येथील मुख्य बाजारपेठेत सुमारे पाचशे मीटरच्या अंतरात पाच दुकानाचे शटर सोमवारी (८ जून) मध्यभागी उचकटून चोरी करण्यात आली. यामुळे व्यापाऱ्यांत खळबळ उडाली असून कन्नड पोलिस ठाण्यात गुन्हा दाखल करण्यात आला आहे.
औरंगाबाद-धुळे महामार्गावरील पवन किराणा, अष्टविनायक प्रोव्हिजन, आकाशदीप क्लॉथ स्टोअर, मंगल मेडिकल स्टोअर्स व तेजश्री एंटरप्रायजेस ही दुकाने सोमवारी मध्यरात्री व मंगळवारी पहाटे फोडण्यात आली. चोरांनी तेजश्री एंटरप्रायजेस मध्ये एलसीडी टीव्ही, विविध कंपनीचे मोबाइल हँडसेट चोरून नेले. या मालाची किंमत अंदाजे साडेचार लाख रुपये आहे. इतर दुकानांमधील कॅश काउंटर फोडून रोख रक्कम पळवण्यात आली. ही चोरी करताना दुकानांसमोर मोठ्या ट्रकचा आडोसा निर्माण करण्यात आला असावा, असा पोलिसांचा अंदाज आहे. तेजश्री एंटरप्रायजेसचे किशोर मधुकर वज्रे यांनी कन्नड पोलिसांना कळविल्यानंतर उपविभागीय पोलिस अधिकारी प्रीतम यावलकर, स्थानिक गुन्हे शाखेचे पोलिस निरीक्षक के. के. पाटील, पोलिस निरीक्षक सुभाष भुजंग, पोलिस उपनिरीक्षक रोहित बेंबरे यांनी घटनास्थळास भेट देऊन पाहणी केली. याप्रकरणी कन्नड पोलिस ठाण्यात गुन्हा नोंद करून सहायक पोलिस निरीक्षक ज्ञानेश्वर पायघन तपास करीत आहेत.
मोबाइल अॅप डाउनलोड करा आणि राहा अपडेट