कुटुंबीयांसाठी पोलिसांना वेळच नाही

July 27, 2015, 12:37 pm

≫ Next: प्रवेश अडकले निकालात

≪ Previous: बनावट नोटांचे रॅकेट उध्वस्त

$

0

0

म. टा. प्रतिनिधी, औरंगाबाद

शांतता नांदावी म्हणून ड्यूटीवर असलेल्या पोलिसांना मात्र कुटुंबाकडे लक्ष देण्यासाठी पुरेसा वेळ मिळत नाही, ही वस्तुस्थिती तरुणांनी केलेल्या अभ्यासात समोर आली आहे पोलिसांच्या अडीअडचणी जाणून घेण्यासाठी २० तरुणांनी सिनिअर सेक्युरिटी फेलोशिपअंतर्गत अभ्यास केला.

सिनियर सेक्युरिटी फेलोशिप या उपक्रमासाठी तरुणांकडून पोलिस आयुक्त अमितेशकुमार यांनी अर्ज मागविले होते. सुमारे ४००हून अधिक अर्ज प्राप्त झाले होते. त्यांची छाननी करून पदव्यत्तुर समाजकार्य, इंजिनीअरिंग, कम्प्युटर सायन्स आदी विविध अभ्यासक्रमांच्या २० विद्यार्थ्यांची निवड पोलिस आयुक्त अमितेशकुमार, पोलिस उपायुक्त वसंत परदेशी, संदीप आटोळे व गुन्हे शाखेचे सहायक पोलिस आयुक्त रमेश गायकवाड यांच्या उपस्थितीत झालेल्या बैठकीत

करण्यात आली. फेलोशिपसाठी निवड झालेल्या विद्यार्थ्यांना पोलिस कर्मचाऱ्यांच्या घरी दोन दिवस राहून निरीक्षण करण्यास सांगण्यात आले होते. यात त्यांचे दैनंदिन जीवन, राहणीमान, कुंटुब व्यवस्था, कुटुंबातील सकारात्मक दृष्टिकोन, त्यांना येणाऱ्या अडीअडचणी आदींचा अभ्यास या विद्यार्थ्यांना करण्यास सांगण्यात आले होते. कुटुंबीयांकडून प्रश्नावली भरून घेण्याचा या अभ्यासात समावेश होता. यासंदर्भातील अहवाल पोलिस आयुक्तांना सादर केला आहे.

टीव्ही सेंटर येथील पोलिस कॉलनीत राहणाऱ्या एका कर्मचाऱ्याच्या कुटुंबाची अभ्यासासाठी निवड करण्यात आली. संबंधित कर्मचाऱ्यास ड्यूटीमुळे कुटुंबीयांना पुरेसा वेळ देता येत नाही. पगार आणि वाढती महागाई, मुलांच्या शिक्षणाचा खर्च यांचा ताळामेळ साधताना त्यांना कसरत करावी लागते, असे दिसून आले.

- शाम पवार, विद्यार्थी

ड्युटीमुळे बहुतांश वेळ कर्मचारी घराबाहेर

मुलांचा अभ्यास घेण्यासाठी पोलिसांना वेळ नाही

महागाईच्या तुलनेत वेतन कमी असल्यामुळे कसरत

कायम कामामुळे रोजचाच दिवस घाईगडबडीचा

कर्मचाऱ्यांबरोबरच कुटुंबीयांना पुरेशी झोप नाही

मोबाइल अॅप डाउनलोड करा आणि राहा अपडेट

---

प्रवेश अडकले निकालात

July 27, 2015, 12:38 pm

≫ Next: ढग गेल्यावर कृत्रिम पाऊस?

≪ Previous: कुटुंबीयांसाठी पोलिसांना वेळच नाही

$

0

0

म. टा. प्रतिनिधी, औरंगाबाद

तंत्रशिक्षण विभागातर्फे इंजिनीअरिंग अभ्यासक्रमांसाठीची थेट द्वितीय प्रवेश प्रक्रिया अद्यापही निकालात अडकलेली आहे. प्रवेशासाठी अर्ज भरण्याची मुदत मंगळवार (२७ जुलै) रोजी संपणार आहे. निकाल रखडल्याने पुढच्या प्रक्रियेचे वेळापत्रक जाहीर केलेले शकले नाही. विशेष म्हणजे डॉ. बाबासाहेब आंबेडक मराठवाडा विद्यापीठाचाच इंजिनीअरिंग अभ्यासक्रमाचा निकाल जाहीर झाला नाही. त्यामुळे ही प्रक्रिया लांबली आहे. यापार्श्वभूमीवर वीस टक्के जागांसाठीच प्रवेशाची प्रक्रिया सुरू करण्याचा विचार तंत्रशिक्षण विभाग करीत आहे.

पॉलिटेक्निक अभ्यासक्रमांचे निकाल जाहीर होऊन महिना उलटला तरीही अभियांत्रिकीची थेट द्वितीय वर्ष प्रवेशाची प्रक्रिया सुरू झाली नाही. विद्यापीठांचे प्रथम वर्षाचे निकाल जाहीर न झाल्याने रिक्त जागांची स्थिती स्पष्ट होऊ शकत नाही. त्यामुळे प्रवेश प्रक्रिया सुरू करण्यात अडचणी येत आहेत. तरीही तंत्रशिक्षण विभागाने ८ जुलैपासून अर्ज भरण्याची प्रक्रिया सुरू केली. त्यासाठी २२ जुलैपर्यंत ही मुदत होती. तोपर्यंतही काही विद्यापीठांचे निकाल जाहीर झाले नाहीत. त्यामुळे ही मुदत २७ जुलैपर्यंत वाढविण्यात आली. दोन वेळा मुदतवाढ देऊनही अद्याप रिक्त जागांची स्थिती स्पष्ट नाही. थेट द्वितीय वर्षासाठी २० टक्के जागा राखीव असतात. त्याचबरोबर पहिल्या वर्षात अनुत्तीर्ण झालेल्या विद्यार्थ्यांच्या रिक्त जागाही या प्रवेश प्रक्रियेच्या माध्यमातून भरण्यात येतात. त्यामुळे अंभियांत्रिकीच्या प्रथम वर्षाचे निकाल जाहीर होणे आवश्यक असते. निकाल वेळेत जाहीर न झाल्याने प्रक्रियेला विलंब होतो आहे. मंगळवारी अर्ज भरण्याची प्रक्रिया संपत आहे.

सूत्रांनी दिलेल्या माहितीनुसार; राज्यात डॉ. बाबासाहेब आंबेडकर मराठवाडा विद्यापीठ वगळता इतर सर्व विद्यापीठांचे इंजिनीअरिंग प्रथम वर्षाचे निकाल जाहीर झाले आहेत. विद्यापीठाचा निकाल रखडल्याने केवळ २० टक्के जागांसाठीच प्रवेशाची प्रक्रिया राबविली जाण्याची शक्यता आहे.

३१ पासून ऑप्शन फॉर्म भरण्याची प्रक्रिया?

राज्यात डॉ. बाबासाहेब आंबेडकर मराठवाडा विद्यापीठाच्याच अंभियांत्रिकीच्या प्रथम वर्षाचे निकाल जाहीर झालेला नाहीत. यामुळे पुढचे वेळापत्रक जाहीर करणे तंत्रशिक्षण विभागाला अडचणीचे ठरत आहे. निकाल वेळेत जाहीर करण्याच्या सूचना दिल्यानंतरही वेळापत्रक पाळले जात नसल्याचे सूत्रांनी सांगितले. यामुळे ३१ जुलैपासून २० टक्के जागांसाठीच ऑप्शन फॉर्म भरण्याची प्रक्रिया सुरू होण्याची शक्यता व्यक्त केली जात आहे.

मोबाइल अॅप डाउनलोड करा आणि राहा अपडेट

ढग गेल्यावर कृत्रिम पाऊस?

July 27, 2015, 12:39 pm

≫ Next: राज्यात २३७२ गावांत शाळा नाहीत

≪ Previous: प्रवेश अडकले निकालात

$

0

0

म. टा. प्रतिनिधी, औरंगाबाद

मराठवाड्यात कृत्रिम पाऊस पाडण्याच्या निर्णयाला आठवडा पूर्ण होईल, मात्र प्रशासनाकडून त्या दिशेने कोणतीही हालचाल झालेली नाही. आभाळात आता ढग आहेत, मात्र डॉप्लर रडारची उभारणी आणि कंट्रोल रुमची स्थापना यांना होत असलेल्या विलंबामुळे येणाऱ्या काही दिवसांसाठी कृत्रिम पावसाचा प्रयोग लांबणीवर पडण्याची चिन्हे असून, ढग निघून गेल्यावर पाऊस पाडणार काय? असा प्रश्न निर्माण आहे.

पावसाने मारलेली दडी आणि मराठवाड्यावर घोंगावणारे दुष्काळाचे सावट या चिंतेपायी मराठवाड्यासह कमी पाऊस असलेल्या जिल्ह्यांमध्ये कृत्रिम पावसाचा प्रयोग करण्याचा निर्णयावर राज्य सरकार ठाम होते. कॅबिनेट व राज्यमंत्र्यांनी वेगवेगळ्या व्यासपीठावरून घोषणाही केल्या. २२ जुलै रोजी औरंगाबाद येथे अधिकाऱ्यांच्या पथकाने येऊन पाहणी केली व ऑगस्ट महिन्याच्या पहिल्या आठवड्यात कृत्रिम पावसाचा प्रयोग होईल, असे जाहीर केले. त्यानंतर पाच दिवसांमध्ये विभागीय आयुक्त कार्यालयावर असलेली व्ही-सॅट यंत्रणा हटविणे आणि स्फोटक परवाना ही दोन कामे करण्यात आली आहेत. कृत्रिम पाऊस पाडण्यासाठी राज्याचे केंद्र औरंगाबादेत असेल. पाऊस नसल्याने या केंद्राकडे सर्वांचे लक्ष लागले आहे.

