‘जेलभरो’साठी मागितली शिवसेनेची मदत

September 13, 2015, 1:53 pm

≫ Next: पित्याचा खून करून आत्महत्येचा बनाव

≪ Previous: लोण्याचा गोळा सर्वांना द्या

$

0

0

म. टा. प्रतिनिधी, उस्मानाबाद

दुष्काळ जाहीर करण्यासाठी मराठवाड्यात राष्ट्रवादी काँग्रेसकडून १४ संप्टेबर रोजी होत असलेल्या जेलभरो आंदोलनाला उस्मानाबादेत राष्ट्रवादी काँग्रेसने चक्क शिवसेनेसह अन्य पक्षाकडे मदत मागितली आहे.

राष्ट्रवादी काँग्रेसच्या पक्षीय आंदोलनाला उस्मानाबादमध्ये मात्र, सर्वपक्षीय आंदोलनाचे रूप देण्याचा प्रकार आमदार राणाजगजीतसिंह पाटील यांच्याकडून केला जात आहे.राष्ट्रवादी काँग्रेसचे उस्मानाबादमधील नेतृत्व कमकुवत असल्याचे उघड होऊ नये म्हणून त्यांच्याकडून खटाटोप केला जात आहे. आमदार पाटील यांनी या संदर्भात प्रसिद्धी पत्रक काढून शिवसेनेसह अन्य पक्षांनी जेलभरो

आंदोलनामध्ये सहभागी होण्याचे आवाहन केले आहे. राष्ट्रवादी काँग्रेसचे सर्वेसर्वा शरद पवार यांच्या आदेशानुसार या मोर्चाचे नेतृत्व जितेंद्र आव्हाड यांच्याकडे सोपविण्यात आले होते. मात्र, डॉ. पद्मसिंह पाटील यांच्यासाठी पक्षाने ऐनवेळी बदल केला आहे. त्यामुळेच आता जितेंद्र आव्हाडला उस्मानाबादचे नेतृत्व करण्यापासून रोखले आहे. तरी आमदार पाटील मात्र, जेलभरोसाठी शिवसेना व अन्य पक्षाचे दार ठोठावत आहेत. दरम्यान, आमदार पाटील यांच्या मागणीला शिवसेनेसह अन्य पक्षांनी धुडकावून लावत स्वबळावरच आंदोलन छेडण्याचा सल्ला त्यांनी दिला.

राष्ट्रवादी काँग्रेसच्या जेलभरो आंदोलनाशी शिवसेनाचा काडी मात्र संबध नाही. खरेतर आता राष्ट्रवादी काँग्रेसने आता आंदोलनाची सवय लावून घ्यावी.

- सुधीर पाटील, जिल्हाप्रमुख, शिवसेना, उस्मानाबाद

मोबाइल अॅप डाउनलोड करा आणि राहा अपडेट

---

पित्याचा खून करून आत्महत्येचा बनाव

September 13, 2015, 1:54 pm

≫ Next: पाटेगावचा पूल धोकादायक

≪ Previous: ‘जेलभरो’साठी मागितली शिवसेनेची मदत

$

0

0

म. टा. प्रतिनिधी, जालना

मुलानेच बापाचा दगडाने ठेचून खून केला आणि नापिकी व कर्जबाजारीपणाला कंटाळून आत्महत्या केली असा बनाव केल्याचा प्रकार उघडकीस आला. ही घटना पाथरवाला (ता. अंबड) येथे शु‌क्रवारी घडली होती. आरोपी मुलाला पोलिसांनी अटक केली.

दादाभाऊ पाचुंदे (वय ५५) असे या मयत शेतकऱ्याचे नाव आहे. कर्जबाजारीपणाला कंटाळून पोळ्याच्या पूर्वसंध्येला गळफास घेऊन आत्महत्या केल्याचा बनाव मुलांनी केला होता. कुटुंबियांच्या तक्रारीवरून पोलिसांनी सुरवातीला अकस्मात मृत्यृची नोंद केली होती. परंतु, मयताच्या डाव्या कानावर व बाजूला जखमा झाल्याने रक्तस्राव झाला. त्यासोबतच गळ्याला व्रण दिसल्याने ११ संप्टेबरच्या मध्यरात्री कोणीतरी जखमी करून गळा आवळून खून केल्याचा बनाव केल्याचे शवविच्छेदन अहवालावरुन स्पष्ट झाले.

पोलिसांनी तपासाची चक्रे फिरवित पाचूंदे यांचा मूलगा बाळू पाचूंदे याची चौकशी केली. वडिल दारू पिऊन सर्व घरच्या मंडळीला त्रास देत असल्याने हे कृत्य केल्याचे सांगितल्याने पोलिसांनी त्याला अटक केली. न्यायालयाने त्याला पोलिस कोठडीत ठेवण्याचे आदेश दिले. याप्रकरणाचा तपास पोलिस उपनिरीक्षक विशाल मोहीते हे करीत आहेत.

वरिष्ठ अधिकारी घटनास्थळी दाखल

घटनेची माहिती मिळाल्यानंतर जालना जिल्ह्याचे प्रभारी पोलिस अधिक्षक अमोल तांबे व अंबड उपविभागीय पोलिस अधिकारी तेजस्वीनी सातपुते यांनी घटनास्थळी रविवारी भेट दिली.

मोबाइल अॅप डाउनलोड करा आणि राहा अपडेट

पाटेगावचा पूल धोकादायक

September 13, 2015, 1:55 pm

≫ Next: वैजापूर तालुक्यात जोरदार पाऊस

≪ Previous: पित्याचा खून करून आत्महत्येचा बनाव

$

0

0

म. टा. प्रतिनिधी, पैठण

मराठवाडा व पश्चिम महाराष्ट्राला जोडणारा पैठण जवळील निजामकालीन पाटेगाव पुलाचा पाया वाळू खोदकामामुळे उघडा पडला आहे. त्यामुळे जड वाहन गेल्यानंतर पुलाला हादरे बसत आहेत. हा पूल वाहतुकीसाठी अत्यंत धोकादायक झाला आहे.

पाटेगाव जवळील निझामकालीन पुलाच्या पायाजवळून मागच्या अनेक वर्षांपासून वाळू उत्खनन करण्यात येत आहे. सुरुवातीला पुलाच्या पायापासून काही फूट दूर वाळू खोदली जात होती. गेल्या काही महिन्यांपासून वाळू चोरांनी पुलाच्या पायाजवळच खोदकाम करून उपसा सुरू केला आहे. त्यामुळे पुलाचा पाया पूर्ण उघडा पडला आहे. पैठणहून पश्चिम महाराष्ट्राकडे जाण्याच्या प्रमुख मार्गावर हा पूल आहे. या पुलावरून सतत लहान-मोठ्या वाहनांची वर्दळ असते.

पुलाचा पाया उघडा पडल्याने कमकुवत झालेल पूल हादरत असल्याचे गावकरी सांगतात. पुलाला धोका निर्माण होऊनही व पाया उघडा पडल्यानंतरही वाळूचे उत्खनन सुरूच आहे. गोदावरी नदीला २००६ मध्ये मोठा महापूर आला होता. या महापुरामुळे पाटेगाव पुलाचे मोठे नुकसान झाले. त्यावेळी पुलाची काही प्रमाणात डागडुजी करण्यात आली होती, मात्र २००६ पासून प्रशासनाने डागडुजी केलेली नाही.

नवीन पूल बांधणार

नवीन पूल बांधण्याची प्रक्रिया सुरू आहे. येत्या एक ते दोन महिन्यांत या पुलाचे काम सुरू होणार आहे, अशी माहिती पैठण येथील सार्वजनिक बांधकाम विभागाचे सहायक अभियंता भिवाजी जायभाये यांनी सांगितले.

