दारूचे व्यसन हा एक मानसिक आजार (अल्कोहोल डिपेन्डन्स) आहे आणि या आजाराचे प्रमाण १० टक्क्यांपेक्षा जास्त आहे. या आजारावरील उपचारांचा खर्च दारूच्या तुलनेत एक चतुर्थांश असूनही एक-दोन टक्क्यांपेक्षा कमीजण या आजारावर उपचार घेतात.
विविध उपचारांनी ६० टक्के मद्यपी व्यसनाच्या आजारापासून मुक्त होऊ शकतात, तर अनेकजण सुसह्य जीवन जगू शकतात. व्यसनांचे प्रमाण वाढत असताना व व्यसन करणाऱ्यांचे वय कमी होत असताना उपचार घेण्याबाबत कमालीचे दुर्लक्ष होत असल्याचे मत तज्ज्ञांनी व्यक्त केले. महात्मा गांधी जयंतीनिमित्त तसेच मानसिक आरोग्य सप्ताहानिमित्त गुरुवारी (एक ऑक्टोबर) आयोजित पत्रकार परिषदेत शांती नर्सिंग होमचे प्रमुख डॉ. विनय बाऱ्हाळे, डॉ. विनय पाटील, प्रशासकीय अधिकारी सई चपळगावकर यांनी विविध निरीक्षणे नोंदविली. जागतिक आरोग्य संघटनेच्या (डब्ल्यूएचओ) परीक्षणानुसार, भारतातील ८० ते ९० टक्के व्यक्तींनी आयुष्यात कधी ना कधी दारू घेतलेलीच असते व त्यातील १० ते १५ टक्के लोकांना 'अल्कोहोल डिपेन्डन्स' हा आजार होतो. महाविद्यालयीन जीवनात युवकांमध्ये मद्यपान सुरू होते व तिशी-पस्तीशीत तरूण व्यसनी होऊन जातो. अलीकडे तर १५-१६ वर्षातील मुलांमध्ये व महिलांमध्येही मद्यपान वाढत असल्याचे दिसून येत आहे. त्यामुळे महात्मा गांधी यांनी फार पूर्वीच 'दारूचे व्यसन हा समाजाचा कॅन्सर' असे म्हटले होते. 'डब्ल्यूएचओ'ने आरोग्याची व्याख्या 'मेंटल, फिझिकल, सोशल, स्पिरिच्युएल वेलबिंग' अशी केली आहे; परंतु मद्यपानाच्या व्यसनामुळे मानसिक, शारीरिक, सामाजिक, अध्यात्मिक असे सर्वांगीण आरोग्य बिघडते; किंबहुना आयुष्य उद्ध्वस्त होते म्हणून मद्यपानाच्या व्यसनाला मानसिक आजार म्हटले जाते. दुर्दैवाने शासकीय यंत्रणेमध्ये व्यसनमुक्तीसाठी फारसे काही होताना दिसत नाही व जनतेमध्येही उपचार घेण्याबाबत जागृती नसल्याची टीका डॉ. बाऱ्हाळे यांनी केली.
युवकांसाठी आज स्पर्धा
युवकांमध्ये जागृती वाढावी म्हणून शांती नर्सिंग होमच्या 'मित्र ग्रुप'तर्फे आंतर-महाविद्यालयीन वादविवाद स्पर्धा होत आहे. 'दारूबंदी कायदाः व्यसनमुक्तीचा एकमेव उपाय' या विषयावर नुकतीच प्राथमिक फेरी झाली व शुक्रवारी (दोन ऑक्टोबर) महसूल प्रबोधिनीत सायंकाळी पाचला 'दारूच्या व्यसनासाठी समाज व संस्कृती जबाबदार आहे' विषयी पाच महाविद्यालयांमध्ये अंतिम स्पर्धा होईल. माजी विभागीय आयुक्त कृष्णा भोगे यांच्या हस्ते पारितोषिक वितरण होईल, असेही सांगण्यात आले.
मोबाइल अॅप डाउनलोड करा आणि राहा अपडेट
