गुणवंत विद्यार्थ्यांना मान्यवरांच्या हस्ते मदत सुपूर्द, गुणवंतांच्या पालकांना अश्रू अनावर
म. टा. प्रतिनिधी, औरंगाबाद
हलाखीच्या परिस्थितीतही परिश्रमपूर्वक गुणवंत ठरलेल्या दहावीच्या पाच विद्यार्थ्यांना मदत करणारा 'मटा हेल्पलाइन' कार्यक्रम अतिशय भावुक ठरला. मुलांच्या उज्ज्वल भवितव्यासाठी समाजातील शेकडो दात्यांनी भरभरून केलेली मदत या गुणवंतांच्या स्वाधीन करण्यात आली. या मदतीने भारावलेल्या विद्यार्थी व पालकांना अश्रू अनावर झाले.
यंदा दहावीचा निकाल लागला अन् काजल अंबिलवादे (वेणुताई चव्हाण हायस्कूल), पवन बनगर (स्वामी समर्थ विद्यालय), पूजा लुटे (जय भवानी विद्या मंदिर), गीता शिंदे (आर. पी. नाथ हायस्कूल), असरार शहा (वेणुताई चव्हाण हायस्कूल) या पाच विद्यार्थ्यांनी ९० टक्क्यांपेक्षा अधिक गुण मिळवले. एवढी टक्केवारी मिळवणारे अनेक विद्यार्थी आहेत. पण, दररोज गरिबीशी झगडत या पाच विद्यार्थ्यांनी मिळवलेले गुण चकीत करतात. कुणाचे वडील गवंडीकाम करतात, तर कुणाची आई धुणी-भांडी करते. हातावर पोट असलेल्या कुटुंबांमध्ये गुणवंतांनाही परिस्थितीशी दोन हात करावे लागले. या विद्यार्थ्यांच्या पुढील शिक्षणासाठी 'महाराष्ट्र टाइम्स'ने 'मटा हेल्पलाइन' उपक्रमाअंतर्गत आपले संवेदनशील वाचक आणि समाजातील दानशूर व्यक्तींना मदतीचे आवाहन केले अन् भरभरून मदत आली. देवगिरी अभियांत्रिकी महाविद्यालयाच्या सभागृहात सोमवारी (२४ ऑगस्ट) ही मदत (चेक वाटप) विद्यार्थ्यांना सुपूर्द करण्यात आली. या कार्यक्रमाला सिडकोचे मुख्य प्रशासक सुनील केंद्रेकर, एमआयटी हॉस्पिटलचे संचालक डॉ. आनंद निकाळजे व देवगिरी अभियांत्रिकी महाविद्यालयाचे संचालक डॉ. उल्हास शिऊरकर यांची प्रमुख उपस्थिती होती. या कार्यक्रमाचे प्रास्ताविक 'महाराष्ट्र टाइम्स'चे वरिष्ठ संपादक पराग करंदीकर यांनी केले. यावेळी गुणवंत विद्यार्थ्यांना प्रमुख पाहुण्यांच्या हस्ते चेक प्रदान करण्यात आले. वरिष्ठ सहाय्यक संपादक प्रमोद माने यांनी आभार मानले. मकरंद कुलकर्णी यांनी सूत्रसंचालन केले. या कार्यक्रमाला शहरातील मान्यवर व विद्यार्थी मोठ्या संख्येने उपस्थित होते.
अन् शब्द अबोल झाले
मुलगी गुणी असली तरी पुढे कसे शिकवावे, असा प्रश्न काजल अंबिलवादे हिच्या आई-वडीलांना पडला होता. जेमतेम चौथी शिकलेले काजलचे वडील मुलगी झाल्यामुळे नाराज होते, पण याच मुलीने घराचे नाव मोठे केले, असे सांगताना आई प्रीती अंबिलवादे यांना अश्रू अनावर झाले. 'मटा हेल्पलाइन'मुळे तिच्या शिक्षणाचा मार्ग मोकळा झाला. या ऋणातून मुक्त होण्यासाठी माझी मुलगी पुढील काळात गरजूंना मदत करील, असा ठाम विश्वास त्यांनी व्यक्त केला. या मनोगताने उपस्थित गहिवरले.