ऑगस्टचा अखेरचा आठवडा व सप्टेबर महिना हा परतीच्या पावसाचा मानला जातो. आता कृत्रिम पावसाची यंत्रणा बसवण्यासाठीच ऑगस्ट उजाडला तर पावसाचा हा प्रयोग केवळ परतीच्या पावसासाठीच ठरण्याची चिन्हे आहेत.

राज्याचे सर्वच मंत्री कमी पावसामुळे चिंतेत आहेत. कृत्रिम पावसाचा निर्णय घेताना सर्वच मंत्र्यांचे परिस्थितीवर लक्ष आहे. मराठवाड्याला कृत्रिम पावसाचा निश्चित उपयोग होईल. यामुळे पिकांबरोबर जमिनीतील पाणीपातळी वाढण्यासही मदत होईल. कृत्रिम पावसासाठी विलंब झाला असे वाटत नाही.

- बबनराव लोणीकर, पाणी पुरवठामंत्री.

औरंगाबादला सी-डॉप्लर रडार यंत्रणा बसविण्यात येणार, ही आनंदाची बाब आहे, मात्र यंदा या यंत्रणेचा उपयोग परतीच्या पावसावेळी होण्याची शक्यता आहे. जुलै महिन्यामध्ये अनेकदा पावसाचे वातावरण निर्माण झाले, मात्र पाऊस पडला नाही. या काळात रडारचा कृत्रिम पावसासाठी चांगला उपयोग झाला असता.

- श्रीनिवास औंधकर, हवामान अभ्यासक

मोबाइल अॅप डाउनलोड करा आणि राहा अपडेट

राज्यात २३७२ गावांत शाळा नाहीत

July 27, 2015, 12:35 pm

≫ Next: हैदराबाद बॅँकेविरुद्ध शेतकऱ्यांचा संताप

≪ Previous: ढग गेल्यावर कृत्रिम पाऊस?

$

0

0

म. टा. विशेष प्रतिनिधी, औरंगाबाद

राज्यातील तब्बल २ हजार ३७२ गावांत शाळाच नसल्याप्रकरणी दाखल जनहित याचिकेत सोमवारी राज्य शासनाला म्हणणे सादर करण्याचे आदेश मुंबई हायकोर्टाच्या औरंगाबाद खंडपीठाचे न्या. आर. एम. बोर्डे आणि न्या. पी. आर. बोरा यांनी दिले.

नारायण लहाने, रमेश खारगे, नंदा साळवे या ग्रामस्थांनी ही जनहित याचिका केली आहे. सुनावणीदरम्यान याचिकाकर्त्यांचे वकील आनंदसिंग बायस यांनी शासनाने निर्णय घेऊनही राज्यात शाळाच सुरू न झाल्याचे कोर्टाच्या निदर्शनास आणून दिले. हायकोर्टाने याप्रकरणी शासनाला नोटीसही बजावली होती. शाळाच नसल्याने आडवळणावरील गावांतील विद्यार्थ्यांना पाच किलोमीटरची पायपीट करावी लागते. नंतर पुढे वाहनातून तब्बल १५ किलोमीटरचा प्रवास करावा लागतो. काही ठिकाणी यापेक्षाही वाईट परिस्थिती आहे. २००९मध्ये मोफत आणि सक्तीचा शिक्षण कायदा मंजूर झाला. त्यामुळे शिक्षण देण्याची हमी सरकारने घेतली. जुलै २०१२मध्ये राज्यातील तब्बल २ हजार ३७२ गावांचा बृहत आराखडा तयार करण्यात आला. या ठिकाणी शाळेच्या इमारतीची आणि शिक्षणाची सोय करण्याचा निर्णयही झाला, पण या दोन वर्षांत कागदावरची शाळा कधीच प्रत्यक्षात आली नाही. मोफत आणि सक्तीच्या शिक्षण कायद्याला सरकारनेच हरताळ फासल्याने या विरोधात शिक्षणापासून वंचित ग्रामस्थांनी थेट औरंगाबाद खंडपीठात दाद मागितली आहे.

घराजवळ असावी शाळा

मोफत आणि सक्तीच्या शिक्षण अधिकारानुसार प्राथमिक शाळा घरापासून एका किलोमीटर अंतरावर, उच्च प्राथमिक शाळा तीन किलोमीटरवर तर, माध्यमिक शाळा पाच किलोमीटवर असावी. शाळा गळतीचे प्रमाण रोखण्यासाठी अनेक उत्तम नियमांचा आंतर्भाव कायद्यात करण्यात आला आहे. विशेष करून मुलींच्या शिक्षणाची सोय व्हावी, ही यामागील तळमळ आहे. त्याअनुषंगाने सरकारने २०० लोकसंख्येमागे एक प्राथमिक शाळा तर, दोन हजार लोकसंख्येसाठी एक माध्यमिक शाळा, असा निकष निश्चित केला आहे. नवीन कायद्यानुसार शाळा सुरू करण्याची विनंती याचिकेत करण्यात आली आहे.

मोबाइल अॅप डाउनलोड करा आणि राहा अपडेट

हैदराबाद बॅँकेविरुद्ध शेतकऱ्यांचा संताप

July 28, 2015, 11:34 am

≫ Next: गिरिजा कोरडीठाक; पाणी सात दिवसांआड

≪ Previous: राज्यात २३७२ गावांत शाळा नाहीत

$

0

0

म. टा. प्रतिनिधी, वैजापूर

स्टेट बॅँक ऑफ हैदराबादने शेतकऱ्यांना कर्ज देण्यास टाळाटाळ करणे सुरू केले आहे. त्यामुळे मंगळवारी शेतकऱ्यांनी बँकेचे व्यवस्थापक आर. एस. नंदगवळी यांच्यापुढे आपला संताप व्यक्त केला.

वैजापूर तालुक्यातील अनेक शेतकऱ्यांना महिन्याचे कर्जवाटपाचे उद्दीष्ट संपले म्हणून स्टेट बॅँक ऑफ हैदराबादकडून कर्ज देण्यात टाळाटाळ केली जात आहे. नांदुरढोक येथील शेतकरी नानासाहेब घंगाळे यांना आज या, उद्या या असे करत जुलै संपत आला तरीही कर्ज

देण्यात आले नाही. वैजापुरातील स्टेट बँक ऑफ हैदराबादच्या शाखे अंतर्गत तालुक्यातील १२ गावे येतात. सर्व शेतकऱ्यांना खरीप हंगामासाठी कर्ज वाटप करण्याचे शासनाचे आदेश आहेत. त्यानुसार या गावातील शेतकरी सात बारा, आठ अ, बेबाकी प्रमाणपत्र आदी कागदपत्रे घेऊन बँकेत जात आहेत. मात्र, बँकेचे व्यवस्थापक व्याजाचा भरणा करणारा शेतकरी सोबत घेऊन या, तरच कर्जाचे प्रकरण मंजूर केले जाईल, अशी अजब अट घालत आहेत. त्यामुळे शेतकऱ्यांना कर्जासाठी बँकेचे हेलपाटे मारावे लागत आहेत.

नांदुरढोक येथील नानासाहेब घंगाळे, भाऊसाहेब पुंजाजी जाधव, रामदास दादाभाऊ पाबळे या शेतकऱ्यांना अद्याप खरीप हंगामासाठी कर्ज मिळाले नाही. शेतकऱ्यांनी बँकेचे व्यवस्थापक आर. एस. नंदगवळी यांच्याशी संपर्क केला. तेव्हा १० जुलैपर्यंत आलेल्या सर्व शेतकऱ्यांचे कर्ज मंजूर केल्याचे सांगत त्यांनी उर्वरित शेतकऱ्यांना कर्ज देण्यास नकार दिला. त्यामुळे या शेतकऱ्यांनी मंगळवारी बँक व्यवस्थापकाची भेट घेऊन संताप व्यक्त केला. बँकेने जुलै महिन्यात साठ लाख रुपयांचे कर्ज वाटप केले. मात्र, शेतकऱ्यांच्या संख्येबाबत मात्र नंदगवळी यांनी मौन पाळले आहे.

उद्दिष्टपूर्तीनंतर आलेल्या शेतकऱ्यांना कर्ज देण्यासाठी बँकेच्या विभागीय कार्यालयाची परवानगी घ्यावी लागेल. वंचित राहिलेल्या शेतकऱ्याबाबत वरिष्ठांना तोंडी कळवण्यात आले आहे. मात्र, त्यांच्याकडून अद्याप मंजुरी मिळाली नाही.

- आर. एस. नंदगवळी, व्यवस्थापक, स्टेट बॅँक ऑफ हैदराबाद

स्टेट बॅँक ऑफ हैदराबाद बँक गावातील पुढाऱ्यांना हाताशी धरून ठराविक शेतकऱ्यांना कर्जवाटप करत आहे. गरजू शेतकरी पीक कर्जापासून वंचित राहत आहे. कर्ज न मिळाल्यास आम्ही उपोषण सुरू करणार आहोत.

- दिलीप बाजारे, शेतकरी, नांदूरढोक

मोबाइल अॅप डाउनलोड करा आणि राहा अपडेट

गिरिजा कोरडीठाक; पाणी सात दिवसांआड

July 28, 2015, 11:35 am

≫ Next: लाचप्रकरणी तलाठ्याला एक वर्षाची शिक्षा

≪ Previous: हैदराबाद बॅँकेविरुद्ध शेतकऱ्यांचा संताप

$

0

0

म. टा. प्रतिनिधी, खुलताबाद

गिरिजा नदी कोरडीठाक पडल्याने खुलताबादच्या तोंडचे पाणी पळाले आहे. शहराला दर सात दिवसांनी पाणीपुरवठा करण्यात येत आहे. भर पावसाळ्यात लोकांचे हाल सुरू आहेत.