मोबाइल अॅप डाउनलोड करा आणि राहा अपडेट

वैजापूर तालुक्यात जोरदार पाऊस

September 13, 2015, 1:57 pm

≫ Next: दगडाने ठेचून तरुणाचा खून

≪ Previous: पाटेगावचा पूल धोकादायक

$

0

0

म. टा. प्रतिनिधी, वैजापूर

शहर व ग्रामीण भागात रविवारी (१३ सप्टेंबर) दुपारी पावसाने जवळपास दोन तास हजेरी लावली. गेल्या दोन महिन्यात दुसऱ्या वेळी मध्यम स्वरुपाचा पाऊस पडल्याने तग धरून राहिलेल्या खरीप पिकांना जीवदान मिळणार आहे. त्यामुळे शेतकऱ्यांना दिलासा मिळाला आहे. रविवारी दुपारी तीन वाजेच्या सुमारास आकाशात ढग दाटून आले व पावसाला सुरुवात झाली. संध्याकाळी पाच वाजेपर्यंत पावसाची रिपरिप सुरू राहिल्याने शहराच्या सखल भागात पाणी साचले होते. ग्रामीण भागात बहुतेक ठिकाणी पावसाने हजेरी लावल्याची माहिती मिळाली आहे. तालुक्यातील नांदगाव येथे एका ट्रक्टरच्या ट्रॉलीवर मोठे झाड पडल्याची घटना घडली. पानव खंडाळा येथील सेतु सुविधा केंद्र व ग्रामपंचायत कार्यालयाचे पत्रे उडून गेले व तेथील संगणक व कागदपत्रांचे नुकसान झाले. सरपंच, तलाठी व ग्रामसेवक यांनी पाहणी केली. या पावसामुळे शहरातील नाशिक निर्मल या चौपदरीकरण झालेल्या रस्त्यावरील खड्ड्यात पाणी साचल्याने वाहनचाकांसोबत पादचाऱ्यांची गैरसोय झाली.

मोबाइल अॅप डाउनलोड करा आणि राहा अपडेट

दगडाने ठेचून तरुणाचा खून

September 13, 2015, 1:58 pm

≫ Next: प्रश्नपत्रिकेतही गैरव्यवहार

≪ Previous: वैजापूर तालुक्यात जोरदार पाऊस

$

0

0

म. टा. प्रतिनिधी वाळूज

पोळ्यानिमित्त बैलपूजेनंतर मित्रासोबत बाहेर गेलेल्या एका तरुणाचा डोक्यात दगड घालून खून करण्यात आला. ही घटना रविवारी (१३ सप्टेंबर) सकाळी पाच वाजता पंढरपूर येथे उघडकीस आली. एमआयडीसी वाळूज पोलिस ठाण्याच्या हद्दीत खूनाची ही दहा दिवसांतील दुसरी घटना आहे. दीपक अशोक बनकर (वय २५, रा. सलामपुरेनगर पंढरपूर) असे या तरुणाचे नाव आहे.

दीपक बनकर हा वीटभट्टी कामगार असून शनिवारी पोळा असल्याने त्याने भैरवनाथ वाघ या मित्राचे बैल पूजेसाठी घरी घेवून आला होता. पूजा झाल्यानंतर ते बैल मालकाच्या घरी नेऊन दिले. त्यानंतर दोन मित्रांसोबत बाहेर गेला. पण तो रात्रभर घरी परतला नाही. दरम्यान रविवारी पहाटे पाच वाजता औरंगाबाद महामार्गावरील एका कुशन दुकानाशेजारी दगडाने ठेचलेला मृतदेह सापडला. ही माहिती मिळाल्यानंतर पोलिस तत्काळ घटनास्थळी पोहोचले. त्यावेळेस बघ्यांची मोठी गर्दी जमली होती. गर्दीतील एकाने हा मृतदेह दीपक बनकर याचा असल्याचे ओळखले. नातेवाईकांनी दीपक रात्री मित्रांसोबत गेला, तो परत आला नाही याची माहिती पोलिसांना दिली. पोलिसांनी गुन्हा नोंदवून तपास सुरू केला आहे. संशयीत आरोपीच्या शोधासाठी पोलिसांनी अमरावतीला पथक रवाना केले आहे. घटनास्थळी रक्ताने माखलेले दोन दगड आढळले.

दरम्यान, वाळूज एमआयडीसी पोलिस ठाण्याच्या हद्दीत हा दहा दिवसातील दुसरा खून उघडकीस आला आहे. यापूर्वी रांजणगाव शेणपुंजी येथे दारू पिण्याच्या कारणावरून खून झाल्याचे उघड झाले होते. हा प्रकारही त्याच कारणावरून झाला असावा, असा संशय पोलिसांनी व्यक्त केला आहे. घटनेची माहिती मिळल्यानंतर पोलिस उपायुक्त वसंत परदेशी, पोलिस निरीक्षक रामेश्वर थोरात, गुन्हे शाखेचे पोलिस निरीक्षक अविनाश आघाव, पोलिस उपनिरीक्षक प्रवीण पाटील, उपनिरीक्षक महेश टाक, ठसे तज्ज्ञ आर. सी. वसमतकर यांनी घटनास्थळी भेट दिली.

मोबाइल अॅप डाउनलोड करा आणि राहा अपडेट

प्रश्नपत्रिकेतही गैरव्यवहार

September 13, 2015, 1:59 pm

≫ Next: तरुणीच्या बनावामुळे दमछाक

≪ Previous: दगडाने ठेचून तरुणाचा खून

$

0

0

म. टा. प्रतिनिधी, औरंगाबाद

प्रशासनाकडून रविवारी (१३ सप्टेबर) घेण्यात आलेल्या तलाठी संवर्गाच्या परीक्षेमध्ये १०० गुणांच्या प्रश्नपत्रिकेसाठी 'ओएमआर शीट'मध्ये (उत्तरपत्रिका) केवळ ८० प्रश्नांची उत्तरे लिहिण्याचे पर्याय देण्यात आले होते. त्यामुळे शहरात असलेल्या १५ परीक्षा केंद्रांवर गोंधळ उडाला. पेपर संपण्याच्या काही मिनिटे आगोदर प्रशासनाकडून १००ऐवजी ८० प्रश्न सोडविण्याची सूचना आली, मात्र २० प्रश्न सोडविता आले नसल्याने ही परीक्षा रद्द करण्याची मागणी उमेदवारांनी केली आहे.

शहरातील १५ केंद्रांवर सकाळी ११ ते १ यादरम्यान तलाठी भरतीसाठी परीक्षा झाली. या परीक्षेसाठी ५ हजार ३२ उमेदवारांनी अर्ज केला होता. यापैकी ३ हजार ४८३ उमेदवार परीक्षेसाठी उपस्थिती होती. परीक्षेत १०० प्रश्न विचारण्यात आले होते. प्रत्येक प्रश्नासाठी २ गुण होते. ओएमआर शीटमध्ये योग्य उत्तराचा पर्याय नोंदवायचा आहे. ओएमआर शीटमध्ये १००ऐवजी केवळ ८० प्रश्नांची उत्तरे लिहिण्याची सोय होती. यासंदर्भात परीक्षार्थिंनी केंद्रांवरील अधिकाऱ्यांनाही माहिती दिली, मात्र याबाबत आम्हाला काहीच माहिती नाही. सूचना आल्यावर सांगू, असे महाविद्यालय प्रशासनाने सांगितले. या गोंधळात परीक्षार्थींचा वेळही वाया गेला. ही बाब प्रशासनाला कळविण्यात आली. त्यानंतर परीक्षा संपण्यापूर्वी शेवटच्या काही मिनिटांमध्ये परीक्षा समिती; जिल्हा प्रशासनाकडून ८० प्रश्न सोडविण्याचा तोडगा काढण्यात आला व हा निर्णय प्रत्येक केंद्रांवर पोचवण्यात आला. तोपर्यंत विद्यार्थ्यांचा संपूर्ण पेपर सोडवून झाला होता. परीक्षा केंद्राबाहेर आल्यानंतर उमेदवारांनी नाराजी व्यक्त केली व परीक्षा रद्द करावी, अन्यथा ४० गुण देण्याची मागणी केली.

