साबळे यांच्यासह अन्य नेत्यांची भाषणे झाली.
विधानसभा अध्यक्ष हरिभाऊ बागडे, ग्रामविकास मंत्री पंकजा मुंडे आदींना मेळाव्यासाठी निमंत्रित केले होते. काही कारणास्तव ते उपस्थित राहू शकले नाही. मेळाव्याची वेळ दुपारी तीन वाजेची होती, परंतु सायंकाळी साडेचारपर्यंतही अपेक्षित गर्दी झाली नव्हती. त्यामुळे रिकाम्या खुर्ची सभास्थळावरून बाजूला नेण्याची वेळ भाजपावर आज आली.
आमदारांनी जोडले कार्यकर्त्यांना हात
मेळावा सुरू होण्यास थोडा वेळ राहिलेला असतानाच उमेदवारीच्या मुद्यावरून काही महिला कार्यकर्त्यांनी निवडणूक समितीचे आमदार अतुल सावे, डॉ. भागवत कराड यांच्यासह अन्य सदस्यांना घेराव घातला. पदाधिकाऱ्यांच्या पत्नी, नातेवाईक यांनाच उमेदवारी मिळणार असेल तर पक्षाशी एकनिष्ठ काम करणाऱ्या महिला कार्यकर्त्यांना केव्हा संधी मिळणार, असा सवाल करत पक्षनेत्यांना धारेवर धरले. भाजपच्या महिला कार्यकर्त्या खूपच आक्रमक झाल्या होत्या. इतक्या की एका महिला कार्यकर्त्याला शांत करण्यासाठी आमदार अतुल सावेंनी अक्षरशः हात जोडले. अजून कोणाचेही तिकिट फायनल केलेले नसून प्रबळ, योग्य उमेदवारांनाच संधी मिळेल, असे सांगत नेत्यांनी मेळाव्यापूर्वी आलेले हे विघ्न दूर केले.
मोबाइल अॅप डाउनलोड करा आणि राहा अपडेट
