म. टा. विशेष प्रतिनिधी, औरंगाबाद
औरंगाबाद महापालिकेसाठी अखेरच्या टप्प्यात सर्वच राजकीय पक्षांनी दणकेबाज प्रचार करून वातावरण ढवळून टाकले. शिवसेना, भाजप, काँग्रेस, राष्ट्रवादी काँग्रेस, एमआयएम, रिपाइ, भारिप बहुजन महासंघ, रिपब्लिकन सेना, समाजवादी पक्षाच्या नेत्यांनी गेल्या चार दिवसांत मॅरेथॉन प्रचार करून खऱ्या अर्थाने निवडणुकीचा आखाडा गाजवून सोडला.
वांद्रे पूर्व विधानसभेची पोटनिवडणूक गेल्या आठवड्यात झाली. त्याचा निकाल १५ एप्रिल रोजी लागला. काँग्रेसने शिवसेनेला आव्हान दिल्यामुळे राज्यातील राजकीय नेत्यांचे लक्ष मुंबईत लागले होते. तेथील निकाल जाहीर झाल्यानंतरच औरंगाबादकडे सर्वपक्षीय नेत्यांनी येण्यास सुरवात केली. शिवसेना-भाजप युतीला टक्कर देण्यासाठी काँग्रेसने स्वतंत्र निवडणूक लढविली. राष्ट्रवादी काँग्रेसने सर्वात आधी जाहीरनामा प्रसिद्ध करून निवडक वॉर्डातून उमेदवार देऊन आखाड्यात तेवढ्याच ताकदीने उतरत असल्याचे संकेत दिले होते. एमआयएमविषयी विधानसभा निवडणुकीपासून प्रचंड उत्सुकता आहे. रिपाइं, भारिप बहुजन महासंघ, रिपब्लिकन सेना, समाजवादी पक्षाच्या नेत्यांनीही सभा घेतल्या.
गुरुवार ते रविवार प्रचारसभांची धूम होती. दिवसभरात तीन ते पाच सभा घेऊन नेत्यांनी १११ वॉर्डांमधील वातावरण तापविले. एकमेकांवर आरोप - प्रत्यारोपाच्या फैरी झाडत शहराच्या विकासासाठी राजकीय पक्षांनी मताचा जोगवा मागितला. मराठवाड्याची राजधानी असलेल्या औरंगाबाद महापालिकेच्या निवडणुकीकडे सर्वच राजकीय पक्षांनी गांभीर्याने पाहिले. पुढची चार वर्षे कुठल्याही निवडणुका नसल्याने राजकीयदृष्ट्या वर्चस्व प्रस्थापित करण्यात कोण यशस्वी होईल, याचे उत्तर गुरुवारी मिळणार आहे.
राज्यभरातील नेत्यांची प्रचारासाठी शहरात हजेरी
शिवसेना : पक्षप्रमुख उद्धव ठाकरे, पालकमंत्री रामदास कदम, खासदार अनिल देसाई, आमदार नीलम गोऱ्हे, संपर्कनेते विनोद घोसाळकर, आमदार अर्जून खोतकर.
भाजप : मुख्यमंत्री देवेंद्र फडणवीस, प्रदेशाध्यक्ष खासदार रावसाहेब दानवे, महसूलमंत्री एकनाथ खडसे, जलसंपदा मंत्री गिरीष महाजन, पाणीपुरवठा मंत्री बबनराव लोणीकर, महिला व बालकल्याणमंत्री पंकजा मुंडे, राज्यमंत्री राम शिंदे, दिलीप कांबळे, आमदार चेनसुख संचेती, स्मिता वाघ.
काँग्रेस : प्रदेशाध्यक्ष अशोक चव्हाण, विरोधी पक्षनेते राधाकृष्ण विखे पाटील, माजी पालकमंत्री बाळासाहेब थोरात, माजीमंत्री नितीन राऊत, आरेफ नसीम खान, डॉ. विश्वजित कदम, प्रवक्ते सचिन सावंत.
राष्ट्रवादी काँग्रेस : विरोधी पक्षनेते धनंजय मुंडे, माजीमंत्री जयदत्त क्षीरसागर, राजेश टोपे, आमदार विद्या चव्हाण.
एमआयएम : पक्षप्रमुख असदुद्दिन ओवेसी, आमदार अकबरुद्दिन ओवेसी, वारीस पठाण, जफर हुसेन.
रिपाइं : खासदार रामदास आठवले.
पीपल्स रिपब्लिकन पार्टीः आमदार जोगेंद्र कवाडे.
रिपब्लिकन सेनाः पक्षप्रमुख आनंदराज आंबेडकर.
समाजवादी पार्टीः आमदार अबू आजमी.
मोबाइल अॅप डाउनलोड करा आणि राहा अपडेट
