म. टा. प्रतिनिधी, औरंगाबाद
शिक्षणमंत्री विनोद तावडे यांनी केलेली बेताल वक्तव्ये, शिक्षण विभागाने गेल्या काही दिवसांत घेतलेले जाचक निर्णय, शिक्षकांच्या वर्षानुवर्षे प्रलंबित मागण्यांकडे होत असलेले दुर्लक्ष याचा निषेध करत शिक्षक संघटनांनी शिक्षकदिनाचे (५ सप्टेंबर) औचित्य साधत आंदोलने केली. धरणे आंदोलन, काळ्या फिती लावणे तसेच मुंडण आंदोलन करण्यात आले.
शिक्षण विभागाने घेतलेले जाचक निर्णय, शिक्षणमंत्र्यांनी शिक्षकांसंदर्भात केलेल्या वक्तव्याचा निषेध करत शनिवारी विविध शिक्षक संघटनांनी काळा दिन पाळला. विभागीय आयुक्त कार्यालयासमोर काळ्या फिती लावून धरणे आंदोलन केले. शिक्षकांना कामचुकार संबोधून जेलमध्ये टाकण्याची भाषा करणे, संस्थाचालकांना 'दरोडेखोर' म्हणणे, असे शब्द आजवर राज्यातील कोणत्याच शिक्षणमंत्र्यांनी वापरलेले नव्हते. शिक्षणासारख्या संवेदनशील क्षेत्रात अशा प्रकारची भाषा वापरणाऱ्या शिक्षणमंत्री विनोद तावडे यांनी शिक्षकांची माफी मागावी. रोज जाचक निर्णय घेवून शिक्षण क्षेत्राला नाहक त्रास देणाऱ्या शिक्षणमंत्र्यांनी राजीनामा द्यावा, या मागणीसाठी शनिवारी दुपारी एक वाजता विभागीय आयुक्त कार्यालयावर निदर्शने करण्यात आली. शिक्षकेतर कर्मचारी महामंडळाचे अध्यक्ष वाल्मिक सुरासे, काँग्रेस शिक्षक आघाडीचे प्रदेशाध्यक्ष मनोज पाटील, संस्थाचालक संघटनेचे एस. पी. जवळकर, उर्दू शिक्षक संघटनेचे मिर्जा सलिम बेग, मुख्याध्यापक संघटनेचे शिवाजी चव्हाण, मोहन चव्हाण, मंगला हुमे, आनंद खरात यांच्यासह विना अनुदान कृती समितीचे सदस्य मोठ्या संख्येने उपस्थित होते.
शिक्षक भारतीचे धरणे आंदोलन
शिक्षणमंत्री विनोद तावडे यांच्या वक्तव्याचा निषेध करण्यासाठी शिक्षक भारती संघटनेने जिल्हाधिकारी कार्यालयासमोर धरणे आंदोलन केले. कमी पटसंख्येच्या शाळा बंद करू नयेत, शिक्षकांचे वेतन दरमहा एक तारखेला विनाविलंब करण्यात यावे, शिक्षकांना मुख्यालयी राहण्याच्या अटीतून वगळण्यात यावे, सावित्री - फातेमा कॅशलेस आरोग्य योजना सुरू करण्यात यावी, विनाअनुदानित शाळांना १०० टक्के अनुदान सुरू करून शिक्षकांची उपासमार बंद करावी, वस्तीशाळा शिक्षकांची सेवा मूळ नियुक्तीपासून ग्राह्य धरून सर्व लाभ देण्यात यावेत आदीं मागण्यासाठी शिक्षक भारतीतर्फे धरणे आंदोलन करण्यात आले. यावेळी जिल्हाध्यक्ष प्रकाश दाणे, शेख मुश्ताक, संतोष ताठे, रामदास कवठेकर, दत्तात्रय गायकवाड, महेंद्र बारवाल, इरफान पठाण, राजेश भुसारी यांच्यासह शिक्षक मोठ्या संख्येने उपस्थित होते.
मोबाइल अॅप डाउनलोड करा आणि राहा अपडेट