शालेय विद्यार्थ्यांपासून ते महाविद्यालयीन स्तरावरील विद्यार्थ्यांना देता येणारी शासकीय रेखाकला परीक्षेचा अभ्यासक्रम बदलण्यात आला आहे. कला संचालनालयाने याबाबत स्पष्ट केले आहे. अनेक वर्षानंतर प्रथमच बदल झालेल्या या अभ्यासक्रमातून दोन विषय रद्द करून चार विषयांवरच परीक्षा घेतली जाणार आहे.
चित्रकलेला चालना मिळावी म्हणून कला संचालनालयातर्फे दरवर्षी एलिमेंटरी, इंटरमिजिएट परीक्षा घेण्यात येते. हे दोन विषय अवांतर आहेत. परीक्षेत यशस्वी ठरलेल्या विद्यार्थ्यांना यासाठी ग्रेड दिले जातात. यासाठी शाळांमध्ये चित्रकला शिक्षकही नेमण्यात येतो. पाचवीनंतर एलिमेंटरी परीक्षा देता येते. यानंतर इंटरमिजिएट परीक्षा असते. सातवी, आठवीनंतर डीटीएड, इंजिनीअरिंग, आर्किटेक्चर अशा विविध अभ्याक्रमाच्या विद्यार्थ्यांना ही परीक्षा देता येते. या विषयांच्या अभ्यासक्रमांत गेल्या तीस वर्षांपासून बदल झाले नव्हते. अखेर कला संचालनालयाने अभ्यासक्रमात बदल करूत दोन विषय कमी केले. नव्या बदलात निसर्गचित्र आणि मुक्तहस्त चित्र हे विषय वगळण्यात आले आहेत. यामुळे विद्यार्थ्यांना यापुढे आता चारच विषय द्यावे लागणार आहेत.
नोव्हेंबरमध्ये परीक्षा
एलिमेंटरी, इंटरमिजिएट या परीक्षांसाठी जून ते ऑगस्ट या कालावधीत अर्ज स्वीकारले जातात. त्यानंतर नोव्हेंबरच्या तिसऱ्या आठवड्यात राज्यभरात एकाच वेळीही परीक्षा घेण्यात येते. यात यशस्वी ठरलेल्या विद्यार्थ्यांना शासनातर्फे प्रमाणपत्र दिले जाते.
साधारण ३० वर्षांपासून विषयात बदल करण्यात आले नव्हते. यंदा हे बदल करून दोन विषय कमी केले आहेत. विद्यार्थ्यांना चार विषयांचीच परीक्षा द्यावी लागेल. याबाबत केंद्रप्रमुखांना माहिती देण्यासाठी कार्यशाळाही लवकरच घेण्यात येणार आहे.
- प्रल्हाद शिंदे, सरचिटणीस, ललित कला शिक्षक संघटना
मोबाइल अॅप डाउनलोड करा आणि राहा अपडेट
