म. टा. प्रतिनिधी, औरंगाबाद
महापालिका आयुक्त प्रकाश महाजन यांच्याविरुध्द अविश्वास ठराव आणण्यावरून शिवसेनेच्या स्थानिक नेत्यांमध्येच कलगीतुरा रंगला आहे. 'अविश्वास ठरावामागच्या सूत्रधाराची माहिती पक्षप्रमुख उद्धव ठाकरेंना दिली,' असे म्हणत खैरेंनी मंगळवारी स्वकीयांना इशारा दिला.
गजानन महाराज मंदिर चौक ते जयभवानीनगर चौक रस्त्याच्या व्हाइट टॉपिंग कामाचा शुभारंभ खासदार चंद्रकांत खैरे यांच्या हस्ते झाला यावेळी ते बोलत होते. यावेळी आमदार अतुल सावे, उपमहापौर प्रमोद राठोड, स्थायी समितीचे सभापती दिलीप थोरात, सभागृहनेते राजेंद्र जंजाळ, गटनेते गजानन बारवाल आदी उपस्थित होते. खैरे म्हणाले, 'आयुक्तांविरोधात अविश्वास ठराव घेऊन त्यांच्या आतापर्यंतच्या सेवेचा आपण अपमान करत आहोत. ते तीन महिन्यांनी सेवानिवृत्त होतीलच. त्यामुळे त्यांच्यानंतर महापालिकेसाठी सक्षम आयुक्त द्या, अशी मागणी आपण मुख्यमंत्र्यांकडे करावी. आयुक्तांवरील अविश्वास ठराव मोहिमेमागे कोण आहे, याची माहिती मी पक्षप्रमुखांना दिली आहे. अतुल सावे यांनी पाच रस्त्यांच्या कामासाठी शासनाकडून २४ कोटींचा निधी मिळवला. मी त्यापेक्षा जास्त पैसा केंद्र आणि राज्य सरकारकडून रस्त्यांच्या कामासाठी आणेन. केंद्रात माझे वजन किती आहे, हे दोन दिवसांपूर्वी सर्वांच्या लक्षात आलेच आहे. (जिल्हा दक्षता व संनियंत्रण समितीचे अध्यक्षपद खेचल्याचा संदर्भ) मुख्यमंत्र्यांशीही माझे चांगले संबंध आहेत. तेव्हा ते शहरासाठी जास्तीचा निधी देतील.'
आमदार सावे म्हणाले, 'खासदार खैरे यांनी रस्ते विकासासाठी दिल्लीतून निधी आणावा. काल अमावस्येमुळे रस्त्याच्या कामाचा शुभारंभ केला नाही. अमावस्येदिवशी काम सुरू केले तर, भूत मागे लागते असे खैरे यांनीच आम्हाला सांगितले आहे,' असा उल्लेख करून त्यांनी मीना गायके यांनी केलेल्या कामाच्या उदघाटनावर टीका केली.
नगरसेवकांना ताकद द्या!
'खासदार चंद्रकांत खैरे यांनी कामचुकार अधिकाऱ्यांना पाठीशी घालण्यापेक्षा नगरसेवकांना ताकद द्यावी,' अशा शब्दांत महापालिका सभागृहनेते राजेंद्र जंजाळ यांनी खैरेंना घरचा आहेर दिला. 'आयुक्तांविरोधात अविश्वास ठराव आणू नका, असे आदेश अद्याप आम्हाला पक्षप्रमुखांकडून किंवा अन्य वरिष्ठ नेत्यांकडून आले नाहीत,' असे त्यांनी स्पष्ट केले. महापालिका आयुक्तांविरोधात अविश्वास ठराव आणणाऱ्या सूत्रधाराची माहिती आपण पक्षप्रमुख उद्धव ठाकरे यांना दिली आहे,' असा इशारा खैरे यांनी दिला होता. यावर प्रत्युत्तर देताना जंजाळ म्हणाले, 'आयुक्तांवरील अविश्वास प्रस्ताव तयार केला असून त्यावर भाजप, शिवसेना, शहर विकास आघाडीतील नगरसेवकांच्या स्वाक्षऱ्या आहेत. एमआयएम नगरसेवकांच्या स्वाक्षऱ्या लवकरच होतील. बहुमताने आयुक्तांवरचा अविश्वास ठराव मंजूर होईल. आम्ही महापालिकेचे विश्वस्त आहोत. आम्हाला जनतेत जावे लागते. त्यामुळे खैरे यांनी कामचुकार अधिकाऱ्यांना पाठीशी घालण्यापेक्षा आपल्या नगरसेवकांना बळ दिले पाहिजे. निवडणुकीचा विचार केला तर, आता खैरे यांचीच निवडणूक प्रथम होईल. त्यामुळे त्यांनी जास्तीत जास्त खासदार निधी शहराच्या विकासासाठी आणून विकास कामे करावी. आयुक्तांच्या अविश्वास प्रस्तावाचा विषय प्रतिष्ठेचा करू नये. पालिकेत घेण्यात आलेल्या रॉडिंग मशीनच्या चौकशीची मागणी आपण केली आहे. आयुक्तांनी यावर चौकशी समितीही नियुक्त केली, पण सखाराम पानझडे जोपर्यंत शहर अभियंता पदावर आहेत, तो पर्यंत या प्रकरणाची चौकशी होणार नाही. त्यामुळे त्यांना निलंबित करावे किंवा चौकशी पूर्ण होईपर्यंत सक्तीच्या रजेवर पाठवावे,' असे जंजाळ म्हणाले.
मोबाइल अॅप डाउनलोड करा आणि राहा अपडेट
