मराठवाड्यातील नांदेड, बीड, उस्मानाबाद व लातूर जिल्ह्यात पावसाने मृग नक्षत्राच्या पावसाने हजेरी लावली. विजांच्या गडगडाटासह पाऊस झाल्याने सर्वत्र पाणीच पाणी झाले. उस्मानाबाद जिल्ह्यात वीज अंगावर पडल्याने माहिलेचा मृत्यू झाला.
नांदेडमध्ये पावसाची हजेरी
नांदेडः नांदेड शहर व परिसरात शुक्रवारी सायंकाळी सहानंतर जोरदार पावसाने हजेरी लावली. काही भागात पावसाचा जोर कमी होता पण नांदेडच्या वजिराबाद भागात अर्धातास धो धो मृग बरसला. परभणी पूर्ण परिसरात तसेच नांदेड जिल्ह्याच्या सीमावर्ती भागात किनवट, हिमायत नगर भागात जोरदार पाऊस झाला. नांदेड शहर व परिसरात शुक्रवारी सहा ते साडे सहाच्या विजांच्या गडगडाटासह पाऊस झाला. प्रथमच नाल्या भरून पाणी वाहताना दिसले. मनपाने अजून नालेसफाईची कामे न केल्याने काही भागात पाणीही तुंबले होते.
महिलेचा मृत्यू
उस्मानाबादः उस्मानाबाद जिल्ह्यात शुक्रवारी मृग नक्षत्राच्या पावसाने हजेरी लावली. वीज अंगावर कोसळल्याने भूम तालूक्यातील पाथरूड येथील शेळ्या चारण्यासाठी गेलेल्या महिलेचा मृत्यू झाला. ही घटना शुक्रवारी दुपारी चारच्या सुमारास घडली. नीलावती गोरख तिकटे असे मरण पावलेलया महिलेचे नाव आहे. त्यासोबतच तीन शेळ्या दगावल्या.
दरम्यान, या प्रकरणाचा पंचनामा भूम तहसील कार्यालयातील कर्मचाऱ्यांनी शुक्रवारी रात्री उशीरा केला. आतापर्यंत भूम तालुक्यात मोठ्या प्रमाणात पावसाने हजेरी लावल्याने शेतकरी वर्गात आनंदाचे वातावरण पसरले आहे. या भागातील शेतकरी लवकरच पेरणीच्या कामास सुरुवात करतील, असे चित्र सध्या दिसत आहेत. शुक्रवारी उस्मानाबाद जिल्ह्यातील काही भागात विजांच्या कडकडाटासह पाऊस झाला.
लातूर जिल्ह्यात पावसाला सुरुवात
लातूरः मृग नक्षत्राच्या आगमनासोबतच लातूर जिल्ह्यात पावसाने हजेरी लावली. गेल्या चार दिवसांपासून कमी अधिक प्रमाणात पाऊस पडत आहे. शुक्रवारी दुपारी चाकुर, लातूर तालुक्यात पाऊस झाला. लातूरात अवघा अर्धातास परंतु जोरदार पावसाने सर्वांची
त्रेधातिरीपट उडवली. लातूर जिल्ह्यात या हंगामात आतापर्यंत पडलेला सरासरी पाऊस ३१ मिलि मीटर इतका आहे. शुक्रवारी सकाळी आठ वाजता मोजलेला पाऊस हा तालुकानिहाय पुढीलप्रमाणे आहे. कंसातील आकडे हे आजपर्यंतच्या एकूण पावसाचे आहेत. लातूर ८ ( ४०.७५ मिमी), औसा- १ (३०.५६), रेणापूर- ०.७५ (३९), उदगीर-निरंक (४४.१३), अहमदपूर- ६.६७ (१८.५), चाकुर निरंक (३३.८), जळकोट निरंक (५४.५), निलंगा ०.७५ (११.६३), देवणी- ५ (२१.६७) शिरुरअनंतपाळ-निरंक (२०.६७ मिमी) इतका पाऊस घझाला आहे. शेतकऱ्यांनी पेरणीसाठी मशागतीचे कामे पूर्ण केली आहेत. पेरणी योग्य पावसाची शेतकरी मोठ्या आतुरतेने वाट पाहत आहेत.
परळीमध्ये दमदार पाऊस
बीडः बीड जिल्ह्यातील काही भागात शुक्रवारी दमदार पावसाने हजेरी लावली. गुरुवारी रात्री परळी परिसरात ६० मिलि मीटर पाऊस झाला. त्यासोबतच बीडसह अंबाजोगाई, परळी,केज, धारूर तालुक्यात पावसाने हजेरी लावली. परळी तालुक्यात आतापर्यंत सरासरी २० मिलि मीटर पाऊस झाला. त्यासोबतच केज तालुक्यातील काही भागात शुक्रवारी ३० मिलि मीटर पावसाची नोंद झाली. या पावसामुळे आता काही भागात पेरण्याला सुरुवात होणार आहे. त्यामुळे शेतकरी वर्गातून समाधानाचे वातावरण आहे.
मोबाइल अॅप डाउनलोड करा आणि राहा अपडेट
