म.टा. प्रतिनिधी, औरंगाबाद
बीड पोलिसांना खंडणीच्या गुन्ह्यात हव्या असलेल्या आरोपीला सिटीचौक पोलिस ठाण्याच्या गुन्हे प्रकटीकरण पथकाने अटक केली. रविवारी रात्री बारा वाजता ही कारवाई करण्यात आली. आरोपीच्या ताब्यातून गुन्ह्यात वापरलेली कारही जप्त करण्यात आली असून आरोपीला बीड पोलिसांच्या स्वाधीन करण्यात आले आहे.
बीड शहर पोलिस ठाण्यात शहेबाज शेख कलीम (वय २७ रा. बीड) याच्यावर खंडणीचा गुन्हा दाखल आहे. शहेबाज हा सध्या रोहीलागल्ली येथे वास्तव्यास असून त्याने गुन्ह्यात वापरलेली कार (क्रमांक एमएच २३ एडी ०८१०) जुना बाजार येथे लपवून ठेवली आहे तसेच आरोपी शहेबाज लोटाकारंजा येथे असल्याची माहिती पोलिस नाईक इरफानखान याना मिळाली होती. या माहितीवरून पोलिसांनी कार ताब्यात घेत लोटाकारंजा येथून शहेबाजला अटक केली. त्याची झडती घेण्यात आली असता त्याच्याजवळ विविध कंपनीचे सीमकार्ड आढळून आले. पोलिसांनी त्याला बीडच्या स्थानिक गुन्हेशाखेच्या स्वाधीन केले आहे. ही कारवाई एसीपी खुशालचंद बाहेती यांच्या मार्गदर्शनाखाली जमादार दिनेश बन, सुनील राऊत, इरफान खान आदींनी केली.
हद्दपार गुन्हेगार गजाआड
म.टा. प्रतिनिधी, औरंगाबाद
शहरातून दोन वर्षांसाठी हद्दपार करण्यात आलेला अट्टल आरोपी शेख कैसर शेख अन्वर (वय २३ रा. कैसर कॉलनी) हा रविवारी औरंगपुरा भागात आला असल्याची माहिती गुन्हेशाखेला मिळाली होती. या माहितीवरून पथकाने औरंगपुऱ्यातून आरोपी शेख कैसरला अटक केली. त्याच्याजवळ धारदार चाकू पोलिसांना आढळला. त्याच्याविरूद्ध् क्रांतिचौक पोलिस ठाण्यात गुन्हा दाखल करण्यात आला आहे.
चार जणांना पोलिस कोठडी
म. टा. प्रतिनिधी, औरंगाबाद
सिडको परिसरातील घरातून झालेल्या ६८ हजार रुपयांच्या मुद्देमालाच्या चोरीप्रकरणी तिघा आरोपींना पोलिस कोठडीत ठेवण्याचे आदेश प्रथम वर्ग न्यायदंडाधिकारी श्रीमती ए. व्ही. कस्तुरे यांनी दिले आहेत. विशेष म्हणजे या आरोपींमध्ये आई, मुलगा, सून व नातवाचा समावेश आहे.
टाऊन सेंटर परिसरातील प्लॉट क्रमांक ५५ (सेक्टर एक) परिसरातील अर्चना जितेंद्र दिघे (४६) यांनी या प्रकरणी सिडको पोलिस ठाण्यात फिर्याद दिली होती. ३ जुलै रोजी स्वयंपाकघरात कुकरी शोची तयारी करीत असताना त्यांच्या घराचे समोरचे दार उघडे होते आणि कामानिमित्त बाहेरच्या खोलीत आल्यावर पर्सची चोरी झाल्याचे लक्षात आले. या पर्समधील सोन्या-चांदीचे दागिने व रोख पाच हजार रुपये चोरीला गेल्याचे तक्रारीत म्हटले होते.
