म.टा.प्रतिनिधी वाळूज
तिसगाव परिसरातील खवडा डोंगर परिसरात कचरा डेपो सुरू करण्याचा मानस खासदार चंद्रकांत खैरे यांनी बोलून दाखवला आहे. त्याला गावकऱ्यांनी तीव्र विरोध करून आंदोलनाचा पवित्रा घेतला. दरम्यान, माजी सरपंच संजय जाधव यांनी खासदारांविरुद्ध मुंडण करून निषेध व्यक्त केला.
औरंगाबाद शहरातील घनकचऱ्याचा डेपो तिसगाव येथे करण्याचा प्रयत्न आहे. सरपंच अंजन साळवे यांच्या प्रमुख उपस्थितीत गावकऱ्यांनी घेतलेल्या मंगळवारी घेतलेल्या बैठकीत ठाम विरोध केला. ही बैठक डॉ. बाबासाहेब आंबेडकर चौकात झाली. खवडा डोंगर परिसरात कचरा डेपो करण्याचा मानस खासदार चंद्रकांत खैरे यांनी बोलून दाखवला आहे. त्यामुळे हा विषय पेटला आहे. 'शहरापासून काही अंतरावर असलेल्या तिसगावाच्या विकासाचा मार्ग कधी खासदारांना सापडला नाही, मात्र शहरातील घनकचरा टाकण्यासाठी ठिकाण सापडले. गावकऱ्यांचा कडवा विरोध असून, देखील कचराडेपो तेथेच होणार असा हुकूम सोडणाऱ्या खासदारांचा मुंडण करून निषेध करतो,' अशी भूमिका मांडत माजी सरपंच संजय जाधव यांनी मुंडण केले.
'कचरा डेपो होणे हा काही गावाचा विकास नाही. कचरा डेपोमुळे परिसरातील जमिनीचे भाव कमी होतील. शिवाय रोगराईचाही त्रास होणार आहे. त्याच्या विरोधात लोकशाही मार्गाने आंदोलन करू,' अशी भूमिका सरपंच अंजन साळवे यांनी मांडली. या बैठकीला जिल्हा परिषदेचे माजी सदस्य रामचंद्र कसुरे, माजी सरपंच मिठठूलाल तरैय्यावाले, ग्रामपंचायत तारासिंग तरैय्यावाले, विजय साळे, दशरथ महापुरे, मोहन चौधरी, फकीरचंद दाभाडे, किशोर साळे, गौतम मोरे, भूषम साळवे, सुनील जाधव, अनिल जाधव, साजापूर करोडीचे उपसरपंच भारत दळे, रामसिंग सलामपुरे, सुगंध दाभाडे यांच्यासह गावकऱ्यांची उपस्थिती होती.
आंदोलनाचा इशारा
कचरा डेपोप्रश्नी खासदार चंद्रकांत खैरे यांच्याविरुद्ध बैठक व आंदोलन होणार असल्याची कुणकुण लागल्यामुळे शिवसेना तालुकाप्रमुख बप्पा दळवी बैठकीच्या ठिकाणी हजर झाले होते. तेव्हा नागरिकांनी आमचा प्रश्न पक्षाच्या नेत्यांकडे मांडा, असे त्यांना सुनावले. खासदार खैरे यांची गुरुवारी भेट घेऊन हा विषय सांगू, असे दळवी यांनी यावेळी सांगितले.
मोबाइल अॅप डाउनलोड करा आणि राहा अपडेट