खुलताबादला गिरिजा मध्यम प्रकल्पातून पाणीपुरवठा होतो. मात्र, ऑक्टोबरपासून प्रकल्प कोरडाठाक पडला. नगरपालिकेच्या बुडीत क्षेत्रातील तीन विहिरीतील पाणी चारीत एकत्र करून पाणीपुरवठा करण्यात येत होता. पुरेसा पाऊस नसल्यामुळे गिरजा प्रकल्पात पावसाचे पाणी आलेले नाही. त्यामुळे नगरपालिकेला विहिरीतील पाण्यावर अवलंबून राहावे लागत आहे. विहिरीतील विद्युतपंप दोन-तीन तास उपसा करीत असून, दोन अडीच तासांनी विहिरीचा उपसा बंद होत आहे. त्यामुळे आता सातव्या दिवशी करण्यात येणाऱ्या पाणीपुरवठ्यातही कपात करण्याशिवाय पर्याय उरलेला नाही. ऐन पावसाळ्यातही पाणीपुरवठ्यात व्यत्यय निर्माण होऊन दुष्काळात तेरावा महिना अशी परिस्थिती शहरवासीयांची झाली आहे.

पावसाळ्यात उन्हाचा तडाखा वाढला आहे. अशातच विहिरी, कूपनलिकांच्या पाणीपातळीत झपाट्याने घट होत आहे. पाण्यासाठी नागरिकांना भटकंती करण्याची वेळ आली आहे. खुलताबाद तालुक्यात चार गावांना टँकरने पाणीपुरवठा सुरू आहे.

तालुक्यात २४ टक्केच पाऊस

खुलताबाद तालुक्याचे वार्षिक पर्जन्यमान ७९९.५० मिलिमीटर इतके आहे. २७ जुलै २०१५ पर्यंत तालुक्यात सरासरी ३२४.८० मिलिमीटर इतका पाऊस पडणे अपेक्षित होते. मागीलवर्षी याच दिवशी १२६.५२ मिलिमीटर पाऊस झाला. चालूवर्षी या दिवशी १९७.३३ मिलिमीटर पाऊस झाला आहे. चालू वर्षाची आजपर्यंतची टक्केवारी ६०.७५ इतकी आहे. तर वार्षिक टक्केवारी २४.६८ इतकी आहे.

मोबाइल अॅप डाउनलोड करा आणि राहा अपडेट

लाचप्रकरणी तलाठ्याला एक वर्षाची शिक्षा

July 28, 2015, 11:36 am

≫ Next: सिल्लोडमध्ये ४ गावात ७ टॅँकरने पाणीपुरवठा

≪ Previous: गिरिजा कोरडीठाक; पाणी सात दिवसांआड

$

0

0

म. टा. प्रतिनिधी, वैजापूर

वारसा हक्काने जमीन नावावर करून देण्यासाठी दीड हजार रुपयांची लाच घेणाऱ्या तालुक्यातील मांडकी सज्जाचा तलाठी रवींद्र रामचंद्र साळवे याला येथील जिल्हा व अतिरिक्त सत्र न्यायाधीश के. ए. कोठेकर यांनी एका वर्षाची शिक्षा ठोठावली.

गंगापूर तालुक्यातील लासूर स्टेशन येथील रहिवासी डॉ. समीर सिरसाठ यांचे वडील किसन सिरसाठ यांचे २००८मध्ये निधन झाले. त्यांच्या नावावर असलेल्या वैजापूर तालुक्यातील राजुरा शिवारातील गट क्रमांक २९ मधील जमीन वारसाहक्काने पत्नीच्या नावावर करण्यात आली. डॉ. समीर यांच्या आईच्या नावावर असलेली ही जमीन वारसाहक्काने नावावर करण्यासाठी डॉ. समीर यांनी तालुक्यातील मांडकी सज्जाचे तलाठी रवींद्र साळवे यांच्याशी संपर्क साधून अर्ज तलाठी साळवे यांच्याकडे दिला. त्यानुसार वर्तमान पत्रात जाहीर प्रकटन देण्यात आले. त्यानंतर डॉ. समीर हे जमीन नावावर झाली की नाही हे पाहण्यासाठी साळवे यांच्या गारज येथील घरी गेले. तेव्हा त्यांनी समीर यांना समाधानकारक उत्तरे दिली नाही. या कामासाठी वरिष्ठ अधिकाऱ्यांना पैसे द्यावे लागतील, त्याशिवाय हे काम होणार नाही, असे साळवे यांनी समीर यांना सांगितले. त्यानुसार १० जून २००८ रोजी साळवे यांच्या घरी त्यांना दीड हजार रुपये देण्याचे ठरले. दरम्यान तोपर्यंत समीर यांनी लाचलुचपत प्रतिबंधक विभागाच्या अधिकाऱ्यांशी संपर्क साधून तक्रार केली. लाचलुचपत प्रतिबंधक विभागाच्या पथकाने सापळा रचून गारज येथे साळवे यांच्या घरात त्यांना दीड हजार रुपयांची लाच घेतांना रंगेहाथ पकडले. डॉ. समीर सिरसाठ यांनी दिलेल्या फिर्यादीवरून तलाठी रवींद्र साळवे यांच्याविरुद्ध शिऊर पोलीस ठाण्यात गुन्हा दाखल करण्यात आला होता.

लाचलुचपत प्रतिबंधक विभागाचे पोलिस निरीक्षक नंदकुमार पाटील यांनी तपास करून दोषारोपपत्र न्यायालयात दाखल केले. या प्रकरणात सरकार पक्षातर्फे पाच साक्षीदार तपासण्यात आले.

दोन्ही शिक्षा एकत्र

जिल्हा व अतिरिक्त सत्र न्यायाधीश के. ए. कोठेकर यांनी दोन्ही बाजूचे म्हणणे ऐकून घेऊन लाचलुचपत प्रतिबंधक कायदा ७ अन्वये एक वर्षाची शिक्षा, पाचशे रुपये दंड व दंड न भरल्यास दोन महिन्यांची शिक्षा तसेच कलम १३ (१) व (२) ड अन्वये दोन वर्षे शिक्षा व एक हजार रुपये दंड व दंड न भरल्यास चार महिन्याची शिक्षा ठोठावली. या दोन्ही शिक्षा एकत्रच भोगावयाच्या आहेत. सरकारपक्षातर्फे सरकारी वकील अॅड. कैलास पवार यांनी काम पाहिले.

मोबाइल अॅप डाउनलोड करा आणि राहा अपडेट

सिल्लोडमध्ये ४ गावात ७ टॅँकरने पाणीपुरवठा

July 28, 2015, 11:38 am

≫ Next: सौर दिवेप्रकरणी पाच जणांना जामीन

≪ Previous: लाचप्रकरणी तलाठ्याला एक वर्षाची शिक्षा

$

0

0

म. टा. प्रतिनिधी, सिल्लोड

पावसाने फिरवलेल्या पाठीमुळे तालुक्यात पाणीटंचाई तीव्र होत आहे. सध्या ४ गावात ७ टँकरने पाणी पुरवठा सुरू आहे. एका गावासाठी दोन विहिरी अधिग्रहित केल्या आहेत. तालुक्यातील मध्यम प्रकल्प, साठवण तलाव, लघु तलावातील पाणी पातळी झपाट्याने कमी होत आहे. सिल्लोड शहरासह अर्ध्या तालुक्याची तहान भागविणाऱ्या खेळणा मध्यम प्रकल्पात ९.५७ टक्के पाणीसाठा आहे. या प्रकल्पातून सिल्लोड शहर व परिसरातील मोठ्या गावांना पाणीपुरवठा केला जातो. अजिंठा-अंधारी मध्यम प्रकल्पात ११.७६ टक्के पाणी साठा आहे. या प्रकल्पातून अजिंठा, शिवना या मोठ्या बाजार पेठेसह लगतच्या छोट्या मोठ्या गावची तहान भागवली जाते. केळगाव लघु तलावात १७ टक्के पाणी साठा आहे. या प्रकल्पावर आमठाणा, अंभई या बाजारपेठेच्या गावासह अनेक गावचा पाणीपुरवठा अवलंबून आहे.

चारनेर लघु तलावात ६.३४ टक्के, निल्लोड लघु तलावात यावर्षी जून महिण्यात झालेल्या जोरदार पावसात सहा वर्षानंतर पहील्यांदाच पाणी आले होते. या तलावात ९.४९ टक्के पाणी साठा आहे. उंडणगाव लघु तलाव व हीमाबाद लघु तलावात पाणी पातळी (बिलोसील) जोत्याच्या खाली गेली आहे. तसेच प्रत्येक गावच्या शिवारात असलेले पाझर तलावही कोरडे ठाक पडण्याच्या मार्गावर आहेत.

मोबाइल अॅप डाउनलोड करा आणि राहा अपडेट

---

सौर दिवेप्रकरणी पाच जणांना जामीन

July 28, 2015, 11:38 am

≫ Next: दुबार पेरणीचे संकट टळेना

≪ Previous: सिल्लोडमध्ये ४ गावात ७ टॅँकरने पाणीपुरवठा

$

0

0

औरंगाबाद : जिल्हा परिषदेत सौर ऊर्जा दिवे खरेदी प्रकरणात २९ लाख ४० हजारांचा घोटाळा करणाऱ्या जिल्हा परिषदेचे तत्कालीन सभापती आणि सीईओ यांच्यासह सात जणांचा अटकपूर्व जामीन सत्र न्यायालयाने अर्ज फेटाळला होता. या निर्णयाला आव्हान दिले असता मुंबई हायकोर्टाच्या औरंगाबाद खंडपीठाचे न्या.व्ही.एम.देशपांडे यांनी पाच जणांचा अंतरिम अटकपूर्व जामीन मंजूर केला.

