औरंगाबाद महापालिकेच्या पाचव्या निवडणुकीतही शिवसेना-भाजप युतीनेच भगवा कायम राखला. काँग्रेस, राष्ट्रवादी आणि शहर प्रगती या आघाडीने युतीसमोर जबरदस्त आव्हान उभे केले होते; परंतु हे आव्हान परतवून लावण्यात युतीला यश मिळाले. या निवडणुकीत नेहरूनगर प्रभागातून काँग्रेसचे अब्दुल साजेद बिल्डर हे बिनविरोध निवडून आले होते. ९८ वॉर्डांत ८१६ उमेदवार रिंगणात होते. शिवसेना-भाजप युतीची सत्ता उलथवून टाकण्यासाठी आघाडीने जोरदार कंबर कसली होती. आघाडी आणि युती असल्याने एकाही राजकीय पक्षाला सर्व जागा लढविता आल्या नाहीत आणि एकट्याच्या बळावर सत्ताही काबीज करता आली नाही. आता शिवसेनेत असलेले महानगरप्रमुख प्रदीप जैस्वाल हे आमदार होते. शहर प्रगती आघाडीने काँग्रेस आणि राष्ट्रवादीबरोबर घरोबा केला होता. त्यांच्या वाट्याला १६ वॉर्ड आले होते. हिंदू मतपेढी फोडण्यात प्रदीप जैस्वाल यांच्या शहर प्रगती आघाडीला फार कमी प्रमाणात यश मिळाले. हिंदू मतपेढी फोडण्यासाठी मनसेही सज्ज झाली होती. मनसेचे अध्यक्ष राज ठाकरे यांची सभा या निवडणुकीतील सर्वात मोठी सभा ठरली होती.
औरंगाबाद महापालिका निवडणुकीत शिवसेना-भाजप युतीने आपले वर्चस्व राखताना काँग्रेस आघाडीसह राज ठाकरे यांच्या मनसेचाही नक्शा उतरविला होता. पहिल्या चारही निवडणुकांप्रमाणे युती किंवा आघाडीला स्पष्ट बहुमत मिळाले नाही. शिवसेना-भाजप युतीने ४५ जागा जिंकल्या होत्या. काँग्रेस, राष्ट्रवादी आणि शहर प्रगती या आघाडीला ३३ जागांच जिंकता आल्या. मनसेने जेमतेम खाते उघडले होते. लागोपाठच्या पाचव्या निवडणुकीत शिवसेनाच सर्वाधिक जागा जिंकणारा पक्ष ठरला. 'औरंगाबाद की संभाजीनगर', या भावनिक आवाहनाला औरंगाबादकरांनी पूर्ण नाही, तरी काहीशी साथ दिली होती. जैस्वाल यांच्या आघाडीला केवळ तीन जागा मिळाल्या. मनसेच्या राज ठाकरे यांची सभा मोठी होऊनही मते खेचण्यात त्यांना फारसे यश आले नाही.
भगवा कायम ठेवण्यासाठी शिवशक्तीला पुन्हा एकदा भीमशक्तीची साथ मिळाली. युतीचे सुरेंद्र कुलकर्णी (जवाहर कॉलनी), मधुकर सावंत (रमानगर) आणि अनिता घोडेले (कबीरनगर) हे बंडखोर उमेदवार निवडून आले होते. त्यामुळे केवळ सत्तेसाठी दोन जागांची आवश्यकता युतीला होती. रिपाइं (डेमो‌क्रेटिक) गटाचे दोन उमेदवार निवडून आले होते. या पक्षाने युतीलाच साथ दिली. शिवसेनेने २००७मध्ये भीमशक्तीला सत्तेत वाटा दिला होता. शिवशक्ती आणि भीमशक्ती यांनी एकत्रित यावे, असे आवाहन शिवसेनेचे पक्षप्रमुख उद्धव ठाकरे यांनी केले होते. यावेळीही दहा वर्षांपूर्वीच्या प्रयोगाची पुनरावृत्ती झाली. शिवसेना-भाजप युती शेवटच्या क्षणी झाली. युतीतील वादामध्ये नेहमीप्रमाणे कच खात भाजपने ज्योतीनगर वॉर्ड शिवसेनेला देऊन टाकल्यानंतर पेच निर्माण झाला होता, त्यावर पडदा पडला होता.
या निवडणुकीत दोन बड्या नेत्यांच्या चिरंजीवांना पराभवाचा धक्का सहन करावा लागला. भाजपचे माजी केंद्रीयमंत्री जयसिंगराव गायकवाड पाटील आणि शिवसेनेचे उपनेते खा. चंद्रकांत खैरे यांचे चिरंजीव पराभूत झाले होते. स्थायी समितीचे सभापती काँग्रेसचे अब्दुल साजेद यांचे सुपुत्र सिकंदर हे राष्ट्रवादीकडून निवडून आले होते. ऋषिकेश खैरे यांना निवडून आणण्याचे आव्हान चंद्रकांत खैरे यांच्यासमोर होते; पण त्यांना ही कामगिरी करता आली नही. 'गड आला पण सिंह गेला', अशी चंद्रकांत खैरे यांची अवस्था होती. नक्षत्रवाडीतून निवडून आलेले रावसाहेब गायकवाड हे सेनेचे युवाप्रमुख होते; परंतु त्यांनी काँग्रेसकडून उमेदवारी मिळवून सेनेला घरचा आहेर दिला होता. रमानगर या भाजपच्या पारंपरिक वॉर्डात मधुकर सावंत हे दोनवेळा निवडून आले होते. भाजपने त्यांना उमेदवारी नाकारून राजेंद्र गायकवाड यांना उमेदवारी दिली. सावंत यांनी बंडखोरी करून विजयाची हॅट्ट्रीक साधली होती. या निवडणुकीत प्रथमच शिवसेनाप्रमुख कै. बाळासाहेब ठाकरे प्रत्यक्ष प्रचारसभेला आले नव्हते. प्रकृतीच्या कारणामुळे त्यांचे ध्वनिचित्रफितीद्वारे भाषण झाले. शिवसेनाप्रमुख आणि सांस्कृतिक मंडळाच्या मैदानाचे नाते जुळले होते. १९८८पासून निवडणूक, मग ती कोणतीही असो; मराठवाडा सांस्कृतिक मंडळाच्या मैदानावर शिवसेनाप्रमुखांच्या सभेने प्रचाराची सांगता होत होती. आजारपणामुळे त्यांना या निवडणुकीत येता आले नाही. औरंगाबादमध्ये भगवा फडकलाच पाहिजे, असे आवाहन त्यांनी केले होते. मनसेचे संस्थापक अध्यक्ष राज ठाकरे यांनाही शिवसेनाप्रमुखांनी टोला लगावला होता. 'काही लोक आमच्या नक्कला करतात, अगदी सही रे सही! मात्र या आवेशावर जाऊ नका,' अशा शब्दांत त्यांनी राज ठाकरेंवर टीका केली होती.