१५ मिनिटांचा अधिकचा वेळ

ओएमआर शीटमध्ये झालेल्या गोंधळामुळे विद्यार्थ्यांना पेपर सोडवण्यासाठी १५ मिनिटांचा अधिकचा वेळ देण्यात आला, मात्र तोपर्यंत विद्यार्थ्यांचा पेपर सोडवून झाला होता. प्रश्न कमी केले मात्र वेळ का वाढविला, असा प्रश्नही विद्यार्थ्यांनी केंद्रातील अधिकाऱ्यांना केला.

यासंदर्भात परीक्षा समितीची तत्काळ बैठक घेण्यात आली व प्रश्नपत्रिकेत देण्यात आलेल्या पहिल्या ८० प्रश्न सोडवून त्यास संपूर्ण गुण देण्याचा निर्णय घेण्यात आला. पेपर सोडवण्यासाठी १५ मिनिटांचा जादा वेळही देण्यात आला. यासंदर्भात तयार करण्यात आलेल्या सूचनेवर सहमत असल्याबाबत विद्यार्थ्यांकडून स्वाक्षऱ्याही घेण्यात आल्या आहेत.

- डॉ. निधी पांडेय, जिल्हाधिकारी

मोबाइल अॅप डाउनलोड करा आणि राहा अपडेट

तरुणीच्या बनावामुळे दमछाक

September 13, 2015, 2:02 pm

≫ Next: सत्तेत राहायचे की विरोधात?

≪ Previous: प्रश्नपत्रिकेतही गैरव्यवहार

$

0

0

म.टा.प्रतिनिधी, औरंगाबाद

'तू मेरी नही तो किसी और की नहीं,' असे म्हणत तीन तरुणांनी आपल्या हातावर ब्लेडने वार केल्याची माहिती तिने पोलिसांना दिली. अवघ्या काही मिनिटांत पोलिस यंत्रणा कामाला लागली. तिच्या वागण्यावरून पोलिसांना ही घटना संशयास्पद वाटली. पोलिसांनी क्लृप्ती लढवल्यानंतर या तरुणीने आपणच हा प्रकार केल्याची कबुली दिली. रविवारी सकाळी दहा ते तीन वाजेपर्यंत पोलिसांची मात्र दमछाक झाली.

जवाहर कॉलनी परिसरातील एक २० वर्षांची तरुणी एका कॉलेजमध्ये वाणिज्य शाखेच्या द्वितीय वर्षात शिक्षण घेते. औरंगपुरा परिसरात या तरुणीची ट्यूशन आहे. रविवारी सकाळी ती रडतच क्लासमध्ये आली. तिचा डाव हातावर ब्लेडने वार केल्याच्या सात रक्तातळलेल्या खुणा होत्या. तापडिया नाट्य मंदिराशेजारील गल्लीमध्ये दुचाकीवर आलेल्या तिघांनी तिची दुचाकी अडवून हातावर ब्लेडने वार केल्याची माहिती तिने दिली. तिघांनी तोंडाला रुमाल बांधलेले होते व एकाने 'तू मेरी नहीं तो किसी और की नहीं हो सक‌ती' अशी धमकी देत निघून गेल्याचे सां​गितले. तिच्या पालकांना हा प्रकार कळवण्यात आला. पालकांनी ही माहिती पोलिसांना कळवली. अवघ्या काही मिनिटांत दामिनी पथक, पोलिस निरीक्षक अविनाश आघाव, राजकुमार डोंगरे, अेपीआय अशोक आव्हाड, सुनिता मिसाळ व मोठा फौजफाटा घटनास्थळी दाखल झाला. या मुलीला घाटी हॉस्पिटलमध्ये नेत उपचार करण्यात आले. पोलिस ठाण्यात आणण्यात आल्यानंतर अज्ञात तरुणांविरूद्ध खुनाचा प्रयत्न केल्याप्रकरणी गुन्हा दाखल करण्याची प्रक्रिया सुरू झाली. पोलिस उपायुक्त वसंत परदेशी, एसीपी खुशालचंद बाहेती पोलिस ठाण्यात ठाण मांडून बसले. ती देत असलेल्या माहितीवरून पोलिसांना हे प्रकरण संशयास्पद वाटले. दरम्यान, एका तरुणासोबत तिची मैत्री असल्याची माहिती नातेवाईकांकडून पोलिसांना मिळाली. या तरुणाला बोलवण्यात आले. त्याच्यावर कारवाईची धमकी देण्यात आली. आपले पितळ उघडे पडल्याचे तरुणीच्या लक्षात आले. यानंतर तिने आपण स्वतः हे कृत्य केल्याची कबुली दिली. प्रेमप्रकरणातून घरीच तिने हा प्रकार केल्याचे सां​गितले. घरी जाऊन पोलिसांनी ती ब्लेड जप्त केली. पोलिसांनी तिचा तसा जवाब नोंदवून घेतल्यानंतर या प्रकरणावर पडदा पडला. मात्र या प्रकरणात पोलिसांना बरीच धावपळ करावी लागली.

मोबाइल अॅप डाउनलोड करा आणि राहा अपडेट

सत्तेत राहायचे की विरोधात?

September 13, 2015, 2:03 pm

≫ Next: छावणीचा नगरसेवक लाचेच्या सापळ्यात

≪ Previous: तरुणीच्या बनावामुळे दमछाक

$

0

0

म. टा. प्रतिनिधी, औरंगाबाद

सत्तेत असूनही शिवसेनेला मागणी करावी लागत आहे. खरे तर त्यांनी निर्णय घेऊन सरकारकडून कामे करून घेतली पाहिजेत, पण ते विरोधी पक्षाच्या भूमिकेत आहेत. त्यांना सत्तेत राहायचे आहे का विरोधी पक्षात, असा सवाल काँग्रेस प्रदेशाध्यक्ष अशोक चव्हाण यांनी पत्रकारांशी बोलताना उपस्थित केला.

चव्हाण म्हणाले,'राज्यात गंभीर दुष्काळी परिस्थिती आहे. त्याचे राजकारण न करता प्रत्येक पक्षाने लोकांची मदत केली पाहिजे. हा प्रश्न सर्वप्रथम काँग्रेसने उपस्थित केला. वाढणाऱ्या आत्महत्या, नापिकी याबाबत सरकारने ठोस भूमिका घेतली पाहिजे. कर्जमाफी निश्चितपणे फायद्याची आहे. आता परतीचा पाऊस सुरू झाला आहे. तो किती पडेल हे सांगता येत नाही. खरीप तर गेले. शेतकऱ्यांचे नुकसान भरून दिले पाहिजे. २००० शेतकऱ्यांनी आत्महत्या केल्या आहेत. त्यांचे कर्ज अजून सुरूच आहे. ही कर्जमाफी झाली पाहिजे.'

'दुष्काळावर उपाययोजना करण्यासाठी विशेष अधिवेशन बोलाविले पाहिजे, अशी मागणी आम्ही राज्यपालांकडे केली आहे. सरकारने सर्वपक्षीय बैठक बोलावून सूचना मागवाव्यात, तिथे आम्ही निश्चितपणे मदत करू. विरोधी पक्षांना विश्वासात घेतले पाहिजे. पंतप्रधान नरेंद्र मोदी यांनी बिहारला मोठे पॅकेज दिले. तसे महाराष्ट्रालाही द्यायला हवे. राज्यसरकारने केंद्राकडे मागणी केली पाहिजे कारण दोन्हीकडे त्यांचेच सरकार आहे. दुष्काळ निवारणासाठी मंत्र्यांनी एकेका जिल्ह्यात जाऊन बसले पाहिजे. त्यानंतरच अंमलबजावणी प्रभावीपणे होऊ शकेल. काँग्रेसकडून शक्य ती मदत पुरविली जात आहे. दुष्काळावर राजकारण करू नये. समन्यायी पाणीवाटप आणि रखडलेले सिंचन प्रकल्प याबाबत आम्ही वेळोवेळी भूमिका स्पष्ट केली आहे,' असे चव्हाण म्हणाले.