'मटा' तुमच्या सोबतीला
मागील वर्षीचा गुणवंत विद्यार्थी देवेंद्र रंधवे याचे मनोगत विद्यार्थ्यांसाठी प्रेरक ठरले. रेल्वे स्टेशन परिसरात राहणारा देवेंद्र बारावीत शिकतो. वडील मिस्त्रीकाम आणि आई धुणी-भांडी करते. या परिस्थितीत शिकणे कठीण होते, मात्र 'मटा'ने मदत केल्याने शिक्षण सुरू आहे.माझ्यासारख्या विद्यार्थ्यांनी यश मिळवल्यानंतर सामाजिक बांधिलकी जपावी अन् 'मटा' आपल्या पाठिशी असल्याची जाण ठेवावी, असे देवेंद्र म्हणताच टाळ्यांचा कडकडाट झाला.
सामाजिक ऋण
'मटा हेल्पलाइन'साठी समाजातील दानशूर व्यक्तींनी भरभरून मदत केली. या मदतीतून साडेबारा लाख रुपयांचा निधी जमा झाला. तब्बल २४२ दात्यांनी चेकद्वारे मदत केली. औरंगाबाद शहरासह सेलू, नांदेड, जिंतूर, जालना, बीड अशा अनेक गावातून मदतीचा ओघ सुरू होता.
कुटुंबाचे आणि 'महाराष्ट्र टाइम्स'चे पाठबळ आमच्या यशासाठी महत्त्वाचे आहे. शिक्षणाची जिद्द कायम असून, चांगल्या पदावर काम करायचे आहे. या वाटचालीसाठी 'मटा'ने दिलेली मदत अनमोल आहे. - पूजा लुटे, गुणवंत विद्यार्थिनी
घरची परिस्थिती बिकट असताना चांगले शिक्षण घेणे कठीण आहे. आर्थिक परिस्थिती चांगली असती तर उच्च शिक्षण सहज घेता येते, मात्र परिस्थितीत शक्य नसते. माझ्यासारख्याला'मटा'ने मोलाची मदत केली याचा अभिमान आहे. - पवन बनगर,गुणवंत विद्यार्थी
समाजात भरपूर हुशार विद्यार्थी आहेत, पण घरची परिस्थिती चांगली नसल्याने विद्यार्थ्यांना अडचणी येतात. माझ्याप्रमाणे इतर मुलांनाही समाजाने मदत केल्यास कुणाचाही शिक्षणाचा हक्क हिरावला जाणार नाही. - काजल अंबिलवादे, गुणवंत विद्यार्थिनी
'मटा हेल्पलाइन'च्या मदतीमुळे आता मला चांगले शिक्षण घेता येईल. माझ्या यशात शिक्षक, आई-वडील यांचा वाटा आहे. आता 'महाराष्ट्र टाइम्स'ने मदतीचा हात दिल्याने अधिक उत्साह आला आहे. - असरार शहा, गुणवंत विद्यार्थी
सध्या अकरावी सायन्सला प्रवेश घेतला आहे. अभियांत्रिकी किंवा वैद्यकीय क्षेत्रात चांगले शिक्षण घेण्याची इच्छा आहे. 'महाराष्ट्र टाइम्स'ने केलेल्या या मदतीमुळे अभ्यास करण्यासाठी अधिक बळ मिळाले. - गीता शिंदे, गुणवंत विद्यार्थिनी
गुणवंतांच्या जिद्दीला शाबासकी
बिकट परिस्थितीवर मात करून यशाचे नाणे खणखणीत वाजविलेल्या गुणवंत विद्यार्थ्यांना मान्यवरांचे अनुभवी बोल प्रेरणादायी ठरले. ध्येय गाठताना अडचणी टाळून वाटचाल करण्याचा विचार विद्यार्थ्यांना प्रेरित करून गेला.
