जैन धर्मियांच्या पर्युषण महापर्वास गुरुवारपासून मोठ्या उत्साहात सुरुवात झाली. शहरातील विविध मंदिरांमध्ये या निमित्त विविध धार्मिक आणि सांस्कृतिक कार्यक्रम होत आहेत. शंखेश्वर पार्श्वनाथ जैन जीनालय एन. ३ सिडको, गोडीजी पार्श्वनाथ श्वेतांबर जैन मंदिर जोहरीवाडा, विमलनाथ मंदिर, जाधववाडी येथे मुख्य कार्यक्रमांचे आयोजन करण्यात आले आहे.
सिडको एन. ३ मधील गुरू गौतम श्वेतांबर वर्धमान जैन सेवा संघातर्फे शंखेश्वर पार्श्वनाथ जैन जीनालयात पर्युषण महापर्वाच्या कार्यक्रमांना सुरुवात झाली. ते १९ सप्टेंबरपर्यंत चालतील. पर्वादरम्यान दररोज सकाळी ५ वाजता प्रतिक्रमण, ६.३० वाजता भगवंतांचा अभिषेक, ८ वाजता आरती, सायंकाळी ६ वाजता प्रतिक्रमण, ७.३० वाजता उज्जैन येथील जैन संगीतकार नागेश जैन यांचा भक्तिगीतांचा कार्यक्रम सादर होईल. १२ सप्टेंबरला हैदराबाद येथील बालकलाकार सय्यम नाबेडा भक्तिगीत सादर करतील. १४ सप्टेंबरला भगवान महावीर जन्मवाचननिमित्त मंदिरात भगवंतांचा पाळणा व त्रिशलामातेला पडलेल्या चौदा स्वप्नांचा देखावा भाविकांच्या दर्शनासाठी ठेवण्यात येईल. १६ सप्टेंबरला रात्री कुमारपाल महाराजाद्वारा महाआरतीचे आयोजन करण्यात आले आहे. १९ सप्टेंबर ला सागर लॉन येथे सकाळी ९.३० ते २ दरम्यान सामूहिक क्षमायाचनाचा कार्यक्रम होईल.
जोहरीवाडा येथे आनंदजी कल्याणजी जैन श्वेतांबर मंदिर ट्रस्टतर्फे पर्युषण पर्वानिमित्त दररोज सकाळी ६ वाजता भगवंतांचे मुखदर्शन, पंचामृत अभिषेक, सकाळी ९ ते ११ वाजेदरम्यान प्रवचन, दुपारी २ ते ३ वाजेदरम्यान पूजा, सायंकाळी प्रतिक्रमण व रात्री ८ वाजेपासून भक्तिभावना (भजन) चे आयोजन करण्यात आले आहे. ११ व १२ रोजी सकाळी ९ ते ११ दरम्यान अष्टान्हिका प्रवचन, १२ रोजी कल्पसुत्रजी ग्रंथांचे पूज्यश्रीस शास्त्र प्रदान करण्याचा सन्मान व बोलिया, १३ रोजी कल्पसुत्रजी ग्रंथांचे वाचन व प्रवचन, १४ रोजी भगवान महावीरांचा जन्म सोहळा, १५ रोजी पाठशाळेतील विद्यार्थ्यांना भेटवस्तू वाटप, १६ रोजी बारसाजी सूत्र पूज्यश्री यांना प्रदान करण्याची बोली, १७ रोजी बारसाजी सूत्र वाचन होईल. दुपारी ३ वाजता सवंत्सरी प्रतिक्रमण, रात्री ८ वाजता कुमारपाल महाराजांची आरती व १८ रोजी भक्तिसंगीताचा कार्यक्रम होईल.
माता-पिता शिबिर
जाधवमंडी येथे जैन श्वेतांबर मूर्तीपूजक संघाच्या वतीने विमलनाथ जैन मंदिरात विविध धार्मिक कार्यक्रम घेण्यात येणार आहेत. साध्वीजी संस्कारनिधीजी म.सा. यांच्या मार्गदर्शनाखाली पर्युषण पर्व साजरे करण्यात येईल. १० सप्टेंबरला पर्वाच्या पहिल्या दिवशी सकाळी ५ व सायंकाळी ७ वाजता प्रतिक्रमण, सकाळी ९ ते १०.३० वाजेदरम्यान प्रवचन झाले. याशिवाय २१ ते २७ सप्टेंबरदरम्यान 'आत्मशृंगार सप्ताह'चे आयोजन करण्यात आले आहे. २७ रोजी 'माता-पिता शिबिरा'चे आयोजन करण्यात आले आहे.
मोबाइल अॅप डाउनलोड करा आणि राहा अपडेट