सौर ऊर्जा दिवे लावण्याच्या प्रस्ताव मंजूर करण्यात आला होता. त्यासाठी बनावट लाभार्थींची यादी तयार करून २९ लाख ४० हजार रुपयांचे दिवे खरेदी करण्यात आले. या प्रस्तावाला तत्कालीन समाजकल्याण सभापती रामनाथ चोरमले, मुख्य कार्यकारी अधिकारी दीपक चौधरी, संभाजी लांगोरे, मुख्य लेखाधिकारी विलास जाधव, समाजकल्याण अधिकारी जयश्री सोनकवडे, डी. डी. जोशी, समाजकल्याण निरीक्षक एस. एम. शिंदीकर यांनी मान्यता दिली. खंडपीठाने त्यांचा अर्ज मंजूर केला. त्यामुळे त्यांना अटक होणार नाही. त्यांच्यातर्फे अजित कडेठाणकर यांनी काम पाहिले.

मोबाइल अॅप डाउनलोड करा आणि राहा अपडेट

दुबार पेरणीचे संकट टळेना

July 28, 2015, 11:40 am

≫ Next: ३९ डॉक्टरांचा एनपीए बंद

≪ Previous: सौर दिवेप्रकरणी पाच जणांना जामीन

$

0

0

म. टा. प्रतिनिधी, औरंगाबाद

पिकांना तग धरण्याएवढा पाऊस झाला असला तरी अजूनही पिकांना पुरेशा पावसाची प्रतीक्षा आहे. कन्नड, फुलंब्री व सिल्लोड तालुक्यात समाधानकारक पाऊस झाला. मात्र, इतर तालुक्यात जेमतेम पाऊस झाल्यामुळे खरीप पिकांवर दुष्परिणाम झाला आहे. पूर्वीचे पीक मोडून शेतकऱ्यांनी दुबार पेरणीची तयारी केली आहे.

जून महिन्याच्या पहिल्या आठवड्यात जोरदार पाऊस झाल्यानंतर जिल्ह्यात ८५ टक्के पेरण्या पूर्ण झाल्या, पण पावसाने दडी मारल्यानंतर खरीप पिकांचे अतोनात नुकसान झाले. पाऊस तब्बल एक महिना लांबल्यामुळे पिके पिवळी पडली होती. या परिस्थितीत मागील आठवड्यात पाऊस पडल्यानंतर पिकांना जीवदान मिळाले. हा पाऊस सर्वदूर नसल्याने काही तालुक्यातील भीषण परिस्थिती कायम आहे. मका, कापूस, तूर, मूग, सोयाबीन या खरीप पिकांना फटका बसला आहे. गेल्या आठवड्यात कन्नड, सिल्लोड व फुलंब्री तालुक्यात समाधानकारक पाऊस झाला. मात्र, खुलताबाद, पैठण, गंगापूर व वैजापूर तालुक्यातील परिस्थिती कठीण आहे. सध्या ढगाळ वातावरण असूनही पाऊस पडत नसल्याने शेतकरी धास्तावले आहेत. वसंतराव नाईक मराठवाडा कृषी विद्यापीठ व कृषी विभागाने खरीप पिकांचा आढावा घेतला आहे. दुष्काळी परिस्थिती निर्माण झाल्यास उपाययोजना हाती घेतल्या जाणार आहेत. याबाबत विद्यापीठाच्या कार्यकारी परिषदेचे अध्यक्ष दिवाकर रावते यांनी रविवारी बैठक घेतली. या बैठकीत विद्यापीठाचे शास्त्रज्ञ व शेतकरी उपस्थित होते. दरम्यान, औरंगाबाद जिल्ह्यातील जवळपास ३० टक्के जमीन हलक्या प्रतीची असल्यामुळे पिकांना पाण्याची आवश्यकता आहे. पिके वाढण्याच्या स्थितीत असून पाणी नसल्यास पिकांची वाढ खुंटणार आहे.

मका, सोयाबीन मोडले

पाऊस सर्वदूर नसल्याने पिकांची स्थिती चिंताजनक आहे. पावसाअभावी मका आणि सोयाबीन पिके मोडण्यात आली आहेत. शेतकऱ्यांनी दुबार पेरणीची तयारी केली असून सर्वांना जोरदार पावसाची प्रतीक्षा आहे. पुरेसा पाऊस झाला तरच खरीप हंगाम हाती लागण्याची शक्यता आहे.

सध्या २० ते २५ मिलीमीटर पाऊस झाला तरच पिकांना जीवदान मिळणार आहे. अगदी तुरळक पाऊस झाल्यास पिकांना फायदा नसतो. हलक्या जमिनीतील पिकांसाठी तर पावसाची खूप गरज आहे.

- सतीश शिरडकर, उपसंचालक, 'आत्मा'

मोबाइल अॅप डाउनलोड करा आणि राहा अपडेट

३९ डॉक्टरांचा एनपीए बंद

July 28, 2015, 11:41 am

≫ Next: शिक्षक भारतीचे झेडपीसमोर उपोषण

≪ Previous: दुबार पेरणीचे संकट टळेना

$

0

0

म. टा. प्रतिनिधी, औरंगाबाद

दीर्घ कालावधीनंतर जिल्हा परिषदेच्या आरोग्य विभागाचे प्रशासन कार्यतत्पर झाले आहे. ग्रामीण भागातील गरोदर माता व बालकांना ट्रॅक करण्यासाठी असलेल्या एमसीटीएस सॉफ्टवेअरमध्ये नोंदणी न केलेल्या प्राथमिक आरोग्य केंद्रांची तपासणी प्रशासनाने केली आहे. त्यात ३९ वैद्यकीय अधिकाऱ्यांनी कामात कुचराई केल्याचे सिद्ध झाल्याने त्यांचा व्यवसायरोध (एनपीए) भत्ता बंद केला आहे. सध्या महाराष्ट्र टाइम्समधून 'आरोग्याचा पंचनामा' ही वृत्तमालिका सुरू आहे. यातील वृत्तानंतर आरोग्य विभागाने ही कारवाई केली.

जिल्हा आरोग्य अधिकारी डॉ. भीमाशंकर जमादार यांनी गेल्या काही दिवसांपासून प्रशासनाची विस्कटलेली घडी बसविण्याचे काम सुरू केले आहे. सुरक्षित बाळंतपणासाठी गरोदर मातांच्या लसीकरण, औषधी तसेच अन्य आरोग्य सुविधांवर व्यवस्थित लक्ष राहावे, यासाठी केंद्र सरकारने मदर चाईल्ड केअर सिस्टम (एमसीटीएस) कार्यान्वित केली आहे. या सॉफ्टवेअर अंतर्गत गरोदर मातेची संपूर्ण माहिती संगणकामध्ये भरणे आवश्यक आहे. जेणेकरून या महिलेला उपचारपद्धती करणे सोपे जाते. जिल्हा परिषदेच्या आरोग्य विभागाने सर्व प्राथमिक आरोग्य केंद्रांमध्ये यासंदर्भात सूचना दिली होती. गेल्या काही महिन्यांपासून या सिस्टममध्ये काही ठिकाणाहून वैद्यकीय अधिकारी माहिती भरत नसल्याचे निदर्शनास आले. त्याचे ट्रॅकिंग करून ३९ वैद्यकीय अधिकाऱ्यांनी कामात कुचराई केल्याचे लक्षात आले. या सर्वांचा व्यवसायरोध भत्ता बंद करण्यात आले. डॉ. जमादार यांनी सांगितले. यापुढेही ही मोहीम राबविली जाईल. जिल्ह्यातील सर्व प्राथमिक आरोग्य केंद्रांवर बायोमेट्रिक सुविधा उपलब्ध करून दिली आहे. हजेरी याच पद्धतीने नोंदविणे आवश्यक आहे. चार ठिकाणचे यंत्र खराब झाल्याने ते दुरुस्तीसाठी हैदराबादला पाठविण्यात आले आहेत. यापुढे बायोमेट्रिक शिवाय दुसरी हजेरी पद्धत खपवून घेतली जाणार नाहीत, असेही जमादार यांनी स्पष्ट केले.

'ओटी' सुरू करा; अन्यथा कारवाई

जिल्ह्यात चिंचोली, पिंप्री, जिकठाण, करंजखेडा, नाचनवेल, औराळा येथील प्राथमिक आरोग्य केंद्रांमधील शस्त्रक्रियागार बंद आहेत. किरकोळ कारणावरून बंद असलेले हे ऑपरेशन थिएटर आठ दिवसांत कार्यान्वित करा अन्यथा तेथील अधिकाऱ्यांवर कारवाई केली जाईल, असा इशारा डीएचओ डॉ. जमादार यांनी दिला.