दरम्यान, पोलिसांना मिळालेल्या माहितीवरून पाच जुलै रोजी मिसारवाडीच्या कादरिया कॉलनीतील रेकॉर्डवरील गुन्हेगार मालनबाई मकळेला ताब्यात घेऊन चौकशी केल्यानंतर तिने गुन्ह्याची कबुली दिली. तपासी अंमलदार सहाय्यक पोलिस उपनिरीक्षक हरिष खटावर यांनी तपास करून मालनबाई शंकर मकळे (५७), अंकुश शंकर मकळे (४०), मंगलबाई अंकुश मकळे (३२) व राहुल अंकुश मकळे (१९) (सर्व रा. मिसारवाडी) यांच्याविरुद्ध गुन्हा दाखल केला. खटल्यावेळी आरोपींकडून रक्कम व सोन्या-चांदीचे दागिने हस्तगत करणे बाकी आहे. तसेच आरोपी सराईत असून तपास करण्यासाठी पोलिस कोठडी आवश्यक असल्याचा युक्तिवाद सरकार पक्षाकडून करण्यात आला. दोन्ही बाजूंच्या युक्तिवादानंतर प्रथम वर्ग न्यायदंडाधिकारी कस्तुरे यांनी आरोपींना पोलिस कोठडीत ठेवण्याचे आदेश दिले.
बीड जिल्ह्यातील तीन बहिणी ताब्यात
म.टा. प्रतिनिधी, औरंगाबाद
हरवलेल्या बालकांच्या शोधासाठी सुरू असलेल्या ऑपरेशन मुस्कान मोहिमेअंतर्गत बीड जिल्ह्यातून आलेल्या तीन बहिणींना गुन्हेशाखेच्या पथकाने ताब्यात घेतले. त्यांच्या पालकांना हा प्रकार कळवण्यात आला असून सध्या त्यांची रवानगी महिलागृहात करण्यात आली आहे. या मोहिमेसाठी दीडशे पोलिस कर्मचारी अधिकारी पथकांमध्ये नेमण्यात आले आहेत.
ऑपरेशन मुस्कान अंतर्गत हरवलेल्या बालकांचा शोध घेण्यासाठी गुन्हेशाखेचे पथक सोमवारी सकाळी बसस्टँड परिसरात फिरत होते. यावेळी एका हॉटेलमध्ये तीन तरुणी आढळल्या. यामध्ये एक १९ वर्षांची विवाहिता तर उर्वरित दोघी अल्पवयीन होत्या. यांची चौकशी केली असता या तिघी सख्ख्या बहिणी असून रविवारी शहरात आल्याची माहिती मिलाली. त्यांच्या गावातील एका परीचिताने त्यांना औरंगाबाद शहर दाखविण्यासाठी स्कॉर्पियो कारमध्ये आणल्याची माहिती त्यांनी दिली. दरम्यान, ही व्यक्ती सोमवारी गावाकडे अचानक निघून गेली. हरवलेल्या या तीन बहिणींना गुन्हेशाखेत आणण्यात आले. त्यांच्या पालकांना फोन करून ही माहिती देण्यात आली. जिल्हा बाल कल्याण समितीच्या सदस्यांना हा प्रकार कळवित बोलावून घेण्यात आले. सायंकाळपर्यंत या बहिणीचे पालक आले नसल्याने त्यांची रवानगी महिलागृहात करण्यात आली असल्याची माहिती पोलिस निरीक्षक अविनाश आघाव यांनी दिली.
विविध पथके तैनात
ऑपरेशन मुस्कान मोहीम राबवण्यासाठी सोमवारी पोलिस आयुक्तालयात एका बैठकीचे आयोजन करण्यात आले होते. यामध्ये विविध पोलिस ठाण्याचे दहा अधिकारी, ८९ कर्मचारी, गुन्हेशाखेचे दोन अधिकारी व ३० कर्मचारी तसेच जिल्हा महिला बाल विकास अधिकारी, जिल्हा बाल सरंक्षण कक्ष व जिल्हा बाल कल्याण समितीच्या अधिकाऱ्यांचा व कर्मचाऱ्यांचा समावेश होता.
