म. टा. प्रतिनिधी, औरंगाबाद
पालकमंत्री रामदास कदम यांना असलेला शुगरचा त्रास, त्यातच खासदार चंद्रकांत खैरे यांची झालेली चिडचिड आणि पालकमंत्र्यांच्या पाठोपाठ महापौर त्र्यंबक तुपे यांची 'सुभेदारी'वारी या घडामोडींमुळे महापौर-उपमहापौर निवडणुकीच्या नंतर वेगळेच नाट्य रंगले.
महापौर -उपमहापौरपदाची निवडणूक झाली. त्यानंतर पालकमंत्री रामदास कदम, खासदार चंद्रकांत खैरे, आमदार संजय शिरसाट, महानगरप्रमुख प्रदीप जैस्वाल, जिल्हाप्रमुख अंबादास दानवे, महापौर कला ओझा यांच्यासह भाजपचे आमदार अतुल सावे, सुरजितसिंह ठाकूर, डॉ. भागवत कराड व अन्य पदाधिकारी नूतन महापौर त्रिंबक तुपे यांची वाट पहात महापौरांच्या दालनात बसले होते. तिकडे सभागृहत निवडणूक झाली, निकालही जाहीर करण्यात आला. त्यानंतर तुपे सभागृहाच्या बाहेर पडले. पालिकेच्या आवारात कार्यकर्ते जल्लोष करीत असल्याचे त्यांच्या लक्षात आले. तुपे थेट कार्यकर्त्यांमध्ये जाऊन मिसळले. इकडे दालनात नेते आणि पदाधिकाऱ्यांमध्ये चलबिचल सुरू झाली. तेवढ्यात पालकमंत्र्यांनी बिस्कीट आणण्याचे फर्मान सोडले. पाच - दहा मिनिटे झाली तरी बिस्कीट काही येईनात. त्यामुळे ते मावळत्या महापौर कला ओझा यांना उद्देशून म्हणाले, 'तुम्ही नुसत्याच महापौर दिसता. काही बिस्कीट वगैरे आहेत की नाही.' त्यावर गोऱ्यामोऱ्या होत ओझा यांनी टेबलवरची बेल दाबली, पण त्याला कर्मचाऱ्यांकडून प्रतिसाद मिळाला नाही.
तेवढ्यात पालकमंत्र्यांनी पुन्हा एकदा बिस्कीटाची आठवण केली. त्यावर ओझा म्हणाल्या, 'पिशवी भरून बिस्किटे आणली होती. आता ती कुठे गेली काहीच कळत नाही. ओझा यांच्या या अवस्थेमुळे खासदार खैरेही संतापले. कर्मचाऱ्यांना बोलवा असे त्यांनी आपल्या कार्यकर्त्यांना सांगितले. कार्यकर्ते काही हालायला तयार नव्हते. हा सगळा रागरंग पालकमंत्री पहात होते. शेवटी ते कुणाशीही न बोलता महापौर दालनाच्या बाहेर पडले. पालकमंत्री सहज उठून गेले असतील असे सर्वांना वाटले. दहा-पंधरा मिनिटे झाली तरी ते परतले नाहीत. त्यामुळे खैरे यांच्यासह सर्वच नेत्यांचे इंडिकेटर लागले. इतक्यात कुणीतरी निरोप आणला. पालकमंत्री गाडीत बसून सुभेदारी विश्रामगृहात निघून गेले आहेत. पालकमंत्री कसे काय निघून गेले, त्यांना राग आला का, नेमके काय झाले, अशी चर्चा सुरू झाली. पालकमंत्री गाडीत बसून बाहेर निघून जाताना त्रिंबक तुपे यांनी पाहिले. तुपेही त्यांच्या मागे गेले. इकडे दालनात सर्वच नेत्यांची घालमेल सुरू झाली. काय करावे काहीच कळेना. त्यामुळे खैरे यांची चिडचिड वाढली. त्यांनी आपला राग महापौर कार्यालयातील कर्मचाऱ्यांवर काढला. तितक्यात तुपे परतले.
महापौर आले, महापौर आले अशी कुजबूज सुरू झाली, पण पालकमंत्री येणार की नाही या बद्दलचा सस्पेन्स कायम होता. काही वेळांनी पालकमंत्रीही आले. त्यानंतर तुपे यांना महापौरपदाची सूत्रे बहाल करण्याचा औपचारिक कार्यक्रम पार पडला. हा कार्यक्रम होताना पालकमंत्र्यांनी खुलासा केला. ते म्हणाले, 'मला शुगरचा त्रास आहे. त्यामुळे मी विश्रामगृहात गेलो होतो. आता ठीक आहे. उगीच गैरसमज नको म्हणून मी खुलासा करीत आहे.'
चॉकलेटचा खुमासदार धमाका
नेते आणि पदाधिकाऱ्यांमध्ये बिस्कीटाची चर्चा सुरू होती, पण बिस्कीट काही येत नव्हते. शेवटी खासदार चंद्रकांत खैरे यांनीच पुढाकार घेतला आणि बिस्कीटे मागवली. बिस्कीटाच्या प्लेटस् टेबलवर ठेवण्यात आल्या. बिस्कीट पाहून पालकमंत्री रामदास कदम म्हणाले, 'आले आले खैरेंचे बिस्कीट आले.' त्यावर एका नेत्याने उत्स्फूर्त प्रतिक्रिया देताना, 'खैरेंना चॉकलेट देण्याची सवय आहे. त्यांनी बिस्कीट कसे काय आणले,' असा प्रश्न उपस्थित केला आणि दालनात हशा पिकला.
मोबाइल अॅप डाउनलोड करा आणि राहा अपडेट