पक्षांतर्गत बदल लवकरच

काँग्रेसमध्ये लवकरच संघटनात्मक बदल केले जातील. काही जिल्ह्यात; तसेच प्रदेश कार्यकारिणीतील निष्क्रिय मंडळींना हटवून सक्रिय कार्यकर्त्यांना संधी दिली जाणार आहे. ही प्रक्रिया लवकरच सुरू होईल, असे सूतोवाच चव्हाण यांनी केले.

मोबाइल अॅप डाउनलोड करा आणि राहा अपडेट

---

छावणीचा नगरसेवक लाचेच्या सापळ्यात

September 13, 2015, 2:06 pm

≫ Next: शहरात होतेय कोकेनची तस्करी

≪ Previous: सत्तेत राहायचे की विरोधात?

$

0

0

म. टा. प्रतिनिधी, औरंगाबाद

छावणी परिषदेतील नगरसेवक आणि छावणी गणेश महासंघाचे अध्यक्ष संजय गारोल यांच्यावर एक लाख रुपयांची लाच मागितल्याप्रकरणी गुन्हा दाखल करण्यात आला आहे. त्यांच्या मेहुण्याला एक लाखाची लाच घेताना अटक करण्यात आली असून, गारोल पसार झाले आहेत. रविवारी दुपारी दीड वाजता छावणी परिसरात ही कारवाई करण्यात आली. टोलनाक्याच्या कंत्राटावर आक्षेप न घेण्यासाठी या लाचेची मागणी करण्यात आली होती.

छावणी टोलनाक्याचे कंत्राट पुणे येथील विकी ललवाणी यांना देण्यात आले आहे. येत्या ३० सप्टेंबर रोजी हे कंत्राट संपुष्टात येणार होते. पुढील वर्षाचे कंत्राट मिळवण्यासाठी छावणी परिषदेमध्ये ललवाणी प्रयत्नशील होते. दरम्यान, या कंत्राटावर आक्षेप न घेता मंजूर करण्यासाठी नगरसेवक गारोल यांनी एका लाखाच्या लाचेची मागणी केली होती. ललवाणी यांनी लाच लुचपत प्रतिबंधक विभाग गाठून तक्रार केली होती. शनिवारी या तक्रारीची पडताळणी करण्यात आली असता गारोल यांनी लाच मागितल्याचे निष्पन्न झाले. रविवारी दुपारी एक लाखाची रक्कम घेऊन त्यांना छावणीमध्ये बोलावण्यात आले होते. ललवाणी यांनी फोन केल्यानंतर गारोल यांनी आपण बाहेर असून ती रक्कम आपला मेहुणा अजय नागभुषण नायडू (वय ४५, रा. छावणी) याच्याकडे देण्यास सांगितली. नायडू यांचे कोमल कलेक्शन नावाने कपड्याचे दुकान आहे. ललवाणी यांनी लाचेची रक्कम नायडू याच्याकडे दिल्यानंतर पोलिसांनी नायडूला अटक केली. पोलिसांनी गारोल यांचा शोध घेण्याचा प्रयत्न केला, मात्र ते पसार झाले. त्यांच्या घराला देखील टाळे लावल्याचे पोलिसांना आढळून आले.

मोबाइल अॅप डाउनलोड करा आणि राहा अपडेट

शहरात होतेय कोकेनची तस्करी

September 13, 2015, 2:01 pm

≫ Next: संघ, भाजपकडून राज्यघटनेवर प्रहार

≪ Previous: छावणीचा नगरसेवक लाचेच्या सापळ्यात

$

0

0

म. टा. प्रतिनिधी, औरंगाबाद

शहरात कोकेन या अंमली पदार्थाची तस्करी करणाऱ्या तिघांना स्थानिक गुन्हे शाखेने शनिवारी रात्री शेंद्रा परिसरात अटक केली. आरोपीमध्ये उच्चशिक्षित तरुणांचा समावेश आहे. त्यांच्या ताब्यातून ८० हजार रुपये किमतीचे २५० ग्रॅम कोकेन जप्त करण्यात आले आहे. इव्हेंट मॅनेजमेंटच्या नावाखाली कोकेनची शहरात तस्करी होत असून, शहरातील बड्या प्रस्थांना याचा

पुरवठा होत असल्याची माहिती समोर आली आहे.

शहरात जालना ते औरंगाबाददरम्यान कोकेनची कारमध्ये तस्करी करण्यात येणार असल्याची माहिती पोलिस निरीक्षक कांचनकुमार चाटे यांना मिळाली होती. या माहितीवरून पोलिसांनी शेंद्रा परिसरातील हॉटेल बलबीरसमोर सापळा रचला होता. यावेळी संशयित कार (क्रमांक एमएच १२ ईजी ४७७९) पोलिसांनी अडविली. पोलिसांनी कारची तपासणी केली असता आतमध्ये कोकेन सदृष्य पदार्थ आढळून आला.

पोलिसांनी संशयित आरोपी गौरव उर्फ गोपाल हरिष शर्मा (वय ३१), किशोर हरिष शर्मा (वय २८ दोघे रा. प्लॉट क्रमांक ८६, एन १, सिडको); तसेच सुमीत राजूलाल जैस्वाल (वय १९ रा. राजाबाजार) यांना अटक केली. त्यांच्या ताब्यातून रोख ६५ हजार, मोबाइल हँडसेट देखील जप्त करण्यात आले. पोलिसांनी केलेल्या प्राथमिक तपासणीमध्ये हा पदार्थ कोकेन असल्याचे निष्पन्न झाले आहे. अधिक तपासणीसाठी याचे नमुने फॉरेंसिक लॅबमध्ये पाठविण्यात येणार आहेत. ही कारवाई पोलिस अधिक्षक नवीनचंद्र रेड्डी यांच्या मार्गदर्शनाखाली पोलिस निरीक्षक कांचनकुमार चाटे, अेपीआय महेश आंधळे, राजश्री आडे, पीएसआय पी. डी. भारती, जमादार प्रकाश मोहिते, विश्वास पडूळ, विक्रम देशमुख, कृष्णा ढाकरे, सुनील शिराळे, भूषण देसाई, योगीता थोरात यांनी केली.

महिन्यातून चार वेळा तस्करी

हे आरोपी इव्हेंट मॅनेजमेंटच्या नावाखाली ही तस्करी करीत होते. महिन्यातून चार वेळा कोकेनचा माल शहरात पुण्यावरून आणला जात होता. प्युअर कोकेन आणून त्याचा या ठिकाणी डोस तयार व्हायचा. हा एक डोस सहा हजार रुपयात देण्यात येत होता. पोलिसांनी जप्त केलेल्या २५० ग्रॅममध्ये एकूण २३ डोस तयार करण्यात येणार होते.

ग्राहक बडे प्रस्थ

आरोपी गौरव उर्फ गोपालवर येरवडा पोलिस ठाण्यातही गेल्यावर्षी अंमली पदार्थची तस्करी केल्याप्रकरणी गुन्हा दाखल करण्यात आला. शहरातील महाविद्यालयीनत तसेच प्रतिष्ठित घरातील मुलांना विक्री करण्यात येत होती. या दृष्टीने तपास सुरू असल्याची माहिती पोलिस निरीक्षक कांचनकुमार चाटे यांनी दिली.

उच्चशिक्षित आरोपी

या आरोपीमध्ये गौरव व किशोर हे दोघे सख्खे भाऊ आहेत. गौरव याने एमबीएचे शिक्षण घेतले असून गोवा येथे काही दिवस नोकरीला होता. तसेच सुमीत जैस्वाल यांच्या वडिलांचा विडी तयार करण्याचा उद्योग असल्याची माहिती पोलिसांनी दिली.

मोबाइल अॅप डाउनलोड करा आणि राहा अपडेट

संघ, भाजपकडून राज्यघटनेवर प्रहार

September 13, 2015, 2:05 pm

≫ Next: औरंगाबादेतील तिघे मक्का येथे बेपत्ता

≪ Previous: शहरात होतेय कोकेनची तस्करी

$

0

0

म. टा. प्रतिनिधी, औरंगाबाद

देशामध्ये भारतीय जनता पक्ष आणि राष्ट्रीय स्वयंसेवक संघ हे डॉ. बाबासाहेब आंबेडकर यांनी तयार केलेल्या राज्यघटनेची मोडतोड करून वर्णव्यवस्था निर्माण करण्याचा प्रयत्न करत आहे. राज्यघटनेची तोडण्याचा प्रयत्न केल्यास सडेतोड उत्तर दिले जाईल, असा घणाघात रविवारी लोकसभेतील काँग्रेसनेते मल्लीकार्जून खरगे यांनी येथे केला.