आमदाराचा वाद पोलिस ठाण्यात
म.टा. प्रतिनिधी, औरंगाबाद
जिल्ह्यातील एका आमदाराने नो-पार्किंगमध्ये कार उभी करण्यावरून वाहतूक पोलिस कर्मचाऱ्याशी चांगलाच वाद घातला. उस्मानपुरा परिसरात सोमवारी सायंकाळी हा प्रकार घडला. पोलिस कर्मचारीही खमक्या निघाला. हा वाद पोलिस ठाण्यात पोहचला. मात्र, वरिष्ठांच्या मध्यस्थीनंतर आपसात मिटविण्यात आला.
जिल्ह्यातील एक आमदार शहरातच वास्तव्यास आहेत. सोमवारी सायंकाळी कारमध्ये आमदार उस्मानपुरा परिसरात आले होते. त्यांनी नो पार्किंग झोनमध्ये त्यांची कार उभी केली. एका वाहतूक कर्मचाऱ्याने हे पाहून त्यांना नो पार्किंग झोन असल्याचे सांगितले. यावर आमदारांनी येथे कुठे असे लिहिले आहे, असा सवाल केला. पोलिस कर्मचारी म्हणाला, 'साहेब येथे पार्किंग करा असे तरी कुठे लिहिले आहे दाखवा.' यावरून दोघांत चांगलाच वाद झाला. उस्मानपुरा पोलिस ठाण्यापर्यंत प्रकरण पोहचले. मात्र, वरिष्ठ पोलिस अधिकाऱ्यांनी मध्यस्थी करीत हा वाद आपसात मिटविला.
चार्लींच्या सतर्कतेने दुचाकी चोर गजाआड
म.टा. प्रतिनिधी, औरंगाबाद
शहरात सुरू असलेल्या चार्लींच्या गस्ती पथकाच्या सतर्कतेने दुचाकी चोर पकडण्यात यश आले आहे. रविवारी ही घटना घडली. दरम्यान, महिला चार्लीच्या सतर्कतेने चोरलेली दुचाकी सोडून चोरट्यांनी पलायन केले आहे. सिडको व सिटीचौक हद्दीत या घटना घडल्या.
सिडको पोलिस ठाणे हद्दीतील चार्ली पथक क्रमांक ३२ चे कल्याण पाटील व कुंदन आल्हाटे हे दोघे रविवारी जळगाव रोडवर गस्त घालीत होते. यावेळी त्यांना सय्यद हनीफ सय्यद हबीब हा तरुण संशयितरित्या विना क्रमांकाच्या अॅक्टिव्हा दुचाकीवर जाताना आढळला. हनीफला ताब्यात घेतले असता ही मोपेड चोरीची असल्याचे निष्पन्न झाले. हनीफ रेकॉर्डवरील गुन्हेगार आहे. हनीफला दुचाकीसह सिडको पोलिसांच्या ताब्यात देण्यात आले आहे.
पाच दिवसांपूर्वी सिटीचौक हद्दीतून एक हिरोहोंडा दुचाकी चोरीला जाण्याची घटना घडली होती. दुचाकी चालकाने तात्काळ ही माहिती पोलिसांना दिल्यानंतर वायरलेस सेटवर ही माहिती देण्यात आली. सिटीचौक हद्दीतील महिला चार्ली पथकाच्या सुप्रिया मुरकुटे, जयश्री काकडे, हीना पठाण व अंबीका पवार यांनी वायरलेसवर ही माहिती ऐकली. नेमके त्याचवेळी ही दुचाकी त्यांना एका तरुणाकडे दिसली. त्यांनी तरुणाचा पाठलाग केला. आपला पाठलाग होत असल्याचे लक्षात येताच या तरुणाने दुचाकी महानगरपालिकेजवळ असलेल्या नाल्यामध्ये टाकून पलायन केले. ही दुचाकी जप्त करण्यात आली आहे. सिटीचौक पोलिस ठाण्यात या घटनेची नोंद करण्यात आली आहे.
