बीड, उस्मानाबाद आणि परभणी जिल्ह्यांमध्ये पावसाअभावी दुष्काळाची भयावह परिस्थिती आहे. पिण्याचे पाणी; तसेच जनावरांना चारा हा प्रश्न अत्यंत गंभीर बनला असून, पाणी आणायचे कोठून, असा प्रश्न आहे. खरीप पीक हातचे गेले असून, रब्बी पीक घेण्यासाठी शेतकऱ्यांमध्ये आत्मविश्वास नाही, अशी भावना शिवसेनेचे लोकप्रतिनिधी, पदाधिकाऱ्यांनी 'मटा'शी संवाद साधताना व्यक्त केली.
परभणी जिल्ह्यात सर्वत्र पावसाअभावी दुष्काळाची गंभीर परिस्थिती निर्माण झाली आहे. सेलू, मानवत पट्ट्यात अत्यंत वाईट स्थिती आहे. पोखर्णी ते सोनपेठ परिसरात पेरणीच होऊ शकलेली नाही. एरवी मार्चपासून पाण्याची टंचाई जाणवते; परंतु यंदा ऑगस्ट महिन्यात पाण्याचे टँकर मागवावे लागत आहे. त्यामुळे परतीचा पावसाकडे सर्वांचेच लक्ष लागले आहे. पाणीच उपलब्ध नाही, तेथे टँकरद्धारे कोठून भरायचे असा प्रश्न असल्याचे खासदार संजय जाधव यांनी सांगितले. ते म्हणाले, 'परभणी शहरात १०-१२ दिवसांनी पिण्याचे पाणी येते. गेल्या तीन वर्षांपासून शेतकरी दुष्काळ, गारपीट याचा सामना करीत आहेत. येलदरी, निम्न दुधना, जायकवाडी या धरणात पाणीसाठा अत्यंत कमी आहे. परतीच्या पावसाकडे लक्ष आहे. किमान पिण्याच्या पाण्याची व्यवस्था होईल. अन्यथा नागरिकांसमोर गाव सोडल्याशिवाय दुसरा पर्याय राहणार नाही.'
उस्मानाबाद जिल्ह्यातही गंभीर दुष्काळ असल्याचे खासदार रवींद्र गायकवाड यांनी सांगितले. ते म्हणाले, 'मांजरा, तेरणा, निम्न तेरणा या धरणांमध्ये पाणीच नाही. त्यामुळे शेतीच नव्हे, तर पिण्याच्या पाण्याचाही प्रश्न गंभीर झाला आहे. सध्या १२५ टँकर चालू आहेत. दररोज मागणी वाढत आहे. चारा, पाणी आणायचा कोठून हा प्रश्न आहे. अनेक तालुक्यांत पावसाअभावी पेरणी होऊ शकलेली नाही. जनावरांची संख्या पाहून शेतकऱ्यांना थेट मदत केल्यास ती अधिक उपयुक्त ठरेल.'
बीडचे शिवसेना जिल्हा प्रमुख अनिल जगताप म्हणाले, 'गेल्या काही वर्षांतील बीड जिल्ह्यातील पर्जन्यमान हे पन्नास टक्क्यांच्या आसपास राहिलेले आहे. कठीण खडकाचा प्रदेश असल्याने भूगर्भात पाणी मुरण्याचे प्रमाण फार कमी आहे. सरासरी पाणी पातळीही खोलवर गेलेली आहे. आष्टी, पाटोदा, शिरूर, गेवराई व बीड तालुक्याचा काही भाग तर हा 'रन-ऑफ झोन'मध्ये येतो. चारा छावणी तातडीने सुरू करण्याची आवश्यकता आहे. चार म्हणून उसाचा वापर करण्यात येत आहे.'
परभणी जिल्ह्यात दुष्काळाची गंभीर परिस्थिती आहे. पोखर्णी ते सोनपेठ भागात पावसाअभावी पेरणीच होऊ शकलेली नाही. पिण्याच्या पाण्याचा प्रश्न गंभीर असून, परतीच्या पावसावर आशा आहे. अन्यथा गाव सोडण्याची वेळ येणार आहे.
- संजय जाधव, खासदार, परभणी
पिण्याच्या पाण्याच्या टँकरची संख्या दररोज वाढत आहे. धरण, विहिरींत पाणीच उपलब्ध नाही. त्यामुळे पाणी कोढून आणावे, असा प्रश्न आहे. चाऱ्याचा प्रश्नही गंभीर आहे. जनावरांची संख्या पाहून थेट शेतकऱ्यांंना मदत द्यावी.
- रवींद्र गायकवाड, खासदार, उस्मानाबाद
बीड जिल्ह्यातील सर्वच तालुक्यात पावसाअभावी गंभीर स्थिती निर्माण झालेली आहे. गेवराई, शिरूर तालुक्यात २० टक्केही पाऊस झालेला नाही. शेतकऱ्यांच्या आत्महत्या रोखणे आवश्यक आहे. शेतकऱ्यांच्या पाठीशी उभे राहण्याची ही वेळ आहे.
- अनिल जगताप, जिल्हाप्रमुख, बीड
मोबाइल अॅप डाउनलोड करा आणि राहा अपडेट