महाराष्ट्र प्रदेश काँग्रेस समितीने आयोजित केलेल्या भारतरत्न डॉ बाबासाहेब आंबेडकर शतकोत्तर रौप्य महोतस्वी जयंती वर्ष समारंभाच्या उद्घाटन समांरंभात ते बोलत होते. संपूर्ण देशभरात आयोजित करण्यात येणाऱ्या या कार्यक्रमाची राज्यातील सुरुवात औरंगाबादेत झाली. या कार्यक्रमाला मराठवाडा सांस्कृतिक मंडळाच्या मैदानावर मोठी गर्दी होती.

डॉ. बाबासाहेब आंबेडकर यांनी तयार केलेल्या राज्यघटनेची मोडतोड करून ती संघाच्या हवाली करायचे आहे, मात्र आम्ही ते होऊ देणार नाहीत. देशात 'आरएसएस का साथ, बिजेपीका विकास' असे चित्र निर्माण झाले असल्याचेही त्यांनी यावेळी सांगितले.

सध्या विविध राज्यांत आरक्षणाचा आगडोंब उठला आहे. गुजरात, राजस्थान हे त्याचे उदाहरण आहे. येत्या काळामध्ये संपूर्ण आरक्षणच संपविण्याचा प्रयत्न भाजपकडून होऊ शकतो. अशी वेळ आल्यास कोणत्याही त्याग करण्यासाठी मागेपुढे पाहू नका, असे आवाहन खरगे यांनी केले.

पंतप्रधान नरेंद्र मोदी हे नेहमीच मी चहावाला असल्याचे सांगतात, मात्र केवळ राज्यघटनेमुळेत पंतप्रधानपद मिळाल्याचे त्यांनी विसरू नये. मी विरोधी पक्षनेताही याच राज्यघटनेमुळे झाल्याचे खरगे यांनी सांगितले. प्रदेशाध्यक्ष अशोक चव्हाण कार्यक्रमाच्या अध्यक्षस्थानी होते. यावेळी राज्याचे प्रभारी मोहन प्रकाश, के. राजू, अब्दुल सत्तार, राधाकृष्ण विखे पाटील, चंद्रकांत हांडोरे, शरद रणपिसे यांची उपस्थिती होती.

मोबाइल अॅप डाउनलोड करा आणि राहा अपडेट

औरंगाबादेतील तिघे मक्का येथे बेपत्ता

September 13, 2015, 2:05 pm

≫ Next: सलीम अली सरोवर अचानक उघडले

≪ Previous: संघ, भाजपकडून राज्यघटनेवर प्रहार

$

0

0

म. टा. प्रतिनिधी, औरंगाबाद

मक्का येथे क्रेन पडल्याची दुर्घटना घडल्यानंतर औरंगाबादचे तीन यात्रेकरू बेपत्ता असल्याची माहिती समोर आली आहे. या दुर्घटनेत सुमारे १०० जणांचा मृत्यू झाला होता.
दुर्घटना घडली त्यादिवशी औरंगाबादहून ८ सप्टेंबर रोजी गेलेल्या यात्रेकरूंचा जत्था तेथे होता. त्यापैकी तीन यात्रेकरू बेपत्ता असल्याची माहिती आहे. सोबतचे यात्रेकरू आणि अन्य संस्थांकडून त्यांचा शोध घेण्यात येत आहे, मात्र आतापर्यंत त्यांची माहिती मिळालेली नाही. पैठण येथील शेख जाफर, शिरूर कासार (जि. बीड) मधील शेख अल्लाउद्दिन, उदगीर येथील शेख हैदर शेख शरफोद्दिन हे बेपत्ता असल्याची माहिती हुज्जाज कमिटीचे अध्यक्ष अब्दुल करीम पटेल यांनी दिली.

मोबाइल अॅप डाउनलोड करा आणि राहा अपडेट

सलीम अली सरोवर अचानक उघडले

September 13, 2015, 2:04 pm

≫ Next: राष्ट्रवादी काँग्रेसचे जेलभरो आंदोलन

≪ Previous: औरंगाबादेतील तिघे मक्का येथे बेपत्ता

$

0

0

खंडपीठाचे आदेश मोडल्याचा दावा

म. टा. प्रतिनिधी, औरंगाबाद

सलीम अली सरोवर हे पक्ष्यांच्या विहारासाठी राखीव आहे. त्यामुळे या परिसरात बांधकामास मनाई आहे; तसेच नागरिकांसाठी हे खुले करू नये, असे खंडपीठाचे निर्देश असतानाही हे सरोवर रविवारी नागरिकांसाठी खुले करण्यात आले. सध्या पक्ष्यांचा प्रजननाचा काळ आहे. त्यामुळे हे सरोवर बंद ठेवण्यात यावे, अशी मागणी सृष्टी संवर्धन संस्थेचे अध्यक्ष किशोर पाठक यांनी केली.

सलीम अली सरोवरात जवळपास १२० प्रकारचे देशी-विदेशी पक्षांचा विहार असतो. नागरिकांसाठी शहरात अनेक उद्याने आहेत. पक्ष्यांसाठी हे एकमेव सरोवर असल्याने हे नागरिकांसाठी खुले करण्यात येऊ नये, या मागणीसाठी सृष्टी संवर्धन संस्था व सलीम अली संघर्ष समितीने खंडपीठात धाव घेतली होती. त्यानंतर हे सरोवर बंद ठेवण्यात आले होते, परंतु रविवारी हे सरोवर अचानक खुले करण्यात आले. हा न्यायालयाच्या आदेशाचा अवमान असून, महापालिकेचा खोडसाळपणा यातून दिसून येतो, असे किशोर पाठक यांनी सांगितले. काही दिवसांपूर्वीच जैववित्त समितीची विलास बर्डेकर यांच्या अध्यक्षतेखाली बैठक झाली. या बैठकीत आयुक्त प्रकाश महाजन, उपवनसंरक्षक गिरेपुजे, राजेंद्र धोंडगे, सिकंदर अली व किशोर पाठक हे उपस्थित होते. या बैठकीत सलीम अली सरोवराच्या संवर्धनावर व्यापक चर्चा झाली. या बैठकीनंतर सलीम अली सरोवर नागरिकांसाठी खुले केल्याबद्दल पाठक यांनी खंत व्यक्त केली.

मोबाइल अॅप डाउनलोड करा आणि राहा अपडेट

राष्ट्रवादी काँग्रेसचे जेलभरो आंदोलन

September 14, 2015, 12:08 pm

≫ Next: खुलताबादच्या सीईओंना हायकोर्टाचे वॉरंट

≪ Previous: सलीम अली सरोवर अचानक उघडले

$

0

0

म. टा. प्रतिनिधी, औरंगाबाद

मराठवाड्यात तत्काळ दुष्काळ जाहीर करण्यात यावा आणि दुष्काळग्रस्त शेतकऱ्यांना कर्जमाफी देण्यात यावी यांसह अनेक मागण्यांकरिता राष्ट्रवादी काँग्रेसतर्फे करमाड येथे जेलभरो आंदोलन करण्यात आले.

विधानसभेचे माजी अध्यक्ष दिलीप वळसे पाटील व आमदार सतीश चव्हाण यांच्या नेतृत्त्वाखाली करमाड येथे दीड तास रास्ता रोको करण्यात आला. या आंदोलनात शेतकरी मोठ्या संख्येने सहभागी झाले होते. अनेक शेतकरी बैलगाडीसह व शेळ्यांसह सहभागी झाल्याने पोलिसांची तारांबळ उडाली होती.

