म. टा. प्रतिनिधी, फुलंब्री
ई-फेरफार ऑनलाइन संगणक प्रणाली मंद गतीने चालत असून विहिरीची नोंद न होणे यासह तांत्रिक अडचणी असल्याचे तलाठी संघटनेने तहसीलदार किशोर देशमुख यांच्या लक्षात आणून दिले आहे. संघटनेतर्फे नुकतेच तहसीलदारांना त्याबद्दलचे निवेदन देण्यात आले.
ई-फेरफार संगणक प्रणालीत मंडळ अधिकारी यांच्या लॉगइनला फेरफार मंजूर होण्यास अडचण येत आहे. फेर मंजूर होत नाही, ऑनलाइन संगणक प्रणालीत इतर हक्कांमध्ये विहिरीची नोंद होत नाही. सातबाराच्या इतर अधिकारात हस्तांतरणात बंदी, असा एरर येतो, संबंधित माहिती डिलिट होत नाही. ऑनलाइन संगणक प्रणालीचे सर्वर नेहमीच स्लो असते व संगणक हँग होतो. या समस्याचे निराकरण करण्यासाठी संबंधितांकडे विचारणा केली असता योग्य मार्गदर्शन मिळत नाही, अशी तक्रार निवेदनात करण्यात आली आहे.
या समस्यांचे निराकरण करून काम सुलभ करावे, अशी मागणी करण्यात आली आहे. तहसीलदारांना दिलेल्या निवेदनावर संघटनेचे तालुकाध्यक्ष संजय पवार, माजी तालुकाध्यक्ष कैलास थोरात, आर. एस. खंडागळे, अलका पेटारे, एस. एस. मिसाळ, एन. ओ. खंदारे, व्ही. बी. जगताप, व्ही. पी. कुलकर्णी, एस.आय. केंद्रे, बी. जे. दुतोंडे, के. डी. साळवे, ए. के. पंडित, एम. एस. पांचाळ आदींच्या सह्या आहेत.
मोबाइल अॅप डाउनलोड करा आणि राहा अपडेट
