म. टा. प्रतिनिधी, औरंगाबाद
'वेगळे राहणे नकोच. काही चुकले असेल ते दोघांचेही. आपण दोघेही समजून घेऊ', असे म्हणत ३७ जोडप्यांनी आपले विसकटलेले संसार पुन्हा सुरू करण्याचा निर्णय घेतला. बुधवारी महिला सहाय्य कक्ष आणि पोलिस आयुक्त कार्यालयाने घेतलेल्या विशेष समुपदेशन मेळाव्याचे हे फलित.
प्रत्येक पोलिस स्टेशनच्या महिला सहाय्यक कक्षात महिन्याकाठी किमान एक तरी जोडपे कौटुंबिक कलाहामुळे वेगळे राहण्यासाठी अर्ज करते. ही संख्या वाढतेच आहे. सामाजिक कार्यकर्त्यांच्या मदतीने समुपदेशन करून या जोडप्यांचा संसार टिकावा म्हणून प्रयत्न केले जातात, पण ही प्रकिया वेळखाऊ. त्यामुळे सर्व पोलिस स्टेशनची अशी प्रकरणे एकाच दिवशी सोडवण्यासाठी या मेळाव्याचे आयाेजन करण्यात आले. एकूण २८५ अर्जदारांपैकी १०० जणांशी संपर्क झाला. प्रत्यक्षात ६१ हजर जोडप्यांपैकी ३७ जोडप्यांचे संसार पुन्हा जोडण्यात पोलिसांना यश आले. ज्यांचे पटतच नाही, अशा ४ जोडप्यांना न्यायालायात दाद मागण्याचा सल्ला देण्यात आला. ज्या पीडित महिलांना पती व सासरच्या मंडळीकडून मानसिक, शारीरिक त्रास होत आहे, अशा पती-पत्नींचे समुपदेशन करून सखोल विचार करण्यासाठी १६ जोडप्यांना पुढील तारखा देण्यात आला. तर ३ प्रकरणे पुढील कार्यवाहीसाठी पोलिस स्टेशनला दिली. यातले १ प्रकरण निकाली काढले. ज्या जोडप्यांपैकी एकाच बाजूचे लोक हजर झाले, त्यांना पुढील तारखा देते समुपदेशनाकरता वेळ देण्यात आला.
पोलिस आयुक्त अमितेशकुमार, पोलिस उपायुक्त संदीप आटोळे, वसंत परदेशी, सहाय्यक पोलिस आयुक्त रमेश गायकवाड व महिला सहाय्य कक्षाच्या पोलिस निरीक्षक निर्मला परदेशी यांच्या मार्गदर्शनाखाली हा मेळावा झाला. महिला सामाजिक सुरक्षा समितीच्या सफिया लक्ष्मीनारायण, सुरैय्या बेगम, डॉ. शुभांगी गव्हाणे, ज्योती दासरी, नसीमा खालेद, स्नेहलता मानकर, विमल मापारी, मंगल खिंवसरा, सुरैय्या बेगम, नसीमा खालेद, मनोरमा शर्मा, सईदा शाहजहां, सुनिता चव्हाण, सुलभा खंदारे आदींनी
समुपदेशन केले. उपक्रमाच्या यशस्वितेसाठी पोलिस हेडकॉन्स्टेबल एस. आर. चव्हाण, विनोद आघाव, कल्पना नाईक, प्रणिता दुभळकर, फहिमुन्नीसा शेख, रुक्मिणी गाडेकर, इत्तेजा शेख, नंदा तिडके, समिंद्रा गायकवाड, उषा राठोड आदींनी परीश्रम घेतले. यशस्वी जोडप्यांचा यावेळी सत्कार करण्यात आला.
पाच महिन्यांपासून तीन वर्षापर्यंत प्रकरणे
समुपदेश मेळाव्यात आलेल्या जोडप्यांमध्ये पाच महिन्यांपासून तीन वर्षांपर्यंतची प्रकरणे होती. गेल्या तीन वर्षांपासून कुरबुरी सुरू झालेली जोडपे अनेक आहेत. बहुतेक प्रकरणांत नातेवाईकांच्या हस्तक्षेपामुळे घरात कलह निर्माण झाल्याचे निरीक्षण समुपदेशकांनी नोंदविले.
आत समुपदेशन, बाहेर हाणामारी
माझा नवऱ्याला माझ्यासाठी वेळच नसतो, तो दारू पितो, माझी बायको सारखा संशय घेते, मला काही नको, फक्त नवऱ्याचा वेळ हवा, असे संवाद यावेळी ऐकू आले. तरी वेगळ्या वाटेने आलेली जोडपी जाताना मात्र मोठ्या आनंदाने सोबत गेली. काही प्रकरणांमध्ये वाद इतक्या शिगेला पोचला होता की, समोरासमोर आल्यापासून ते जाईपर्यंत ही जोडपी एकमेकांशी भांडत होती. इतकेच नव्हे तर काही जोडप्यांच्या नातेवाईकांनी आयुक्तालयाच्या आवारातच जोरदार हाणामारी केली.
न्याय देण्याचा प्रयत्न आम्ही करतो. फलित मिळायला बराच वेळ जातो. मेळाव्यात दोन्ही बाजूच्या लोकांना एकत्र आणत शांतपणे विचार करण्याची संधी दिली. महिन्यातून एकदा असा मेळावा घेण्याचा प्रयत्न करू.
- निर्मला परदेशी, पोलिस निरीक्षक, महिला सहाय्य कक्ष
मोबाइल अॅप डाउनलोड करा आणि राहा अपडेट