मोबाइल अॅप डाउनलोड करा आणि राहा अपडेट

शिक्षक भारतीचे झेडपीसमोर उपोषण

July 28, 2015, 11:48 am

≫ Next: २५ लाख बालकांचे प्राण वाचतात ‘ओआरएस’ने

≪ Previous: ३९ डॉक्टरांचा एनपीए बंद

$

0

0

म. टा. प्रतिनिधी, औरंगाबाद

जिल्हा परिषद पातळीवर शिक्षकांचे विविध प्रश्न प्रलंबित असल्याच्या कारणावरून शिक्षक भारतीने मंगळवारपासून जिल्हा परिषदेसमोर बेमुदत उपोषण सुरू केले आहे. शिक्षकांचे मासिक वेतन दरमहा पाच तारखेपर्यंत जमा व्हावे, डीएड परीक्षा उत्तीर्ण झालेल्या निमशिक्षकांना प्राथमिक शिक्षकांचे आदेश निगर्मित व्हावेत, मुख्यालयी राहण्याच्या अटीतून शिक्षकांना वगळावे, शिक्षण विस्तार अधिकारी, केंद्रप्रमुख, मुख्याध्यापक, प्राथमिक पदवीधर यांची रिक्तपदे पदोन्नतीने भरावीत, शासन निर्णयानुसार शिक्षकांच्या आपसी बदल्या कराव्यात, २००५ पर्यंत सेवेत रुजू झालेल्या शिक्षकांना सेवेत कायम करावे आदी मागण्या वारंवार संघटनेने प्रशासनाकडे केल्या. मात्र, त्याची अंमलबजावणी झाली नाही. प्रलंबित मागण्यांमुळे शिक्षकांचे हाल होत आहेत. याकडे लक्ष वेधून घेण्यासाठी आज सकाळपासून शिक्षक भारतीचे सदस्य जिल्हा परिषदेसमोर बेमुदत उपोषणाला बसले आहेत. प्रश्न निकाली निघेपर्यंत उपोषण सुरू राहील, अशी भूमिका संघटनेने घेतली आहे. उपोषणासाठी जिल्हाध्यक्ष प्रकाश दाणे, मुश्ताक शेख, संतोष ताठे, अशोक बनकर, के. टी. शिसोदे, महेंद्र बारवाल, राजेश भुसारी, सुषमा खरे, छाया पळसकर आदींसह शिक्षक सहभागी झाले आहेत.

मोबाइल अॅप डाउनलोड करा आणि राहा अपडेट

२५ लाख बालकांचे प्राण वाचतात ‘ओआरएस’ने

July 28, 2015, 11:53 am

≫ Next: ३ महिन्यांत १७६ व्यक्ती HIV बाधित

≪ Previous: शिक्षक भारतीचे झेडपीसमोर उपोषण

$

0

0

म. टा. प्रतिनिधी, औरंगाबाद

'ओआरएस'च्या जन्माआधी म्हणजेच १९७० च्या आधी गॅस्ट्रो, डायरिया, कॉलरा, अतिसाराने जगभरात ५० लाख बालकांचा मृत्यू दरवर्षी होत होता. मात्र, 'ओआरएस'च्या सर्वत्र वापरामुळे दरवर्षी या २५ लाख बालकांचा मृत्यू रोखणे शक्य झाले आहे. त्याचवेळी सुरुवातीपासून व योग्य पद्धतीने 'ओआरएस'चा वापर सुरू झाला तर त्यातील आणखी १० ते १२ टक्के मृत्यूचे प्रमाण कमी होऊ शकते, असाही वैद्यकीय तज्ज्ञांचा मतप्रवाह आहे.

१९६९ ते १९७० दरम्यान भारतीय शास्त्रज्ञ डॉ. दिलीप मोहनबलीस यांनी 'ओआरएस' हे संशोधित मिश्रण जगामध्ये सर्वांत आधी तयार केले. योग्य प्रमाणातील ग्लुकोजमुळेच शरीरामध्ये सोडियम व पाणी शोषले जाऊ शकते आणि शरीरामध्ये पाण्याची पातळी योग्य प्रमाणात राखली जाऊ शकते. परिणामी, गॅस्ट्रो-डायरियाने होणारे मृत्यू रोखता येऊ शकतात, हे सर्वांत आधी डॉ. मोहनबलीस यांनी जगासमोर आणले. त्यांनी तयार केलेल्या 'ओआरएस'चा वापर युद्धातील गंभीर जखमींवर केला आणि आश्चर्यकारक परिणाम समोर आल्यानंतर त्याचा अनेक ठिकाणी वापर सुरू झाला. प्रत्यक्ष वापर सुरू झाल्याच्या पहिल्याच वर्षी ९६ टक्के सकारात्मक परिणाम दिसून आले. त्यानंतर डायरिया-अतिसारासाठी आणि ज्या ज्या आजार-रोगांमध्ये शरीरातील पाण्याचे प्रमाण कमी होते, त्या सर्व ठिकाणी 'ओआरएस'चा वापर सुरू झाला. दशकापूर्वीपर्यंत 'ओआरएस'मध्ये क्षाराचे प्रमाण जास्त होते व त्यामुळे काही प्रमाणात समस्या येत होत्या. या पार्श्वभूमीवर जागतिक आरोग्य संघटना (डब्ल्यूएचओ) व 'युनिसेफ'च्या मार्गदर्शक तत्वांनुसार क्षारांचे प्रमाण कमी करून २००४ च्या सुमारास नवीन 'ओआरएस' वापरात आले, ज्याचा प्रभावी उपयोग समोर आला. तसेच पूर्वी एक लिटरच्या पॅकमध्ये 'ओआरएस' उपलब्ध होते. मात्र, हे मिश्रण २४ तासांत वापरणे आवश्यक असल्याने असे मिश्रण वाया जाण्याचे प्रमाणही खूप जास्त होते. त्यामुळे दुसरे भारतीय शास्त्रज्ञ डॉ. एम. के. भान यांच्या पुढाकारातून २०० एमएलच्या छोट्या पुडीमध्ये 'ओआरएस' दहा वर्षांपूर्वी उपलब्ध झाले आणि त्याचा घरगुती वापर सर्वदूर सुरू झाला. परिणामी, गॅस्ट्रो-डायरियाचे ५० टक्के मृत्यूचे रोखणे शक्य झाल्याचे बालरोगतज्ज्ञ व भारतीय बालरोग संघटनेच्या शहर शाखेचे सचिव डॉ. मंदार देशपांडे यांनी 'मटा'ला सांगितले.

मात्र 'ओआरएस'चा वापर सांगितलेल्या प्रमाणानुसारच करणे गरजेचे आहे, नाहीतर त्याचा अपाय होऊ शकतो, असे ज्येष्ठ बालरोगतज्ज्ञ डॉ. जयंत तुपकरी म्हणाले. अतिसारामध्ये स्तनपान सुरू ठेवणे आवश्यक असल्याचे बालरोगतज्ज्ञ डॉ. श्रद्धा चांडक म्हणाल्या.

थीम 'सिंपल सोल्युशन'ची

यंदाच्या 'ओआरएस डे'ची थीम ही 'मोस्ट सिंपल सोल्युशन टू लाइफ' अशी आहे. अर्थातच, अतिशय सहज वापरण्याजोग्या 'ओआरएस'च्या योग्य वेळी व योग्य वापरामुळे असंख्य फायदे होतात आणि त्याचा प्रसार-प्रचार करण्याच्या हेतुने त्याचा थीम म्हणून वापर करण्यात आल्याचे बालरोगतज्ज्ञ म्हणतात.

२००४ नंतर आलेल्या 'डब्ल्यूएचओ' प्रमाणित सुधारित 'ओआरएस'मुळे उलट्या, डिहायड्रेशन, जुलाबाचे प्रमाण उल्लेखनीयरित्या कमी झाले. त्याचा वापर घरोघरी वाढला. त्याचवेळी डेंग्यू, ताप व इतर अनेक आजारांमध्येही वापर वाढत आहे. 'ओआरएस'सह झिंकचा वेगळा वापर १४ दिवस केल्यास प्रतिकारशक्ती वाढून नेहमी-नेहमी होणारे अतिसार, जुलाब होण्याचे प्रमाणही कमी होते.

- डॉ. मंदार देशपांडे, बालरोगतज्ज्ञ

'ओआरएस डे'निमित्त पोस्टर प्रकाशन

औरंगाबाद : जागतिक ओआरएस दिनानिमित्त भारतीय बालरोग संघटनेच्या (इंडियन अॅकॅडमी ऑफ पेडियाट्रिक्स) शहर शाखेतर्फे 'ओआरएस'ची सविस्तर माहिती देणाऱ्या पोस्टरचे मंगळवारी (२८ जुलै) प्रकाशन करण्यात आले. बीड बायपासवरील ओंकार बालवाडीमध्ये हा छोटेखानी कार्यक्रम झाला.

या वेळी संघटनेच्या शहर शाखेचे अध्यक्ष डॉ. केदार सावळेश्वरकर, उपाध्यक्ष डॉ. मंजुषा शेरकर, सचिव डॉ. मंदार देशपांडे, कोषाध्यक्ष डॉ. सचिन देशमुख, डॉ. राजेंद्र वैद्य, डॉ. जयंत तुपकरी, डॉ. प्रशांत जाधव, डॉ. गणेश कुलकर्णी, डॉ. मकरंद दिवाण, डॉ. रोशनी सोधी, डॉ. स्मीता कुलकर्णी, डॉ. निखिल पाठक आदींची उपस्थिती होती. जागतिक ओआरएस दिन हा २९ जुलै रोजी साजरा केला जातो. यानिमित्त ओआरएसचे महत्त्व, घेण्याची नेमकी पद्धत, फायदे तसेच महत्वाच्या सूचना या पोस्टरच्या माध्यमातून देण्यात आल्या आहेत. जलसंजीवनीचे काही प्रमाणात काम करणाऱ्या साखर-मीठ युक्त पाणी, लिंबू पाणी, नारळ पाणी, लस्सी, भाताची पेज यांच्या वापराबद्दलही माहिती देण्यात आहे. विशेष म्हणजे पूरक छायाचित्रांसह माहिती देण्यात आली. या कार्यक्रमानिमित्त बालरोगतज्ज्ञ डॉ. श्रद्धा चांडक, डॉ. देशपांडे, डॉ. वैद्य, डॉ. तुपकरी यांनी 'ओआरएस'चे महत्त्व विषद केले. या प्रसंगी डॉ. तुपकरी व डॉ. मधुश्री सावजी यांनी ओंकार बालवाडीच्या शिक्षण पद्धतीविषयी माहिती दिली.