राज्य सरकार तसेच केंद्र सरकारच्या विरोधात हे जेलभरो आंदोलन असल्याचे सांगत दिलीप वळसे पाटील म्हणाले, 'पावसाअभावी मराठवाडा दुष्काळाच्या खाईत गेला आहे. उपजीविकेचे साधन राहिलेले नाही. पिण्याचे पाणी, जनावरांना चारा, शेतीला पाणी हे अत्यंत गंभीर प्रश्न निर्माण झाले होते. राज्य सरकारने तत्काळ दुष्काळ जाहीर करून शेतकऱ्यांना दिलासा द्यावा. त्यासोबतच कर्जमाफी जाहीर करावी. विद्यार्थ्यांना शैक्षणिक शुल्क माफी, वीज बिल माफी देऊन शेतकऱ्यांच्या उभारी द्यावी. धरणेही रिकामी झालेली आहेत. आठ-दहा महिन्यांचा काळ कसा काढायचा हा प्रश्न आहे.'

परतीचा पाऊस झाला नाही तर हाहाःकार उडणार आहे. शिवसेनेचे मंडळी 'शो' करून जातात. शेतकरी उद्धवस्त होण्याच्या मार्गावर आहे. त्याला जगवण्याची गरज आहे. या परिस्थितीतही राज्याचे मुख्यमंत्री उद्योगपतींसाठी जपानचा दौरा करतात. एलबीटी, टोलमाफी होते. परंतु, शेतकऱ्यांकरिता तिजोरीत पैसे नसल्याचे सांगण्यात येते. ही दुर्देवी गोष्ट आहे, अशी खंत त्यांनी यावेळी व्यक्त केली. यावेळी आमदार सतीश चव्हाण, सुधाकर सोनवणे, किशोर पाटील यांनीही सरकारवर टीका केली. जेलभरो आंदोलनाची दखल घेतली नाही तर आगामी काळात अधिक उग्र आंदोलन छेडण्यात येईल असा इशारा आमदार सतीश चव्हाण यांनी दिला.

कार्यालयासमोर आंदोलन

भाजपचे प्रदेशाध्यक्ष रावसाहेब दानवे यांच्या गारखेडा परिसरातील संपर्क कार्यालयासमोर विनोद पाटील, अभिजीत देशमुख यांच्या नेतृत्वाखाली कार्यकर्त्यांनी आंदोलन केले.

कार्यकर्त्यांना अटक

काशीनाथ कोकाटे, मनमोहनसिंग ओबेरॉय, बाळासाहेब पवार, माणिक शिंदे, अवधूत शिंदे यांच्या नेतृत्त्वाखाली रास्ता रोको करण्यात आला. सर्व आंदोलनकर्त्यांना नंतर पोलिसांनी अटक केली.

पोलिसांचा रुग्णांना मदतीचा हात

करमाड येथे रास्ता रोको करण्यातत आल्यामुळे दुर्तफा वाहनांची कोंडी झाली होती. त्याचवेळी जिंतूर-परभणी बसमधून एक रुग्ण प्रवास करीत होता. त्याला दुसऱ्या कारमधून औरंगाबादला पाठवण्याकरिता पोलिसांनी मदत केली. तसेच एका आजारी महिलेला खासगी कारमधून उपचारासाठी औरंगाबादला जाण्यासाठी व्यवस्था करून देण्यात आली. एक लहान आजारी मुलाला घेऊन जाणारी कारही कोंडीत अडकली होती. तिला मार्ग करून देण्यात आला. रास्ता रोकोच्या काळात रुग्णांची गैरसोय होणार नाही याची काळजी पोलिस यंत्रणा घेत होती.

मोबाइल अॅप डाउनलोड करा आणि राहा अपडेट

खुलताबादच्या सीईओंना हायकोर्टाचे वॉरंट

September 14, 2015, 12:09 pm

≫ Next: ७०० रुपये लाच घेणाऱ्या अभियंत्याला सक्तमजुरी

≪ Previous: राष्ट्रवादी काँग्रेसचे जेलभरो आंदोलन

$

0

0

औरंगाबाद : अनुकंपावर सफाई कामगार म्हणून नोकरीत सामावून न घेतल्याने मुंबई हायकोर्टाच्या औरंगाबाद खंडपीठाचे न्या. ए. व्ही. निरगुडे व न्या. व्ही. के. जाधव यांनी खुलताबाद नगरपालिकेचे मुख्याधिकारी यांना अटक वॉंरट बजावून २५ सप्टेंबर रोजी हजर राहण्याचे आदेश दिले.

नव्याने जागा निर्माण होताच अनुकंपावर सफाई कामगार म्हणून याचिकाकर्त्यास सामावून घेतले जाईल, अशी लेखी हमी खुलताबाद नगरपालिकेने १२ डिसेंबर २०१२ रोजी घेतली होती. या आदेशानंतर याचिकाकर्त्याने नगरपालिकेच्या संबधित अधिकाऱ्यांकडे नोकरी मिळावी म्हणून अर्ज केला, परंतु नगरपालिकेने वेगळीच भूमिका घेतली. हायकोर्टात दिलेल्या हमीचे विस्मरण झाल्याने नगर पालिकेविरोधात देवकीबाई कसारे यांनी औरंगाबाद खंडपीठात पुन्हा धाव घेतली.

नोटीस बजावूनही खुलताबाद नगर पालिकेचे मुख्याधिकारी हे कोर्टात गैरहजर राहिले. नोटीस बजावूनही आदेशाचे पालन केले नाही म्हणून अटक वॉंरट बजावण्याचे आदेश देण्यात आले आहेत. याचिकाकर्त्यातर्फे चंद्रकांत ठोंबरे, शासनातर्फे एस. डी. काळदाते हे काम पाहत आहेत.

मोबाइल अॅप डाउनलोड करा आणि राहा अपडेट

---

७०० रुपये लाच घेणाऱ्या अभियंत्याला सक्तमजुरी

September 14, 2015, 12:16 pm

≫ Next: पंढरपूर येथील तरुणाच्या खूनप्रकरणी दोघांना अटक

≪ Previous: खुलताबादच्या सीईओंना हायकोर्टाचे वॉरंट

$

0

0

वीज जोडणीसाठी घेतली होती लाच

म. टा. प्रतिनिधी, औरंगाबाद

सातशे रुपयांची लाच स्वीकारणाऱ्या बायजीपुरा येथील महाराष्ट्र राज्य विद्युत विरतण कंपनीच्या ३३ के. व्ही. उपकेंद्रातील कनिष्ठ अभियंता रमेश जनार्धन देशपांडे यास सत्र न्यायधीश पी. एस. शिंदे यांनी दोन वर्षे सक्तमजुरी व दहा हजार रुपये दंडाची शिक्षा ठोठवली.

कनिष्ठ अभियंता रमेश जनार्धन देशपांडे याने नवीन विद्युत जोडणीचे कोटेशन देण्यासाठी ७०० रुपयांची लाच मागितली. तक्रारदाराने लाच लुचपत प्रतिबंधक विभागाच्या पथकाकडे कनिष्ठ अभियंता देशपांडे याची तक्रार केली. या तक्रारीवरुन पथकाने सापळा रचून देशपांडे यास लाच घेताना रंगेहाथ पकडले. त्याच्याविरुद्ध जिन्सी पोलिस ठाण्यात गुन्हा दाखल करण्यात आला. तसेच पोलिसांनी तपास करुन कोर्टात दोषारोपपत्र दाखल केले. या खटल्याची सुनावणी सत्र न्यायाधीश पी. एस. शिंदे यांच्यासमोर झाली असता अतिरिक्त लोकअभियोक्ता भिमराव पवार यांनी चार साक्षीदार तपासले. कोर्टाने देशपांडेला दोषी ठरवून कलम ७ अन्वये एक वर्ष सक्तमजुरी, ५ हजार रुपये दंड, दंड न भरल्यास एक महिना साधी कैद, कलम १३ (१) (ड) सह १३ (२) लाच प्रतिबंधक कायदा १९८८ अन्वये एक वर्ष सक्तमजुरी, ५ हजार रुपये दंड, दंड न भरल्यास एक महिना साधी कैदेची शिक्षा ठोठवली.

