शहरातील नामांकित वकिल निलेश घाणेकर यांच्यावर मंगळवारी (५ मे) रात्री साडेअकरा वाजता संग्रामनगर भागात दोन हल्लेखोरांनी गोळीबार केला. याप्रकरणी घाणेकर यांच्या तक्रारीवरून महिला वकिलासह तिघांवर खुनाचा प्रयत्न केल्याचा गुन्हा सातारा पोलिस ठाण्यात दाखल करण्यात आला आहे. दरम्यान या प्रकरणात मला गोवण्यात आल्याचा दावा, संबंधित महिला वकिलाने केला आहे.
अॅड. निलेश सिताराम घाणेकर (रा. गुरू लॉन्समागे, बाळापूर शिवार, बीड बायपास रोड) यांचे कुशलनगर भागात ऑफीस आहे. ते मंगळवारी रात्री ११.२० वाजता कार्यालयातून कारने ( एम. एच. २०, ए. एस. ३०२) घरी जाण्यासाठी निघाले. संग्रामनगर उड्डाणपूल पार करून बीड बायपासमार्गे ते घराकडे जात होते. यावेळी पूल संपल्यानंतर काही अंतरावर त्यांच्या पाठीमागून कारमधून आलेल्या अॅड. स्मिता लेंडवे पाटील यांनी अडवले. कोर्टात सुरू असलेली खंडणीची केस मागे घ्या, तसेच मला पैसे द्या, अशी मागणी अॅड. पाटील यांनी केली. यावेळी घाणेकर यांनी नकार दिला. त्यानंतर अॅड. पाटील घाणेकर यांना धमकावत कारमधून निघून गेल्या. यावेळी पाठीमागून दुचाकीवर दोन तरूण आले, त्यावर मागे बसलेल्या तरुणाने चालत्या दुचाकीवरून उडी मारून कारच्या उघड्या खिडकीतून त्यांच्यावर रिव्हॉल्वरमधून गोळी झाडली. ही गोळी घाणेकर यांच्या उजव्या हाताला किरकोळ चाटून गेली. हल्लेखोराच्या हाताला घाणेकर यांनी झटका दिल्याने त्याचे रिव्हॉल्वर लॉक झाले. यावेळी हल्लेखोराने सलीम नावाच्या पुढे गेलेल्या दुचाकीवरील हल्लेखोराला गोळी झाडण्यास सांगितले. त्याने कारच्या समोरच्या काचेवर घाणेकर बसलेल्या दिशेने गोळी झाडली. काच फोडून ही गोळी आत शिरली मात्र घाणेकर बचावले. यानंतर हल्लेखोरांनी तेथून पलायन केले. अॅड. घाणेकर यांनी सातारा पोलिस ठाण्यात दिलेल्या तक्रारीमध्ये ही माहिती दिली. त्यांच्या तक्रारीवरून अॅड. स्मिता पाटील व दोन हल्लेखोरांविरुद्ध खुनाचा प्रयत्न व कट रचल्याप्रकरणी गुन्हा दाखल करण्यात आला आहे.
अॅड. निलेश घाणेकर गोळीबार प्रकरणात संशयित अॅड. स्मिता लेंडवे पाटील यांची मंगळवारी (५ मे) मध्यरात्रीपासून पोलिस चौकशी करीत आहेत. पोलिसांनी दहा संशयितांना ताब्यात घेतले असून गुन्हेशाखा, सायबर सेल, सातारा पोलिसांनी संयुक्त तपास सुरू केला आहे. हल्लेखोरांनी झाडलेल्या दोन गोळ्यांपैकी एक घाणेकर बसलेल्या सीटखाली, तर दुसरी मागील सीटखाली सापडली. या गोळ्या तपासणीसाठी फॉरेन्सिक लॅबकडे पाठवण्यात आल्या.
या प्रकरणात मला गोवण्यात आले आहे. रात्री साडेआठ वाजता घरी आल्यानंतर मी मैत्रीणीसोबत घरीच होते. रात्री दीड वाजता पोलिस घरी आल्यानंतर हा प्रकार समजला. अॅड. घाणेकर यांनी माझ्यावर अत्याचार केल्याप्रकरणी मी दोन वेळा मुकुंदवाडी पोलिस ठाण्यात गेले होते. मात्र प्रकरण मिटवून घेऊ असे सांगत मला घाणेकरांनी पुन्हा माघारी बोलावले होते.
- अॅड. स्मिता लेंडवे पाटील
मोबाइल अॅप डाउनलोड करा आणि राहा अपडेट