म. टा. प्रतिनिधी, औरंगाबाद
महापालिकेने बीओटी तत्त्वावर विकसित केलेल्या आणि राकाज् लाइफ स्टाइल क्लबला चालवण्यासाठी दिलेल्या स्विमिंग पुलाच्या परिसरात जलतरणाला दुय्यम स्थान होते. क्लबच्या पहिल्या मजल्यावर बांधण्यात आलेल्या जेंटस् आणि लेडिज पार्लरच्या नावाखाली खुलेआम मसाज पार्लर चालविले जात असल्याचे उघड झाले. महापौर, उपमहापौर, महापालिकेचे आयुक्त यांनी आज शनिवारी याची पाहणी केली, त्यावेळी अनेक अवैध धंद्यांचा भांडाफोड झाला.
महापौर त्र्यंबक तुपे आणि उपमहापौर प्रमोद राठोड यांनी दोन दिवसांपूर्वी 'राकाज्'ला भेट दिली होती. त्यावेळी पूल टेबल हॉलची सरकती खिडकी, सरकत्या खिडकीतून दिसणारा पोहण्याचा तलाव, हुक्का पार्लर आदी उघड झाले होते. आज पुन्हा तुपे, राठोड यांनी 'राकाज्' भेट दिली. यावेळी पालिकेचे बीओटी कक्षप्रमुख सिकंदर अली, राकाज् लाइफ स्टाइलचे संचालक सुनील राका उपस्थित होते. सिकंदर अली राका यांची पाठराखण करण्यासारखे बोलत होते, पण त्याकडे या पदाधिकाऱ्यांनी लक्ष दिले नाही. त्यांनी राका यांना बोलावले व त्यांच्याकडून क्लबमध्ये सुरू असलेल्या अवैध व अनैतिक बाबींविषयी विचारणा केली. दरम्यानच्या काळात आयुक्त प्रकाश महाजन देखील आले.
पोहण्याच्या तलावाच्या समोरच्या बाजुला प्रशासकीय कामासाठी इमारत बांधण्यात आली आहे. या इमारतीच्या गच्चीवर लेडीज आणि जेंट्स पार्लरचे विनापरवाना बांधकाम करण्यात आल्याचे यावेळी स्पष्ट झाले. लेडिज आणि जेंट्स पार्लरला जाण्यासाठी एकच दार होते. एकाच खोलीत महिला आणि पुरुषांची कटिंग केली जात होती.
विशेष म्हणजे महिलांची कटिंग करण्यासाठी पुरूष कर्मचारी नियुक्त करण्यात आले होते, ही बाबही यावेळी उघड झाली. महापौरांनी सुरुवातीला सौम्य आवाजात आणि त्यानंतर आवाज चढवून या दोन्ही पार्लरबद्दल तेथील कर्मचाऱ्यांना माहिती विचारली. त्यावेळी, 'येथे मसाज केली जाते,' असे कर्मचाऱ्यांनी सांगितले. महिलांच्या मसाजसाठी पुरुषांची तर, पुरुषांच्या मसाजसाठी महिलांची नियुक्ती केली जात असल्याचे महापौरांच्या लक्षात आणून देण्यात आले. मसाजसाठीच्या प्रत्येक खोलीत सीसीटीव्ही कॅमेरा होता. तेथे फक्त दोन व्यक्ती मावतील एवढ्या छोट्या आकाराचे केबिन्स तयार केले होते. प्रत्येक केबीनमध्ये पलंग होता. हे चित्र पाहिल्यावर, 'या केबिन्समध्ये काय चालत असेल याची कल्पनाच न केलेली बरी,' अशी प्रतिक्रिया महापौर, उपमहापौरांच्या तोंडातून बाहेर पडली.
प्रत्येक खोलीतील सीसीटीव्ही कॅमेऱ्याचे कंट्रोलिंग पार्लरच्या एका कोपऱ्यात होते. सर्व केबीनमधल्या हालचाली या कोपऱ्यात उभे राहून पहता येत होत्या. सीसीटीव्हीचे कंट्रोलिंग पॅनल महापौरांच्या आदेशाने सिकंदर अली यांनी ताब्यात घेतले. हे सर्व पाहून आयुक्त प्रकाश महाजन यांनीही आश्चर्य व्यक्त केले. 'राकाज्'च्या विरोधात कायदेशीर कारवाई करण्यात येईल, असे त्यांनी पत्रकारांना सांगितले.
'राकाज्' बंद करून उद्यान विकसित करा
राकाज् लाइफ स्टाइल क्लब कायमचा बंद करावा. क्लबच्या शेजारी असलेल्या मोकळ्या जागेत उद्यान विकसित करावे, अशी मागणी ज्योतीनगरमधील महिलांनी महापौर त्र्यंबक तुपे व आयुक्त प्रकाश महाजन यांच्याकडे केली आहे. महिलांनी दिलेल्या निवेदनात म्हटले आहे की, क्लबमध्ये रात्री-अपरात्री मुले येतात. मद्यपान करून मोठ्या आवाजात गाणे लावतात. दारूच्या बाटल्या फोडतात. हे क्लब रहिवाशांना त्रासदायक आहे. निवेदनावर तारा पवार, सुरेखा वैद्य, अपर्णी जोशी, सुचिता सोनवणे, शीतल पवार, सरोज संघई यांच्यासह ३५ महिलांची नावे आहेत.
टपोरी मुलांची वर्दळ
राकाज् लाइफ स्टाइल क्लबमध्ये असलेल्या पार्लरमध्ये टपोरी मुलांची सतत वर्दळ सुरू होती. महापौर, उपमहापौर व आयुक्तांच्या पाहणीत आक्षेपार्ह काहीही सापडू नये यासाठी त्यांची धडपड सुरू होती. एका पार्लरचे दार महापौरांनी तेथील कर्मचाऱ्याला उघडायला लावले तेव्हा पार्लरमध्ये आरशाच्या समोर तोकडे कपडे घातलेल्या दोन मुली खुर्चीवर बसल्या होत्या व त्यांची कटिंग दोन मुले करीत होते. पदाधिकारी, अधिकारी यांची ये-जा वाढल्यावर मुलींना तेथील कर्मचाऱ्यांनी गुपचूप बाहेर काढले.
मोबाइल अॅप डाउनलोड करा आणि राहा अपडेट
