पोलिसांबद्दल कोणी फारसे चांगले बोलत नाही. पण क्षुल्लक कारणामुळे चार वर्षांपूर्वी विभक्त झालेल्या एका जोडप्याला पैठण पोलिसांनी एकत्र आणले. यामुळे पोलिसांची नकारात्मक भूमिका बदलण्यास मदतच होणार आहे.
तालुक्यातील आपेगाव येथील गणेश बाबुराव औटे याचे अंबड तालुक्यातील एकलहरा येथील उषा यांच्यासोबत पाच वर्षापूर्वी लग्न झाले. उषा या उच्चशिक्षित असून नोकरी लावून देतो, अशी थाप मारून उषाच्या माहेराकडील एका नातेवाईकाने गणेश औटे यांच्याकडून दोन लाख रुपये घेतले. तो नातेवाईक उषाला नोकरी मिळवून न देता पळून गेला. त्यावरून दोन कुटुंबात वाद सुरू झाला. हा वाद पैठण, अंबड, जालना व औरंगाबादच्या कौटुंबिक न्यायालयापर्यंत पोहचला. परंतु, कोर्टबाजीमुळे संसार जुळणार नाही, असे वाटल्याने उषा यांनी पैठण पोलिस ठाण्यात पोलिस निरीक्षक चत्रभूज काकडे यांच्याशी संपर्क करून मदतीची विनंती केली. काकडे यांनी दोघांना बोलावून घेतले.
तब्बल तीन-चार तास दोघांशी चर्चा करून समजूत काढली. या चर्चेत सुरुवातीला नकारात्मक भूमिका घेणाऱ्या गणेश यांनी शेवटी प्रतिसाद देण्यास सुरुवात केली. अखेरीस त्यांनी चार वर्षापूर्वी संपुष्टात आलेले वैवाहिक संबंध पुन्हा नव्याने सुरू करण्याचा निश्चय केला.
एकाचे वाचले प्राण
फुलंब्री तालुक्यातील आडगाव येथील विठ्ठल गाडेकर हा तरूण एक जूनच्या रात्री दारू व विष प्राशन केल्यानंतर पैठण येथील उद्यान रोडवर अंधारात बेशुद्धावस्थेत पडला होता. रात्रीची गस्त घालताना पोलिस निरीक्षक काकडे यांना हे निदर्शनास आले. पोलिसांनी त्याच्यावर डॉ. राजेंद्र दळवी यांना फोन करून प्रथमोपचार केले. अधिक उपचारासाठी त्वरित औरंगाबाद येथे पाठवण्यात आले. वेळेत उपचार मिळाल्याने विठ्ठल गाडेकर याचे प्राण वाचले.
प्रकरण कोर्टात गेल्यामुळे पुन्हा संसार सुरळीत होईल, असे वाटत नव्हते. त्यामुळे पोलिसांत जाऊन मदत मागितली. पोलिसांच्या प्रयत्नामुळे माझा संसार पुन्हा एकदा सुरू होणार आहे. - उषा औटे
पोलिस ही माणसेच आहेत. अनेकवेळा पोलिस समाजपयोगी व सकारात्मक कामे करतात. मात्र, काहीवेळा झालेल्या चुकांमुळे समाजात संपूर्ण खात्याची नकारात्मक प्रतिमा तयार होते. - चत्रभूज काकडे, पोलिस निरीक्षक
मोबाइल अॅप डाउनलोड करा आणि राहा अपडेट