'मटा हेल्पलाइन' हा उपक्रम वेगळा व महत्त्वाचा आहे. दहावीनंतर पुढील शिक्षणासाठी अनेक विद्यार्थ्यांना मदत आवश्यक असते. खडतर परिस्थितीत गुणवंत ठरलेल्या विद्यार्थ्यांची निवड करून 'मटा'ने आर्थिक मदतीचा हात दिला. ही निव्वळ आर्थिक मदत आहे, असे मी मानत नाही. आर्थिक मदतीसोबतच हा भक्कम आधार आहे. या वाटचालीत आपल्या पाठिशी कुणीतरी असल्याची जाणीव आहे. त्यामुळे इथपर्यंत पोहचलेल्या विद्यार्थ्यांनी मनात कोणताही न्यूनगंड न बाळगता उमेदीने वाटचाल करावी. काळे-गोरे, उच्च-नीच असा भेद यश मिळवण्यापासून तुम्हाला रोखू शकत नाही. आपले ध्येय साध्य करण्यासाठी विविधांगी वाचन आवश्यक आहे. भरपूर वाचन केल्यास तुमची मते बनवायला शिकता. अन्यथा, आपल्यावर कुणी मते लादत आहे याची जाणीव अस्वस्थ करील. महागड्या वस्तूंचा सोस टाळून बचत करायला शिका. नेहमी स्वतःशी स्पर्धा करा. स्पर्धेत अपयशी ठरल्यास कारणांचा शोध घ्या. पुढील यश तुमचेच असेल. आपल्या यश-अपयशाबद्दल इतरांना कधीच दोषी धरू नका. कारण आपल्या कष्टावरच यश अवलंबून असते. - डॉ. आनंद निकाळजे, संचालक, एमआयटी हॉस्पिटल.
एखाद्याला परिपूर्ण मदत करणेही आवाक्याबाहेर असते. कारण आर्थिक मदत केली तरी पूर्ण मदतीची अपेक्षा असतेच. बीडला जिल्हाधिकारी असताना याचा मला पुरेपूर अनुभव आला. दुष्काळ असल्यामुळे घरी काही पिकले नाही, असे विद्यार्थी सांगत. कॉलेजांना फोन करून शक्य तेवढी मदत केली. काही कॉलेजने विनाशुल्क शिक्षण दिले, मात्र आपण मोजक्याच विद्यार्थ्यांना मदत करतो. बेताच्या आर्थिक परिस्थितीमुळे शिक्षणाची परवड झालेली शेकडो मुले आहेत. त्यांच्या भवितव्यासाठी कॉर्पोरेट, प्रसारमाध्यमे आणि महाविद्यालयांनी एकत्र येण्याची गरज आहे. दरमहा दोन हजार रुपये मदत शक्य झाली तरी खूप आहे. खानावळीचे पैसे आणि थोडा इतर खर्च दिल्यास अडचण दूर होईल. 'मटा हेल्पलाइन' माध्यमातून वेगळा प्रयत्न सुरू असल्याचा आनंद आहे. व्यक्तिमत्त्व विकासासाठी कौशल्ये प्राप्त करून प्रत्येक विद्यार्थ्याने यश मिळवावे एवढीच अपेक्षा आहे.
- सुनील केंद्रेकर, मुख्य प्रशासक, सिडको.
सभोवताली प्रतिकूल परिस्थितीचे चटके अन् अनंत अडचणी. या अडचणींवर मात करीत गरीब विद्यार्थ्यांनी यश मिळवले याचा अतिशय आनंद वाटतो. कुणाच्या घरात लाइट नव्हती. पाणी नव्हते. लहानसे घर, आजुबाजुला गोंगाट अशा समस्यांकडे दुर्लक्ष करून अभ्यासावर लक्ष केंद्रीत केले. परीक्षेतील मार्क्स हा प्रश्न नसतो तर, आपण कुठे पोहचलो हे महत्त्वाचे आहे. चांगले काम केल्यास समाज कौतुक करण्यासाठी पुढे येईल. सुरक्षित असूनही आपण किती अभ्यास करतो याची जाणीव इतर विद्यार्थ्यांनी ठेवावी. कारण पाचपर्यंत कॉलेज व थोडा अभ्यास एवढ्याच चाकोरीत विद्यार्थी अडकले आहेत. व्यक्तिमत्त्व विकासासाठी भरपूर वाचन करा. देशभरातील घडामोडी ज्ञात असल्यास अभ्यासाला मदतच होते. या विद्यार्थ्यांच्या मदतीसाठी देवगिरी अभियांत्रिकी कॉलेज तयार आहे. विद्यार्थ्यांनी फक्त ध्येयाकडे वाटचाल करावी या शुभेच्छा.
