महिन्याभरानंतर शहरात पुन्हा मंगळसूत्र चोरट्यांनी सलामी दिली आहे. शुक्रवारी सकाळी एन-५ भागातून तर गुरुवारी साडेआठ वाजता सिंधी कॉलनी भागातून दुचाकीस्वार चोरट्यांनी मंगळसूत्र पळविले. या प्रकरणी जवाहरनगर व सिडको पोलिस ठाण्यात गुन्हा दाखल करण्यात आला आहे.
रोहिणी रमेश पोंडगुले (वय ६५, रा. सह्याद्रीनगर, एन-५, सिडको) ही महिला शुक्रवारी सकाळी सात वाजता दूध आणण्यासाठी घराबाहेर पडली होती. दूध घेऊन घरी परतत असताना एका परिचयाच्या महिलेसोबत थांबून त्या बोलत होत्या. ही संधी साधून समोरून आलेल्या दुचाकीवरील दोन तरुणांनी त्यांच्या गळ्यातील तीन तोळ्याचे सोन्याचे मंगळसूत्र हिसकावून पलायन केले. पोंडगुले आरडाओरडा करेपर्यंत चोरटे पसार झाले होते. दरम्यान, या चोरट्यांना जवळच असलेल्या एका मंदिराच्या बाहेर लावण्यात आलेल्या सीसीटीव्ही कॅमेऱ्याने टिपले. या दोघांची छायाचित्रे कॅमेऱ्यात कैद झाली आहेत. हा प्रकार कळताच सिडको पोलिसांनी घटनास्थळी धाव घेतली. याप्रकरणी सिडको पोलिस ठाण्यात गुन्हा दाखल करण्यात आला आहे.
सिंधी कॉलनीतही मारला हात
मंगळसूत्र चोरट्यांनी गुरूवारी रात्री सिंधी कॉलनीत देखील मंगळसूत्र लंपास केले. शोभा आहुजा (वय ५१) ही महिला रात्री साडेआठ वाजता गुरूद्वारा येथे दर्शन करून घरी जात होती. यावेळी अंधारात आलेल्या दुचाकीस्वारांनी त्यांच्या गळ्यातील एक तोळ्याचे मंगळसूत्र लंपास केले. या प्रकरणी जवाहरनगर पोलिस ठाण्यात गुन्हा दाखल करण्यात आला आहे.
एक महिना विश्रांती
मंगळसूत्र चोरट्यांनी २५ जून रोजी ज्योतीनगर भागातून मंगलबाई देशमुख यांचे मंगळसूत्र पळविले होते. याप्रकरणी मंगळसूत्र चोरांच्या टोळीला अटक करण्यात आली होती. त्यानंतर महिनाभर मंगळसूत्र चोरीचे प्रकार घडले नाहीत. आता त्यांनी पुन्हा डोके वर काढल्याचे दिसत आहे.
मोबाइल अॅप डाउनलोड करा आणि राहा अपडेट