रेल्वे स्टेशन पार्किंगमधील झाड तोडल्याने पक्ष्यांचा बळी गेला. त्याच्या न‌िषेधार्थ पक्षीप्रेमींनी काळ्या फिती बांधून मोर्चा काढला.
म. टा. प्रतिनिधी, औरंगाबाद
रेल्वे प्रशासनाने मनमानी पद्धतीने झाडांवर कुऱ्हाड चालविली. त्यात असंख्य निष्पाप पक्षी बेघर झाले. त्यांच्या पिलांचा अकाली मृत्यू झाला. या प्रकारामुळे गहिरवलेल्या औरंगाबादकरांनी रेल्वे विभागाविरुद्धचा संताप मूकमोर्चाच्या माध्यमातून व्यक्त केला. यावेळी अनेकांच्या डोळ्यांत अश्रू तराळले.
रेल्वे स्टेशनच्या पार्किंग परिसरातील दोन झाडांची संपूर्ण छाटणी केली. त्यामुळे झाडांवरील असंख्य निष्पाप पक्षांचे संसार मोडले. ६० ते ७० पिलांचा मृत्यू झाला. या निर्दयी प्रकाराचा निषेध करण्याबरोबर शहरातील झाडांची कत्तल थांबविण्यासाठी विविध संस्था, संघटना आणि पर्यावरणप्रेमी नागरिक गुरुवारी रस्त्यावर उतरले. गेल्या काही वर्षांत नागरिकांनी अशा स्वरुपाचा पुढाकार प्रथमच घेतला.
सकाळी आठच्या सुमारास पर्यावरणप्रेमी स्टेशनच्या प्रवेशद्वारापाशी एकत्र आले. त्यानंतर त्यांनी तोंडावर काळ्या पट्ट्या बांधून दुचाकी पार्किंगपर्यंत मूकमोर्चा काढला. त्यांच्या हातात झाडे तोडल्याचा निषेध करणारे आणि पर्यावरण रक्षणाचा संदेश देणारे फलक होते. तोडलेल्या झाडापर्यंत मूकमोर्चा पोचला. तेथे काहींनी मेणबत्त्या लावून पक्ष्यांना श्रद्धांजली अर्पण केली. त्यानंतर श्रद्धांजली सभा घेण्यात आली. त्यावेळी काहींचे डोळे पाणावले. प्रयास ग्रुप, निसर्ग मित्र मंडळ, व्हिजन आशा ग्रुप, जैन इंजिनीअरिंग सोसायटीचा वी फॉर इन्व्हायरमेंट ग्रुप, क्षत्रीय राठोड समाज सेवाभावी संस्था, एज्युकेश रिसर्च फाउंडेशन अॅकॅडमी, पाेलिस सै‌निक प्र‌शिक्ष्ाण्ा केंद्र, सृष्टी संवर्धन सेवाभावी संस्था, मराठवाडा गुणवंत कामगार संघटना यांसह अनेक पर्यावरणप्रेमी नागरिक, तरूण, तरुणी, प्रवासी आदींनी या मोर्चात सहभाग घेतला. यावेळी निसर्ग मित्र मंडळाचे मानद वनसंरक्षक दिलीप यार्दी, आश्विनी यार्दी, निर्मल दादा, माजी नगरसेवक सुरेंद्र कुलकर्णी, प्रयासचे प्रकाश कुलकर्णी, गोविंद कुलकर्णी, प्रीतम चव्हाण, सागर शिंदे, यासह अतुल यावलकर, मनोज शहा, कमल पठाडे, प्रिती शहा, राजेश बंग, मोनिका चहाला, अक्षय शिंदे, आकाश पडळकर, शिवानी चहाला, पूजा गिरे, राजेश गव्हाणकर, निरज बडजाते, मेघना बडजाते, संजय जोहापूरकर, अॅड. ए. के. आगळे, पक्ष्ाीमित्र किशोर पाठक यांच्यासह अनेक पर्यावरणप्रेमी उपस्थिती होती.
मोबाइल अॅप डाउनलोड करा आणि राहा अपडेट
