सुंदरवाडी येथील सामूहिक बलात्कार प्रकरणात सोमवारी (३१ ऑगस्ट) सायंकाळी पकडण्यात आलेला चौथा आरोपी शेख अश्फाक शेख हुसेन हा पत्नीसह जिल्ह्याबाहेर पळून जाण्याच्या तयारीत होता, पण पोलिसांना कुणकुण लागल्याने त्याचा प्लॅन फसला. दरम्यान, न्यायालयीन कोठडीत असलेल्या शेख तय्यब शेख शेख नईम याची मंगळवारी ओळख परेड झाली असून, या टोळीने यासारखे आणखी काही गुन्हे केले असावेत, असा कयास बांधला जात आहे.
सुंदरवाडी शिवारात मित्रासोबत फेरफटका मारण्यासाठी गेलेल्या तरुणीवर गुरुवारी (२७ ऑगस्ट) सामूहिक बलात्कार झाला. पोलिसांनी या प्रकरणी आतापर्यंत शेख तय्यब शेख शेख नईम (रा. सुंदरवाडी), तालिबअली सय्यद अली शाह (रा. हीनानगर), शेख जमील शेख हुसेन बागवान आणि शेख अश्फाक यास अटक केली. त्याला कोर्टाने चार सप्टेंबरपर्यंत पोलिस कोठडी सुनावली, अशी माहिती चिकलठाणा पोलिस स्टेशनच्या सहायक पोलिस निरीक्षक प्रिया थोरात यांनी दिली.
त्याला प्रथम वर्ग न्यायादंडाधिकारी मनिषा कुलकर्णी यांच्या समोर हजर करण्यात आले. आरोपीच्या ताब्यातून चाकू जप्त करावयाचा आहे, गुन्हा करण्यासाठी कोणते वाहन वापरले याचा तपास करुन ते जप्त करावयाचे असल्यामूळे सात दिवसाची पोलिस कोठडी देण्यात यावी अशी विनंती करण्यात आली. कोर्टाने ही विनंती ग्राह्य धरुन शेख अश्फाकला शुक्रवारपर्यंत पोलिस कोठडीत ठेवण्याचे आदेश दिले. आतापर्यंत स्थानिक गुन्हे शाखेच्या पथकाने शेख तयब शेख नईम, तालेब अली सय्यद शहा आणि शेख जमील शेख हुसेन आणि शेख अश्पाक या चौघांना अटक केली आहे.
'तयार राहा', पत्नीला निरोप
अत्याचाराच्या घटनेपासूनच शेख अशफाक (वय २२, हीनानगर) हा पसार होता. ओळख दडवण्यासाठी त्याने दाढी काढली आणि कटिंग केली होती. टोळीचा हा म्होरक्या पत्नीसह पळून जाण्याच्या तयारीत होता. त्याची पत्नी गेल्या काही दिवसांपासून माहेरी राहत होती. खुलताबाद परिसरात डोंगरात दडून बसलेल्या शेख अशफाकने सार्वजनिक टेलिफोन बूथवरून पत्नीशी तीन ते चार वेळा संपर्क साधला. 'तयार राहा' असा निरोप त्याने पत्नीला दिला होता. परंतु पोलिसांनी आधीच त्याच्यावर झडप घातली.
मोबाइल अॅप डाउनलोड करा आणि राहा अपडेट