टीम मटा, औरंगाबाद
मराठवाड्यातील जिल्हा बॅँकांच्या निवडणुकीत काँग्रेसचे प्रदेशाध्यक्ष अशोक चव्हाण, विधान परिषदेचे विरोधी पक्षनेते धनजंय मुंडे यांना धक्का बसला आहे. या निवडणुकीत बीडमध्ये पंकजा मुंडे यांनी राष्ट्रावादी काँग्रेसच्या मदतीने वर्चस्व सिद्ध केले आहे. नांदेडमध्ये युतीने काँग्रेसचा सुफडासाफ केला आहे. तर लातूरमध्ये आमदार अमित देशमुख यांनी निर्विवाद वर्चस्व राखले आहे.
बीडमध्ये युतीची सरशी
बीड जिल्हा बँक निवडणुकीत पालकमंत्री पंकजा मुंडे यांच्या पॅनेलने बाजी मारली आहे. गेल्या तीन वर्षांपासून बँकेवर प्रशासक नेमण्यात आले होते. या निवडणुकीनंतर संचालक मंडळ पुन्हा बँकेच कामकाज बघू शकणार आहे. मात्र, आता बँक अडचणीत बाहेर काढून राज्य सरकारकडून आर्थिक मदत मिळवून देण्याचे आव्हान पंकजा मुंडे यांच्यापुढे असणार आहे. जिल्हा बँकेच्या १९ जागेसाठी निवडणूक लागली होती. त्यासाठी गुरुवारी मतमोजणी झाली. या निवडणुकीसाठी पाच जागा बिनविरोध झाल्या होत्या. त्यामुळे केवळ १४ जागांसाठी निवडणूक झाली. केज , बीड , आष्टी , पाटोदा आणि शिरूर या तालुक्यातून प्रत्येकी एकमेव अर्ज शिल्लक राहिल्याने या पाच तालुक्यातून जिल्हा बँकेवर पाच संचालक बिनविरोध निवडून गेले होते. केजमधून ऋषिकेश आड्सकर, बीडमधून शीतल दिनकर कदम, आष्टीमधून साहेबराव थोरवे आणि पाटोद्यातून बांगर सत्यभामा रामकृष्ण व शिरूरमधून संध्या वनवे हे बिनविरोध निवडून आले होते. यामध्ये भाजपचे समर्थक चार तर राष्ट्रवादी काँग्रेसचे आमदार जयदत्त क्षीरसागर समर्थक एक संचालक बिनविरोध निवडून आला आहे. पंकजा मुंडे यांच्या पॅनेलचे सहकारी पतसंस्था गटातून आदित्य सारडा, महिला प्रतिनधी मतदारसंघातून संगीता धस आणि मिनाबाई राडकर, विमुक्त भटक्या जमातीमधून सर्जेराव तांदळे, इतर मागास वर्ग प्रतिनिधी म्हणून दिनेश परदेशी, अंबाजोगाई तालुक्यातून दत्ता पाटील, वडवणी तालुक्यातून फुलचंद मुंडे, परळी तालुक्यातून नितिन ढाकणे, धारूर तालुक्यातून गोरख धुमाळ यांचा एका मतांनी विजय झाला. धनंजय मुंडे यांच्या पॅनलचे कृषा पणन संस्था मतदार संघातून भाऊसाहेब नाटकर, गेवराई तालुक्यातून कैलास नलावडे, व माजलगाव तालुक्यातून चंद्रकांत शेजूळ हे तिघेच निवडून आले आहेत.
लातुरात काँग्रेसचे वर्चस्व
लातूर जिल्हा बँकेच्या निवडणुकीत आमदार दिलीप देशमुख व अमित देशमुख यांच्या नेतृत्वाखलील पॅनलने १९ पैकी १७ जागा पटकावल्या आहेत. या निवडणुकीत भाजपने चंचूप्रवेश केला आहे. भाजपचे रमेश कराड आणि धर्मपाल देवशेट्टे या दोन उमेदवारांनी विजय मिळवला. गेल्या काही वर्षांपासून लातूर जिल्हा मध्यवर्ती सहकारी बँकेवर आमदार अमित देशमुख यांची एकहाती सत्ता आहे. या निवडणुकीत एकूण १९ पैकी १३ जागा निवडणुकीपूर्वीच बिनविरोध जाहीर झाल्या होत्या. अहमदपूर, जळकोट, देवणी, चाकूर व शिरूर अनंतपाळ या पाच तालुक्यातून प्रत्येकी एक संचालक व नागरी बँक पतसंस्था मतदार संघातून एक अशा जागेसाठी ५ मे रोजी मतदान झाले होते. त्याची मतमोजणी गुरुवारी पणन महामंडळाच्या कार्यालयात झाली. निवडणूक निर्णय अधिकारी घोलकर यांनी सकाळी आठ वाजता मतमोजणीस आठ टेबलवर सुरुवात झाली. पहिल्या फेरीत निकाल पूर्ण होऊन मतमोजणी संपली. पतसंस्था मतदार संघातून अशोक गोविंदपूरकर विरूद्ध रमेश कराड अशी लढत झाली. यामध्ये अशोक गोविंदपूरकर यांना ८९ तर रमेश कराड यांना ११४ मते मिळाली. २५ मतांनी कराड विजयी झाले. माजी चेअरमन शीलाताई पाटील यांचा जळकोटमधून धर्मपाल देवशेट्टे यांचा चार मतांनी पराभव केला. अहमदपूर तालुक्यातून माजी आमदार बाबासाहेब पाटील यांनी आबासाहेब देशमुख यांचा पराभव केला. देवणी तालुक्यातून भगवान पाटील विजयनगरकर यांनी भगवान पाटील तळेगावकर यांचा पराभव केला. चाकूर तालुक्यातील एका जागेसाठी शिवाजी काळे यांना १५, तर नागनाथ पाटील यांना २५ मते मिळाली. शिरूर अनंतपाळ तालुक्यात व्यंकट बिरादार विरूद्ध लक्ष्मण बोधले असे उमेदवार होते. येथे बिरादार यांना २६ पैकी२६ मते मिळाली.
