राकाज् लाइफस्टाइल क्लबमध्ये सुरू असलेले कारनामे ज्या सीसीटीव्हीत कैद झाले, त्या रेकॉर्डिंग डीव्हीआरमधून हार्डडिस्क गायब झाल्याचे सोमवारी उघड झाले. या प्रकरणी प्रशासनातील काही अधिकारी व 'राकाज्' नेटवर्क तर कार्यरत नाही ना, अशी शंका निर्माण झाली आहे.
राकाज् लाइफस्टाइल क्लबची तपासणी शनिवारी आयुक्त, महापौर, उपमहापौर यांनी केली. तेव्हा या क्लबच्या पहिल्या मजल्यावर मसाज पार्लर सुरू असल्याचे लक्षात आले. ज्या पार्लरमध्ये मसाज केली जात होती, त्या पार्लरमध्ये सीसीटीव्ही कॅमेरे बसविले होते. पार्लरमधील सर्व हालचालींचे चित्रिकरण या कॅमेऱ्याच्या माध्यमातून व्हायचे. या गंभीर प्रकाराची दखल घेऊन महापौर, उपमहापौरांच्या आदेशाने पार्लरमधील डीव्हीआरचा बॉक्स बीओटी कक्षप्रमुख सिकंदर अली यांनी ताब्यात घेतला.
सोमवारी सायंकाळी महापौरांच्या दालनात बैठक झाली. त्यावेळी राकाज् प्रकरणासंदर्भात पालिकेने केलेल्या पंचनाम्याबद्दल चर्चा झाली. त्यानंतर डीव्हीआरचा बॉक्स उघडून पाहण्याचे ठरले. उपमहापौर प्रमोद राठोड, बीओटी कक्षप्रमुख सिकंदर अली बॉक्स घेऊन महापालिकेच्या संगणक कक्षात गेले. संगणक कक्षप्रमुख अब्दुल बारी यांच्या समक्ष तेथील एका कर्मचाऱ्याने बॉक्स उघडला, तर त्यात हार्डडिस्कच नव्हती. बॉक्समध्ये एकच स्क्रू होता. तो स्क्रू ढिला करून हार्डडिस्क काढून घेण्यात आल्याचे मत, त्या कर्मचाऱ्याने व्यक्त केले.
महापौर कार्यालय लागले कामाला : आयुक्तांसह महापौर, उपमहापौरांनी 'राकाज्'ची पाहणी केल्याचे फोटो, वृत्तपत्रांमध्ये प्रसिद्ध झालेल्या बातम्यांची कात्रणे, स्थानिक वृत्त वाहिनीने केलेले व्हिडिओ रेकॉर्डिंग यापैकी काहीच बीओटी कक्षाकडे उपलब्ध नव्हते. हे कोर्टात सादर केल्याशिवाय कोर्टाला वस्तुस्थिती लक्षात येणार नाही, असे महापौर तुपे यांनी सांगितले. हे सर्व पूरक साहित्य जमा करून बीओटी कक्षाला देण्याची जबाबदारी त्यांनी आपल्याच कार्यालयातील कर्मचाऱ्यांवर टाकली.
मोबाइल अॅप डाउनलोड करा आणि राहा अपडेट
