उस्मानाबादचे जिल्हाधिकारी डॉ. प्रशांत नारनवरे यांच्या शिस्त व पारदर्शक कारभारामुळे जिल्ह्यातील इच्छूक असलेल्या चारा छावणी चालक त्रस्त झाले आहेत. त्यामुळे दुष्काळात चारा छावण्या उघडून जनावरांच्या सेवेच्या नावाखाली बिले लाटणाऱ्या राजकीय पशुसेवकांमध्ये अस्वस्थेतेचे वातावरण आहे.
चारा छावणीच्या कारभारात यंदा भ्रष्टाचाराला व गैरकारभाराला वाव नाही. याची खात्री इच्छूक चारा छावणी चालकासह राजकीय नेतेमंडळी व साखर सम्राटांना झाल्यामुळेच यंदा चारा छावण्या सुरू करण्यायाबाबत निरुत्साहाचे वातावरण आहे. यापूर्वीच्या दुष्काळात राजकीय नेते मंडळींच्या शिफारशींवरून अनेक कार्यकर्त्यांना छावण्या मिळाल्या. छावणीसाठी कागदपत्रे गोळा करणारे छावणी मालक अल्पावधीतच मालामाल झाले. जनावरांना उपाशी, अर्धपोटी ठेवणारा, शेतकऱ्यांना आत्महत्या करायला लावणारा दुष्काळ अशा छावणी चालकांच्या पथ्थ्यावर असल्याचे यापूर्वी अनुभवयास मिळाले आहे.
यापूर्वीच्या दुष्काळी स्थितीत अनेक छावणी चालकांनी कागदोपत्री जनावरांचा आकडा फुगवून प्रशासनाच्या मर्जीत राहून दुष्काळाच्या संधीचे सोने केले आहे. चारा छावणीसाठीची ही मोहिम सर्वांसाठी खुले असल्याने कोणत्याही राजकीय पक्षांनी छावण्यांबाबत तक्रारी केल्या नाहीत. चारा छावणी उघडण्यासाठीच्या अटीमुळे अनेकांनी या चारा छावण्या सुरू करण्याकडे कानडोळा केला आहे. चारा छावणी संदर्भातील नियमावली सकृतदर्शनी जाचक वाटत असली तरी ती व्यावहारिकदृष्ट्या योग्य आहे. शासन नियमानुसार अदा रक्कम मिळण्यास आठ-दहा दिवसांचा कालावधी अपेक्षित आहे. तोपर्यंतचा छावणीतील खर्च चालकांने करणे गरजेचे आहे.
चारा छावणीतील जनावरांसाठी शासनाकडून मिळणारे अर्थसहाय्य तोकडे आहे, असा आरोप केला जात आहे. छावणीतील शेण व मूत्राव्दारे मिळणारे उत्पन्न मोठे आहे. अनेक छावणीला दानशूर व्यक्ती चारा देणगी स्वरूपात देतात. पाण्यासाठी टँकर पुरवितात. मात्र, या बाबी छावणीचालक हिशेबात दर्शवित नाहीत.
- डॉ. प्रशांत नारनवरे, जिल्हाधिकारी, उस्मानाबाद
दुष्काळामुळे शेतकऱ्याजवळील चारा संपुष्टात आला आसून, आता चारा छावण्यावर शेतकऱ्यांची व पशुपालकांची मदार आहे. जिल्ह्यातील धनदांड्यामंडळिबरोबरच साखर सम्राट व सामाजिक संस्थांनी छावण्या उघडण्याबाबत निरुत्साह दर्शविला आहे.
- महेश पाठक, पालक सचिव, उस्मानबाद
उस्मानाबाद जिल्ह्यात प्रशासनाच्यावतीने अॅझोला आणि हायड्रोफोनिक्स तंत्राव्दारे चारा निर्मितीस चालना देण्यात येत आहे.
- शंकर तोटावार, जिल्हा कृषी अधिकारी, उस्मानाबाद
मोबाइल अॅप डाउनलोड करा आणि राहा अपडेट