पाठलाग करून संशयितांना अटक
म.टा. प्रतिनिधी, औरंगाबाद
चोरीच्या हेतूने अंधारात लपून बसलेल्या दोघांना गुन्हेशाखेच्या पथकाने पाठलाग करून अटक केली. शनिवारी मध्यरात्री ही घटना घडली. या प्रकरणी सिडको पोलिस ठाण्यात गुन्हा दाखल करण्यात आला आहे. गुन्हेशाखेचे जमादार नितीन मोरे, रणजीत राजपूत, वाल्मीक जगदाळे व देविदास राठोड शनिवारी मध्यरात्री हर्सूल टी पॉइंट भागात गस्त घालीत होते. यावेळी ऑडीटर सोसायटीच्या भिंतीजवळ दोन तरुण त्यांना अंधारात लपून बसलेले आढळले. पोलिसांनी त्यांना हटकले असता या दोघांनी पलायन केले. त्यांचा पाठलाग करून त्यांना पकडण्यात आले. त्यांची चौकशी केली असता त्यांना समाधानकारक उत्तर देता आले नाही. पोलिसांनी संशयित आरोपी मिनाजखान अय्युबखान (वय २३ रा. किराडपुरा दर्गाजवळ) व जुबेरखान इलियासखान (वय १९ रा. रहेमानीया कॉलनी) यांच्याविरूद्ध सिडको पोलिस ठाण्यात गुन्हा दाखल केला आहे.
डोक्यात पाटा घालून पतीचा खून
म. टा. प्रतिनिधी, औरंगाबाद
मद्यपी पतीच्या छळाला कंटाळून पत्नीने दोन जणासह पतीवर लोखंडी रॉडने मारहाण करीत डोक्यात पाटा घातल्याची खळबळजनक घटना संतोषीमातानगरात घडली. या अपघातात पतीचा मृत्यू झाला. दरम्यान, मुकुंदवाडी पोलिसांनी पत्नीसह दोघांना ताब्यात घेतले असून मुकुंदवाडी पोलिस ठाण्यात गुन्हा दाखल करण्यात आला आहे.
संतोषीमातानगर, गल्ली क्रमांक ४ येथे वास्तव्यास असलेला रमेश शंकर मोरे (वय ४०) हा दुर्धर आजाराने त्रस्त आहे. मजुरी काम करून रमेश उपजिविका करतो. मद्याचे व्यसन असल्याने रमेश नेहमी मद्याच्या नशेमध्ये पत्नी व मुलामुलींना शिवीगाळ करीत होता. गेल्यावर्षी त्याने पत्नीवर संशयावरून चाकूहल्ला देखील केला होता. त्याच्या या सवयीमुळे पत्नी अनिता मुलांना घेऊन वेगळे राहत होती. या ठिकाणी देखील रमेश त्यांना येऊन त्रास देत होता. या छळाला कंटाळलेल्या पत्नी अनिताने मुलगा व एका व्यक्तीसह सोमवारी दुपारी संतोषीमाता नगर गाठले. गल्लीतच लोखंडी रॉडनी त्यांनी रमेशला बेदम मारहाण केली. नागरिकांनी मध्यस्थी करण्याचा प्रयत्न केला असता त्यांना घरातील बाब आहे, असे म्हणत हाकलून लावण्यात आले. यानंतर घरात नेऊन रमेशला पुन्हा मारहाण करीत त्याच्या डोक्यात पत्नी अनिताने दगडी पाटा मारला. या मारहाणीत रमेश गंभीर जखमी झाला. त्याला तातडीने घाटीमध्ये उपचारासाठी दाखल करण्यात आले. मात्र, उपचारादरम्यान त्याचा मृत्यू झाला. दरम्यान, घटनास्थळी एसीपी सुखदेव चौगुले, पोलिस निरीक्षक नाथा जाधव, पीएसआय शेख हारून आदींनी भेट दिली. पत्नी अनितासह दोघांना चौकशीसाठी ताब्यात घेण्यात आले आहे. या प्रकरणी मुकुंदवाडी पोलिस ठाण्यात गुन्हा दाखल करण्यात आला आहे.
मोबाइल अॅप डाउनलोड करा आणि राहा अपडेट