शहरातील निम्म्याहून अधिक पेट्रोल पंपांवर कंपनीने निश्चित केलेल्या सुविधा वाहनधारकांना पुरविल्या जात नाहीत. अनेक पंपांवर पिण्याचे पाणी, स्वच्छतागृह, चाकांत हवा भरणे आदी व्यवस्था नाहीत. याशिवाय काही पंपांवर वाहने बेशिस्तपणे थांबत असल्याचा त्रास अन्य वाहनधारकांना सहन करावा लागत आहे.
मोंढ्यातील पेट्रोल पंपावर वाहनधारकांना पिण्यासाठी आणि हवा भरण्याची सुविधा उपलब्ध नाही. सेव्हल हिल्स उड्डाणपुलाच्या उत्तरेकडे असलेल्या पंपावर पाणी आणि स्वच्छता गृहाची व्यवस्था आहे. गजानन महाराज मंदिराकडे जाणाऱ्या रस्त्यावरील इस्सार कंपनीच्या पेट्रोल पंपावर हवा भरून देण्याचेही यंत्र गायब आहेत. याशिवाय उल्कानगरी, शिवाजीनगर भागातील पेट्रोल पंपावरही वाहनधारकांसाठी पिण्याच्या पाण्याची सोय उपलब्ध करून देण्यात आलेली नाही. शहरातील निम्म्या पेक्षाजास्त पेट्रोल पंपावर कंपनीने निश्चित केलेल्या सुविधा वाहनधारकांना देण्यात आलेल्या नाहीत.
शहरातील हिंद सुपर, उस्मानपुरा भागातील पेट्रोल पंप वगळता अन्य ठिकाणी हवा भरणे आणि पाण्याची सोय करून देण्यात आलेली नाही. याशिवाय काही पेट्रोल पंपांवर पाण्याची व्यवस्था करून देण्यात आली आहे. त्यात राज पेट्रोल पंप, कंपनीच्या पेट्रोल पंपावर स्वच्छतागृह आणि पाण्याची सोय आहे.
काही पंपांवर पेट्रोल भरण्यासाठी लागलेल्या वाहनांच्या रांगांनाही शिस्त नसते. एपीआय कॉर्नरच्या चौकाच्या पुढील असलेल्या पेट्रोल पंपावर अनेक वाहनधारकांना उन्हात उभे राहून पेट्रोल भरावे लागते. बीड बायपास रोडवर गोदावरी ढाब्याजवळील पेट्रोल पंपावर पेव्हर ब्लॉक बसविलेले नाहीत. त्याचबरोबर या परिसराचे व्यवस्थित सपाटीकरणही केलेले नाही.
सुविधा देणे परवडत नाही
पंप चालकांना पेट्रोल, डिझेल विक्रीतून मिळणारा नफा कमी असतो. यामुळे या सुविधा देणे पंप चालकांना परवडत नाही. हवा भरण्यासाठी एका कर्मचाऱ्याची नियुक्ती केली जाते. या कर्मचाऱ्याचा पगार आणि इतर गोष्टींवर होणारा खर्च वाढला आहे. वाहनधारकांना सुविधा देण्यासाठी पैसे आकारण्याची परवानगी मिळावी, अशी मागणी औरंगाबाद पेट्रोलिअम डिलर्स असोसिएशने संबंधित पेट्रोल कंपन्यांकडे केली आहे.
जागो ग्राहक जागो
पेट्रोल पंपावर हवा पाणी आणि शौचालयाची सुविधा उपलब्ध करून देण्यासाठी ग्राहकांकडून काही मोजकी रक्कम घेतली जाते. अनेक ग्राहकांना या सुविधेसाठी आपण पैसे मोजतो, हेच माहित नसते. तर ज्यांना याबद्दलची माहिती असते, असे ग्राहक या सुविधा न दिल्याबद्दल कोणतीही तक्रार करत नाहीत. त्यामुळे अनेक पेट्रोल पंपचालकांचे फावते. ते या सुविधा देण्याकडे जाणीवपूर्वक दुर्लक्ष करतात.
बेशिस्तीचे प्रमाणच अधिक
पंपांवर येणारी वाहने रांगेत उभी नसतात. त्यामुळे काही पंपांवर वाहनांची गर्दी होते. त्याचबरोबर दुचाकी वाहने उभी असलेल्या पंपावरूनच चारचाकी वाहनांमध्ये पेट्रोल भरण्यात येते. त्यामुळे पंपांवर वादाचे प्रसंगही उद्भवतात. चारचाकी वाहनांसाठी वेगळा पंप असावा, अशी दुचाकीधारकांची भावना आहे.
३६ पंपांवर सीसीटीव्ही नाहीत
पंपावर अनेक वेळा पेट्रोल भरणाऱ्यांसोबत वाहनधारकांची हुज्जत होत असते. याशिवाय काही वेळा मद्यपी वाहनधारक पंपावरील कर्मचाऱ्यांची हुज्जत घालतात, त्यांना दमदाटी करतात. अनेक जण बाटलीत पेट्रोल घेऊन जातात. वाहने जाळण्यासाठीही पेट्रोलचा वापर होऊ शकतो. त्यामुळे पेट्रोल पंपावर सीसीटीव्ही लावण्याची गरज आहे. शहरातील ३६ पेट्रोल पंपांवर सीसीटीव्ही कॅमेरे बसविलेले नाहीत.
पंपावर उन्हात अनेक वेळ थांबावे लागते. तेथे पिण्याच्या पाण्याची व्यवस्था नाही. त्यामुळे पेट्रोल भरल्यानंतर पाणी पिण्यासाठी हॉटेलमध्ये जावे लागते. पेट्रोल पंपांवर पिण्याच्या पाण्याची व्यवस्था असावी.
- अश्विन चौधरी
अनेक पेट्रोल पंपांवर स्वच्छतागृह नसल्याचे वाहनधारकांना सांगितले जाते. अनेक ठिकाणी पेट्रोल पंप कर्मचाऱ्यांसाठी उभारलेले स्वच्छतागृह वाहनधारकांसाठी असल्याचे दाखविण्यात येते. पेट्रोल पंपांवर वाहनधारकांसाठी स्वच्छतागृहाची वेगळी व्यवस्था असणे आवश्यक आहे. जेणेकरून वाहनधारकांना सोय होईल.
- एस. व्ही. श्रीनिवास
महिलांसाठी विशेष स्वच्छतागृहाची व्यवस्था शहरात कुठेही नाही. पेट्रोल पंपांवरही महिलांसाठी स्वच्छतागृहांची व्यवस्था नाही. महिला कर्मचारी व वाहनधारकांना यामुळे फारच त्रास होतो.- लता शेळके
पेट्रोल पंपावर हवा भरण्यासाठी यंत्र लावण्यात आलेले आहे. अनेक वेळा ते यंत्र खराब असल्याचे सांगण्यात येत असतात. यामुळे गाडी पक्चंर झाल्यास ढकलत न्यावी लागते. कधी कधी हवाही व्यवस्थित भरली जात नाही.- अजीम खान
जुन्या पेट्रोल पंपावर हवा, पाणी आणि शौचालयाची सुविधा उपलब्ध नाही. मात्र, काही जुन्या पेट्रोलपंप चालकांनी येणाऱ्या ग्राहकांसाठी या सुविधा उपलब्ध करून दिल्या आहेत. सध्या नवीन पेट्रोल पंपावर या सुविधा आहेतच.
- अखिल अब्बास, सचिव, औरंगाबाद पेट्रोलीयम डिलर्स असोसिऐशन
मोबाइल अॅप डाउनलोड करा आणि राहा अपडेट
