म. टा. प्रतिनिधी, औरंगाबाद
कन्नड तालुक्यात रस्त्यावर झाडे आडवी टाकून लुटमार करणाऱ्या टोळीतील दोन दरोडेखोरांना स्थानिक गुन्हे शाखा पोलिसांनी मध्य प्रदेशातून अटक केली. दरोडेखोरांच्या या टोळीने धुळ्यासह, मालेगावातील कुसुंबा घाटातही काही दरोडे टाकले होते. खेमसिंग रतीलाल आर्य (वय २२, रा. भेजदड, जि. बडवणी) आणि शांत्या सुंदऱ्या बारेला (वय ३८, रा. जोडमोडा) अशी या दरोडेखोरांची नावे आहेत.
कन्नड तालुक्यातील प्रेमनारायण राधेशाम जैस्वाल (रा. हस्ता) हे १८ ऑगस्ट रोजी रात्री साडे दहाच्या सुमारास कुटुंबीयांसह गौताळ्याच्या जंगल परिसरातून वाहनाने पिशोरकडे जात होते. जैस्वाल कुटुंबीयांना दहा दरोडेखोरांनी अडविले. त्यांच्याजवळील सोन्या-चांदीचे दागिने आणि रोकड हिसकावून त्यांना मारहाण करत पळ काढला होता. जैस्वाल यांच्यासह दरोडेखोरांनी अन्य चार वाहनेही अडवून लुटमार केली होती. या आरोपींच्या शोधार्थ कोम्ब‌िंग ऑपरेशन राबविण्यात आले होते, परंतु आरोपी हाती लागले नाही. याप्रकरणी जैस्वाल यांच्या तक्रारीवरुन कन्नड पोलिस ठाण्यात गुन्हा दाखल करण्यात आला होता. याच दरोडेखोरांनी १३ ऑगस्ट रोजी मालेगाव येथील कुसुंबा घाटात अशाच पद्धतीने दरोडा टाकला होता, अशी माहिती मिळाल्यानंतर ग्रामीण पोलिस अधीक्षक नवीनचंद्र रेड्डी, अप्पर पोलिस अधीक्षक जी. श्रीधर, उपविभागीय पोलिस अधिकारी प्रीतमकुमार यावलकर यांच्या मार्गदर्शनाखाली स्थानिक गुन्हे शाखेचे वरिष्ठ पोलिस निरीक्षक डॉ. कांचनकुमार चाटे, सहायक पोलिस निरीक्षक महेश आंधळे व पथकाने आरोपीचा शोध सुरू केला. हे आरोपी मध्य प्रदेशातील सेंधवा येथील असल्याची माहिती खबऱ्याकडून पोलिसांना मिळाली. त्याआधारे पोलिसांच्या पथकाने सेंधवा येथे दरोडेखोरांचा शोध घेतला. जंगल परिसरात दोन दिवस ते आरोपींच्या मागावर होते. जोडमोडा येथे शांत्या बारेला याला ताब्यात घेतले. त्यानंतर खेमसिंह आर्य यालाही ताब्यात घेतले गेले.
मुद्देमाल हस्तगत
गुन्ह्यासाठी वापरलेल्या मारुती व्हॅनसह, आठ मोबाइल, १६ हजार ५२५ रुपये रोख, विळा, चाकू, बॅटऱ्या, असा १ लाख २६ हजारांचा मुद्देमाल जप्त करण्यात आला आहे. या आरोपींवर मध्यप्रदेशातही अनेक गुन्हे दाखल असून त्यांच्या अन्य साथीदारांचा शोध पोलिस घेत आहेत.
यांनी बजावली कामगिरी
मध्य प्रदेशातील जंगल परिसरात दोन दिवस राहून डॉ. चाटे, आंधळे यांच्या पथकातील पोलिस कर्मचारी ज्ञानेश्वर पायघन, दीपक सरोदे, संजय खंडागळे, प्रकाश मोहिते, जितेंद्र बोरसे, रोहिदास तांदळे, सुनील शिराळे, शेख कासम, सुनील ढेरे, विठ्ठल चव्हाण, संजय घुगे, रवी लोखंडे, विक्रम देशमुख, नितीन उणे, गणेश माळी, गुलाब पाटील, सुभाष ठोके आणि सागर पाटील यांनी या दरोडेखोरांच्या मुसक्या बांधल्या.
मोबाइल अॅप डाउनलोड करा आणि राहा अपडेट