मोबाइल अॅप डाउनलोड करा आणि राहा अपडेट

३ महिन्यांत १७६ व्यक्ती HIV बाधित

July 28, 2015, 11:54 am

≫ Next: ...मुलासाठी संसार सोडला!

≪ Previous: २५ लाख बालकांचे प्राण वाचतात ‘ओआरएस’ने

$

0

0

म. टा. प्रतिनिधी, औरंगाबाद

जिल्ह्यातील जिल्हा एडस् प्रतिबंधक व नियंत्रक पथकाच्या २३ आयसीटीसी केंद्रात मागच्या तीन महिन्यांमध्ये १६ हजार ८५९ सामान्य रुग्णांची एचआयव्ही तपासणी करण्यात आली असता, त्यातील १७६ व्यक्तींना एचआयव्हीचा संसर्ग झाल्याचे स्पष्ट झाले आहे. तसेच १८ हजार १५४ गरोदर मातांपैकी सहा गरोदर मातांनाही एचआयव्हीचा संसर्ग झाल्याचे समोर आले आहे.

जिल्ह्यातील एआरटी केंद्रांमध्ये ४,५३० रुग्णांना औषधोपचार दिला जात असल्याची माहिती जिल्हा शल्यचिकित्सक डॉ. जी. एम. गायकवाड यांनी जिल्हा एडस् प्रतिबंधक व नियंत्रण समिती आणि एचआयव्ही-क्षयरोग समन्वय समितीच्या बैठकीत दिली. अप्पर जिल्हाधिकारी पी. एल. सोरमारे हे बैठकीच्या अध्यक्षस्थानी होते. या वेळी जिल्ह्यातील शासकीय आरोग्य संस्थांमध्ये एडस-एचआयव्हीची मोफत चाचणी उपलब्ध असून, गरोदर मातांनी चाचणी करून घ्यावी, असे आवाहनही सोरमारे यांनी केले. औद्योगिक क्षेत्रातील स्थलांतरित कामगारांचीही एचआयव्ही चाचणी आवश्यक आहे. त्यासाठी फिरते वाहन उपलब्ध असल्याने कामगारांनी चाचणीचा लाभ घ्यावा. तसेच जिल्ह्यातील सर्व प्राथमिक आरोग्य केंद्र व महापालिका उपकेंद्रात नोंदणी झालेल्या गरोदर मातांची व संशयित क्षयरोगींची एचआयव्ही चाचणी करण्याची सूचना त्यांनी संबंधित अधिकाऱ्यांना केली. बैठकीला डॉ. विवेक खतगावकर, डॉ. अंजली पाथ्रीकर, डॉ. डी. पी. परदेशी, डॉ. विनायक मुंडे, डॉ. संदीप भवरे, आरोग्य अधिकारी बी. टी. पवार, डॉ. ज्योती घाटगे, डॉ. संजय देवरे आदींची उपस्थिती होती.

मोबाइल अॅप डाउनलोड करा आणि राहा अपडेट

...मुलासाठी संसार सोडला!

July 28, 2015, 11:56 am

≫ Next: देर आए, दुरूस्त आए

≪ Previous: ३ महिन्यांत १७६ व्यक्ती HIV बाधित

$

0

0

पृथा वीर, औरंगाबाद

'हर्ष की मी', असे त्याने विचारल्यावर मी क्षणात हर्षला जवळ केले. आपले मुल बहुविकलांग हे समजण्यास उशीर झाला, तरी आदिती यांनी त्याची निवड करत पतीला घटस्फोट दिला. त्यांचा हा निर्णय इतर पालकांनाही प्रेरणा देणारा आहे.

ध्यमवर्गीय कुटुंबात वाढलेल्या आदिती मूळ औरंगाबादकर, पण वडिलांच्या नोकरीमुळे हे कुटुंब मुंबईला राहायचे. एम. ए. सायकॉलॉजी झालेल्या आदितींना पुढे शिकण्याची इच्छा होती. मात्र, मुंबईच्याच एका वधू-वर परिचय केंद्राने त्यांच्यासाठी स्थळ सूचविले. हे स्थळ मुंबईचेच होते, पण या कुटुंबाला केनियाचे नागरिकत्व मिळाले होते. मुलगाही केनियाच्या एका कंपनीमध्ये चांगल्या पदावर होता. सर्वांनाच हे स्थळ उत्तम वाटले व आदितीनांही स्थळ पसंत पडले. लग्न झाल्यानंतरही शिकण्यास परवानगी मिळाल्याने अवघ्या तीन महिन्याच्या आत हे लग्न पार पडले. आदितीही केनियाला गेल्या. सासरी गेल्यावर थोड्यांच दिवसात त्यांना खरी परिस्थिती समजली. केनियाच्या कायद्यानुसार भाषेची अट असल्यामुळे आदितींनाही नोकरी करता आली नाही व शिक्षणही बंद झाले. सासरे वरवर शांत वाटत असले तरी त्यांचा स्वभाव विक्षिप्त होता. मुलाचे लग्न होताच त्यांनी तडकाफडकी नोकरी सोडली. सासऱ्यांचा विरोध आदितींना महाग पडायचा. पतीकडून मानसिक व शारीरिक छळ व्हायचा. कुणाशी साधे बोलले की, पती थेट चारित्र्यावर संशय घ्यायचे. मूल झाल्यावर सर्वकाही नीट होईल, असे म्हणत त्या त्रास सहन करत गेल्या व बाळंतपणाकरता भारतात परतल्या. मुदतपूर्व प्रसुती झाल्याने बाळाला आयसीयूमध्ये ठेवावे लागले. प्रकृती अधिकच चिंताजनक झाल्याने बाळास मुंबईला हलवण्यात आले. पुढचे एक वर्ष काळजी घेतली तरच तो जगेल, असा इशारा डॉक्टरांनी दिला. उपचाराचा सर्व खर्च हाताबाहेर गेल्याने आदितीच्या वडिलांनी आपले शेत विकले, पण सासरहून काहीच मदत झाली नाही. याउलट आम्हाला हे मूल नको म्हणत सासरे मोकळे झाले. तरीही आदितींना आशा होती. मुलाला घेऊन त्या ‌पुन्हा केनियाला गेल्या, पण सासरे मात्र कधी बाळाचे हात-पाय बांधून ठेवत तर कधी थंडगार पाणी पाजून त्याला त्रास द्यायचे. विशेष म्हणजे वडील म्हणून पतीही आपल्या मुलाची कोणतीच जबाबदारी घ्यायचे नाहीत. आदितींचा विरोध वाढला, तसा मारहाण वाढली. एकदा तर त्यांना रात्रभर बाहेर काढून दिले व त्यांचा पासपोर्ट स्वतःकडे ठेऊन भारतात परतण्याचे सर्व मार्ग बंद करून टाकले. इकडे मुलाचा त्रास वाढतच होता. केनियामध्ये उपचाराच्या नावाने मुलाला मारण्याचा प्रयत्न होतो आहे, हे आदितींना कळून चुकले. त्यामुळे भारतात परतणे गरजेचे झाले. त्यांच्या आई-वडिलांनीही मोठ्या हुशारीने जावयाच्या भावाचे लग्न म्हणून आदितीला बोलावून घेतले व अदितींनाही भारताता परतेपर्यंत शांत रहा, असा सल्ला दिला. भारतात आल्यावर आदिती वेगळा होण्याचा आपला निर्णय सांगून मोकळा झाल्या. बरेच दिवस पतीने गोड बोलून आदितीचे मत परिवर्तन करण्याचा प्रयत्न केला, पण आदिती ठाम होत्या. सासरच्या लोकांनी एकदाच समजूत घातली व नंतर कायमचे संबंध तोडले. पतीलाही मूल नकोच होते. हा मानसिक ताण सहन करताना आदितींच्या चिंतेत भर पडली. त्यांचा मुलगा बहुविकलांग होता व दोन वर्षांच्या काळात त्याला योग्य ते उपचार न मिळाल्याने त्याला अपंगत्वही आले होते. विशेष म्हणजे प्रसुती होण्यापूर्वीच मुलाच्या वडिलांना डॉक्टरांनी ही शक्यता बोलून दाखवली, पण आदितींना अंधारात ठेवण्यात आले. मुलाचे आजारपण व पतीचा दगा याचा आदितींवर मोठा आघात झाला. तणावातून जाताना त्यांचे वजन वाढले, केस जाऊ लागले. एकवार तडजोडीचा प्रयत्न करताना पतीने सरळ विचारले 'मी की, मुलगा?' त्यामुळे पतीकडून सर्वच आशा मावळल्या. आता मात्र आदिती आई व वडील या दोन्ही भूमिकेत होत्या. यासाठी सर्वप्रथम त्याचे आजारपण समजून घेणे गरजेचे होते. मुंबईला विशेष मुलांचे संगोपनाच्या अभ्यासक्रमास आदितींनी प्रवेश घेतला. मध्यंतरी त्यांच्या दुसऱ्या विवाहासाठी प्रयत्न झाले, पण मूल बघून ही शक्यताही नव्हती. यानंतर आई-वडील व मुलाला घेऊन त्या औरंगाबादला आल्या व इथे ओंकार बालवाडी अंतर्गत विशेष मुलांची ‌बालवाडी त्यांनी जॉइन केली. आज हर्ष बारा वर्षांचा झाला.

