विटावा ता. गंगापूर येथे अवैध दारू विक्री करणाऱ्या महिलेच्या घरावर छापा टाकून ५२ हजाराचा देशी दारूचा साठा जप्त करण्यात आला. बुधवारी राज्य उत्पादन शुल्क विभागाच्या पथकाने ही कारवाई केली. या संदर्भात गंगापूर येथे गुन्हा दाखल करण्यात आला आहे.
रांजणगाव शेणपुंजी येथे अवैध दारूची विक्री होत असल्याची माहिती उत्पादन शुल्क विभागाच्या पथकाला मिळाली होती. या ठिकाणी पथकाने चौकशी केली असता विटावा येथील पिंगळाबाई किसन चव्हाण ही महिला अवैधरित्या देशी दारूचा साठा बाळगून पुरवठा करीत असल्याची माहिती मिळाली. या माहितीवरून पिंगळाबाईच्या घरी छापा टाकण्यात आला. यावेळी तिच्या घरात पोत्यामध्ये देशी दारूच्या १ हजार १५२ बाटल्या आढळून आल्या. एकूण ५२ हजार ४१६ रूपये किमतीचा हा साठा आहे.
स्थानिक गुन्हे शाखेच्या वतीने गेल्या दोन महिन्यांपासून जिल्ह्यातील अवैध दारु विक्री विरुद्ध जोरदार मोहीम सुरू आहे. या मोहिमेअंतर्गत हातभट्टीचे अड्डे अजिंठा येथे उद्ध्वस्त करण्यात आले. मात्र, गंगापूर तालुक्यात होत असलेल्या अवैध दारू विक्रीकडे पोलिसांचा कानाडोळा झाल्याचे दिसून आले. बुधवारी करण्यात आलेली कारवाई अधिक्षक सी. बी. राजपूत यांच्या मार्गदर्शनाखाली यु. एन. राठोड, पी. एस. वानखेडे, सुशील चव्हाण, एम.एच. बहुरे, बी.आर. पुरी, शेख अश्फाक, अश्विनी बोंदर आदींनी केली.
स्थानिक पोलिसांचे दुर्लक्ष
पिंगलाबाई चव्हाण ही सर्रासपणे अवैध दारूची विक्री करीत होती. गेल्या काही महिन्यांपासून हा प्रकार सुरू होता. मात्र स्थानिक पोलिस व स्थानिक गुन्हेशाखेचे या प्रकाराकडे दुर्लक्ष होत असल्याची माहिती सूत्रांनी दिली.
मोबाइल अॅप डाउनलोड करा आणि राहा अपडेट