मराठवाड्याला कृत्रिम पावसानेही चकवा देणे सुरू केले आहे. गेल्या चार दिवसांपासून विमान उड्डाण घेतात. मात्र, सिडिंग होणाऱ्या गावातही समाधानकारक पाऊस नाही. त्यामुळे दुष्काळाचे ढग गडद झालेत.
मंगळवारी प्रायोगिक तत्त्वावर विमानाने उड्डाण घेतले. २० फ्लेअर्स सोडण्यात आले. मात्र, ज्या गावात प्रयोग झाला, त्या ठिकाणी केवळ रिमझिम पावसाची नोंद झाली. बुधवारी शिरुर कासार, पाटोदा तालुक्यातील काही गावांमध्ये फ्लेअर्स सोडले. मात्र तेथेही कुठे ७ तर कुठे ५ मिलिमीटर पावसाची नोंद झाली. गुरुवारी विमानाने दोन वेळेस उड्डाण केले. पहिल्या टप्प्यात लातूर, बीड, उस्मानाबाद, परभणी व नगर जिल्ह्यातील राहुरीत २४ फ्लेअर्स सोडले. दुसऱ्या टप्प्यात विमानाने औरंगाबाद, सांगली व सोलापूरसाठी उड्डाण घेतले यामध्ये २० प्लेअर्सचा उपयोग केला. यात बाभळगाव, कानसूर, गुंज, रामेटाकळी, लोणी (ता. पाथरी, जिल्हा परभणी) या ठिकाणी पाऊस झाल्याची नोंद झाली. मात्र, इतर ठिकाणी यश मिळाले नाही.
इथले ढग गायब
चाटेपिंगपळगाव, रेणापूर (ता. पाथरी, जि. परभणी), पोहंडूळ, भारखाड वाघाळा, मुदगल, लिंबा, डाकू पिंप्री, रामपुरी, वझूर (ता. सोनपेठ, जि. परभणी), गांजूर, रुई, रामेश्वर, सारसा (ता. रेणापूर, जि. लातूर), मंढा, पाडोळी, बेंबळी, पलारी, मासुर्डी, सिंदळवाडी, शिंदाळा, बेलकुंड, एकंबी तांडा (ता. औसा, जि. लातूर), पोहनेर, जुनोनी पिंप्री, चिलवडी, सुर्डी (जि. उस्मानाबाद), पानकनेरगाव, वडगाव सिद्धेश्वर (ता. जि. उस्मानाबाद), मेडसिंगा, सांजा, शेकापूर, देवळाली, खंडाळा, अमसूर्डा, राघुचीवाडी (ता. जि. उस्मानाबाद) या ठिकाणी गुरुवारी क्लाउड सिडिंगचा प्रयोग झाला. मात्र, विरळ ढग व कमी आर्द्रतेमुळे प्रयोग फसला. दरम्यान, गुरुवारी सांगली व सोलापूरसाठी विमानाने उड्डाण घेतले. या ठिकाणी क्लाउड सिडिंग केली. मात्र, विभागीय आयुक्त कार्यालयाकडे या प्रयोगाची कोणतीही आकडेवारी मिळाली नाही.
रडार आज होणार सुरू
विभागीय आयुक्त कार्यालयाच्या इमारतीवर शुक्रवारी (७ ऑगस्ट) दुपारी डॉप्लर रडार बसवण्यात आले. डॉप्लरसाठी सॉफ्टवेअर आणि हार्डवेअर इन्स्टॉलेशनचे काम सुरू असून उद्या ते पूर्ण होईल आणि रडारचे काम सुरू होण्याची शक्यता आहे.
कृत्रिम पाऊस पाडण्यासाठी शुक्रवारीही विमानाने बीड, उस्मानाबाद, तुळजापूरसह लातूर भागात फेरी मारली. उस्मानाबाद, बीड, तुळजापूर येथे फ्लेअर्सचा मारा केला. बीड, आणि उस्मानाबाद येथे पाऊस पडला. तुळजापूरमध्ये चांगला पाऊस पडल्याची माहिती आहे. मात्र, उर्वरित मराठवाड्यात उपयुक्त ढग सापडत नाहीत. पश्चिम महाराष्ट्रातील भीमाशंकर, कोल्हापूर या भागातही आठ दिवसांपासून पाणी नाही. कोकणातही परिस्थिती वाईट आहे. उपयुक्त ढग मिळत नसल्याने, काय करावे असा प्रश्न आमच्या समोरही आहे.
- सुहास दिवसे, संचालक, आपत्ती व्यवस्थापन विभाग
मोबाइल अॅप डाउनलोड करा आणि राहा अपडेट
