'लक्ष्मी कशानं आली,
लक्ष्मी सुख-समृद्धीनं आली,
लक्ष्मी कशानं आली,
लक्ष्मी माणिक-मोत्यांनी आली,'
गणपतीच्या जल्लोषात आगमनानंतर शनिवारी घरोघरी गौरींचे आगमन झाले. लक्ष्मीचे स्वागत करण्यासाठी घरोघरी लगबग सुरू होती. गौरींचे मुखवटे, दागिने, साड्या, मखर व सजावटीचे साहित्य खरेदीसाठी बाजारपेठेत गर्दी उसळली. घरोघरी सायंकाळी गौरीची प्रतिष्ठापना करण्यात आली. गणपतीचे गुरुवारी आगमन झाल्यानंतर गौरी माहेरी आल्या आहेत. घरोघरी शनिवारी गौरींचे आगमन झाले. या प्रतिष्ठापनेची सजावट व पूजनासाठी महिलांची लगबग सुरू होती. कौटुंबिक कौटुंबिक परंपरेनुसार काहींनी गौरीच्या मुखवट्यांना झळाळी दिली. यंदा प्रथमच घरी गौरीचे आगमन झालेल्या कुटुंबियांनी नवीन मुखवटे खरेदी केले. गुलमंडी, औरंगपुरा व कुंभारवाडा या मुख्य बाजारपेठेत मुखवटे व सजावटीचे साहित्य खरेदी करण्यात आली. पितळी मुखवट्यांची किंमत एक हजार ते बारा हजार रुपयांपर्यंत होती. सणानिमित्त बाजारपेठेत फुलांची मोठ्या प्रमाणात आवक झाली. झेंडू, गुलाब, शेवंती आणि जरबेरा फुलांनी बाजारपेठ दरवळली. दरम्यान, घरोघरी विधीवत महालक्ष्मी (गौरी) प्रतिष्ठापना करण्यात आली. रविवारी गौरीचे महाप्रसाद असून सोमवारी गौरी विसर्जन आहे.
खरेदीसाठी गर्दी
महालक्ष्मी प्रतिष्ठापना व सजावट यांचे वेगळे समीकरण आहे. सोने-चांदीची नवीन मंगळसूत्रे, कमरपट्टा, बाजूबंद व इतर दागिने खरेदीसाठी बाजारपेठेत गर्दी होती. सोन्याच्या दुकानात पारंपरिक दागिन्यांचे विविध प्रकार उपलब्ध होते.
मोबाइल अॅप डाउनलोड करा आणि राहा अपडेट