मराठवाड्यातील प्रत्येक बसस्थानकावर विक्रेत्यांना त्यांचा व्यवसाय करण्यासाठी एसटीने भाडेतत्वावर जागा दिली आहे. मात्र, या विक्रेत्यांनी निर्धारित जागेपेक्षा जास्त जागेचा वापर सुरू केला आहे. त्यामुळे एसटी महामंडळाला १० कोटींचा फटका बसला आहे. शिवाय लाखोंची थकबाकी या भाडेकरूंकडे आहे.
विभागातील बसस्थानकावर ज्यूस विक्रेता, कॅन्टीनचालक, रसवंती, पानटपरीवाल्यांनी व्यवसाय करण्यासाठी भाडेतत्त्वार जागा घेतली. मात्र, अनेक ठिकाणी व्यावसायिकांनी जास्त जागेचा वापर करणे सुरू केले आहे. लातूर येथील बसस्थानकात एका दुचाकी पार्किंगवाल्याला सहा वर्षापूर्वी ४०० स्क्वेअर फुटाची जागा भाड्याने देण्यात आली. प्रत्यक्षात या पार्किंग व्यवसायिकाने १,५०० स्क्ेवर फुटाच्या जागेचा वापर सुरू केला. या प्रकरणी सुरक्षा व दक्षता विभागाच्या अधिकाऱ्यांनी पाहणी केली. जागेचा अतिरिक्त वापर केल्याप्रकरणी संबधिताला १० लाखांचा दंड ठोठावला. या प्रकरानंतर राज्यातील सर्व बसस्थानकात व्यावसायिक वापरासाठी देण्यात आलेल्या जागेचे सर्वेक्षण करण्याचे आदेश महामंडळाच्या वरिष्ठ कार्यालयाने दिले आहेत.
औरंगाबाद विभागातील विविध बस स्थानकामधील जवळपास १५ हजार स्केवर फूट जागेचा फुकटात वापर सुरू आहे. यामुळे २ कोटी ५१ लाख रुपयांचा भुर्दंड महामंडळाला बसला आहे. यात पन्नास लाखांहून अधिक भाडे भाडेकरूंकडे थकले आहे. यातील अनेक प्रकरणे न्यायप्रविष्ट असल्याची माहिती एसटी विभागाच्या सूत्रांनी दिली.
अधिकाऱ्यांचे दुर्लक्ष
एसटीचे कर्मचारी, अधिकारी, सहप्रादेशिक व्यवस्थापकांना प्रत्येक महिन्याला किंवा तीन महिन्याला या बसस्थानकातील आस्थापनांची प्रत्यक्ष भट देऊन चौकशी करण्याच्या सूचना दिल्या आहेत. मात्र, मागील अनेक वर्षांपासून अधिकारी आणि कर्मचाऱ्यांनी ही तपासणी केलीच नाही.
लातूर विभागात पार्किंगच्या अतिरिक्त जागा वापराबाबतचा प्रकार समोर आला. त्यानंतर वाणिज्यिक वापरासाठी दिलेल्या जागेची आम्ही संपूर्ण बस स्थानकात चौकशी सुरू केली आहे. चौकशी करणे सुरू आहे. अहवालही तयार केला जात आहे. यामुळे याबाबत आता कोणतीही माहिती देता येणार नाही.
- भगवान घुगे, वरिष्ठ सुरक्षा दक्षता अधिकारी, औरंगाबाद
मोबाइल अॅप डाउनलोड करा आणि राहा अपडेट