सुलभ शौचालयाच्या मॅनेजरचे सोळा हजार रूपये पळवणाऱ्या कुख्यात गुंडाला पाच तासात मुकुंदवाडी पोलिसांनी जेरबंद केले. गजानन महाराज मंदीर चौकात गुरूवारी रात्री दहा वाजता हा प्रकार घडला होता. या गुन्ह्यातील दोन आरोपी पसार आहेत.
गजानन महाराज मंदीर चौकात असलेल्या सुलभ शौचालयात कृष्ण सिंग प्रसाद सिंग हे मॅनेजर म्हणून कार्यरत आहेत. रात्री दहा वाजता ते काऊंटरवर बसले होते. यावेळी युसूफ शेख गुलाब (रा. हुसेनकॉलनी, न्यायनगर) हा दोन साथीदारासह तेथे आला. युसूफने कृष्णासिंगला दारू पिण्यासाठी पैशांची मागणी केली. त्यांनी नकार दिला असता युसूफ व साथीदारांनी त्यांना मारहाण करीत त्यांच्या जवळील सोळा हजार रूपये पळवले. कृष्णासिंग यांनी मुकुंदवाडी पोलिस ठाण्यात या प्रकरणी जबरी चोरीचा गुन्हा दाखल केला.
या प्रकरणी गुन्हे प्रकटीकरण पथकाने तात्काळ आरोपीचा शोध घेत त्याला हुसेन कॉलनी परिसरात सकाळी अटक केली. त्याच्या ताब्यातून सोळा हजार रूपये जप्त करण्यात आले. ही कारवाई पोसिल निरिक्षक नाथा जाधव यांच्या मार्गदर्शनाखाली पीएसआय शेख हारून, रावसाहेब कसबे, राजू बनकर, राहूल हिवराळे, परशुराम सोनूने, आनंद वाहूळ यांनी केली.
मोबाइल अॅप डाउनलोड करा आणि राहा अपडेट