ट्रान्सपोर्टच्या आडून बेकायदेशीररित्या स्पिरीटची तस्करी करण्यात येत असल्याचा खळबळजनक प्रकार उघडकीस आला. राज्य उत्पादन शुल्क विभागाने शनिवारी कारवाई करीत तीन ठिकाणावरून नऊ हजार लिटर स्पिरीट जप्त केले. वाळूज एमआयडीसी परिसरात दोन ट्रान्सपोर्ट कंपनीमध्ये ही कारवाई करण्यात आली असून सहा आरोपींना गजाआड करण्यात आले आहे.
वाळूज एमआयडीसी परिसरातील ट्रान्सपोर्ट कंपनीच्या माध्यमातून अवैधरित्या दारु तयार करण्यासाठी लागणाऱ्या स्पिरीटचा साठा आला असल्याची माहिती राज्य उत्पादन शुल्क विभागाला मिळाली होती. या माहितीवरून तीन स्वतंत्र पथके निर्माण करण्यात आली. पहिल्या पथकाने लालजी मूलजी ट्रान्सपोर्टच्या कार्यालयात छापा टाकला असता या ठिकाणी पन्नास लिटरचे दोन बॅरल पथकाला आढळून आले. जवळच असलेल्या व्ही. ट्रान्स ई लि. या ट्रान्सपोर्ट कंपनीमध्ये देखील स्पिरीटचा साठा असल्याची माहिती मिळाली. या ठिकाणी छापा टाकला असता आवारामध्ये दोनशे लिटरचे ३६ ड्रम स्पिरीट पोलिसांना आढळून आले. या ट्रान्सपोर्टच्या बाहेरच कंटेनर क्रमांक एमएच १४ डीएम १०९ पथकाला आढळला. या कंटेनरची तपासणी करण्यात आली असता आतमध्ये इतर कंपनीच्या मालासोबतच स्पिरीटचे पन्नास लिटरचे २५ बॅरल लपवून ठेवलेले आढळून आले.
राज्य उत्पादन शुल्क विभागाच्या पथकाने एकूण ९ हजार लिटर स्पिरीट तसेच कंटेनर असा चौदा लाखांचा ऐवज जप्त केला आहे. या कारवाईत लालजी मूलजी कंपनीचा मालक महेंद्र शंकर उमाशंकर पाठक (रा. उत्तरप्रदेश), कंटेनरचालक दादासाहेब भागवत ढोकणे (रा. बीड गेवराई) यांच्यासोबत चौघांना अटक केली आहे. आरोपींविरूद्ध मुंबई दारूबंदी कायद्यानुसार गुन्हे दाखल करण्यात आले आहेत.
ही कारवाई अधिक्षक सी. बी. राजपूत, उपायुक्त वाय. एम. पवार यांच्या मार्गदर्शनाखाली निरीक्षक शिवाजी वानखेडे, शरद फटांगडे, के.पी. जाधव, गणेश पुसे, ए.बी. चौधरी, बी. आर. नवले, सुशिल चव्हाण, रतन फुसे, गणेश पवार, के.एस. ढाले, श्रावण खरात, अनिल जायभाये, अशोक कोतकर, विजय मकरंद, शिंदे, चव्हाण आदींनी केली.
ट्रान्सपोर्टद्वारे स्पिरीटची वाहतूक
करण्याची या टोळीची पद्धत आहे. अंबाला येथून हा माल आणल्याचे सांगण्यात येत आहे. यासाठी एक पथक हरीयाणात पाठविण्यात येणार आहे. अधिक तपासणीसाठी या स्पिरीटचे नमूने केमीकन अॅनालायझरकडे पाठवण्यात आले आहे.
सी. बी. राजपूत, अधिक्षक राज्य उत्पादन शुल्क विभाग
मोबाइल अॅप डाउनलोड करा आणि राहा अपडेट
