म. टा. प्रतिनिधी, औरंगाबाद
गेल्या आठवड्यात दमदार हजेरी लावणाऱ्या वरुणराजाने पुन्हा एकदा मराठवाड्याकडे पाठ फिरवली. त्यामुळे २३ तालुक्यांत जलसंकट गंभीर झाले आहे. सध्या विभागातील ५७७ गावांना टॅँकरद्वारे पाणीपुरवठा सुरू आहे.
१७ व १८ सप्टेंबर रोजी औरंगाबाद, जालना, बीड, हिंगोली, नांदेड, परभणी या जिल्ह्यांमध्ये दमदार पाऊस झाला. मात्र, त्यानंतर पावसाने विश्रांती घेतली. मराठवाड्यातील ७६ तालुक्यांपैकी परभणी, नांदेड, बीड, उस्मानाबाद व लातूर जिल्ह्यातील २३ तालुक्यांनी आतापर्यंत पावसाची ५० टक्के सरासरीही ओलांडली नाही हे विशेष. गेल्या आठवड्यात झालेल्या पावसामुळे नेहमीच दुष्काळाला समोरे जात असलेल्या मराठवाड्यावर कृपादृष्टी झाली. मात्र, बीड, नांदेड, लातूर व उस्मानाबाद जिल्ह्यामध्ये अद्यापही पिण्याच्या पाण्याचा प्रश्न कायम आहे. या जिल्ह्यांमध्ये पावसानंतरही मोठ्या प्रमाणावर टँकर सुरू आहेत.
औरंगाबाद, जालना जिल्ह्यांत सर्वाधिक पाऊस
विभागात औरंगाबादमध्ये सर्वाधिक ८४.२० टक्के पाऊस झाला. यामध्ये औरंगाबाद, फुलंब्री, सिल्लोड, सोयगाव, कन्नड, खुलताबाद तालुक्यांमध्ये ४०० मिलिमीटर पेक्षा अधिक पाऊस झाला. भर उन्हाळ्यात साडेपाचशे टँकर सुरू असलेल्या औरंगाबाद जिल्ह्यामध्ये आता टँकरची संख्या दोन आकड्यावंर आली आहे.
या तालुक्यात निम्माही पाऊस नाही
मराठवाड्यातील ७६ पैकी २३ तालुक्यांमध्ये आतापर्यंतच्या सरासरी पावसापेक्षा ५० टक्केही पाऊस झाला नाही. यामध्ये परभणी जिल्ह्यातील परभणी ३७.२९ टक्के, पालम ३८.८१, गंगाखेड ३६.३७, सोनपेठ ४९.५०, पाथरी ३९.१२, जिंतूर ४९.३१, हिंगोली जिल्ह्यातील वसमत ४७.२१, नांदेड जिल्ह्यातील देगलूर ३३.९०, बिलोली ३९.२३, धर्माबाद ३६.२३, नायगाव ४१.९०, मुखेड ४८.५८., बीड जिल्ह्यातील गेवराई ४२.३६, शिरूर कासार ३७.४७, लातूर जिल्ह्यातील उदगीर ४६.७९, चाकूर ४५.६६, जळकोट ४९.७०, शिरूर अनंतपाळ ४३.८३., उस्मानाबाद जिल्ह्यातील उस्मानाबाद ४९.७५, तुळजापूर ४६.८९, कळंब ४९.०६, भूम ४४.५६, वाशी ४०.६१ या तालुक्यांचा समावेश आहे.
तज्ज्ञ म्हणतात हिवाळ्यातही पाऊस
मराठवाड्यातील पावसाबाबत हवामान अभ्यासक श्रीनिवास औंधकर म्हणाले की, 'येत्या काही दिवसांमध्ये मराठवाड्यात पावसाची शक्यता नसली तरी, सुपर अप निनोच्या प्रभावामुळे नोव्हेंबर ते एप्रिलपर्यंत गारपिटीसह पावसाच्या सरी कोसळतील. या काळात थंडी मात्र कमी राहील.'
मोबाइल अॅप डाउनलोड करा आणि राहा अपडेट