- डॉ. उल्हास शिऊरकर, संचालक, देवगिरी अभियांत्रिकी महाविद्यालय.
थोडक्यात
गुणवंतांचे अनुभव ऐकण्यासाठी विद्यार्थ्यांची गर्दी
मुलांचे कौतुक पाहताना पालकांना भावना अनावर
उच्च शिक्षणासाठी मान्यवरांचे मोलाचे मार्गदर्शन
मटा हेल्पलाइन उपक्रमाला भरभरून शुभेच्छा
मराठवाड्यातील शेकडो दात्यांनी केली मदत
मी दोन वर्षांपासून हा उपक्रम पाहतो आहे. अशा उपक्रमामुळे समाजातील अनेकांना बळ मिळाले आहे. अशा उपक्रमातून 'मटा'ने सामाजिक भान जपले आहे. अशा उपक्रमांना सर्वसामान्यांचाही पाठिंबा उर्त्स्फूतपणे मिळतो आहे. यात दरवर्षी निश्चित भर पडेल.
- जीवन साहू
सुरुवातीपासून मी या उपक्रमाकडे पाहते आहे. आर्थिक परिस्थितीमुळे शिक्षण घेऊ न शकणाऱ्या विद्यार्थ्यांना मदत करण्यासाठी हे पाऊल महत्त्वाचे आहे. याचे कौतुक करावे तेवढे कमी आहे. विद्यार्थ्यांना प्रोत्साहन देणारा हा उपक्रम अतिशय चांगला आहे. - प्रिती नारखेडे
गरीब कुटुंबातील हुशार मुलांना इच्छा असूनही शिक्षण घेणे शक्य होत नाही. हा उपक्रम त्यांना आधार देणारा आहे. शहरातील नागरिकही उपक्रमाला भरभरून मदत करतात. त्यांचे हे मोठेपणही महत्त्वाचे आहे. या उपक्रमाची व्यापीत निश्चितच वाढेल अन् अनेक विद्यार्थी चांगले शिक्षण घेऊ शकतील. - ए. डी. मनवर
महाराष्ट्र टाइम्सचा हा उपक्रम अतिशय चांगला आहे. समाजातील अनेकजणांना परिस्थितीमुळे शिक्षण घेणे अशक्य होते. मदतीचा हात देऊन त्यांना उभे करण्यासाठीचा हा प्रयत्न आहे. निश्चितच हे विद्यार्थी भविष्यात याचा उपयोग करत आपला ठसा उमटवतील. - तेजपाल कानसा
प्रत्येकाची कहाणी ऐकली की अंगावर शहारे उभे राहतात. त्यांना मदत करण्यासाठीचा 'मटा'चा हा उपक्रम प्रेरणा देणारा आहे. यामुळे अशा अनेकांना प्रोत्साहन मिळेल. या विद्यार्थ्यांना त्याचा फायदा तर झालाच. ते स्वतःच्या पायावर उभे राहिल्यानंतर इतरांनाही मदत करतील. - कुनिका पटेल
कठीण परिस्थितीवर मात करत यशाचे शिखर गाठणाऱ्या या विद्यार्थ्यांचा अभिमान वाटतो. मोठ्या कष्टात ते विद्यार्थी शिक्षण घेत आहेत. त्यांना 'महाराष्ट्र टाइम्स'ने वाचकांच्या माध्यमातून केलेली ही मदत वाखणण्याजोगी आहे. - भाग्यश्री जाधव
मोबाइल अॅप डाउनलोड करा आणि राहा अपडेट