नांदेडमध्ये शेतकरी विकास पॅनेल विजयी
नांदेड जिल्हा मध्यवर्ती सहकारी बँकेच्या २१ पैकी १६ जागांवर विजय मिळवीत शेतकरी विकास पॅनेलने वर्चस्व सिद्ध केले आहे. काँग्रेसचे प्रदेशाध्यक्ष अशोक चव्हाण यांच्या नेतृत्वखालील काँग्रेसप्रणीत किसान समृद्धी पॅनलला केवळ पाच जागांवर समाधान मानावे लागले आहे. नांदेड जिल्हा बँकेची सत्तासुत्रे जुन्या व नव्या कारभाऱ्यांच्या हाती गेली आहेत. गुरुवारी सकाळपासून शासकीय तंत्रनिकेतन महाविद्यालयाच्या सभागृहात सकाळी ८ वाजता मतमोजणीला प्रारंभ झाला. निवडणुकीचे चित्र दुपारी तीननंतर स्पष्ट झाले. हदगाव मतदारसंघातून आमदार नागेश पाटील आष्टीकर ५२ मते घेऊन निवडून आले आहेत. पराभूत उमेदवार प्रभाकर देशमुख यांना केवळ १२ मते मिळाली. कंधार मतदारसंघातून प्रवीण पाटील-चिखलीकर यांना विजय मिळवित हनुमंत लुंगारे व पांडूरंग कंधारे यांचा पराभव केला. देगलूर मतदारसंघातून अन्नपुर्णा देशमुख आणि माधवराव पाटील या दोघांना समान ३८ मते मिळाली परंतु चिठ्ठीमध्ये मात्र, समृद्धी पॅनलच्या अन्नपुर्णा देशमुखांची लॉटरी लागली. अर्धापूरमधून केशवराव पाटील यंनी प्रतिस्पर्धी उमेदवार दत्ता कदम यांचा पराभव केला. उमरीमधून माजी आमदार बापुसाहेब गोरठेकर ४२ मते घेऊन निवडून आले. धर्माबाद महिला राखीव मतदारसंघातून शेतकरी पॅनलच्या जिजाबाई जगदंबे ६४६ मते घेऊन निवडून आल्या तर मथुरा सोनटक्के यांना ४८६ मते मिळाली. अनुसूचित जाती जमाती मतदारसंघातून लक्ष्मण ठक्करवाड ६९६ मते घेऊन निवडून आले. इतर मागासवर्गीय मतदारसंघातून हरीहरराव भोसीकर ७१५ मते घेऊन निवडून आले. विमुक्त जाती मतदार संघातून सुशांत शेषराव चव्हाण तर नागरी सहकारी बँका मतदार संघातून दिलीप कंदकुर्ते विजयी झाले. इतर सहकारी संस्था मतदार संघातून मोहनराव पाटील-टाकळीकर तर कृषी पतपुरवठा मतदारसंघातून गंगाधर राठोड विजयी झाले. कृषी पतपुरवठा मतदार संघातून बिलोलीतून माजी खासदार भास्कराव पाटील-खतगावकर तर नायगावमधून राजेश देशमुख कुंटूरकर विजयी झाले. नांदेड मतदारसंघातून डॉ. सुनील कदम, लोह्यातून आमदार प्रतापराव पाटील-चिखलीकर, माहूरमधून गयाबाई चव्हाण, किनवटमधून दिनकर दहीफळे, भोकरमधून बाळासाहेब कदम, हिमायतनगरमधून शंकरराव शिंदे, मुदखेडमधून गोविंदराव शिंदे नागेलीकर विजयी झाले. यावेळी निवडणूक निर्वाचन अधिकारी तथा उपविभागीय अधिकारी जयराज कारभारी यांनी निकाल जाहीर केला.
मोबाइल अॅप डाउनलोड करा आणि राहा अपडेट
