लोकसभेतील काँग्रेस पक्षाच्या २५ खासदारांचे निलंबन रद्द करण्याच्या मागणीसाठी गुरुवारी लातुरातील गांधी चौकात काँग्रेसतर्फे जिल्हाध्यक्ष अॅड. व्यंकट बेद्रे यांच्या नेतृत्वाखाली धरणे आंदोलन करण्यात आले. या धरणे आंदोलनाकडे लोकप्रतिनिधींनी मात्र, पाठ फिरवली होती.
साडे दहा वाजता धरणे आंदोलनाला सुरुवात झाली होती. या धरणे आंदोलनात जिल्ह्यातील तीन आमदार उपस्थित नव्हते. लातूर जिल्हा परिषदेचे अध्यक्ष, सभापती यावेळी उपस्थित नव्हते. महापौर अख्तर शेख, सभागृह नेते नरेंद्र अग्रवाल या दोन पदाधिकाऱ्यांशिवाय एकही नगरसेवक धरणे आंदोलनाकडे फिरकला नाही.
यावेळी माजी अध्यक्ष दत्तात्रय बनसोडे, मोटार मालक संघाचे अध्यक्ष ताजोद्दीन बाबा यांची भाषणे झाली. यावेळी वैजनाथ शिंदे, अॅड. त्र्यंबकदास झंवर, तालुका अध्यक्ष दगडू पडीले, व्यकंटेश पुरी उपस्थित होते. काँग्रेसचे जिल्हाध्यक्ष अॅड. व्यंकट बेद्रे म्हणाले, 'मोदी सरकारने हुकमशाही सुरू केली आहे. खासदारांचे निलंबन हा हुकुमशाहीचा एक नमुना आहे.'
स्मार्ट सिटीबाबत दुजाभाव
धरणे आंदोलनाच्या समाप्तीनंतर एका शिष्टमंडळाने सादर केलेल्या निवेदनात निलंबीत खासदाराच्या मुद्यासह केंद्र व राज्य सरकारचा संयुक्त प्रकल्प असलेल्या स्मार्ट सिटी योजनेमध्ये मराठवाडा विभागावर अन्याय झाला आहे. या योजनेसाठी ज्या शहराची निवड करताना सरकराने संबंधीत शहरात काँग्रेसची सत्ता आहे की भाजपची या निकषावर निर्णय घेतला असून लोकशाहीत अशा प्रकारचा दुजाभाव स्वीकारहार्य असू शकत नाही या निर्णयाचाही निषेध करण्यात आल्याचे म्हटले आहे.
मोबाइल अॅप डाउनलोड करा आणि राहा अपडेट