मोबाइल अॅप डाउनलोड करा आणि राहा अपडेट

पंढरपूर येथील तरुणाच्या खूनप्रकरणी दोघांना अटक

September 14, 2015, 12:17 pm

≫ Next: नारंगी प्रकल्पात पाणी

≪ Previous: ७०० रुपये लाच घेणाऱ्या अभियंत्याला सक्तमजुरी

$

0

0

म. टा. प्रतिनिधी वाळूज

पंढरपूर येथे एका तरुणाचा डोक्यात दगड घालून खून केल्याच्या संशयावरून एमआयडीसी वाळूज पोलिसांनी दोघांना अटक केली. त्यांना पोलिसांनी अमरावती जिल्ह्याती बडनेरा जंक्शन येथून ताब्यात घेतले.

पंढरपूर येथील कामगार दीपक अशोक बनकर (वय २५, सलामपुरेनगर) याचा खून झाल्याचे रविवारी (१३ सप्टेंबर) सकाळी सात वाजता उघडकीस आले होते. फिर्यादीने दीपकचा खून मित्रांनी केल्याचा संशय घेतला होता. पोलिसांनी त्या मित्रांची नावे व पत्ते मिळविले. न केल्यानंतर ते मुळगावी पळूज जात असल्याची माहिती पोलिसांना मिळाली होती. त्यावर पोलिसांनी पाठलाग करून त्यांना बडनेरा जंक्श्न अमरावती येथून ताब्यात घेतले. आकाश रामभाऊ उर्फ कलकराम परतेक (वय २५, ह.मु. बकवालनगर वाळूज) व सागर मोहन उईके (वय १९, साई कंपनी मनसे चौक पंढरपूर) हे मूळ गावी पळून जात असल्याची माहिती मिळाली. हे दोघेही अमरावती जिल्ह्यातील पररतवाडा येथील रहिवासी आहेत. त्यांना बडनेरा जंक्शन येथून ताब्यात घेण्यात आले. हा खून किरकोळ वादातून झाल्याचे पोलिस निरीक्षक रामेश्वर थोरात यांनी सांगितले.

मोबाइल अॅप डाउनलोड करा आणि राहा अपडेट

नारंगी प्रकल्पात पाणी

September 14, 2015, 12:19 pm

≫ Next: अस्वच्छ एसटीतून प्रवाशांचा प्रवास

≪ Previous: पंढरपूर येथील तरुणाच्या खूनप्रकरणी दोघांना अटक

$

0

0

म. टा. प्रतिनिधी, वैजापूर

वैजापूर शहराला पाणीपुरवठा करणाऱ्या व गेल्या नऊ वर्षांपासून कोरडे असलेल्या नारंगी मध्यम प्रकल्पात सोमवारी (१४ सप्टेंबर) सायंकाळपासून पाणी येण्यास सुरुवात झाली आहे. येवला तालुक्यातील लाख सुरेगाव, देवठाण व भुलेगाव येथल धरणातून ओव्हरफ्लोचे पाणी दाखल होत आहे.

१३.५ दशलक्ष घनमीटर क्षमतेच्या नारंगी प्रकल्पात यापूर्वी २००६मध्ये १०० टक्के पाणी होते व गेट उघडावे लागले होते. २००८मध्ये ९८ टक्के भरला होता. त्यानंतर कोरडे पडलेल्या प्रकल्पात सोमवारी मोठ्या प्रमाणावर पाणी आले आहे. हे पाणी पाहण्यासाठी नागरिकांनी धरणावर धाव घेतली. नाशिक जिल्ह्यातील येवला तालुक्यात गेल्या काही दिवसांत चांगला पाऊस पडला आहे. तेथील लाख सुरेगाव, भुलेगाव व देवठाण येथील छोटी धरणे तुडूंब भरली आहेत. या धरणातील पाणी नांदगाव येथील पुलावरून शहराजवळील नारंगी धरणात दाखल होत आहे.

या पाण्याचा वेग अचानक वाढल्याने नारंगी धरणात सायंकाळपर्यंत मोठ्या प्रमाणावर पाणी दाखल झाले होते. पाण्याचा विसर्ग रात्रभर सुरूच राहणार असल्याने सकाळपर्यत आणखी पाणी धरणात दाखल होण्याची शक्यता आहे. या धरणात येवला तालुक्यातील डोंगरगाव येथील धरणातूनही ओव्हरफ्लोचे पाणी येत असते; मात्र आतापर्यंत डोंगरगावचे धरण पूर्ण भरले नसल्याची माहिती मिळाली आहे.

पिण्याच्या पाण्यासाठी उपयोग होण्याची शक्यता

वैजापूर शहराला नारंगी मध्यम प्रकल्पातून पाणीपुरवठ्याची योजना आहे, परंतु यापूर्वी प्रकल्पात २००६मध्ये पुरेसा साठा होता. त्यानंतर प्रकल्प जवळपास कोरडे पडले होते. परिसरातील पावसाचे पाणी पाणी जमा होत होते, त्यावर शहराचा पाणीपुरवठा करणे शक्य नव्हते. त्यामुळे कोपरगाव तालुक्यातील गोयगाव येथील तीन साठवण तलावातून शहराला पाणीपुरवठा करण्यात येत आहे. हे तलाव वैजापूर नगरपालिकेच्या मालकीचे आहेत. सुमारे २८ किलोमीटर अंतरावरील या तलावात दर दोन महिन्याला डावा, उजव्या कालव्यातून पाणी सोडण्यात येते. नारंगी तलाव शहरालगत असूनही कोरडा असल्याने ही व्यवस्था करण्यात आली आहे. प्रकल्पात पाणी आल्याने शहर व १४ गावांच्या पिण्याच्या पाण्याचा प्रश्न कांही अंशी सुटू शकतो.

मोबाइल अॅप डाउनलोड करा आणि राहा अपडेट

अस्वच्छ एसटीतून प्रवाशांचा प्रवास

September 14, 2015, 12:22 pm

≫ Next: व‌िमा रुग्णालयात असंघटितांना सेवा

≪ Previous: नारंगी प्रकल्पात पाणी

$

0

0

म. टा. प्रतिनिधी, औरंगाबाद

पान-तंबाखूच्या पिचकाऱ्यांनी रंगलेली सीट, पायाखाली साचलेला कचरा, सांडलेले पाणी, कायम अर्धवट बंद राहणारी खिडकी अशा किळसवाण्या आणि अंगावर काटा आणणाऱ्या परिस्थितीतून रोज हजारो लोकांना एसटीतून प्रवास करण्याचा योग येतो. डेपोच्या गलिच्छ कारभारामुळे प्रवाशांचे आरोग्य मात्र धोक्यात आले आहे.

परिवहनमंत्री दिवाकर रावते यांनी पदभार स्वीकारताच एसटी स्वच्छेतेबाबत आपले धोरण स्पष्ट केले होते. प्रवाशांना चांगली सेवा देण्यासाठी बस स्वच्छ असावी, अशी सूचना दिली होती. मात्र, औरंगाबाद आगाराने त्याकडे सोयीस्कररित्या दुर्लक्ष केलेले दिसते. मध्यवर्ती बसस्थानकातील बस, इतर आगारातून आलेल्या बस यांची स्वच्छताच केली जात नाही. अनेक निमआराम गाड्यांची अवस्था साध्या बसपेक्षा वाईट असते. त्यामुळे या बसमध्ये प्रवासी चढणार कसे, असा प्रश्न निर्माण होतो. औरंगाबाद- पैठण, औरंगाबाद-कन्नड आणि औरंगाबाद, गंगापूर, वैजापूर या भागात जाणाऱ्या गाड्यांच्या स्वच्छतेकडेही डोळेझाक केली जाते. या बस आतून पानाच्या पिचकाऱ्यांनी रंगलेल्या असतात. विडी, सिगारेटचे तुकडे बसमध्ये पडलेले असतात. शिवाय रिकामे पाणी पाऊच, बिसलरीच्या रिकाम्या बाटल्या, चिप्स-बिस्कीटच्या कागदांनी आपण एखाद्या कचराकुंडीजवळ बसल्याचा भास प्रवाशांना होतो. बसमधील साफसफाईच्या कामासाठी विशेष स्वच्छकांची दिवसा व रात्री ड्युटी लावलेली आहे. मात्र, हे स्वच्छक येतात कधी, गाड्यांची स्वच्छता करतात कधी सारेच गौडबंगाल आहे. त्यांच्यावर कुण्याही अधिकाऱ्यांचा वचक नाही.

