सातारा-देवळाई परिसर महापालिकेकडे हस्तांतरित करण्याची अधिसूचना शासनाने काढल्यानंतर निवडणुक आयोगाने देखील आपले काम लगोलग सुरू केले आहे. सातारा-देवळाई परिसरातील निवडणुकीच्या दृष्टिने महत्त्वाची असलेली माहिती तात्काळ पाठवा, असे पत्रच आयोगाने महापालिकेच्या आयुक्तांना पाठवले आहे. त्यामुळे अधिकारी कामाला लागेल आहेत. आयोगाने पोटनिवडणुकीची तयारी सुरू केल्याचे मानले जात आहे.
शासनाने सातारा-देवळाई नगर पालिका स्थापन केली. त्यानंतर या नगर पालिकेच्या निवडणुकीच्या दृष्टिने वॉर्ड रचना निवडणूक आयोगाच्या सूचनेनुसार करण्यात आली, पण त्यानंतरची प्रक्रिया ढेपाळली. आता या संपूर्ण परिसरचा समावेश शासनाने महापालिकेत केला आहे. तशी अधिसूचना सोमवारी काढण्यात आली. त्यानंतर आज निवडणूक आयोगाने आयुक्तांच्या नावे पत्र पाठविले. निवडणूक आयोगाने, सातारा-देवळाई भागाची माहिती तात्काळ पाठवावी, असे या पत्राद्वारे कळविले आहे.
त्यानुसार उपायुक्त किशोर बोर्डे यांच्या नेतृत्वाखाली मालमत्ता अधिकारी वसंत निकम, आबेद अली, वॉर्ड अधिकारी सी. एम. अभंग या अधिकाऱ्यांचे एक पथक सातारा नगर पालिकेच्या कार्यालयात गेले होते. तेथून त्यांनी पोट निवडणुकीसाठी आवश्यक असलेली माहिती संकल‌ित केली. त्यात सातारा-देवळाई भागाची भागाची एकूण लोकसंख्या, मतदारांची संख्या, अनुसूचित जाती, अनुसूचित जमाती या वर्गातील मतदारांची संख्या, महिला आणि पुरुषांची संख्या या माहितीचा समावेश आहे. ही सर्व माहिती एकत्रित करून तातडीने निवडणूक आयोगाला पाठवली जाणार आहे, असे महापालिकेच्या सूत्रांनी सांगितले.
मोबाइल अॅप डाउनलोड करा आणि राहा अपडेट
