म. टा. प्रतिनिधी, वाळूज
तीसगाव येथील नियोजित कचरा डेपोविरुद्ध शुक्रवारी वाळूज व तीसगाव पंचक्रोशीतील नागरिकांनी औरंगाबाद-नगर रस्त्यावरील ए. एस. क्लब चौकात रास्ता रोको केला. या आंदोलनात सुमारे एक हजार नागरिक सामील झाले होते. पोलिसांनी दीडशे आंदोलकांना ताब्यात घेऊन सोडून दिले.
औरंगाबाद महापालिकेचा नारेगाव येथील कचरा डेपो तीसगाव येथील खवडा डोंगर परिसरात कचरा डेपो सुरू करण्यात येणार आहे. यामुळे दुर्गंधी पसरून आरोग्याचा प्रश्न निर्माण होईल, असा गावकऱ्यांचा आक्षेप आहे. धरमपूर व वडगाव कोल्हाटी येथील नागरिकांचाही कचरा डेपोला विरोध आहे. यामुळे तीसगावचे सरपंच अंजन साळवे यांच्या मार्गदर्शनाखाली सर्वपक्षीय आंदोलन करण्यात आले. या रास्तो रोकोत शेकडो नागरिक सामील झाले होते. यावेळी बोलताना आंदोलनातील नेत्यांनी महापालिकेच्या कारभाऱ्यांविरुद्ध रोष व्यक्त केला. कोणत्याही परिस्थितीत तीसगावला कचरा डेपो होऊ देणार नाही, असा निर्धार व्यक्त केला. यावेळी आंदोलकांनी सरकार व पालिकेच्या विरुद्ध प्रचंड घोषणाबाजी केली. आंदोलनामुळे सुमारे तासभर वाहतूक खोळंबली होती. पोलिसांनी चौकात येणारी वाहतूक काहीकाळ बंद करण्यात केली होती.
या ठिकाणी पोलिसांनी मोठा बंदोबस्त लावला होता. पोलिसांचा बंदोबस्तामुळे चौकाला छावणीचे रूप आले होतो. एमआयडीसी वाळूज पोलिस ठाण्याचे पोलिस निरीक्षक रामेश्वर थोरात यांनी आंदोलकांना सहकार्याचे आवाहन केले.
तीसगावचे माजी सरपंच संजय जाधव, माजी जिल्हा परिषद सदस्य रामचंद्र कसुरे, सुगंध दाभाडे, ज्ञानेश्वर शेलार, नागेश कुठारे, साजापूर येथील सचीन जाधव, गौतम मोरे, अमोल रत्तपारखी, सय्यद हरूण, अशोक त्रिभुवन, अनिल जाधव, करोडी येथील माजी सरपंच अनिल जाधव, निलेश गोफने, किशार साळवे, सोपान नाडे, अमोल गायकवाड आदींसह महिलांची मोठ्या संख्येने उपस्थिती होती.
या आंदोलनाला पाठिंबा देण्यासाठी काँग्रेसचे जितेंद्र देहाडे, राष्ट्रवादी काँग्रेसचे गणेश घुले, बहुजन समाज पार्टीचे प्रदेश महासचिव डॉ. शरदचंद्र वानखेडे, जिल्हाध्यक्ष किशोर म्हस्के, भाजपचे अनिल चोरडिया, स्वाभीमानी शेतकरी संघटनेचे संतोष पाटील सूर्यंवशी, छावाचे शिवाजी मर्तांडे आदींनी हजेरी लावली.
महिलांची गर्दी
रास्ता रोको आंदोलनात माहिलांची उपस्थिती मोठ्या संख्येने होती. कचरा डेपोला विरोध करण्यासाठी त्यांनी पुरुषांच्या खांद्याला खांदा लावून लढण्याचा निर्धार केला.
भाजपची फक्त हजेरी
भाजप नेत्यांनी कार्यकर्तांसह आंदोलनात प्रत्यक्ष सहभाग घेतला. मात्र पोलिसांनी आंदोलकांना ताब्यात घेण्यास सुरुवात करताच भाजप नेते, कार्यकर्त्यांनी काढता पाय घेतला.
मोबाइल अॅप डाउनलोड करा आणि राहा अपडेट