नियम काय आहे?

एखाद्या गावाहून गाडी मुक्काम करून आली असेल किंवा एका गावाची फेरी झाल्यानंतर गाडी धुवूनच फलाटावर लावावी.

नियमानुसार बहुतांश गाड्या धुतल्या जात नाहीत. त्यांची साफसफाई होत नाही.

काही रात्र पाळीत मुक्कामी असणाऱ्या आणि शिवनेरी बस वगळता इतर गाड्यांची साफसफाई होत नाही.

दररोज औरंगाबाद आगाराच्या गाड्यांचा प्रवास ५२ हजार किलोमीटर होतो.

वॉशर पंप बंद

औरंगाबाद आगार क्रमांक २वर बस धुण्यासाठी वॉशर पंप बसविण्यात आला आहे. मागील काही वर्षांपासून हा पंप बंद आहे. त्यामुळे या गाड्यांच्या दर्शनी भागाची स्वच्छता होत नाही.

उपलब्ध साधनांच्या सहाय्याने औरंगाबाद आगार क्रमांक दोन वरील बस स्वच्छ केल्या जातात. साधनांची कमतरता आहे. मात्र, शक्यतो सर्व गाड्यांची स्वच्छता करूनच त्या फलाटावर लावल्या जातात.- सी. के. सोळसे, आगार प्रमुख, औरंगाबाद आगार क्रमांक २

मोबाइल अॅप डाउनलोड करा आणि राहा अपडेट

व‌िमा रुग्णालयात असंघटितांना सेवा

September 14, 2015, 12:28 pm

≫ Next: एकाच सोसायटीत दोन घरफोड्या

≪ Previous: अस्वच्छ एसटीतून प्रवाशांचा प्रवास

$

0

0

म. टा. प्रतिनिधी, औरंगाबाद

'ईएसआयसी' रुग्णालयांतील ८५०० डॉक्टर, कर्मचाऱ्यांच्या रिक्त जागा एक वर्षात भरण्यात येणार असून समस्या सोडवण्याकरिता राज्यस्तरीय समिती स्थापन केली जाईल. सर्व संघटित व असंघटित कामगारांना स्मार्ट कार्डद्वारे सेवा देण्यात येणार आहे,' अशी घोषणा केंद्रीय कामगार व रोजगार मंत्री बंडारू दत्तात्रेय यांनी केली. केंद्रीयमंत्री बंडारू दत्तात्रेय यांच्या हस्ते सोमवारी (१४ सप्टेंबर) कामगार राज्य विमा महामंडळाच्या (ईएसआयसी) चिकलठाणा एमआयडीसी परिसरातील उपक्षेत्रीय कार्यालयाचे उद‍्घाटन करण्यात आले. यावेळी ते बोलत होते.

'ईएसआयसी' रुग्णालयांतील त्रुटी लवकरच दूर करून अत्याधुनिक वैद्यकीय सुविधा देण्यात येणार आहे. देशातील ३९३ जिल्हे 'ईएसआयसी'च्या सेवा-सुविधांनी परिपूर्ण केले जातील. १८००३८३९ या टोल फ्री क्रमांकावर मेडिकल हेल्पलाईन २४ तास सुरू केली जाणार आहे, अशी माहिती त्यांनी दिली. देशात संघटित कामगार केवळ ७ टक्के, तर असंघटित कामगार तब्बल ९३ टक्के आहेत. त्यामुळे सर्व प्रकारच्या संघटित व असंघटित कामगारांना 'यु विन स्मार्ट कार्ड'द्वारे राष्ट्रीय स्वास्थ्य बिमा योजना, आम आदमी बिमा योजना, ओल्डएज पेन्शन योजना, प्रधानमंत्री जनसुरक्षा, प्रधानमंत्री जीवन ज्योती बिमा योजना व अटल पेन्शन योजनेचे लाभ दिले जाणार आहेत. किमान वेतन वाढविण्यासाठी आणि बोनस वाढविण्यासाठी 'बोनस अॅक्ट' कॅबिनेटमध्ये लवकरात लवकर मांडण्यात येणार असल्याचे त्यांनी भाषणात सांगितले.

याप्रसंगी ईएसआयसीचे मंडळ सदस्य खासदार चंद्रकांत खैरे यांनी, ईएसआयसीची मर्यादा १५००० रुपये मासिक वेतनावरून २५००० रुपये वेतनापर्यंत वाढविण्याची सूचना केली. या प्रसंगी ईएसआयसीचे विभागीय संचालक जी. एस. दास, सहसंचालक डी. टी. उंदीरवाडे, संचालक प्रमुख दीपक जोशी आदींची उपस्थिती होती.

कार्यक्रमानंतर पत्रकारांशी बोलताना ते म्हणाले, 'मेक इन इंडिया'अंतर्गत रोजगार वाढविण्याचा प्रयत्न केला जाणार आहे. 'स्कील इंडिया' योजनेअंतर्गत तांत्रिक कुमक १.७ टक्क्यांवरून २५ टक्क्यांपर्यंत वाढविण्याचा प्रयत्न केला जाणार आहे. 'अॅप्रेन्टाईस अमेंडमेंट बिल'अंतर्गत प्रशिक्षणाची क्षमता १.९ लाखापासून २० लाख व्यक्तींपर्यंत वाढविण्यात येणार आहे. कामगार कायद्यामध्येही सुधारणा करण्याचे प्रस्तावित असल्याचे त्यांनी सांगितले.

'ईएसआयसी'संदर्भात ते म्हणाले, महाराष्ट्रातील २२ जिल्ह्यांमध्ये 'ईएसआयसी'चे ५१ केंद्र असून, ९१ लाख २१ हजार २१६ कुटुंब 'ईएसआयसी'चे लाभार्थी आहेत. सात कोटी ४० लाख बांधकाम कामगारांना ऑगस्टपासून 'ईएसआयसी'च्या सुविधा उपलब्ध झाल्या आहेत.'

प्रश्नांनी निरुत्तर

शहरातील वाळूज येथील 'मॉडेल डिस्पेन्सरी' येथे कुठल्याच वैद्यकीय सुविधा नाहीत, तज्ज्ञ डॉक्टर नाहीत, उपकरणे नाही. केवळ भव्य इमारतीचे उदघाटन असल्याबद्दल केंद्रीय कामगार मंत्री बंडारू दत्तात्रेय व खासदार खैरे यांच्यावर पत्रकारांनी प्रश्नांची सरबत्ती केली. येथे नेमक्या कोणत्या सुविधा कधी देणार, याविषयी मंत्री महोदय व खासदार ठोस उत्तर देऊ शकले नाहीत. लवकरच सेवा वाढविणार असल्याचे मोघम उत्तर मंत्र्यांनी दिले.

मंत्र्यांच्या घोषणा

८५०० रिक्त जागा भरणार

१५०० डिस्पेन्सरीज ६ खाटांच्या रुग्णालयांपर्यंत अपग्रेड करणार

कॅन्सर, हृदयरोग, डायलिसिसचे अत्याधुनिक उपचार मिळणार

योगा, आयुष, टेलिमेडिसिनचेही उपचार रुग्णालयांत मिळणार

बांधकाम कामगारांना आरोग्य सुविधा ऑगस्टपासून सुरू

ऑटोरिक्षाचालक, अंगणवाडी-आशा कर्मचाऱ्यांनाही लवकरच सुविधा

संघटित-असंघटित कामगारांना 'स्मार्ट कार्ड'द्वारे विविध सुविधा

मोबाइल अॅप डाउनलोड करा आणि राहा अपडेट