पूर्वीच्या तुलनेत तो खूप छान प‌्रतिसाद देतो, पण त्याच्या दैनंदिन गरजांकरता तो पूर्णपणे आदितींवर अवलंबून आहे. आदितीच्या माघारी आई-वडील मुलाची काळजी घेतात. पतीकडून घटस्फोट घेताना आदितींनी पोटगी नाकारली. कारण ज्या पतीला मुलाचे येणेच नको होते व ज्याने कधीच मुलाची चौकशी केली नव्हती त्या व्यक्तीसोबत आदितीलाही संबंधच ठेवायचे नव्हते. इतक्या कठीण परिस्थितीचा सामना केला, मग आपला मुलगाही एक दिवस यातून बाहेर येईल, असा विश्वास त्यांना आहे.

मोबाइल अॅप डाउनलोड करा आणि राहा अपडेट

---

देर आए, दुरूस्त आए

July 28, 2015, 11:59 am

≫ Next: किरकोळ दुकानदार होते लक्ष्य

≪ Previous: ...मुलासाठी संसार सोडला!

$

0

0

उन्मेष देशपांडे

सर्वांनी सहकार्य केले तर स्मार्ट सिटीची स्पर्धा पार करू, असे आयुक्तांनी म्हटले आहे. त्यांना प्रशासना बरोबरच नगरसेवक, पदाधिकारी आणि नागरिकांचे सहकार्य अपेक्षित आहे. प्रशासनाने प्रयत्नाचे हात पुढे केलेच आहेत आता अन्य घटकांची बारी आहे.

'स्मार्टसिटी' प्रकल्पाचा बडगा घेऊन महापालिकेचे प्रशासन आता आपल्या कामात सतर्क झाले आहे. प्रशासकीय सुधारणा केल्याशिवाय आणि उत्पन्न वाढवल्याशिवाय काहीच पर्याय नाही हे लक्षात आल्यामुळे या दोन्हीही पातळीवर प्रयत्न केले जात आहेत. प्रशासनाची ही कृती देर आए, दुरुस्त आए अशीच आहे.

औरंगाबाद महापालिकेने स्मार्टसिटी योजनेसाठी राज्य शासनाकडे आपली एन्ट्री दाखल केली आहे. या योजनेतील समावेशासाठी आपण कसे पात्र आहोत हे दाखवण्यासाठी एक - दोन दिवसांत शासकीय स्तरावर महापालिकेला प्रेझेंटेशन करावे लागणार आहे. त्याची तयारीही महापालिकेने केली आहे. स्मार्टसिटी प्रकल्पात समावेश होताना महापालिकेला काही प्रशासकीय सुधारणा कराव्या लागणार आहेत. त्याचबरोबर उत्पन्नाची साधने वाढवावी लागणार आहेत. या प्रकल्पात समावेश झाला तर दरवर्षी ५० कोटी रुपये खर्च महापालिकेला स्वतःचा हिस्सा म्हणून उभे करावे लागणार आहेत. ही बाब तशी सोपी नाही. महापालिकेची आर्थिक स्थिती बेताचीच आहे. दर महिन्याला पगारावर अकरा कोटी रुपये खर्च करावा लागतो, लाइट बिल, ठेकेदारांची बिले, कर्जाचा हप्ता आणि अन्य बाबींचा खर्च लक्षात घेता दर महिन्याला किमान २३ कोटी रुपये महापालिकेला खर्च करावे लागतात. त्यातच आता १ ऑगस्ट पासून स्थानिक संस्थाकर रद्द होणार आहे. हा कर रद्द झाल्यावर महापालिकेची आर्थिक स्थिती अधिकच बिकट होईल. त्यातून कसे सावरले जाणार हा प्रश्न येत्या काळात भेडसावणार आहे, परंतु स्मार्टसिटीत आपल्या शहराचा समावेश करून घ्यायचा, असे पालिकेच्या प्रशासनाने मनोमन ठरवल्यामुळे त्या दृष्टीने प्रयत्न सुरू करण्यात आले आहेत. त्यात प्रामुख्याने उत्पन्न वाढीकडे सध्यातरी लक्ष दिले जात आहे. लोटाकारंजा येथील सरसय्यद हॉलवर कारवाई करून महापालिकेने आपल्या मीटरचा आकडा वाढविला. ज्या हॉलपासून दर महिन्याला पाच हजार रुपये मिळणार होते, त्या हॉलला तीस हजार रुपयांचे भाडे आकारण्यात आले, शिवाय दंडात्मक कारवाई करण्याचे सुतोवाच करण्यात आले. महापालिकेने बांधून ठेवलेले शहरात असे अनेक हॉल आहेत ज्याचा महापालिकेच्या प्रशासनाला काहीच पत्ता नाही. आंधळं दळतं आणि कुत्रं पीठ खातं अशी स्थिती आहे. सरसय्यद हॉलच्या प्रकरणामुळे ही स्थिती बदलण्याचा चंग अधिकाऱ्यांनी बांधला आहे. शहरातील जाहिरात कमानींचा वाद काही वर्षांपासून सुरू होता. हा वाद आयुक्त प्रकाश महाजन आणि उपायुक्त अय्युब खान यांनी सोडवला, त्याला सहमतीही मिळाली. त्यामुळे पालिकेच्या उत्पन्नात एका कमानीमागे एका महिन्याला पाच हजार रुपयांऐवजी बारा हजार रुपये महापालिकेला मिळतील. पालिकेच्या मालकीच्या वीस कमानी शहरात आहेत. त्यातून पालिकेला महसूलात वाढ होईल. महापालिकेचे उत्पन्न वाढविणाऱ्या अशा अनेक बाबी आहेत त्याकडे प्रशासनाने लक्ष दिले पाहीजे. महापालिकेने आपल्या अधिकारी, कर्मचाऱ्यांसाठी निवासस्थाने बांधली. या निवासस्थानांची संख्या चारशेपेक्षा जास्त आहे, पण फक्त १५० च्या जवळपास कर्मचारी या निवासस्थानांचे भाडे भरतात. बाकीच्या कर्मचाऱ्यांबद्दल पालिकेकडे नोंदच नाही. काही कर्मचाऱ्यांनी या निवासस्थानांमध्ये चक्क पोटभाडेकरू ठेवले आहेत. त्यांच्यावर कारवाई करून महसूल वाढीचा विचार महापालिका करणार आहे का, असा प्रश्न या निमित्ताने निर्माण झाला आहे. महापालिकेने शहराच्या विविध भागात शॉपिंग कॉम्प्लेक्स बांधले आहेत, पण बहुतेक कॉम्प्लेक्सला आणि कर्मचाऱ्यांच्या निवासस्थानांना मालमत्ता कर लागलेला नाही, त्यामुळे दरवर्षी कोट्यावधी रुपयांचे नुकसान होते. हे नुकसान भरून काढण्याकडे लक्ष दिले तर एलबीटी बंद झाल्यावर शासनाकडे हात पसरण्याची वेळ महापालिकेवर येणार नाही.

स्मार्टसिटीच्या प्रशासकीय सुधारणेत उत्पन्न वाढीचा मुद्या फार महत्वाचा आहे. या मुद्याकडे महापालिकेच्या सर्वच यंत्रणांनी लक्ष दिले पाहीजे. सर्वांनी सहकार्य केले तर स्मार्टसिटीची स्पर्धा पार करू, असे आयुक्तांनी म्हटले आहे. त्यांना प्रशासनाबरोबरच नगरसेवक, पदाधिकारी आणि नागरिकांचे सहकार्य अपेक्षित आहे. प्रशासनाने प्रयत्नाचे हात पुढे केलेच आहेत आता अन्य घटकांची वेळ आहे.

मोबाइल अॅप डाउनलोड करा आणि राहा अपडेट

किरकोळ दुकानदार होते लक्ष्य

July 28, 2015, 12:00 pm

≫ Next: एकतर्फी प्रेमाच्या जाचाला कंटाळून आत्महत्या

≪ Previous: देर आए, दुरूस्त आए

$

0

0

म. टा. प्रतिनिधी, औरंगाबाद

मुकुंदवाडी पो‌लिसांनी अटक केलेल्या दोन संशयित आरोपींपैकी एका आरोपीला कोर्टाने चार दिवसांची पोलिस कोठडी सुनावली आहे. तर दुसऱ्या १७ वर्षांच्या बालकाची रवागनी बालगृहात करण्यात आली. या दोघांनी बनावट नोटा चालविण्यासाठी किरकोळ दुकानदारांना लक्ष्य केले होते.

एन-२ भागातून पोलिसांनी सोमवारी शेख आमेर शेख खुदूदस रा. अंबड याच्यासह एका १७ वर्षांच्या तरुणाला ताब्यात घेतले होते. या दोघांच्या ताब्यातून २० हजारांच्या बनावट नोटा जप्त करण्यात आल्या होत्या. आरोपी शेख आमेरला मंगळवारी कोर्टात हजर करण्यात आले असता १ ऑगस्टपर्यंत पोलिस कोठडी सुनावण्यात आली आहे. पकडण्यात आलेल्या या दोघांनी खळबळजनक माहिती पोलिसांना दिली. यामध्ये शंभर रूपयांची बनावट नोट चालविताना छोटे दुकानदार, टपरी, फेरीवाल्यांना ते टार्गेट करीत होते. यामध्ये १० ते २० रूपयांची किरकोळ वस्तू ते खरेदी करीत होते. उर्वरित असली चलन खिशात घालून फसवणूक करायचे. औरंगाबाद शहरातच नाही तर नगर, पुणे शहरातही त्यांनी नोटा खपविल्याची माहिती दिली.

आमेरने ठेवले अंधारात

शेख आमेर हा शिक्षणाच्या बहाण्याने औरंगाबादला राहत आहे. इंटरनेटच्या माध्यमातून त्याने बनावट नोटाचे तंत्र शिकले. सोबत असलेल्या सतरा वर्षांच्या संशयिताला त्याने मित्राकडून नोटा बनवून आणतो, असे सांगत अंधारात ठेवले होते. नंतर त्याला माहिती झाल्यानंतर तो देखील या धंद्यात सहभागी झाला.