या निवडणुकीचे दुसरे वैशिष्ट्य म्हणजे आघाडीचे तत्कालीन राज्यमंत्री अब्दुल सत्तार यांचा 'लत्ताप्रहार' खूप गाजला होता. या निवडणुकीच्या आघाडीच्या घोषणेच्यावेळी अब्दुल सत्तार यांनी 'राडा' केला होता. काँग्रेसअंतर्गतचे वाद यामुळे चव्हाट्यावर आले होते. त्यांच्या लाथेमुळे आणि त्यांच्या अंगरक्षकाच्या मारहाणीमुळे यांनी मोहम्मद मुश्ताख उर्फ मुश्तू हे जखमी झाले होते. या जखमी अवस्थेतही त्यांनी सिटी चौक प्रभागातून अपक्ष उमेदवारी दाखल केली होती. राज्यमंत्र्यांनी मला मारहाण का केली, याचा जाब मी विचारणार असल्याचे त्यांनी सांगितले. अब्दुल सत्तारांचा लत्ताप्रहार राज्यभर गाजला होता. त्यांना प्रचारापासून दूरही करण्यात आले होते. भाजपचे नेते कै. गोपीनाथ मुंडे यांनी लत्ताप्रहारावर जोरदार टीका केली होती. 'काँग्रेसचे मंत्री सत्तेच्या मस्तीत आहेत. हे मंत्री आपल्याच कार्यकर्त्यांना लाथा घालत आहेत. उद्या हे मंत्री जनतेलाही तुडविण्यास मागेपुढे पाहणार नाहीत,' अशी टीका मुंडे यांनी केली होती.
आघाडीने या निवडणुकीत मतदारांना आमिषे दाखविली होती. आघाडीची सत्ता आली तर शहर विकासासाठी पुरेपूर निधी देऊ, असे आश्वासन तत्कालीन मुख्यमंत्री अशोक चव्हाण यांनी दिले होते. 'आम्ही वाढपी म्हणून काम करणार आहोत. वाढपी आपला असला की, थाळीत बुंदीचा लाडू अधिक मिळतो,' असे मुख्यमंत्री म्हणाले होते; पण आघाडी सरकारने औरंगाबाद महापालिकेला सापत्न वागणूक दिली. आघाडी सरकारने कायमच औरंगाबाद मनपाला मदत करताना हात आखडता घेतला. आघाडीमध्ये प्रदीप जैस्वाल यांचा समावेश असतानाही आघाडीला फार मोठा चमत्कार करता आला नाही. तत्कालीन पालकमंत्री राधाकृष्ण विखे यांनी मोट बांधण्याचा प्रयत्न केला; पण ही मोट पक्षातील अंतर्गत वादाने बांधता आली नाही. अखेर आघाडीला पराभवच पत्करावा लागला. या निवडणुकीत अब्दुल साजेद यांच्याविरुद्धही युतीने जोरदार आघाडी उघडली होती. एकनाथनगर वॉर्डात शिवसेनेचे उमेदवार उमेश दळवी यांच्यावर अब्दुल साजेद यांनी रिव्हॉल्व्हर रोखून धमकी दिली होती. उस्मानपुरा पोलिस ठाण्यात तक्रार दाखल करण्यासाठी शिवसेनेचे नेते ठाण मांडून बसले होते. बोगस मतदान आणि पैसे वाटपावरून हा वाद निर्माण झाला होता, असा आरोप शिवसेनेच्या नेत्यांनी केला. सेना-भाजप युतीने आश्वासनांचा पाऊस पाडला होता; परंतु हे आश्वासन मृगजळच ठरले.
युतीला पाच वर्षांत औरंगाबादची प्रगती साधता आली नाही. उलट औरंगाबादला पिछाडीवर नेण्यात युतीचा मोठा वाटा होता. हैदराबाद मुक्तीसंग्रामाचे दालन वगळता युतीला काहीही करता आले नाही. 'समांतर'चा वाद पाच वर्षे चालला. अखेरच्या वर्षात औरंगाबाद वॉटर युटिलिटी कंपनीबरोबर घाट्याचा सौदा असलेला करार करण्यात आला. या सौद्यामुळेच आज औरंगाबादकरांना दरवर्षी दहा टक्के अधिक पाणीपट्टी भरावी लागणार आहे. सुरक्षेच्या नावावर मते मागणाऱ्या युतीला औरंगाबादची प्रगती साधता आली नाही, हेच खरे.
मोबाइल अॅप डाउनलोड करा आणि राहा अपडेट