अल्पवयीन आरोपीलाही बेड्या

या दोन आरोपीपैकी एक आरोपी सतरा वर्षांचा आहे. मुकुंदवाडी पोलिसांनी पकडल्यानंतर मर्दुमुकी दाखवण्यासाठी पोलिस आयुक्तालयात या दोघांना बुरखा घालून हजर केले. यावेळी अल्पवयीन आरोपीलादेखील हातकडी घालण्यात आली होती.

मोबाइल अॅप डाउनलोड करा आणि राहा अपडेट

एकतर्फी प्रेमाच्या जाचाला कंटाळून आत्महत्या

July 28, 2015, 12:02 pm

≫ Next: रात्र निवारागृहात पोलिसांचाच मुक्काम

≪ Previous: किरकोळ दुकानदार होते लक्ष्य

$

0

0

म. टा. प्रतिनिधी, औरंगाबाद

एकतर्फी प्रेमातून सातत्याने होत असलेल्या छेडछाडीमुळे सतरा वर्षांच्या विद्यार्थींनीने गळफास घेत आत्महत्या केली. बालाजीनगरात सोमवारी दुपारी हा प्रकार घडला. या प्रकरणी एका आरोपीला जवाहरनगर पोलिसांनी अटक केली आहे.

बालाजीनगरात रिमा (वय १७) नाव बदललेले आहे. ही तरुणी कुटुंबासह राहत असून एका कॉलेजमध्ये बारावीचे शिक्षण घेत आहे. या तरुणीच्या वडिलांचे किराडपुऱ्यात दुकान आहे. बजरंग चौकात एका क्लासमध्ये ती जात होती. गेल्या पाच सहा महिन्यांपासून बालाजीनगर येथीलच संदीप विठ्ठलराव भसांडे (वय २९) हा तरूण तिचा पाठलाग करीत होता.

एकतर्फी प्रेमातून सातत्याने तो रिमाची छेडछाड करीत होता. या प्रकाराला कंटाळलेल्या रिमाने घरी हा प्रकार सांगितला होता. रिमाच्या कुटुंबीयांनी संदीपला जाब विचारल्यानंतर त्याने आईवडिलांसमोर तिची माफी मागितली होती. त्यानंतरही त्याने त्रास देणे सुरूच ठेवले. तिला रस्त्यात अडवून बदनामी करीत ठार मारण्याची धमकीही दिली होती. अखेर या प्रकाराला कंटाळलेल्या रिमाने सोमवारी दुपारी अडीच वाजता बेडरूममध्ये पंख्याला गळफास घेत आत्महत्या केली.

काही वेळानंतर घरच्या मंडळीच्या लक्षात हा प्रकार आला. तिला तातडीने सुरुवातीला खासगी हॉस्पिटलमध्ये दाखल करण्यात आले. मात्र, डॉक्टरांनी तपासून मृत घोषित केले. तिच्या वडिलांनी रात्री जवाहरनगर पोलिस ठाण्यात संशयित आरोपी संदीप भसांडेविरूद्ध तक्रार दाखल केली. पोलिसांनी संदीपला अटक करून त्याच्याविरूद्ध बाल लैंगिक अत्याचार कायदा व मृत्यूस कारणीभूत ठरल्याप्रकरणी गुन्हा दाखल केला आहे. त्याला मंगळवारी कोर्टात हजर करण्यात आले असता तीन ऑगस्टपर्यंत पोलिस कोठडी सुनावण्यात आली आहे. मृत्युपूर्वी रिमाने लिहिलेली सुसाईड नोट पोलिसांना सापडली असल्याची माहिती सूत्रांनी दिली.

मोबाइल अॅप डाउनलोड करा आणि राहा अपडेट

रात्र निवारागृहात पोलिसांचाच मुक्काम

July 28, 2015, 12:03 pm

≫ Next: दरोडेखोरांची टोळी जाळ्यात

≪ Previous: एकतर्फी प्रेमाच्या जाचाला कंटाळून आत्महत्या

$

0

0

औरंगाबाद : महापालिकेने सुरू केलेल्या रात्र निवारागृहांचा सर्वाधिक उपयोग शहरात विविध कारणांसाठी बंदोबस्ताला आलेले पोलिस करीत असल्याची माहिती देण्यात आली आहे. रात्र निवारागृहांच्या वापराबद्दल सभागृहनेते राजेंद्र जंजाळ यांनी प्रशासनाला पत्र दिले होते. त्यांच्या पत्राला अधिकाऱ्यांनी दोन महिन्यानंतर उत्तर दिले आहे.

राजेंद्र जंजाळ यांनी मे महिन्यात अचानकपणे रात्र निवारागृहांना भेट दिली होती. त्यावेळी अनेक गैरसोई त्या ठिकाणी असल्याचे त्यांच्या लक्षात आले. त्यामुळे त्यांनी आयुक्तांच्या नावे पत्र देऊन सर्वच रात्र निवारागृहांच्या कामकाजाचे लेखापरिक्षण करण्याची मागणी केली होती. त्यांच्या पत्रावर दोन महिने विचार करून उपायुक्त किशोर बोर्डे यांनी उत्तर दिले आहे. रात्र निवारागृहांचा जास्त उपयोग बंदोबस्तावरील पोलिस करतात अशी माहिती त्या उत्तरात नसली तरी संबंधित अधिकाऱ्याने जंजाळ यांच्याशी चर्चा करताना ही माहिती दिली. गणेशोत्सव, नवरात्र या पारंपारिक उत्सवासाठी बाहेरगावाहून मोठा पोलिस बंदोबस्त मागवला जातो, त्यांची निवासाची व्यवस्था रात्र निवारागृहात केली जाते. या शिवाय वेळोवेळी पोलिसांचा फौजफाटा तैनात केला जातो. या फौजफाट्यातील पोलिस रात्र निवारागृहात राहतात.

मोबाइल अॅप डाउनलोड करा आणि राहा अपडेट

दरोडेखोरांची टोळी जाळ्यात

July 28, 2015, 12:03 pm

≫ Next: नोकरीचे आमिष दाखवून गंडा घालणारी महिला गजाआड

≪ Previous: रात्र निवारागृहात पोलिसांचाच मुक्काम

$

0

0

म. टा. प्रतिनिधी, औरंगाबाद

दरोड्याच्या तयारीत असलेल्या चार सराइत गुन्हेगारांना स्थानिक गुन्हे शाखेच्या पोलिसांनी सोमवारी रात्री खोपेश्वर फाट्याजवळ पकडले. त्यापैकी तीन जणांनी रत्नप्रभा मोटार्सवर दरोडा टाकल्याचा संशय असून, अनेक गुन्हे उघडकीस येतील, अशी शक्यता पोलिसांनी व्यक्त केली. अंधाराचा फायदा घेत पसार झालेल्या दोघांचा शोध सुरू आहे.

स्थानिक गुन्हे शाखेचे सहायक पोलिस निरीक्षक महेश आंधळे व पोलिस उपनिरीक्षक दीपक सरोदे हे पथकासह गंगापूर ते सिल्लेगाव परिसरात गस्त घालत होते. यावेळी खबऱ्यामार्फत माहिती मिळाल्याने त्यांनी मालुंजा ते तांदूळवाडी रस्त्यावर असलेल्या खोपेश्वर फाट्याजवळ टाटा इंडिगो कारसह दबा धरून बसलेल्या दरोडेखोरांवर छापा मारला. अंधार असल्याने यातील दोघे जण पळून गेले तर चौघांना पकडण्यात पोलिसांना यश आले. शेख सादिक शेख कचरू (वय ३१, रा. अमीना मशिदजवळ नायगाव, फुलंब्री), मुनीर खान रशीद खान ( वय ३२, रा. माहुली), तेजराव श्रीराम राठोड ( वय २८, रा. आडगाव सरक), विष्णू गंगाराम राठोड (वय ३१, रा. होनाजीनगर, जटवाडा रोड, हर्सूल) अशी अटक केलेल्या आरोपींची नावे आहेत. तर भगवान गायकवाड (रा. जयसिंगपुर, ता. गंगापूर) व माधव जाधव (रा. पेंढापूर, ता. गंगापूर) अशी पसार झालेल्या दरोडेखोरांची नावे आहेत.

ताब्यात घेतलेल्या चौघांकडून एक कुऱ्हाड, लाकडी दांडा, मिरची पूड, नायलॉन दोरी, लोखंडी कात्री, दोन करवती, एक टाटा इंडिगो कार (एम.एच. १७ एक्स ७९९९) असा मुद्देमाल जप्त करण्यात आला. मार्च महिन्यात एमआयडीसी सिडको पोलिस ठाण्याच्या हद्दीतील रत्नप्रभा मोटर्सवर पडलेल्या दरोडाप्रकरणात यापैकी तीन आरोपींचा हात असल्याचा संशय पोलिसांनी व्यक्त केला आहे. पोलिस अधीक्षक नवीनचंद्र रेड्डी यांच्या मार्गदर्शनाखाली स्थानिक गुन्हे शाखेचे पोलिस निरीक्षक डॉ. कांचन चाटे, सहायक पोलिस निरीक्षक आंधळे, पोलिस उपनिरीक्षक सरोदे, सहायक फौजदार पोपट कांबळे, पोलिस कर्मचारी जमादार नवनाथ कोल्हे, गणेश मुळे, रतन वारे, आशिष जमधडे, सुनील शिराळे व दीपक जगदाळे यांनी ही कामगिरी केली.

मोबाइल अॅप डाउनलोड करा आणि राहा अपडेट